潮福蒸氣石鍋 (已結業)

上回在潮福做冬，一時興起，又點鮑魚又點扇貝又點蝦…最後埋單每位$4xx…今次同樣一家四位，決心試試餐牌上其他食品，飽肚之餘埋單亦要平一點。潮福最特別就是以各種蒸料精華將生米煮成的粥底。三款粥底選擇之中，瑤柱鮮淮山粥($80/細)最清。淮山煲得很稔，口感像薯蓉、芋頭…上次點了蟲草蒸雞，粥底較油。今次的蒸料主要是海鮮和菜，粥底較清亦較鮮。今次唯一點選的活海鮮是龍蝦($98/隻)，對比其他海鮮，它是相當抵食。廚房先將龍蝦開邊，每人半隻。放在蒸架時，龍蝦的手腳仍然活動，其新鮮狀態令人對它充滿期待。八分鐘後專人來拿走竹罩，可看到豐富的『龍蝦膏』。龍蝦肉完全不粘殼，一㚒就能輕易起肉。肉質彈牙，上面滿鋪蒜茸，有提鮮之用。手剁鮮蝦丸($98/6粒)蝦肉被剁至起膠，混入少量蔥花搓圓而成。四分鐘蒸煮時間定得恰到好處。口感彈牙，沾一點豉油味道更鮮甜。順帶一提以下收費：茶芥醬油($12/位)、花生($10/碟)。蒸料的選擇方面，我個人會傾向保守，就是只選平時也以蒸的方式弄的食材，例如牛肉一定不選。海鮮、雞肉、蔬菜、糯米飯都安全。蒜茸肉蟹蒸糯米飯($198)需時十分鐘。蟹殼預先被夾開，肉汁滲透糯米飯，煙靭鮮甜。