聯記川王涼粉 (已搬遷) 新店位置

同得好友食家"乜都放入窿"食飯, 當然唔會係得一間食店咁少啦, 所以當師傅喺時新落單嘅同時, 好友食家亦喺隔離(即係呢間食店)柯打左另一樣食物, 皆因呢間人氣食店亦係好友食家"乜都放入窿"同師傅從未食過, 既然黎得呢度當然不能錯過, 所以大家都非常期待!由於事前已經商量, 所以好友食家"乜都放入窿"就柯打左麻辣牛舌涼粉(小辣)同埋麻辣豬耳薯粉(小辣)行街!先講下麻辣牛舌涼粉(小辣), 麻辣牛舌真係幾麻辣, 香香嘅辣味配上少少嘅麻味, 麻辣味道點到即止, 洽到好處, 好正; 而牛舌又夠腍夠鬆, 肉身唔鞋, 一d都唔韌, 掂呀; 涼粉就夠爽口而且夠滑身, 加上係凍吃, 感覺係辣中帶涼, 勁正; 而麻辣豬耳薯粉(小辣)係熱食, 麻辣味道依然搶口, 熱食亦份外覺得惹味, 至於豬耳切得細細片, 入口夠爽, 薯粉又係爽爽滑滑, 非常好味, 真係好味到停唔到口!總括黎講食物質素甚佳, 地方都係細, 環境係坐喺街邊, 不過價錢唔貴, 絕對抵食; 師傅同好友食家"乜都放入窿"一面食一面讚, 所以好肯定一定會再黎; 由於人氣食店嘅關係, 所以都幾多人, 加上又要等, 所以都幾冇癮, 好希望下次唔使等啦,