影片
鴨脷洲大街有間士多專賣茶果、糕類(芝麻、紅綠豆)、糯米糍、馬拉糕😍仲有好多涼果、懷舊餅乾(水泡餅、瑪利餅、梳打餅、花生酥等)一包包一律$10❗️試咗「眉豆茶果」 價錢超親民🥹$4/個即日新鮮製，放起蒸籠入面細細個但重手，底部有塊荷葉茶果黏黏哋入口煙煙韌韌眉豆磨成蓉，味道鹹鹹地似端午節糭餡料😋不過略嫌餡料唔夠多，同茶果外皮唔成正比但呢個價錢質素絕對收貨啦！呢啲店起香港差唔多絕跡，路過一定要買返個支持吓！
繼續閱讀
呢間士多真係由細食到大詳細我都唔知佢有幾多年歷史呀不過佢有上過電視入面嘅佈置非常有歷史感你可以買到佢嘅舊式餅乾同埋一啲懷舊嘅小食我都有買過佢啲白糖糕砵仔糕紅豆餅而家都見少賣少啦如果黎開鴨脷洲不妨去下呢間舖頭幫襯下佢支持下呢啲小舖頭體驗下佢嘅風味
繼續閱讀
極少機會黎到呢區 機緣巧合之下經過呢間充滿懷舊味道嘅士多 必定要幫襯一下公眾假期 大約兩點幾都已經好多糕點賣晒 咁就一於幫襯下砵仔糕 多豆少甜 讚 兒時回憶返晒黎 係細細個嘅味道 滿足😌 另外買咗原味&朱古力味蛋卷作為手信😝 都只係💁🏻♀️$10/pack 性價比超高🤭其實仲有好多餅乾 涼果都想買 花多眼亂 下次再經過 一定會再幫襯🙌🏻返屋企試咗兩個口味嘅蛋卷 口感&味道我都鍾意 有幾層薄脆 有層次嘅脆感 特別好味 最鍾意佢少甜 一次過食晒成包都冇罪惡感😋🤤 原味蛋味濃啲 朱古力味反而椰味重啲 各有各好味🤭
繼續閱讀
每次黎鴨脷洲，必定要幫襯友和士多，事關呢度嘅懷舊糕點新鮮又好食。坐地鐵南港島線出利東站，A出口斜對面就到，非常方便。今日帶左阿媽黎，佢話一眼睇中茶果，3款餡係豆沙花生眉豆，要晒3款啦，$10有3個嘛。我就每次都要食豆沙西米糕，仲有漲卜卜嘅煎堆。兩隻為食貓出咗門口嗱嗱聲啪晒茶果同煎堆，真係食到lam lam脷！帶好口罩返入友和士多，阿媽話要買光酥餅同埋魚皮花生，梗係好，我都有份食嘛。我仲話最好買埋馬仔同南乳椒鹽餅乾，阿媽話我醒目。下次要帶老豆黎潮聖。
繼續閱讀
鴨脷洲大街名物---友和士多！行入友和士多，好似穿越返去舊陣時咁，佢地賣嘅懷舊糕點、零食、餅食，係傳統嘅味道！老闆俾我影張幾相珍藏，好開心！（本身呢度係唔准影相）今日遇正豆沙煎堆啱啱出爐，即刻排隊，排我前面嘅食客，都係幾個幾個咁買，真係好怕輪到我就賣晒，心裡面祈禱希望有得食，輪到我真係冇晒，點知前面大叔見我想喊，讓左一個俾我，多謝呀！豆沙煎堆實在太香口，外脆內帶少少煙韌，豆沙餡冇過甜，真係一絕，食一個係絕對唔夠喉，期待有機會再食。另外砵仔糕、西米糕、茶果、帶菜糕、眉豆花生糕...都係必食！不過眉豆茶果同帶菜糕賣晒，今次試下桂花杞子糕，好清甜喎，驚喜！最好行入d被巨型山楂餅、米通波波、花生糖吸引左，掃埋就滿足回家，下次再黎！
繼續閱讀