去咗公司附近嘅傑星冰廳午餐，冰室光猛乾淨，牆上掛有玩味字牌，懷舊中不失新意。 鹹牛肉滑蛋多士（$18 ，烘底加$1） 多士烘到金黃香脆，滑蛋炒得嫩滑有汁，配搭鹹香嘅鹹牛肉，所有材料熱騰騰，好好食！ 豬潤豬扒蕃茄湯烏冬($58) 豬潤同豬扒都係呢度嘅名物，點粉麵餐就可以一次過試晒！豬潤超級厚身，入口彈牙，生熟度控制得啱啱好，好正！豬扒不愧為招牌，表面煎香，同時肉質冇流失，入口依然保持嫩滑，份量都好多，抵食！蕃茄湯底就略嫌比較酸，如果再濃郁d就冇得輸啦！ 套餐奉送熱飲，加$12點咗紅豆冰消消暑。好耐冇飲過紅豆冰，超懷念！呢度嘅紅豆冰好有誠意，紅豆又多又軟綿，仲要粒粒都好飽滿，唔係紅豆蓉，飲落更加有口感！

好耐冇食kebab，呢個經過土耳其外賣小店Turkeyano，見到好多人排隊等外賣，就點咗一個lunch set試下。 Lunch set全部都包薯條及飲品。點咗羊肉卷餐($98)，+$15仲有一份玉米片炸雞塊，好抵！食物全部都即叫即整，羊肉片喺鐵板上即點即燒，好有穫氣，調味都好入味，個wrap包住生菜及醬料，足料又飽肚。如果係細食嘅女仔，甚至可以兩個人分享呢！ +$15的玉米片炸雞塊超級大份，完全冇將貨走價，非常值得加點！炸雞都係即點即炸，唔會有油益味，份量好多。 飲品可以揀檸檬茶或者汽水，好豐富嘅一個午餐！ 外籍店員嘅服務都好好，好有笑容！值得支持嘅一間小店！

來自台灣嘅TEA TOP 第一味！品牌源自台灣百年老店「長順茶行」，嚴選自家南投茶園嘅台灣茶葉 ，即使珍珠都係台灣直送，務求將台灣嘅味道帶來香港！可惜我呢日去珍珠售罄，無緣一試。青茶3Q($35)
人氣產品NO1，有珍珠、椰果及茶凍，珍珠售罄我就轉咗做芋圓。呢款茶味比較清爽，特別適合飯後解膩，口感都好有層次：芋圓細細粒，口感軟糯，椰果就晶瑩彈實，茶凍滑捋捋，增添茶香。108茶王鮮奶茶($34)
「108茶王」係「長順茶行」嘅自家烏龍茶，由台灣老師傅手工細火烘焙108小時而成，茶香餘韻十足，如果茶同奶嘅比例可以調整返，茶感再厚重突出D就更好啦！當代雙Q($32)
買咗呢杯俾姐姐飲，本身應該係珍珠加芋圓，雙倍Q彈，最後就揀咗茶凍加芋圓，同樣好有口感。呢款飲品奶味比較濃。

鐵板居酒屋Hungry Monkey登陸荃灣海之戀，一直都想搵機會試下，原來餐廳仲有一人鐵板餐，自私食都唔尷尬！鐵板餐價錢$88-$198不等，價錢唔貴，我揀咗精選鐵板定食，有齊沙律、前菜、主食、炒雜菜、鐵板炒飯、漬物、麵豉湯、飲品及甜品，好豐富。 沙律淋上黑醋汁，灑上粟米粒，清新味蕾。 前菜可以選擇炸鳳尾或熟帶子，揀咗帶子，都幾大隻，燒香後淋上燒汁，更加惹味！ 另外仲跟咗麵豉湯及胡麻豆腐，前菜好豐富。
主食我揀咗一夜干雞扒($88)，非常唔錯！雞扒好大塊，燒至外皮焦香脆，肉質依然保持嫩滑多汁，師傅亦細心地將雞扒切件，食起來更加方便，啱晒我呢D懶人！
炒飯喺鐵板上炒，鑊氣十足，材料唔多，主要係炸蒜及葱花，但味道都幾香口。 炒雜菜唔太大碟。 甜品有蕨餅及和菓子，甜度剛好。 見串燒價錢非常抵食，散點咗幾款試下，水準都唔錯，性價比高！
雞翼串($18/2隻）燒至表面炭香，內裡juicy嫩滑，可見師傅嘅功架！ 金菇牛肉卷($25），芝士翠肉瓜($12)，鴨胸($12) 唔會燒得過熟或過乾，水準保持到！

呢日喺太子附近返工，去咗始創中心後面嘅”東京街”食午餐。 餐廳門面充滿日式風情，好有特色！午餐款式好多，有刺身壽司之餘，亦有唔少熟食選擇，價錢亦都唔算貴，難怪午市吸引咗唔少人前來光顧！ 點咗蒲燒鰻魚丼飯定食（$78） 配麵豉湯、沙律、茶碗蒸 鰻魚好大塊，鋪滿成個飯，份量絕不欺場，肉質肥美厚身，啖啖肉，好滿足！配菜有粟米粒同沙律菜，增添口感。 茶碗蒸口感嫩滑，加咗蟹柳棒，味道更加豐富。 麵豉湯就比較淡，如果調味濃郁一啲就更好啦。

日本菜就食得多啦，日式素食真係好少見！最近去咗Kyoto Joe食素食半自助晚餐，頗有驚喜。其實好多好多年前都食過Kyoto Joe幾次，印象唔錯，所以呢次嚟試下日式素食都幾期待！素食放題（$530pp）無限量供應20款日式素食菜式，包括：前菜、爐端燒、炸物、卷物、熱食，另外仲可以選擇一款主菜。前菜：
綠天使他他
呢個模仿Kyoto Joe招牌菜式金槍魚他他，但其實係全蔬菜整成，味道微辣香口，同招牌菜相似度都幾高！同生菜一齊食會更加爽脆！呢個好食到encore咗幾次，哈哈！菠菜沙律、 海雲、 冷奴
呢幾款前菜都係平時日式料理常見嘅冷盤，清新開胃。爐端燒（青椒仔、豆腐、甜蕃薯、銀杏、素雞）
呢度嘅爐端燒水準唔錯，唔會燒得過乾或過熟。鍾意豆腐，燒至外脆內軟，好食！炸物：
椰菜花天婦羅
呢款天婦羅淋上甜酸醬汁，有D似食緊韓式炸雞。

蘋果天婦羅、紫蘇葉素雞天婦羅
炸漿好薄，包住香甜嘅蘋果都幾特別。卷物（墨西哥卷、雜菜天婦羅卷、辣味啦啦卷、山芋卷、秋葵卷、黑金卷）
呢幾款素食卷物幾配搭好有創意，調味都唔錯，推薦辣味啦啦卷，腐皮包住牛油果、蓮藕片、紅菜頭、銀杏，再加上香辣嘅醬汁，有食肉嘅感覺！熱盤：
素餃子
入面包咗素蝦及蔬菜，如果炸得脆口D就更好啦焗雜菌雜菜炒烏冬
烏冬煙靭彈性，炒至乾爽，落咗甜甜地嘅醬汁，好惹味。主菜揀咗煙燻魚刺身盛合(+$160)
店員喺面前打開盒子，立即煙霧彌漫，散發陣陣煙燻香氣。一共有4款刺身，每款都煙燻香入味，最鐘意帶子，厚切柔軟，味道鮮甜。不過要另外加錢性價比就稍低。同行朋友揀咗另一款主菜--西瓜扒。
原來係用西瓜扮成牛扒，好特別！雖然食落唔似牛扒，但亦都唔似食緊西瓜，個味道好特別，鹹鹹甜甜。

芭堤雅泰國餐館喺元朗已經開業10多年，喺元朗幾乎無人不曉。最近重新裝潢，搖身一變成為打卡嘅泰式Cafe，就拉埋老公一齊去試下。純白色嘅店面，竹藤狀嘅吊燈，加埋綠色植物嘅點綴，充滿小清新。餐廳有上下兩層，座位都算多。翻新後嘅芭堤雅泰國餐館人氣十足，假日座無虛席，好彩排隊唔算等太耐，大概等15min左右就可以入座啦！ 午市套餐好抵食，選擇都好多。 泰國海南雞喇沙湯粉($78) 呢個喇沙湯底好有驚喜，泰式香料味道突出，入口辣辣地，加入椰漿後味道香甜，集濃香辣於一身，好惹味！海南雞竟然係髀位，皮香肉嫩，完全唔嚡口，面頭再放上大量炸牛蒡，增添口感！ Pattaya地踎撈麵($72) 撈麵淋上泰式醬汁、擠少許青檸汁，味道清爽開胃！配搭脆炸五花腩、肉碎及炸牛蒡，多重口感。而我特別鍾意脆炸五花腩，炸到香脆，肉質爽口彈牙，好食！ 午市套餐可以另外加配小食： 黃金蝦餅(+$25) 蝦餅炸到脆卜卜，口感彈牙，真材實料。 紅咖喱魚餅(+$20) 魚餅充滿檸檬葉及紅咖哩香、混合豆角粒令口感更有層次。 套餐送飲品，揀咗蜂蜜香茅茶，味道清香。 老公揀咗比較少見嘅泰式綠奶茶(+$10)，奶香絲滑順口，茶味淡雅，不過甜度就稍高。 炭燒豬頸肉($88) 賣相勁靚！必點！豬頸肉燒得好香，邊邊位燒到脆口，肉質嫩滑又彈牙，蘸上泰式秘製醬汁更加惹味！ 奶茶雪山($68) 賣相好打卡！味道亦有水準，刨冰口感綿密絲滑，毫無冰感，泰式奶茶味香濃之餘又唔會太甜，不論加椰漿醬定係落脆脆，味道都好夾。 整體食物質素好高，服務都非常殷勤友善，絕對會回頭！

時間過得好快，眨吓眼就一齊咗11年了，雖然已經結咗婚，但儀式感仍然都係好重要呢！呢晚我哋就去咗秋田鐵板燒慶祝，餐廳位於天文臺道，私隱度好高。
鐵板燒有幾個Menu，我哋揀咗秋田二人前鐵板燒套餐，價錢分別係$950/$1150，視乎選擇嘅係牛肉薄燒定係厚燒。我哋就各點了一款share :
季節沙律
先送上清新開胃的沙律，打開味蕾。

接着就開始精彩嘅鐵板燒料理啦！
師傅免費請我哋食雞泡魚乾，雞泡魚乾預先用味醂醃過，甜甜地，送酒一流！
魚籽鵝肝蒸蛋
蒸蛋生熟度控制得恰到好處，入口嫩滑，面頭有慷慨嘅魚子作點綴，配上脂香嘅鵝肝，味道好有層次！
鮮活龍蝦半隻
龍蝦非常新鮮，上鐵板時仲係活生生，師傅仲要撈埋龍蝦膏去炒香，難怪入口咁鮮甜彈牙！底下亦都有鐵板煎嘅多士，口感香脆。
原隻活南非鮑魚
師傅用昆布包住鮑魚，再放上大把嘅海鹽，淋上酒後再焗一焗。鮑魚口感軟腍，本身海水味重，同時又散發淡淡昆布香氣，不論食原味定係配搭昆布忌廉湯都各有特色。

香煎頂級鵝肝
鵝肝好厚身，煎至外層香脆，內裏口感軟綿，配搭黑醋同菠蘿都有解膩的效果。
鹿兒島霜降和牛薄燒
鹿兒島霜降和牛雪花漂亮，分布平均，包住香蔥再連同香脆嘅蒜片一齊食，牛味更加突出。
秋田炒飯
食鐵板燒點少得炒飯？佢鍾意欣賞師傅炒飯嘅表演，鐵板燒炒嘅炒飯特別有鑊氣，粒粒分明秋田炒飯嘅材料亦都好豐富，有蘿蔔、櫻花蝦、煙肉及蔥花，色彩繽紛。
炒野菜
主要係炒椰菜，加上少少菇類及蘿蔔絲。
龍蝦清湯
用上剩下嘅龍蝦頭去熬湯，味道清甜。

精選甜品
是日甜品有豆沙餅配雪糕，豆沙餅同樣係鐵板燒即席烹飪，餡料嘅十勝紅豆軟綿香甜，味道唔錯。
今次嚟到秋田鐵板燒慶祝周年紀念，餐廳仲特地為我哋喺鐵板上準備打卡位，而且細心地即時幫我哋打印相片，服務非常好！

尖沙咀高cp日式定食 ~ 和道屋! 和道屋嘅地面入口好窄，一不留神就好容易錯過，但走入去卻發現別有洞天！門口一入去嘅走廊位先有千與千尋嘅無臉男迎接，旁邊仲有夢幻嘅粉紅櫻花樹裝飾，沿住樓梯走上上層，樓梯上掛滿燈籠，餐廳內走懷舊日系風格，到處都係打卡位 ！ 餐廳午市定食套餐嘅選擇好多，價錢$88至$268不等，豐儉由人！全部定食都配有三文魚刺身、甜品、麵豉湯、茶碗蒸、前菜、沙律，超級豐富！三文魚刺身有兩件，每件都厚切肥美，甜品有抹茶蕨餅，叫人滿足！openrice訂枱有88折！ 火炙三色丼定食($138) 呢款三色丼有齊我最鍾意嘅幾款刺身，包括：左口魚邊、三文魚、拖羅及三文魚籽。左口魚邊油脂豐腴，入口即溶！三文魚火炙後逼出油香，拖羅油脂分布都好平均，火炙後有化開融化嘅口感。三文魚籽晶瑩剔透，鹹香十足，份量都好慷慨！我特別欣賞丼飯都有添加醋，調味後可以平衡三款火炙刺身嘅膩感，好有心思。 雜錦壽司定食12件($138) 呢個價錢好抵食，計返每件手握壽司都係$10左右。壽司款式係廚師發辦，而用料都冇將貨就價，有火炙左口魚邊、吞拿魚赤身、油甘魚、吞拿魚蓉壽司等等。 拖羅海膽刺身杯($88) 太耐冇食刺身，索性追加呢個餐廳名物豪氣一番！刺身杯舖滿三文魚子、拖羅蓉及海膽，面頭再以黑魚子點綴，非常澎湃！刺身用料新鮮，海膽都好甜！

終於坐完月了，一岀關當然要食我最愛的壽司！老公體貼地預約了螢雪的omakase，想不到午市omakase性價比非常高，11貫壽司+手卷才$490/位，網上口碑亦極佳，難怪當日去座無虛席！ 先上前菜及沙律。沙律菜爽脆新鮮，加上醋汁，酸甜開胃。前菜有墨魚都口感爽彈！ 之後就是壽司環節，11貫壽司包括： 真鯛 真鯛味道甘甜，肉質結實。 左口魚配火炙左口魚邊 左口魚肉質鮮嫩，左口魚邊火炙後油脂豐沛，入口即溶，一啖放進口內口感及油香並重。
帆立貝 帆立貝超級肥美厚身，柔軟鮮甜！ 墨魚 墨魚比較爽口，舖上炒香過的烏魚子炒香，增添鹹香。 池魚 魚味濃郩。 鰤魚 肉質略帶嚼勁，越咀嚼越嚼岀鰤魚清甜的魚味。 櫻鱒魚 外型同平時食開的三文魚非常類似，師傅說櫻鱒魚屬於高級三文魚，每到櫻花季節就是品嚐的最佳時令！
醬油漬吞拿魚 吞拿魚魚味突出，配芥末籽提升味道。 北海道赤海贍 海膽色澤呈橙黃色，非常新鮮，入口甘甜，毫無澀味，好正！ 油坊主 油坊主油分豐腴，輕輕火灼後更加逼出脂香，用香脆嘅紫菜包住能夠平衡一下膩感！ bb吞拿魚 BB吞拿魚肉質嫩滑細緻，師傅用備長炭燒香，食嘅時候帶有淡淡炭火香氣！ 整體魚料非常新鮮，而且當日師傅發板嘅刺身咁啱全部都係我最鐘意食嘅，好啱心水，所以食得特別開心。魚嘅處理都好有心思，食得出有配搭過！不過舍利就握得略為鬆散，有進步空間。

蔥吞拿魚蓉手卷 不落俗套地放有紫蘇葉，令手卷多咗陣陣清香。
赤麵豉湯 麵豉湯都好有誠意，入面加咗雜菌及蜆，增添鮮味。 茶碗蒸 茶碗蒸用魚湯熬製，味道鮮甜，口感滑溜，入面仲有雞肉及甜薯粒，令味道更為豐富。 甜品：香蕉雪糕 甜品可以揀香蕉或柚子味雪糕，我就揀咗比較特別嘅香蕉味，味道濃郁之餘又天然唔人工。老公揀咗柚子雪葩都好refreshing！