影片
更多
2010-06-23
131 瀏覽
環境： 好想比滿分。1) 餐廳分三層：第一層有三張四人枱，外面重有個好靚既井。第二層係一張大約坐十個人既長bar枱，加個open kitchen。第三層係比較有私人空間既三張枱（兩張四人 + 一張八人）。2) 老板好客氣地帶我地行哂三層。佢唔講真係唔知，原來地下有個六十年歷史既古井，重要有水架。3) 餐廳最唔好就係要行樓梯。嗰分真係非常之唔想扣，不過同行既人有返咁上下年紀同好鍾意飲酒，所以條樓梯真係好危險。不過因為係唐樓，所以冇辦法。第日如果葫同要開分店可以留意下依點。4) 我地訂左第三層既八人枱。八人枱有最低消費(HK$ 1,000)。請小心，座位冇椅背，飲多兩杯要小心起身。枱同枱間係用簾隔開，方便客人包場打通。5) 餐廳既裝修好靚，睇得出有比心思。因為有炭爐，所以係會好大煙同好熱。好欣賞老闆選擇左柔和既燈光去減低氣溫同避免左炭爐產生既煙霧瀰漫感。選用既燈好似枝電筒喺天花板吊落黎好特別。雖然個燈口係細，不過好光，佢既好處係唔會曬慶個客人。6) 三樓每張枱側都有部電視。普通係唔會開聲既，因為餐廳會播放音樂，不過如果客人有要求，佢地係會轉比你既。如果你唔鍾意重可以叫佢息左佢。7) 三樓雖
1) 餐廳分三層：第一層有三張四人枱，外面重有個好靚既井。第二層係一張大約坐十個人既長bar枱，加個open kitchen。第三層係比較有私人空間既三張枱（兩張四人 + 一張八人）。
2) 老板好客氣地帶我地行哂三層。佢唔講真係唔知，原來地下有個六十年歷史既古井，重要有水架。
3) 餐廳最唔好就係要行樓梯。嗰分真係非常之唔想扣，不過同行既人有返咁上下年紀同好鍾意飲酒，所以條樓梯真係好危險。不過因為係唐樓，所以冇辦法。第日如果葫同要開分店可以留意下依點。
4) 我地訂左第三層既八人枱。八人枱有最低消費(HK$ 1,000)。請小心，座位冇椅背，飲多兩杯要小心起身。枱同枱間係用簾隔開，方便客人包場打通。
5) 餐廳既裝修好靚，睇得出有比心思。因為有炭爐，所以係會好大煙同好熱。好欣賞老闆選擇左柔和既燈光去減低氣溫同避免左炭爐產生既煙霧瀰漫感。選用既燈好似枝電筒喺天花板吊落黎好特別。雖然個燈口係細，不過好光，佢既好處係唔會曬慶個客人。
6) 三樓每張枱側都有部電視。普通係唔會開聲既，因為餐廳會播放音樂，不過如果客人有要求，佢地係會轉比你既。如果你唔鍾意重可以叫佢息左佢。
7) 三樓雖然係tatami式，不過大家可以放心，唔洗跪既，因為枱低有位比對腳伸展。座位旁亦有空間比女士們放手袋。
8) 有個長期開既炭爐喺前面都冇乜出汗，證明冷氣夠，最啱我地咁怕熱既人。
服務：一流，真係冇野可以挑剔。爆哂燈。
1) 我地七個人其中三個身形比較大件，所以被安排到四人tatami枱時有少少微言（其實多過少少既，hehe…）。可能見我地未齊人都坐得真係有D困難，老板就好客氣，幫我地安排調去最大嗰張有兩個爐既八人枱到，真係好感動。我地調枱期間重幫我地搬哂所有野，包括我地d鞋。
2) 落單既時候好仔細介紹所有食物，有問別答，有求必應。
3) 因為我地好驚食物一窩蜂咁黎，所以千叮萬囑要慢慢上。佢完全做到我地既要求。張枱唔會好似韓式燒烤咁堆積如山。
4) 我地燒野食期間到咁上下佢會自動幫我地換網，保持網既温度同乾淨度，有時重會幫我地燒埋。
5) 我地飲酒既速度係幾驚人既，所以經常要加酒，換水，換冰。因為佢人手夠，所以絕對冇問題。我地唔洗叫，佢都會不時幫我地換埋碟。唔讚唔得。
6) 我地走既時候除左帶我地周圍參觀，重叫我地小心慢行，驚我地滑倒。佢地發自內心既誠懇同細心真係想加多佢幾分。好少見到後生仔女咁有禮貌，咁有耐性，同咁好笑容。
衛生：
1) 好乾淨企理。淨係睇佢成日換碟，換網都感覺到佢對衛生既要求高。
2) 佢選擇唔用餐巾係正確既，因為會好難清潔。佢擺放左兩盒紙巾比客人自己攞。紙巾好細張，而且係任用，我個人覺得比較唔環保，因為有好多人會好浪費。佢可以選擇用韓式既紙口水肩加一人一張大紙巾，其實都好方便。
味道：基本上滿分。
和風salad：菜夠新鮮。個秘汁好醒胃，食得出佢有芝麻味，醋味，重帶少少辣，好正。必吃推介一。
枝豆：$25。第一次食用其他調味料煮過既枝豆，食落都幾特別。枝豆本身甜，佢用黑椒炒過，好有鑊氣，味道唔錯，不妨叫一碟黎送下酒。必吃推介二。
葫同特製既帶子蟹膏刺身：$78/兩件。openrice 既食評們真係冇介紹錯。帶子好嫩滑好鮮甜，中間夾左好濃味既北海道蟹膏同wasabi，簡直係絕配，正到難以置信。（如果唔受得wasabi可以落單時叫佢唔好落。）必吃推介三。
不同燒物有不同醃料比大家選擇：椒鹽，燒烤醬，味噌醬（miso），蒜蓉。落單時老板已提醒味噌醬同蒜味兩款味道比較濃，所以如果客人怕，佢地係可以輕手d去醃。叫完餸，每人會有碟新鮮既青檸汁比大家點d燒物。枱上亦有BBQ汁比大家自己倒黎用。
厚切醬燒牛舌：$238/碟，每碟約十一塊。因為有心黎試葫同，所以打黎訂位既時候已經問定有咩食物要預訂，其中一樣係厚切醬燒牛舌。牛舌一早幫我地切好，一口一粒，肉質爽，BBQ味醃得咸甜適中。必吃推介四。
“逹拉斯”： $198/碟，每碟六塊。葫同特式牛扒，同厚切牛舌一樣要預訂。黎既時候已經幫我地切好，每份只有六塊。見到d肉咁靚咁marble都已經好滿意。咬落口發覺肉味濃且鮮甜，肉身嫩滑鬆軟多汁，爽呀。BBQ醃料唔會蓋過肉味，做得非常好。因各人口味不同，燒到幾熟自己控制，我自己就比較喜歡生D，個皮熟我就食，mmm… 好食到暈。必吃推介五。
一口雞翼：$48/碟，每碟約十一件。好少見食市既雞翼係咁少毛既，真係好意外（肯花時間去毛係另一個為衛生架分既原因），讚。皮光肉滑，好嫩口。個味道甜甜地又唔會太熱氣，而且容易煮到熟，所有女士都要encore。必吃推介六。
牛油去骨雞腿：$58碟。哥哥仔好細心地講解特別既燒法。先燒雞肉到六七成，跟住再溶左個錫紙dou既牛油黎煮到雞肉十成就食得（雞肉唔可以好似牛肉咁生生地就食）。雖然咁煮法會肥d，不過真係好香。個肉身同雞翼一樣咁嫩，不過佢地醃料唔同，連燒法都咁多種，真係帶比你不一樣既享受。必吃推介七。
鹽葱牛舌：$68/碟，每碟六塊。依個牛舌同厚切嗰個完全唔同食法。哥哥仔嘗試教我地煮，不過佢見我地個樣比較迷茫，所以提議幫我地燒。原來我地可以用陰力慢慢拉塊舖滿鹽葱芝麻既牛舌放喺塊網到燒。因為牛舌好薄，所以燒一邊就好快熟，認真皮薄餡靚。平時喺其他餐廳食薄燒牛肉卷d牛肉會好老同過熟，個餡又黐牙。葫同個鹽葱牛舌完全冇依d問題，牛舌本身好靚好薄，所以唔刃，好夠葱而且鹽既份量又唔會太咸所以好啱我地口味。必吃推介八。
燒烤醬牛五花：$78/碟。顏色肉紋都好靚。薄薄既牛五花唔需要燒太耐，不過每個人口味唔同，爸爸話煮耐d熱d重好食wor。我地所有人都覺得咬落口好軟熟，肉味濃郁且好juicy，所以又encore。必吃推介九。
味噌醬豬臉頰（面豬登）：豬臉頰肉身好嫩，不過味噌醬太濃，所以覺得比較咸。（有少少後悔冇聽佢意見叫佢落少d味噌醬，下次再去食會叫佢少醬或用第二種醬。）如果喺落單時老板冇提果我地，個味道分係會因為依味餸而比我減分。
蒜味上等豬五花：$68/碟。勁多蒜，成碟豬五花比蒜蓉覆蓋住，一路燒d蒜香撲埋鼻，正呀！不過大家如果唔係蒜頭既fans最好叫佢少蒜。豬五花本身冇牛五花咁多汁，不過一d 都唔乾，口感算軟熟，只不過採用蒜味就蓋過左本身既肉味。大家可以用椒鹽或燒烤醬試真d。
法式羊小排：$78/兩件。個人唔係好食羊，因為怕蘇。同行叫黎食既人就話好夠肉味，有羊本身應有既蘇味wor，用黎醃既香草又唔會太多，好味。
芝士蕃薯甜品：個人都唔係蕃薯愛好者，不過都覺得好特別。因為我地d炭都燒到七七八八，所以姐姐仔提議幫我地喺樓下燒埋。上到黎佢就幫我地打開個錫紙慢慢搞，然後用匙羹派比我地食。酸酸甜甜煙煙刃刃，第二到未必食到，必吃推介十。
色香味俱全之餘，最難得係五星級酒店好多時都比唔到你既優質服務，今餐食得真係好開心。
其他：
1) 開瓶費：不論大細，每枝$150。
2) 因為同行既人食完咁多肉想食返碗熱辣辣既麵，所以就問老板有冇，佢話下個星期開始先會有熱既烏冬，而家只係有冷麵食。
張貼
