高質高級韓國菜🇰🇷，就算星期一晚都Full House 😳 人氣不容忽視！ 環境都係走高級路線，食物價格港島區價格，但份量都合理。 前菜 有我鍾意食嘅魚板！ 韓式生牛肉 $215 韓式生牛肉伴以蒽、蒜、松子等，撈匀後再配脆炸紫菜，加上凍口感，食落軟綿，牛味適中，超好食😋 炸青陽辣椒釀豬肉 $86 炸青陽辣椒釀豬肉做法特別！有啲似香港嘅煎釀三寶咁，最外層裹咗麵一層薄薄麵包糠，青陽辣椒微辣釀埋豬肉碎，開胃小食。 海膽紫菜包飯 $380 海膽紫菜包飯同為必點，雖然價格稍高，但係海膽之下係仲有生牛肉！2款都係貴價食材，海膽鮮甜再配生牛肉，雙重滑溜。 八爪魚牛肋骨 $245 八爪魚牛肋骨都有驚喜，店員即時幫你剪八爪魚腳，牛肋骨有成4大件，每件快都炆到入哂味，肉好容易就離骨，但又唔會炆老哂，依然保持到質感。 元祖蒜頭辣燉雞鍋 $385 元祖蒜頭辣燉雞鍋好大鍋，相信係有一隻雞嘅份量，雞件上枱煮12分鐘撈匀就食得，愛蒜之人必定鍾意，好重蒜香，反之唔太辣，但油份都相對較重，適合佐飯食，配料仲有菌類、年糕、薯仔，如果加個麵底入去夠哂邪惡👿 Lime Soda $48 & See You $108 Lime Soda 相對較抵飲，想幾大杯，See You 就係西柚為主調嘅Cocktails，都適合襯返濃味菜式。

少女可愛風平價韓式餐廳，之前見啲店員戴住頂柑橘造型帽已經引起我注意😂 依家轉咗戴水蜜桃🍑，比佢吸引去打下卡。 環境十分打卡！原來價錢唔貴，份量又多，一大班人食好啱！ 泡菜牛肉炒飯 $85 泡菜牛肉炒飯以舖平方式上枱，唔好以為份量少，都唔止一碗飯嘅份量，飯底夠入味，唔會太濕癡埋一堆，牛肉係肥牛，都有成4,5塊，$85真係抵食。 山蓟菜大蜆意粉 $92 山蓟菜係韓國特產，食落比較清淡，用白汁配大蜆意粉，相對上冇咁膩咁。 BBQ辣炒豬肋排 $125 BBQ辣炒豬肋排粗略估計都有成10塊，而且每塊厚身，豬肋排都以瘦肉為主，啱哂我口味，每件質感實在無燥腥味。 濟洲柑橘無骨炸雞 $108(半份) 揀咗特別啲嘅濟洲柑橘🍊口味無骨炸雞，炸粉薄，肉質有驚喜😳十分嫩滑，濟洲柑橘醬係淋上炸雞面，非醃入肉，但反而咁保留同食到肉嫩。 柑橘布甸 $48 柑橘布甸有2粒原粒柑橘係入面。 白桃飛舞冰雪乳酪 $58 及 咸咸地奶油維也納咖啡 $56 白桃飛舞冰雪乳酪神還原poster個樣，口味較甜。咸咸地奶油維也納咖啡啱唔飲齋啡嘅人～

正宗希臘菜，超有氣氛，入座率高，而且大多都係外國人～～ 好半山區，好有氣氛～ 無Dinner set ，都係單點。 Halloumi Cheese on the Grill $150 Halloumi Cheese on the Grill係用100%羊奶unripened brined cheese，但一啲都唔騷，外型似雞胸，食落去少少煙靭，奶味唔重，一改對芝士嘅觀感！ Grilled Souvlaki $195 Grilled Souvlaki 即係烤串，可以係雞、豬、牛和羊之中四選二，我哋揀咗雞及羊，肉串大串，燒得香口，仲配Pita Bread同埋薯條。 Grilled Octopus $200 Grilled Octopus成條八爪魚腳，都頗為彈牙，用嚟送酒一流。 Galaktoboureko $110 Galaktoboureko 係希臘特色甜品，必點！熱食，其實係千層牛奶玉米糕，外皮Phyllo做酥皮，內餡主要用牛奶、粗粒小麥粉，表面再淋檸檬糖漿同開心果碎，外層趣，內裏玉米糕嘅口感，超好食❤️

氣氛超好嘅水產店，彷彿置身係居酒屋，每枱都各自勁開心咁傾偈，飲酒吹水聖地～ 勁多選擇，其實都係居酒屋？ 海膽杯 $168 先嚟個海膽杯，叫之前都唔知原來係咁打卡，仙氣上枱，上層有海膽、帆立貝、三文魚籽及吞拿魚蓉，下層就有澤蟹、柚子蘿蔔漬。先食上層嘅魚生類，再食下層，由淡至濃，好Fresh🙌🏻 香蔥鮪魚腩蓉壽司 $68 香蔥鮪魚腩蓉壽司唔洗點咬，欣賞飯身係微暖，做到標準壽司應有温度！ 鮭魚親子丼 $168 鮭魚親子丼有三文魚及三文魚籽，份量都係海量級，淋上微甜壽司醬油，簡單美味。 蚧味噌甲羅燒 $68/隻 必點蚧味噌甲羅燒😍蒽、蟹籽、鵪鶉蛋加埋蟹肉蟹膏，口感真係好creamy，味道濃郁，食一隻份量剛好，尖沙咀食$68/隻真係性價比高。 牡蠣$78/隻 燒物仲叫咗牡蠣🦪，大大一隻，燒嘅過程中店員都會不停調味，但又唔會蓋咗本身蠔嘅鮮味。 鰻魚玉子燒$108 唔想食淨玉子咁Dry，可以叫鰻魚玉子燒，蛋味濃，同時食到鰻魚口感及魚油香。 松葉蟹海膽釜飯 $238 最後以松葉蟹海膽釜飯作結，店員會幫你拌好，本身覺得將松葉蟹海膽整熟好似有啲浪費咁，但撈匀之後，飯及松葉蟹都夠乾身，令其口感更實在，海膽就變相融入飯中。 柚子啤酒 $68 大大杯！

出哂名嘅雞翼放題Wingman，22款口味‼️上次食任食，今次試下嗌Set，都係咁正😆 店舖唔大，好旺場，建議最好book位先！ 有放題有單點，仲做抽獎！ 雞 全部都係雞 $398 包24隻雞翼（4款口味）+2個配菜。雞翼口味揀咗蒙古燒烤、加勒比海香辣雞（限定口味）、WINGMAN水牛城醬及自家製鹹蛋黃。蒙古燒烤屬乾身口味，店家用自家調配孜然粉及四川花椒，唔太辣但好香口；加勒比海香辣雞屬濕身口味，醬汁包裹住成隻雞翼，以加勒比海為靈感，上面放咗菠蘿及蔥嘅煙燻醬，配搭特別但唔覺得怪！加上辣辣地嘅醬汁，幾得意。食雞翼又點可以唔食Buffalo ，有分水牛城醬 /WINGMAN水牛城醬，分別在於後者係自家製辣醬配巴馬臣芝士脆片，多咗芝士嘅鹹香中和辣度。Special口味自家製鹹蛋黃，鹹度適中唔油膩。 2個配菜就揀咗黑松露芝士忌廉汁通粉及烤蒜龍蒿大啡菇。Mac N Cheese 唔好睇碗細細咁，原來份量勁人😨 芝士份量恰到好處。呢一個烤蒜龍蒿大啡菇蒜蓉海量咁多，大啡菇juicy。 Lemon Daiquiri $85 / Wingman’s Guest Tap $60 食雞翼點可以唔送啤酒，Lemon Daiquiri微酸果汁，好易入口！

鬧市嘅平價鐵板燒，有Set有餐，散叫最平人均$600內食五道菜Omakase~~ Primer Omakase 入門廚師發板套餐 $588 包括：沙律、鐵板海鮮兩品、鐵板肉類一品、炒飯、時日甜品。 醉樂無極大吟釀 $180 食日本菜又點可以唔飲sake！呢款米酒香較出。 沙律 沙律係三文魚卷配上黑魚子伴龍珠果及蕃茄仔，最底有意大利黑醋點綴，清新簡單嘅前菜。 鐵板海鮮兩品 有四款可選，分別是南非鮑魚、北海道扇貝 、東星斑及帶子，我哋就各一。伴碟有蝶豆花泡泡，比較特別，估計海鮮非新鮮，但無雪藏後解凍嘅問題，如南非鮑魚配秘製蒜蓉、北海道扇貝以牛油烹調、煎香東星斑及帶子配意大利黃瓜，配搭都可以調返出海鮮嘅鮮味。 鐵板肉類一品 是日供應得秋田雞扒及宮城縣豬扒，並無牛可選擇，有啲失望。秋田雞扒正常水平，但宮城縣豬扒肉質略為有點粗糙。 炒飯 較為出色，上色入味，粒粒分明。 甜品紫薯雪糕配店家邊製嘅分子料理爆珠紅豆。

今日嚟到旺角，其中一個最熱門嘅商場，TOP地庫食sha bu sha bu，一人一煲。餐廳有提供唔同價位嘅菜單選擇，主要係牛肉嘅產地有小小唔同。 澳洲和牛牛小排，嚴選和牛胸腹眼($368/人) 若果點咗呢個任食套餐餐廳方面都會送嚐味頭盤一碟，裏面分別有(鮑魚兩隻，廣島蠔兩隻，牛舌同埋牛胸複眼)，餐廳同時間亦都有做優惠，follow返餐廳社交平台可以免費升級+$10湯底😬 今日其中一款湯底，揀咗羊腩煲湯底，羊肉份量非常足料，亦都冇羊肉酥味，怕食羊嘅朋友唔使驚。另一半免費升級和風舞茸菇野菌湯，菇唔多，但可以自己係自助區拎再加入去，清甜之餘，意外地同牛肉一齊會愈煮愈濃稠，愈煮愈入味。 肉方面，叫得$368呢個餐，當然Encore最多就係澳洲和牛牛小排及嚴選和牛胸腹眼，餐廳都保持到每一轉肉嘅質素，唔會話第一轉係最靚，其他嗰啲就質素下降，牛肉油花都好平均。肉類共有15款，我地主要食和牛，其他款都無點😂海鮮方面質素都OK唔會食落去成浸雪味，本身係熟蝦，但都唔會話煮一陣就霉哂。另外仲有青口、水魷魚、蟹棒、午餐肉等等。落單方面餐廳採用比較傳統係人手落單，有別於而家其他任食火鍋餐廳。 其餘都係自助區拎，菜類都好新鮮，有豆苗、菜心、娃娃菜，我拎勁多豆苗，配菇湯啱哂，仲有平時任食火鍋必有嘅丸類、麵、菇類、粟米、冬瓜等。仲有少見嘅關東煮、小食、甜品，有窩夫機、刨冰機。 飲品方面餐廳都有提供汽水機同埋雪櫃自助飲品吧，亦都可以選擇加$48升級啤酒或者清酒任飲，美中不足嘅係落單嘅時候只可以二選一，魚與熊掌，不可兼得。

旺角都有好Feel天台Bar & Restaurant 😳 鬧市中嘅手工墨西哥料理 🇲🇽 餐廳有indoor 有outdoor ，幫朋友慶生，佢想坐出面，都好好Feel❤️有幅大壁畫。 都唔止得墨西哥菜，有Pizza, Pasta。 串燒拼盤 $78 串燒拼盤共有6串，分別3雞3豬，好抵食，本身都調好味，肉質唔老，做頭盤啱哂。 秘製燒墨魚 $108 必點秘製燒墨魚🦑超大一串，件件都大大粒，較重孜然粉調味，口感彈牙帶肉汁，仲有少少煙燻焦香。 Taco $208(Beef) 🌮 可選蘑菇/雞肉/牛肉，3款不同價錢，我哋揀咗牛肉，面頭舖滿牛油果醬、莎莎醬及酸忌廉，牛肉藏係裏面，一咬炸粟米餅超脆身，配酸酸甜甜嘅莎莎醬及酸忌廉好惹味，加上牛肉質感，足料嘅Taco，不過$208一份都略有少少貴。 燒烤雞肉手工Pizza $128 燒烤雞肉手工Pizza配料芫荽、洋蔥、橄欖，加上黑椒及燒烤汁，手工Pizza係薄脆身，雞肉粒均勻地舖滿每一小塊，芝士份量恰當唔會搶風頭，唔錯。 Maracuyá Fizz $78 & Fresco kiss $78 兩杯Mocktails，Maracuyá Fizz係Passion Fruit, Pineapple, Yuzu, Lemon & Soda，Fresco kiss Cucumber; Apple, Lime & Homemade Thyme Syrup，鍾意佢嘅Mocktails都唔太甜，味道清新，適合配較重口味嘅菜式。

上回講到同另一半8週年紀念食咗間韓燒，又點少得蛋糕？超綿滑芝士蛋糕🍰再唔係食海綿蛋糕嘅蛋糕😆 呢間蛋糕店本身有堂食位有啡飲，環境仲幾靚。 日式半熟芝士御果蛋糕【草莓果籃】 呢個系列共有4款味道，分別係草莓果籃、香印物語、鮮果御園及無花果伯爵，我就揀咗草莓，成個蛋糕草莓🍓同芝士🧀嘅俗量可謂不相伯仲，用料超足。芝士部分店家係用咗特別調配的配方，令到芝士係烘焙過程中都能夠保持半熟嘅狀態，入口幼滑即融，配埋檸檬微香的芝士蛋糕，啖啖都口感綿密豐富，配埋草莓又多份清新嘅感覺❤️

唔經唔覺同另一半8年啦又係搵好西慶祝嘅時候，今次去食韓國菜🇰🇷 即席係面前切韓牛😍超高質韓燒體驗，限定星期六日先有得供應‼️ 韓牛精割品味體驗 $720/person 包括韓國酒、韓式前菜、5款稀少韓牛部位、韓式小食拼盤、韓牛脂飯祭+$38 蜂蜜雪糕。 每人包一杯韓國酒，是日韓國酒3選1，有柚子酒、梅燒酒及紅米막걸리酒，我地揀咗梅燒酒及紅米막걸리酒，第一次飲紅米막걸리酒，酒精味唔濃好易入口。 韓式前菜有芽菜、泡菜、菠菜、辣蘿蔔及海藻，正宗做法可以Refill😆泡菜唔係只得辣味，帶獨特嘅酸甜味，前菜用黎配肉、飯食又得。至於拼盤係帶子及八爪魚，醬汁酸酸甜甜開胃。 到主角韓牛登場😍 5款分別為板腱肉、翼板肉、肩胛里肌（黄瓜條）、特級牛小排及沙巴當，司傅即席係你面前切，而店員就會從旁講解每款肉嘅特點，之後仲會幫客人燒，每款肉都係建議點芝麻鹽，喜歡食辣就可點柚子辣醬。 順次序由脂肪最少嘅食起：板腱肉因脂肪低，食起上來最有咬口，但唔會有渣，風味濃厚；翼板肉位於牛肩位置，口感就腍啲；肩胛里肌又稱黄瓜條，位於肩胛肉裡接近頭部的部位，5款之中我最鍾意呢款，油脂比例適中，肉汁豐富，啖啖都係肉汁；特級牛小排就取自前五花肉的第一至第六條肋骨，可見油花比較豐滿，食起上來帶點肥肉質感，怕膩可以配生菜同配菜夾埋一齊食；沙巴當位於牛肩胛部的下部，接近肋骨的部分，比牛小排油花更豐富，個豐富得來夠均勻緊密，油脂的甘甜。一次食到5款唔同韓牛，超滿足😌 仲有韓牛脂飯Bibimbap，韓牛脂唔係肥肉，同樣口感十足，起哂飯焦，我自己鍾意撈埋柚子辣醬同配菜一齊食更惹味。 最後仲加咗$38 食蜂蜜雪糕🍦，絕對要加！雪糕軟身得來有質感又smooth ，奶味濃厚，配蜂巢，簡單好味！ 套餐仲送韓國餐具！又好食又有嘢拎，呢餐超滿足😌