新廣發 (已結業)

約好朋友四個人夜晚7點去沙田新廣發打邊爐。我同另一朋友遲晒到，好在有朋友準時攞好位，唔使坐露天食埋西北風。淨食火鍋$59/位，任飲任食$69/位，火鍋湯底$45個；都係普遍食家嗰句，個湯底淡而無味近如開水。火鍋食物算多，有海蝦、炸魚皮、炸枝竹、水魷、粉腸、墨魚、芝士腸、豬腎、草鯇、脆肉鯇、花蟹、生腸、滑牛、牛佰葉、牛丸、魚蛋、賴尿蝦、生蠔、肥牛、蔬菜、烏冬、生筋.......睇落最少有40幾樣選擇......全部放在一長一短食物檯；自助飲品放在露天花叢旁汽水櫃，食完要自行到收銀處結賬。由於對象係屋邨街坊，任飲任食$69呢個價錢唔好太祈望有咩靚嘢食。我自己就食咗20幾隻熟蠔同半斤灼蝦，第二日早上肚屙兼要睇醫生；朋友選擇食物對象唔同，所以腸胃完全無事。服務質素非常一般，員工除女性外全部赤裸上身，半截底褲露出。