今天和朋友到深水涉行街， 經過附近見到有間港式鐵板餐的，名叫馬德里餐廳。它在深水埗福榮街120-122號地舖，深水埗地鐵站D出口，行過來就到。 門口紅色的中英文招牌十分亮眼! 內裏裝修簡約，光猛醒神。 檯椅擺設整潔，有長梳發，地方很寬敞，坐得舒適! 餐廳除了主打鐵板餐外，還有炒粉麵飯等；我們都是食鐵板餐：包含主食、沙律、餐湯、牛油餐包、甜品和飲品。 *羅宋湯、忌廉湯和牛油餐包 羅宋湯有椰菜、紅蘿蔔和西芹等，鮮茄味濃。 忌廉湯內有蘑菇和洋蔥，奶味濃和夠杰，配上鮮牛油餐包，特別好吃的! *日式芝麻醬田園沙律 材料：新鮮沙律菜、蕃茄仔、粟米粒和提子乾。 淋上日式芝麻醬, 味道清新開胃。 *法式蒜香薯蓉焗田螺 有4大份，田螺肉很鮮味，配上薯蓉夾好好味! *懷舊鐵板西冷牛扒配薯菜 當牛扒餐上檯時，店員會拿着兩款的醬汁：燒汁或黑椒汁可以選。 當淋上醬汁時，便會發出渣渣聲， 黑椒汁味的白煙就會升起，兒時的感覺返哂來! 西冷牛扒很大件，肉質帶些筋，有咬口和鮮味! 仲配上薯條和脆肉瓜，超正! *蜜椒德國鹹豬手配薯菜 鹹豬手大大隻，皮燒得好香脆，肉就嫩滑，好有鹹香味，沾上黃芥末最岩! 配菜有沙律菜和薯條，好食! 奶茶、檸檬茶、雜果啫喱 雜果啫喱加上花奶，超美味。 喝杯餐後茶完美了! 這間懷舊港式鐵板餐的餐廳食物質量高，鐵板餐相當抵食，仲冇加一。 價錢咁親民，真的要多多捧場!

餐廳分咗有由最低嘅$588以上嘅套餐，我哋今日就揀咗兩個唔同嘅套餐，再加左一支清酒，整體用餐嘅經驗唔錯，非常愉快，而且店員同埋師傅都非常客氣，令到成個用餐經驗更加提升！ 💡沙律，餐廳用咗意大利黑醋再加埋新鮮嘅生菜，令到成個沙律更加酸酸地，作為頭盤嚟講，我覺得非常好，因為可以令到成件事更加開胃，份量亦都適中，擺盤幾靚。 💡時令海鮮，我哋叫咗兩個套餐，所以可以揀四個唔同嘅海鮮，每一個套餐可以揀嘅海鮮都唔同，我哋就share一齊食，然後我哋揀咗四個海鮮，包括有扇貝帶子虎蝦同埋鮑魚。佢哋嘅做法每一個都不一樣，非常特別，虎蝦就每一個特別嘅蝦膏sauce, 本身海鮮亦都非常新鮮，非常爽口彈牙，而且煮嘅時間啱啱好，絕對唔會有太熟嘅情況出現，我同朋友都非常鍾意，鮑魚就用咗蒜蓉汁，餐廳用嘅鮑魚都係新鮮鮑魚，非常爽口，而且有彈性，蒜蓉汁同埋鮑魚嘅配搭上都幾夾，扇貝就用咗牛油同埋黑松露醬，感覺上非常高級，味道食起上嚟都唔錯，而且扇貝非常厚身，加埋牛油嘅香味簡直就係match! 日本元貝好大粒，加上意大利嘅黃瓜，口感又係別有一番風味，味道嘅配搭上都幾好，海鮮嚟講，冇諗過呢一間餐廳可以做得咁出色，整體唔錯 💡宮崎黑豚扒，廚師喺控制烹調時間做得好好，絕對唔會有好鞋或者好硬嘅情況，而且本身宮崎黑豚扒嘅質素都非常高，所以口感上都幾好食，鍾意食豬嘅朋友唔可以錯過 💡澳洲牛柳粒，味道都非常好食，加埋餐廳自家製嘅蒜片，配搭起上嚟都幾好食，而且牛柳非常靚仔，我哋要咗3成，所以中間呈現嘅顏色都好靚，係粉紅色，食得出師傅喺烹調時候嘅技巧！

今日去咗旺角呢一間舖頭，主要係食壽喜燒，牛肉嘅質素真係非常好，我會形容CP值真係好高，而且店員非常客氣，為我哋介紹唔同食物，我覺得鍾意食壽喜燒嘅朋友絕對唔可以錯過，同埋餐廳嘅位置喺旺角其實都非常方便喺地鐵站行過去都只係幾分鐘嘅路程，近百老匯戲院，食完仲可以喺附近行街shopping添 🙌🏻餐廳嘅壽喜燒汁非常特別，係加埋佢自家製嘅棉花糖在家壽喜燒醬汁，去做呢一個湯底，首先店員會每一件牛肉咁樣為你即刻整，非常貼心，牛肉係來自鹿兒島嘅高級A5和牛，每一個套餐有六件，基本上就係每人3件，其實我諗淨係食牛肉都飽，牛肉賣相基本上非常靚仔，而且有證書，即刻忍唔住拎電話出嚟同朋友打咭，餐廳亦都會提供高質嘅日本雞蛋，牛肉喺煮熟之後可以點雞蛋，口感更加滑，而且湯底本身甜甜同雞蛋嘅味道非常夾，牛肉嘅油花非常平均入口即溶，食得出非常高級，冇諗過一個價錢都可以食到呢一個質素，我哋食完牛肉之後店員就幫我哋落埋本身嘅配料，呢一個套餐配料都好多，有芋絲，腐皮，豆腐，菜，冬菇，金菇，亦都有我最鍾意嘅蟹柳，我哋等大概5至6分鐘後就有得食，基本上所有配料都非常好食，因為可以吸到湯底本身嘅牛肉精華，非常入味，食完之後仲可以落埋烏冬，簡直就係捧住個肚走！ 🙌🏻最後仲有柚子雪糕，好refreshing, 酸酸甜甜非常正！我同朋友都非常鍾意！

今日嚟到呢間喺銅鑼灣居酒屋，位置都幾方便距離地鐵站都好近，位於係sogo附近，地鐵站行過去大概3分鐘路程，非常方便！ 🎌明太子雞翼，一嚟到賣相都幾靚，熱辣辣而且咬落去非常足料，就係平時我哋係居酒屋食到嘅明太子雞翼嘅質素，非常高質，一咬落去嘅時候明太子嘅味道沖晒出嚟，我同朋友非常鍾意！ 🎌壽司，玉子壽司上邊會有舖頭嘅名，非常特別，而且係自家製嘅玉子燒，有非常濃郁嘅蛋香，甜甜地非常好食，喺日本傳統嘅味道！腐皮壽司都係甜甜地，而且加埋手握嘅白飯好好食，帶子壽司亦都非常推薦，大大粒日本嘅元貝，非常鮮甜，而且再加埋沙律醬同埋黑松露醬嘅配搭，令到成個口感上嘅味道更加昇華，帶子亦都非常厚切，呢個價錢嚟講性價比都幾高，鍾意食帶子嘅朋友不可以錯過！三文魚腩壽司都唔錯，非常充滿油香，而且食得出係新鮮嘅三文魚腩，味道唔會有雪藏味，最後要推薦一下，赤蝦壽司，赤蝦嘅口感非常厚實，而且食落去有少少甘蝦，亦都食到本身蝦既鮮甜味，整體上壽司嘅質素都非常高，食得出壽司係師傅手握，而且刺身嘅質素都非常高 🎌生蠔，入口非常creamy，再加埋少少明太子香蔥同埋酸酸地嘅醬汁，入口非常好食，本身再想encore，味道亦都非常開胃，作為前菜，擺盤亦都非常靚，我同朋友都忍唔住攞電話出嚟打卡！ 總括嚟講餐廳都幾好食，而且新開，所有裝修到非常新淨，下次去開銅鑼灣都會再返嚟幫襯！

💡腐乳通菜$27，份量正常，加埋餐廳特別配製嘅腐乳醬，令到成個通菜更加好食，通菜本身都非常爽口，整體嚟講都幾好食，唔差！ 💡麻辣孖寶，有我最鍾意食嘅牛柏葉，同埋豬耳，豬耳就非常爽脆，牛柏葉再加埋本身麻麻哋嘅味道非常好食，好入味，作為前菜嚟講非常開胃，辣辣地真係好惹味，而且份量嚟講都唔算太少，呢個價錢都真係差唔多，我覺得都算抵食！ 💡車仔麵，我哋就揀咗每人三個餸，牛筋非常好食，特別推介大家叫，做得非常入味，而且咬落口滑滑哋，幾鍾意呢個質感，豬皮亦都非常入味，吸收晒湯底嘅精華，而且本身調味都做得唔錯，作為配料嚟講非常好食，蘿蔔亦都炆得好林，非常入味，食車仔麵嚟講點少得叫蘿蔔，蘿蔔做得非常出色，keep到本身嘅水準，之前喺尖沙咀嘅分店食過，都覺得唔錯，呢一間分店，大致上嘅水準，我覺得都做得唔差，而且粉麵嘅軟硬度，我亦都覺得適中，唔會好似有一啲車仔麵，做得太過軟，整體嚟講我都覺得唔錯，保持到一貫嘅水準！ 💡抹茶紅豆冰，大大杯，非常適合夏天熱辣辣嘅時間飲，亦都非常有綠茶味，綠茶加埋紅豆配搭不嬲都係非常夾，味道條配亦都唔會太甜，非常適合一路食車仔麵一路飲，鍾意飲抹茶嘅朋友絕對唔可以錯過！

今日同朋友嚟呢一間食潮州嘢嘅餐廳，位於灣仔，佢嘅位置都尚算方便，唔會太難搵，難得收工約埋班朋友食潮州嘢，點可以唔試吓呢度嘅鵝片，鵝片嚟講我哋都覺得幾好食，本身個滷水汁非常出色，而且鵝片送酒一流, 豆腐亦都非常入味，鍾意食潮州滷水嘢嘅朋友絕對唔可以錯過呢一個鵝片，另外我哋叫咗糖醋煎伊面，都非常好食，出邊好少可以做到呢一個水準，而且脆博博熱辣辣，味道都做得唔錯，下次會再返嚟幫襯，絕對係可以聚會嘅好地方！

餐廳位於尖沙咀北京道1號嘅高層，地鐵站行過去都非常方便，而且唔會好遠，大概係5分鐘嘅路程，餐廳主要係食意大利嘢為主，今日我哋就食完嘢先去，去咗飲Cocktail，好彩今日個天都冇乜雲，成個景都非常靚，店員亦都好貼心咁問我哋鍾意啲乜嘢base既酒，我哋一杯揀咗伏特加一杯揀咗gin, 兩杯都非常好飲，酒味唔會好濃，適合食完飯之後小酌一杯，而且overall 環境都非常舒適，去埋個景都幾靚，有機會會再返嚟幫襯！

呢間喺灣仔嘅餐廳位置喺修頓球場附近，如果地鐵站過去嘅話大概喺C出口，行3分鐘嘅話會到達，餐廳分兩個部份，左邊係可以俾你外賣，直接購買肉類，或者其他餐廳嘅物品，右邊係餐廳可以堂食，客人可以出去睇吓有啲咩心儀嘅肉類，先再叫 我哋就叫咗rib eye, 覺得肉味都幾濃，而且咬落去都冇根，喺控制生熟方面都做得幾好，切開嘅時候都係粉紅色，非常靚仔，另外叫咗一份德國腸，反而就覺得冇乜特別，餐廳整體嘅價錢都唔平，不過環境同埋味道都可以，大家可以衡量一下

今日同朋友去中環做運動同兌換日元，做完之後就去食晚飯，行過巴士站見到個廣告，寫住錦麗終於返嚟港島喇，錦麗係越南餐廳，之前我喺東涌行山後食過一次，記得好食好抵食，竟然喺香港島都有分店，有好嘢食我哋當然有興趣即刻去食啦。錦麗上環餐廳位於上環干諾道中168-200號順德中心3樓322-323號舖，港鐵上環站D出口，行幾分鐘就到，十分方便。 餐廳個位置非常好，喺出境搭船嘅門口對面，我見好多客人去搭船之前，或者搭完船返嚟之後，都嚟呢度食嘢，餐廳內裝修好新淨，天花有竹製的燈罩，又有越南的斗笠，亦有越南女人嘅衣着牆畫，好有越南特色，地方寬敞光猛整潔，有卡位同梳化位，座位都坐得很舒服， 職員服務態度都好，亦用QR code落單方便快捷，來這裏食真係唔錯。 我上次喺東涌食係食午餐，今次嚟上環就係食晚餐，晚餐原來係有晚市套餐，有一人煮意同風味二人套餐，價錢都唔貴，一人煮意可任選越南煮食一款、風味小食一款、風味飲品一杯，而風味二人套餐可任選越南煮食兩款、特色小食拼盤、風味飲品兩杯，亦都可以追加小食同甜品，我哋一於選二人套餐，越南煮食我就叫咗正宗越南牛骨湯粉嘅火車頭河粉，我朋友就揀咗越式蟹肉餅番茄湯檬粉，風味飲品就叫咗椰汁紅豆冰同埋椰汁三色冰，亦追加左個小食蔬菜春卷和甜品椰青椰汁糕。 首接下來是主食，是火車頭河粉，正宗越南牛骨湯，先飲一啖相當香濃鮮甜，再配上安格斯牛小排、牛筋、扎肉、熱牛肉及牛丸，牛小排、熟牛肉好鮮嫩，牛筋大大塊好淋滑，牛丸超彈牙多汁，扎肉大大塊，有黑胡椒香濃味，令人口感豐富，河粉煮得剛好，不會太淋，好配合個湯，非常好味。越式蟹肉餅番茄湯檬粉，好足料，有豆卜，蟹肉餅，蔥同芽菜，蟹肉餅好吃，好有蟹味，檬粉好有粉絲口感，湯底以番茄、蟹肉、蟹膏製成，蕃茄加海鮮味湯底，真令人好開胃。 而特色小食拼盤，裡面有金絲網蝦春卷、法式蒜蓉牛油雞翼、香茅豬扒同越式蔗蝦，份量十分豐富，成個小食拼盤非常搶眼， 顏色靚味道正。 越式蔗蝦肉爽鮮甜彈牙， 有蔗嘅甜味，金絲網蝦春卷炸到超脆，蝦肉鮮嫩， 蒜蓉牛油雞翼皮脆肉嫩， 蒜香味濃 ，香茅豬扒大大塊，炸得啱啱好，金黃多汁，連同追加小食蔬菜春卷，點埋甜酸辣醬，同埋酸蘿蔔絲一齊食，令每樣小食都食得更出色。 最後梗係要食甜品， 兩舊心形嘅椰汁糕 ，清香爽甜 ，尤其是椰青糕多啲，食到椰子肉，淋上椰奶，整體不錯不會太甜，椰青好清香，真係好食。飲品嘅椰汁紅豆冰同椰汁三色冰都有大大粒紅豆，而椰汁三色冰仲有綠豆同綠色的珍多條，十分足料，兩杯飲品都飲到好清香嘅椰汁味，令人口感豐富，香甜解渴，好夾食越式嘅食品。 錦麗好值得推薦俾大家，食得好滋味，又好抵食，價錢又唔貴，我哋下次會再來試食其他食品。

之前喺網上面買咗啲麥當勞優惠券，就用嚟食下午茶，今次嚟到依家喺灣仔嘅麥當勞，距離地鐵站好近，地鐵站行過去喺天橋，我諗大概都係3分鐘，非常適合快餐。 脆辣雞腿包熱辣辣即叫即做、因為我叫咗走菜嘅關係，餐廳都好好，咁幫我走咗，炸雞同佢本身個沙律醬都真係好match，食落口炸雞亦都唔會太油膩，呢間麥當勞都合格，而且佢嘅薯條唔係擺放咗好耐，都非常挺身，唔會好似有啲麥當勞嘅薯條咁好林，所以整體上呢間麥當勞都合格，檸檬茶就不過不失，冇乜太大特別