聘珍樓 (已結業)

呢晚老友大喜之日，延開二十席於聘珍樓擺酒，掟他高興﹗難得一大班成年不見的朋友相聚一堂，在酒精的引導下叫嚷嬉戲在所難免，成晚傳來吹吹頂頂三公密實之聲﹗第一味是乳豬仔，隻豬真係好細隻，皮薄夠脆口但唔太入味，得個脆字﹗再來沙律蝦球，蝦肉夠爽又彈牙，味道微酸我幾鍾意呢個餸﹗及後仲有帶子蝦餅，帶子吃得出清甜，蝦餅個賣相的的骰骰幾精緻，不過又係無咩味咁﹗蟹皇翅夠足料，啖啖蟹肉，翅身針未夠厚卻分明，誠意之作‧魚我就唔食不過見老友食埋我0個碟連骨連頭都食埋，應該夠哂新鮮了吧﹗鮑魚細細隻，切落夠軟熟，咬落亦彈牙有嚼勁卻未見糖心，普普通通吧﹗最差係隻燒雞，個碟就大隻雞就細隻，無肉又乾皮又唔算脆，呢味野真係麻麻地﹗最後仲有炒飯同埋水餃麵，個炒飯反而做得幾好夠乾身，身旁的老友餓狼上身食左四碗。甜品係桂花糕加蓮蓉碟，不太甜我就最鍾意﹗整體上呢度0的食物都做得很精緻，不過真係無咩味，亦未見得係做到靚一靚可以食到原味。服務方面，待應都算係即叫即到，幫到手之餘仲好鬼玩得添，唔錯﹗老友大喜日子，那有不笑口之理呢？