好味指數😋😋😋 回頭指數 ⭐️⭐️⭐️ 開心指數🤗🤗🤗 去大埔，好多時都會諗起去熟食中心搵食，呢度有兩間食上海麵嘅店，我去嘅時候只有呢間開咗，見有位就坐低。 佢嘅餐單好簡單，得一個餐牌仲要大大隻字，嘢飲都係隔離檔做。 🍴雞翼上海雲吞粗麵（$46） 雞翼有4隻分碟外上，唔會浸到腍，外皮夠香脆，肉質嫩滑，味道唔錯。上海雲吞都係4粒，味道比較淡，感覺係食咗一粒有肉有菜嘅嘢而已，粗麵外表有D 似烏冬，不過煮得太腍，湯底冇重點冇咩味。 🍴豬扒墨魚丸幼麵（$46） 豬扒同雞翼一樣係分碟上，我估醃料可能同雞翼差唔多，因為個味相差唔大，豬扒大大塊，外脆內鬆軟，好味！墨魚丸唔覺有咩特別，幼麵有鹼水味。 嘢食方面基本上份量多但只算正常發揮，只係去大埔唔知食咩好又成日聽到「大埔名物」而去食，彷彿係大眾潛意識情意結多過食物質素本身，當然價錢上嚟講唔算貴嘅，下次可能去試吓另外店lu～ ☆My IG @tracyloveliving ☆

好味指數😋😋😋😋😋
回頭指數 ⭐️⭐️⭐️⭐️⭐️
開心指數🤗🤗🤗🤗🤗

同朋友響尖沙咀搵食，朋友話想食日本嘢，大家一齊諗起厚福街，去到睇吓，朋友話想試呢間，上到樓見到平日夜晚已經接近滿座，walk-in 得返吧檯有4個位，當然照入座啦，坐低冇耐隔離兩個位都坐埋人，跟住要等位lu~

🍴炸澤蟹（$58）
坐吧檯有個好處就係見到魚生有幾新鮮，跟住我發現檯面有一盒爬吓爬吓嘅蟹仔，問吓師傅係用嚟整咩，原來係原隻炸，睇返餐牌 $58唔係好貴就試吓！廚師響盒度夾蟹仔出嚟即炸，上檯時熱辣辣，蟹仔外面灑咗少少鹽，咬落去好香脆，有蟹肉嘅鮮味，呢個好啱飲生啤嘅小食！🍴上錦繡刺身（$348）
有8款刺身，每款兩件，刺生好厚切，除咗正常嘅油甘魚、牡丹蝦、三文魚、帶子、北寄貝、八爪魚之外，比較特別嘅係螢光魷魚同埋黑鯛，螢光魷魚係用醬汁煮咗嘅，鮮甜帶少少海水味，所有刺身都好新鮮，掂呀！🍴日本蘋果沙律（$78）
上面有一座蟹籽山，撈埋一齊食，清爽酸甜嘅蘋果加埋卜卜脆嘅蟹籽，口感豐富，食完勁開胃呀！🍴甲羅燒（$98）
平常嘅甲羅燒係配鵪鶉蛋，呢度係配大大隻日本雞蛋黃，撈埋之後，放上多士食，口感好creamy，蟹膏味好濃郁，非常邪惡😂🍴味噌煮牛舌（$68）
我自己好鍾意食牛舌，呢個份量多之餘仲係好厚切，店員俾咗碗仔我哋，我先試吓個湯底，味噌味好濃，好飲（最後俾我飲晒🤣）！牛舌淋得嚟有少少咬口，正！🍴什錦天婦羅（$98）
有3隻蝦同埋4款蔬菜，天婦羅嘅外皮夠脆身亦都唔厚，蝦夠新鮮彈牙，唔錯～整體上食物質素好好，刺身夠新鮮，叫咗6樣嘢都係好食，我覺得最得意嘅係炸澤蟹小食，我自己係第一次見，唔怪得呢度平日夜晚都坐滿晒，想試嘅最好訂位，呢間成為咗我尖沙咀食日本嘢嘅頭5位選擇！

好味指數😋😋😋😋
回頭指數 ⭐️⭐️⭐️⭐️
開心指數🤗🤗🤗🤗

同屋企人響附近搵食，見到呢間沙嗲王叫白咖哩公司，上網睇原來係沙嗲王嘅副線，話係簡約文青風，由於我自己已經有好耐冇食沙嗲王，所以叫我講返有咩款式係原本冇嘅，我都講唔出，只係依我記憶沙嗲王係冇椰菜花粒粒嘅選擇。

🍴慢煮牛肉椒麻麻婆豆腐鐵窩配飯（$78）
嚟到時望到勁大窩，好多粒粒豆腐，賣相都唔錯，食落個味好好，椒麻味非常惹味，配飯食好正！食到有牛肉味，亦都食到有少少肉碎，但食多幾啖，開始有少少懷疑人生，唔通個慢煮牛肉就係肉碎？（因為佢有冇慢煮牛肉嘅 version 係$69）終於忍唔住問店員，原來係佢落漏咗慢煮牛肉！😅 跟住姐姐去攞咗一碗仔牛肉出嚟，直接倒上我食咗幾啖窩嘢上面，感覺有D 攪笑～ 雖然成個過程係攪笑到一個點，但其實係好食嘅～







🍴白咖哩香茅豬扒椰菜花粒粒（$78）
呢度嘅白咖哩香茅豬扒係最出色嘅，今次食依舊好味，依家可以揀配椰菜花粒粒，雖然貴少少，但非常迎合呢個時代步伐，尤其好多人都想減澱粉質或者生酮飲食，真係幾唔錯！



🍴白咖哩湯香茅豬扒米線（$65）
白咖哩香茅豬扒係出色，今次試埋佢嘅白咖哩湯，白咖哩湯底味道不變，幾濃郁，真心好味～



🍴白咖哩慢煮牛肉椰菜花粒粒（$65）
因為個白咖哩汁好味，其實配咩都一樣掂，好味！



呢度仲有加配飲品小食，基本係跟凍或熱烏龍茶，揀其他嘢飲補差價，烏龍茶係正常，我哋試咗3款小食。

🍴飲品 + 越南春卷（+$14）
有兩條，炸得好香脆，唔錯！

🍴飲品 + 白咖哩海皇焗蟹蓋（+$14）
蟹蓋嘅料係普通嘢，白咖哩應該都係同一個汁，正常！

🍴飲品 + 蒜香烤餅（$12）
蒜香烤餅有兩件，基本上加埋係半塊，蒜香味有，唔算太濃，都幾香脆，配白咖哩汁一齊食係唔錯～



整體上食物質素唔錯，環境係坐得幾舒服，價錢上同沙嗲王差唔多亦都多咗選擇，呢條副線出得唔錯，雖然過程中發生攪笑事，但係可以回頭再食嘅選擇～

好味指數😋😋😋😋
回頭指數 ⭐️⭐️⭐️
開心指數🤗🤗🤗

其實蘇媽蘇媽我食過深水埗、旺角同荃灣分店，當中以荃灣係做得最差。同朋友 gathering，佢揀咗食沙田嗰間。上網搵 Treasure of Semua Semua（TOSS 蘇媽蘇媽）同 Kedai Kopi Semua Semua（蘇媽蘇媽馬來西亞餐室）有咩分別，唔算太搵到，只係響 社交平台 呢間沙田嘅 TOSS 專頁中搵到店家回應客人講TOSS係新品牌（但又冇講分嘢係咩），升級咗肉骨茶嘅質素同埋冇添飲。

睇返個餐牌，食物 item 比起深水埗原店係多咗，但同時價錢都貴咗！例如大雜錦肉骨茶，就係$198 同$148，椰汁斑蘭冰係$48 同$38嘅分別，大概係貴咗30% 左右。

🍴大雜錦肉骨茶（$198）
呢款肉骨茶係有幾款唔同嘅肉，再有冬菇、豆卜、腐皮、油條等配料，店方面講個肉骨茶升級咗，同埋冇得添飲，其實我自己冇覺得wow升級完好飲咗好多，somehow 我覺得同原本嘅冇咩明顯升級，我彷彿覺得係變相加價 only～🍴奶油大蝦（$188）
呢個我記得原店冇嘅，大蝦有4隻，配有油餅，蝦都幾大隻新鮮，肉質爽口，個汁好 creamy 好味，幾好食！🍴四大天王（$92）
有四款蔬菜，包括豆角、秋葵、茄子同臭豆，呢個嚟到時熱辣辣，鹹香之餘帶少少辣味，非常惹味，但同時都算係頗油膩，鍾意食濃味嘅人應該幾鍾意，有碗白飯會仲正！🍴檳城炒棵條（$118）
呢款其實有丁丁鹹咗少少，棵條炒到一條條，冇痴埋一堆，手藝火喉唔錯嘅～🍴海南鴛鴦燒麵包（$52）
邪惡系列，椰香咖央加鮮油，冇得輸！🍴燒豬頸肉（$92）
份量正常，醬汁都係用返沙嗲汁，外層未算太焦糖化，唔太有燒嘅風味，正常發揮。🍴馬拉沙嗲串燒6串（$98）
豬、牛、雞各2串，燒得有丁丁乾身，燒過龍咗D~ 🍴怡保肥仔芽菜（$76）
正常發揮。🍴椰汁班蘭冰（$48）
我自己好鍾意班蘭蛋糕，所以呢個係我每次食蘇媽都會叫嘅，好飲！

🍴美綠暴龍（$48）
朋友飲，唔知咩味🍴桔仔話梅水 - 熱（$42）
朋友飲，唔知咩味

整體上嘢食係唔錯，但總係覺得深水埗嗰間係最好食，至於 TOSS 同原身嗰間嘅分別，我以食客角度，係裝修風格唔一樣，唔會搭檯，可以訂位，肉骨茶冇得無限添飲，款式多咗，價錢貴咗，不過我自己都係鍾情深水埗店。

好味指數😋😋😋😋 回頭指數 ⭐️⭐️⭐️⭐️ 開心指數🤗🤗🤗🤗 泰國新年潑水節啱啱完咗，冇飛泰國嘅我都想食個泰國菜開心吓，今次揀咗呢間網上評價唔錯嘅小店同朋友嚟試吓～呢幾年深水埗文青風格咖啡店一直漫延到太子，呢間小店嘅外觀都幾似咖啡店。 🍴脆炸雞翼 香茅（$68） 係單骨雞翼嘅做法，食得比較方便，外皮炸到好香脆，配有乾蔥絲，唔點醬汁都已經好惹味！ 🍴泰式酸辣鳳爪沙律（$78） 無骨鳳爪爽口，一丁點細骨都搵唔到，沙律汁酸辣味啱啱好，好多蝦乾仔，食完好開胃！ 🍴傣式燒豬頸肉飯（$88） 呢款係一人晚餐，跟餐飲，另外可以加錢跟小食。豬頸肉份量多，燒到外皮脆帶有少少甜味，肉質爽口，個辣汁好惹味，我用埋嚟撈飯，好味！ 🍴酥炸蝦餅（跟餐 +$28/2件） 香脆夠彈牙～ 🍴泰式奶茶（跟餐 +$8） 奶茶好滑，茶味香濃，好飲。 🍴Singha 生啤（$38 半 pint） 呢個係朋友飲，係泰國皇室認可御用啤酒品牌，試飲咗一啖，口感比較滑同清爽，唔似一般啤酒咁苦～ 小店嘅食物質素唔錯，坐得舒服，食得好開心～ ☆My IG @tracyloveliving ☆

好味指數😋😋😋
回頭指數 ⭐️⭐️⭐️
開心指數🤗🤗🤗🤗

從來都唔知道科大入面有酒店，有屋企人響大學做教職員，因為收到宣傳電郵提前 book 位有7折，問我同家中長老復活節入唔入去食 lunch semi-buffet，我覺得假期同老人家入去行吓都唔錯丫，就去試吓。

坐巴士去到科大南閘，其實呢邊我都冇去過，以前只係去火雞正門嗰邊。落咗巴士後要行15分鐘左右，去到一座會議大樓就係，外表真係完全睇唔出係酒店😅 呢間酒店係由 L' hotel group 營運。



主菜有6款，除咗我哋叫嘅款式，仲有三款係意粉、春雞同牛肋骨，叫咗主菜就可以出去自助區攞嘢食。



🍴燒加拿大豚肉扒配柚子汁（$218）
呢個係煮得最好，厚切豚肉扒熟度啱啱好，中間有少少 pink，肉質爽得嚟有肉汁，柚子汁酸酸甜甜解油膩感，好味！



🍴澳洲穀飼牛柳配燒汁（$228）
牛柳叫咗5成熟，切開後比5成熟多咗丁丁，不過仲係好軟腍有咬口，外皮有焦糖化嘅脆口感，肉質都唔錯～



🍴香煎三文魚柳配蒔蘿香草汁（$208）
呢個係有少少失望嘅，放上檯一刻已經知道煎耐咗，切開時果然魚肉已經好乾，要靠個 creamy 嘅汁救一救。



三款主菜嘅配菜都係一樣，配唔同嘅汁有唔同風味，其實三款汁嘅味道都唔嘅～ 我見到其他檯叫牛肋骨，大大份睇落唔錯呢～

自助區分咗5個部分：
1️⃣沙律區
有3款新鮮蔬菜 + 12款配料 + 4款沙律汁可以自製沙律，另外有3款已調好味嘅沙律。已調味嘅沙律係會換款，用料係普通嘢，味道okay，自製沙律係正常嘢，都算多選擇。
Cold cut 有3款，另外有煙三文魚同4款芝士，呢幾類食物都好一般，尤其4款芝士，勁硬，好似放咗好耐，cracker 係腍嘅～




2️⃣湯、小食及麵包
中湯係粉葛豬骨湯，西湯係野菌忌廉湯，兩款湯味道唔濃郁，稀稀哋，中湯相對比較好飲。
小食有炸春卷同咖哩角兩款，炸得香脆，唔錯。
麵包有4款，隔離仲有個滾動式多士爐可以整熱食，不過我冇試。



3️⃣甜品區
生果有菠蘿、西瓜、蜜瓜。
Chocolate fountain 配有棉花糖同生果串。
蛋糕有藍莓芝士蛋糕、tiramisu、madeleines，另外可能係復活節關係，有一個芒果 mousse cake 配可敲碎嘅紅蘿蔔造型朱古力，蛋糕當中以藍莓芝士蛋糕最好食，其他正常。
亦都可能係復活節關係，有多款朱古力、糖果同兔仔造型棉花糖。
最後有4款 häagen-dazs雪糕杯。






4️⃣ 喇沙
有廚師即場製作，可以揀米線或米粉，另外配有蝦、大魚旦、豆腐卜同菜，可能因為大學入面又唔算太忙，我哋想叫一碗 share 試吓，我哋問可唔可以雙拼米線 ＆ 米粉，配料每樣俾3件，廚師好開心答可以！湯粉配料唔錯，蝦肉爽口，魚旦彈牙，湯底比較淡。


5️⃣ 飲品
近門口位有橙汁特飲，另有咖啡機製作唔同種類咖啡，亦都有熱紅茶同新鮮檸檬，冰同糖漿，可以自製凍飲。咖啡唔好飲，覺得咖啡豆一般，我決定用半個雲呢拿häagen-dazs雪糕整 affogato 食～



整體上自助區嘅食物款式都幾多，亦都有職員睇住進度換一碟新嘅，質素唔算出色但尚算正常，主菜方面除咗三文魚差D 外，另外兩款都幾好食。檯與檯之間有寬闊距離，坐得好舒服，加上人流唔多，自助區唔會好多人攞嘢食，亦都 keep 得好乾淨，食得好舒服～ 景觀方面因為外面大興土木，唔太算靚景。用餐時間相當充裕，可以食到2:30pm，因為唔需要加一服務費，7折後每人都係$150多D，雖然自助區唔算出色，但可以任食4款häagen-dazs 雪糕，以價錢同環境舒適度嚟講，絕對對得起個價錢！

好味指數😋😋😋😋
回頭指數 ⭐️⭐️⭐️⭐️
開心指數🤗🤗🤗🤗

去西貢通常都係因為遊船河或者食海鮮，之前同朋友響西貢市閒逛時，路經一間唔算特別起眼嘅烘焙店，見舖頭細細但入面有唔少人，就入去睇吓！店員好熱情招待，我見店內有兩個座位，櫥窗嘅鮮果撻好吸引，有少少想試，但我又住得遠，冇奶油攞住一個撻返屋企，就問吓可唔可以坐低食個撻，店員笑住話梗係可以，我就買一個試吓！

🍴鮮果撻（$50）
店員問我要唔要切開一半，當然好啦！估唔到一間細細嘅烘焙店買個撻都好用心咁將個撻切好放上木板俾我！一咬落去，撻皮牛油味好香又非常鬆化，吉士唔算好甜，好味！店員主動問我好唔好食，我答好好食，佢笑得好開心，原來佢唔係店員係老闆娘 ，佢話我知原來法國佬係真法國人，佢除咗係烘焙師之外，仲係朱古力師、甜品師仲做咗西廚幾年，將唔同技巧放入烘焙產品中，店入面嘅烘焙產品由麵糰開始都係親手製作，店內有製作機器，咁啱法國佬響度整緊麵糰。而且佢仲攞過美國 Miami 長棍獎（即係整長法包嘅獎）！既然係攞獎嘅法包，梗係要試！佢有原味同黑麥芽味，我揀咗冇試過嘅黑麥芽味！🍴黑麥芽長棍（$28）
因為我要帶走，我問老闆娘可唔可以幫我切開一半，佢幫我切好用紙袋裝住，仲好有儀式感咁貼咗一個貼子。我試咗3款方式食，先試就咁食，因為返到屋企已經凍晒，個皮煙韌得嚟唔會好似其他法包咁硬身，唔可以用嚟卜頭😂，麵包厚實得嚟又鬆軟，唔會食完好似一陣風咁冇咗。黑麥芽味道有丁丁酸味同帶少少苦甘味，而且麥味較濃，係我鍾意嘅味道。跟住用光波爐輕輕焗一焗，外皮變得脆，搽牛油食一流。最後試埋夾腸仔番茄芝士焗熱食，都係好好食，果然攞獎係有原因。老闆娘仲話俾我知，劉青雲都好鍾意食呢款黑麥芽長棍，隔幾日就會嚟買，可能下次去買時會見到影帝呢～ 食緊撻嘅期間，有好多客人出出入入，又有行山常客，話嚟親西貢都嚟買嘢食，如果大家去開西貢，可以去試吓呢間小店。

好味指數😋😋😋😋
回頭指數 ⭐️⭐️⭐️⭐️
開心指數🤗🤗🤗🤗

同朋友食生日飯，搵咗呢間響荃灣，網上評價唔錯嘅日式料理小店試吓！

🍴鮟鱇魚肝（$128）
我從來都冇食過有 "海中鵝肝" 美稱嘅鮟鱇魚肝，就叫嚟試吓！魚肝係厚切，放入口時質感真係好似鵝肝，口感綿密細滑，入口即化，油脂柔嫩香醇，好肥美，加埋酸酸哋嘅醬汁，好味！🍴西班牙蠔（$49）
大大隻嘅蠔，肉質非常肥厚，質地係好軟滑 creamy，海水味比較淡，配埋燒汁同蔥花一齊食，正！$49一隻好抵食！🍴蜜柑鯛薄切（$98）
一碟有8片，師傅刀功唔錯，上碟後係可以透出碟嘅花紋，魚肉晶瑩剔透。上網睇吓，原來蜜柑鯛嘅飼料入面，係加入咗蜜柑皮，唔怪得咬落去會有淡淡嘅 citrus 味，我仲以為叫蜜柑鯛係佢本身已帶有呢種味😅～加咗帶酸味嘅醬汁食鮮味更出，我個人建議先試唔加醬汁，之後再加，就兩種味道都試到！🍴上十貫目（$218）
最吸引我眼球嘅梗係海膽軍艦，海膽份量冇留手，鮮甜好味！密柑鯛壽司可以試到另一種口感，魚肉原來係好清爽帶少少咬口，同薄切時嘅口感好唔一樣！油甘魚有淡淡甘甜，魚油味好香。劍魚腩口感柔軟，脂肪相對多，好鮮甜。帶子、三文魚、北寄貝、甜蝦都好新鮮㗎～🍴燒鱈魚干（$35）
去居酒屋成日會叫雞泡魚干食，鱈魚干就真係未食過～原來係一片片頗大片嘅，咬落去係勁脆（差D 想錄音俾大家聽😂），會有微量魚油滲出，魚油味好香，就咁食已經好好味，加埋蛋黃醬食就會再惹味D！🍴鹽燒牛舌串（$45）
牛舌厚切，好爽口，唔會燒到好乾，好味～

🍴鹽燒黑豚腩串（$36）
黑豚肉彈牙爽口，油脂夾層不得了，勁香～

另外再叫咗🍴雞腎串（$28）🍴燒玉子（$28）🍴雞軟骨串（$18）
正常發揮。整體上食物質素唔錯，魚生夠新鮮，我自己覺得唔可以錯過鮟鱇魚肝同埋西班牙蠔，係值得一試嘅小店。

好味指數😋😋😋😋😋
回頭指數 ⭐️⭐️⭐️⭐️
開心指數🤗🤗🤗🤗🤗

約朋友響荃灣食飯，大家都想食石燒牛扒，好快就會諗起荃灣廣場附近個名一個字嗰間，諗諗吓，嗰度可能因為太多人識又多人等，次次都要趕住食，職員態度又唔好，唔係好想去～ 上網再搵吓，見到呢間都係響附近，評價唔錯又未試過，決定去試吓。

佢嘅石燒牛扒有7款，200g 開波，套餐 +$32 可以響罐裝汽水、湯、沙律、薯條、飯入面揀3款，都幾抵食！我同朋友每人一杯飲品，湯、沙律、薯條、飯各一，就可以試晒啦～



🍴橫隔膜腹肉（$198/200g）
上菜係一大條牛扒，比較厚身，外面已經燒過，自己切開再響熱石上面輕輕再燒兩邊就食得，我自己比較鍾意食原始味道，就算有3款醬汁我都冇用，只係落岩鹽已經夠。肉有好靚嘅油花紋，咬落去好鬆軟有少少咬口，肉味非常香濃，帶有少少油花甘香味，掂！





🍴極上牛小排（$228/200g)
上菜都係已經燒咗表面，已切件，相對橫隔膜腹肉薄少少，中間有一條較粗嘅油花，呢款燒嘅時間再可以縮短，嫩滑多汁，牛味香濃，好味！雖然唔夠橫隔膜腹肉嘅味道咁濃，但係如果對於想食牛味香又不至於太濃嘅人嚟講，呢款係好選擇～



🍴香煎鵝肝配迷你多士（$88）
鵝肝有兩大片，煎到外脆內軟，個醬汁好好味，配埋脆多士，正！



🍴明太子雞翼2隻（$38）
雞翼每隻分咗兩件，食得好方便，雞翼炸到好香口，明太子一D 都唔留手，好味～



🍴湯（跟餐）
打開蓋後有少少驚喜，開頭以為係好 hea嘅湯，點知佢個樣好濃咁，入面有一粒牛肉同埋三色椒番茄薯仔洋蔥，一飲落去，嘩！係勁濃郁嘅羅宋湯，帶少少辣味，勁有驚喜咁好飲！



🍴薯條（跟餐）
粗薯條內脆內軟，正！



🍴升級大碗紫菜飯配日本溫泉蛋（跟餐+$12）
一下篤落去溫泉蛋，爆蛋漿好開心，紫菜飯好大碗，夠晒兩個人 share！



🍴沙律（跟餐）🍴水蜜桃梳打（跟餐 +$15）🍴菠蘿梳打（跟餐 +$15）
正常發揮





整體上食物質素非常好，亦都感受到服務非常有heart！未夠夜晚七點已經差唔多坐滿晒，係一間會想再嚟食嘅小店！

好味指數😋😋😋😋😋
回頭指數 ⭐️⭐️⭐️⭐️
開心指數🤗🤗🤗🤗

用朋友行屯門市中心，朋友心思思想食韓式炸雞，搵到呢間店，因為未夠6點時間尚早，見到廚師響門面傾偈，聽到佢哋講韓文，朋友即刻話食呢間。

店有一D 位響商場，朋友笑話食炸雞要落手食再舔埋手指先開心，而坐嘅位係路過都會睇到食相，都係叫外賣食得自在D！🍴辣椒蛋黃醬炸雞 （有骨/$185/隻）
炸雞每間店都有 common 嘅常見口味，依家好多時我都會試店嘅獨有風味，今次見到呢個味就試吓！呢個味係微辣，加埋微酸帶甜嘅蛋黃醬（係肥死人但我又鍾意食😂），少少刺激又唔會太激，正！炸雞外皮脆，雞肉嫩滑，雞肉本身都有味，唔會只係個外表有味入面冇味，呢個掂呀！🍴炸冬粉海苔卷（$55）
外皮有炸粉加埋紫菜好香口，入面煙煙韌韌，係唔錯嘅小食！🍴牛肉紫菜飯卷（$55）
另外見到佢有好多款飯卷，諗緊食微辣烤豬肉定係牛肉好呢？諗諗吓隻雞已經辣辣哋，個飯卷都係叫唔辣，最後揀咗牛肉。韓式飯卷最好嘅地方係餸多飯比較薄，牛肉份量都唔少，鬆軟入味，配埋紅蘿蔔絲、青瓜、雞蛋，最後點綴嘅白芝麻粒都好緊要，加埋好好味～ 整體上叫咗3款嘅嘢都好好食，等緊外賣時已經見到不斷有人嚟落單，因為即叫即整，好彩早少少，等咗10分鐘鬆D 就可以攞！外賣袋係勁靚又 bling bling嘅金色袋，我同朋友都有少少驚訝，完全唔似攞住外賣袋，雖然沿路行緊嘅時候不斷嗅到炸雞味🤪 開出嚟個炸雞盒都好精緻，而且炸雞仲係熱同香脆，朋友話應該金色袋入面嘅銀色層係有保溫作用，唔係單單一個 fancy 嘅袋呢～