影片
更多
2009-04-08
93 瀏覽
本文只論服務第一次去, 好彩朋友預先比左心理準備話坐得唔舒服同坐得唔耐, 否則相信會比D伙記嚇死.先講講食物, 抄蛋冇得傾, 實在好食得變態! 超滑, 夠味唔駛落salt, 香到暈, 份量多過其他茶記既茶餐好多. 再講服務, 一個字講晒:「冇」! 若你期望係劉華宣傳那種服務, 唔該唔好去. 若你想觀摩一下一個獨有的服務文化 - 「快! 狠! 準!」, 那實在要去見識見識! 1) 個場唔大得二十張枱都唔知有冇, 竟有樓面伙記超過十幾人, 差不多每人負責一點幾張枱. 咪以為人多就悠閒, 事實個個打仗咁, 踼晒腳, 亦踼晒手. 而因為個個著住茶記指定"制服", 一眼掃埋去成支軍隊咁, 何其壯觀, 咪講笑.2) 伙記行每步路都如踩雪屣, 呀! 對唔住, 唔係行, 係”飛”住咁穿插於原先已甚擠迫的通道, 但竟可全部冇撞到人冇倒瀉野, 又一武林絕技!3) 一入去會有一伙記在點零幾秒內飛到你面前, 用手勢同雄壯的聲線, 加上SDU行動時的方式指示你點做:「你四位! 埋邊! 你兩位! 呢度! 坐低! 你三位! O個邊! 你一位! 企響埋D等陣!」, 爭在未講埋「GO! GO! GO!」. 你收到命令
第一次去, 好彩朋友預先比左心理準備話坐得唔舒服同坐得唔耐, 否則相信會比D伙記嚇死.
先講講食物, 抄蛋冇得傾, 實在好食得變態! 超滑, 夠味唔駛落salt, 香到暈, 份量多過其他茶記既茶餐好多.
再講服務, 一個字講晒:「冇」! 若你期望係劉華宣傳那種服務, 唔該唔好去.
若你想觀摩一下一個獨有的服務文化 - 「快! 狠! 準!」, 那實在要去見識見識!
1) 個場唔大得二十張枱都唔知有冇, 竟有樓面伙記超過十幾人, 差不多每人負責一點幾張枱. 咪以為人多就悠閒, 事實個個打仗咁, 踼晒腳, 亦踼晒手. 而因為個個著住茶記指定"制服", 一眼掃埋去成支軍隊咁, 何其壯觀, 咪講笑.
2) 伙記行每步路都如踩雪屣, 呀! 對唔住, 唔係行, 係”飛”住咁穿插於原先已甚擠迫的通道, 但竟可全部冇撞到人冇倒瀉野, 又一武林絕技!
3) 一入去會有一伙記在點零幾秒內飛到你面前, 用手勢同雄壯的聲線, 加上SDU行動時的方式指示你點做:「你四位! 埋邊! 你兩位! 呢度! 坐低! 你三位! O個邊! 你一位! 企響埋D等陣!」, 爭在未講埋「GO! GO! GO!」. 你收到命令請立即 ACTION, 否則我不擔保你將會受到點樣既面色或言語對待.
4) 屁股一坐下去不夠幾十秒, 你必須落單, 所以去前請熟讀餐牌, 或者簡單D講, 去到基本上係叫茶餐/快餐, 茶餐比快餐多左個叉燒湯意, 其他一樣!
我因第一次去, 拿著餐牌仍未訓醒研究緊之際, 好彩我隔離個朋友已經幫我落左單. 佢同個伙記不停用急口令模式對話時, 我實在聽唔切佢地 up 乜. 好! 請而家諗定, 茶餐裡:
- 要多士定白包?
- 要火腿抄蛋定火腿煎蛋?
- 要叉意定叉通?
- 飲咩只可揀普通啡, 奶茶, 檸水/茶 (唔好搞D咩檸樂, 檸賓… 等) 但唔好嗌住, 因枱面放不晒, 佢亦唔會幫你落住. 但食食吓佢一問你要即刻答到.
5) 落完單我問返朋友替我落左乜, 佢講返我知. 一講完, 咦!? D野食到左拿!? 冇錯, 全程5秒! 堅係5秒! 你咪以為佢D野整定晒響度先至咁快所以會唔熱, 錯晒! D野依然係熱! 死未?
6) 你可以食得慢, 但千祈唔好停晒手腳放低晒刀叉, 因佢會以為你食完即刻收你D野, 但老實處於一個行軍遣將槍林彈雨既環境你唔會有心情想慢慢食. 總之, 你要預你放低刀叉後幾秒至幾十秒內你身後/頭頂唔知邊度會有隻手插出黎收左你隻碟.
7) 食食下, 伙記A突然對全場大喝一句: 「抄牌呀!」伙記B隨即再重覆大喝一句: 「抄牌呀!」. 如是者, 伙記 C 同伙記D同伙記 E相繼大喝: 「抄牌呀!」. 係極度有組織性的警告呼籲, 好一班義蓋雲天的好兄弟! 佢地由帶位至落單等等一路粗豪、極速、兇狠、準確的態度, 實在沒法不令你聯想到電影「我在黑社會的日子」.
8) 食完一起身(都唔駛叫埋單), 伙記就會飛埋黎質張寫左銀碼既紙仔響你手 (吓, 佢幾時寫架? 真係快到睇唔到…). 你拿住張紙去門口收銀比錢, 搞掂! 我地由行入去到出返黎全程唔駛三十分鐘!
我真係好想知, 究竟點解班伙記可以咁神乎其技地快得咁交關? 無錯個場真係超級旺, 但人到底會攰既啫, 點解佢地連hea陣都唔會? 比著係我, 處身呢D環境一日, 相信已經精神崩潰. 我開始懷疑, 其實佢地係會收拆賬/有佣金/超級高人工, 否則真係好難個個落力到好似自已盤生意咁.
我知道網上有好多comments話頂唔順佢地D服務態度/覺得受氣, 其實我覺得, 這是因為大家去既時候有錯誤既expectation, 亦唔知佢地既文化. 其實只要去時配合到佢地「快」既文化, D伙記係唔會難為你的. 值唔值比人咁對待自己評估好難講, 但若當係觀摩香港一個獨有既文化, 就自然會一笑置之.
以下是八大不適合去澳洲牛奶公司的時候：
1) 心情唔好時唔好去
2) 想慢慢食傾下計時唔好去
3) 唔想搭枱或怕迫唔好去
4) 想要劉華服務唔好去
5) 頭腦唔清醒未訓醒九唔搭八時唔好去
6) 講野蚊滋咁細聲唔好去（落單佢未必聽到你講乜）
7) 不喜歡抄蛋和厚多士唔好去
8) 會嫌太嘈唔好去
張貼