今日去左元朗買野，突然心血來潮想食咖哩，咁就上網睇下有咩好食啦，發現附近正正就有間食咖哩嘅鋪頭，咁就一於過去試下。 餐牌上面有個金牌牛龍王咖牛大四囍飯，咁叫得金牌就點都要試啦，第一次嚟食又驚太辣，所以叫多個唔辣嘅惹爆慈油三黃雞飯，另外叫多個小食天龍雞皮卷同香芋魚肉餅，應該夠哂滿足喇啩。 先講講個咖哩，牛肉煮得十分入味而唔會過老，每一片都十分腍滿，而個牛腩炆得好淋，一絲絲咁完全唔黐牙，牛根亦都十分之淋。重點嘅咖哩，食到十分重嘅香料味，超級正，而且個汁充滿洋蔥碎，食起上嚟甜中帶辣，十分好送飯。仲配左兩件簿餅，牛油味香，配埋個汁食一流呀。 除左咖哩，個蔥油三黃雞一樣出色，啖啖肉，每一件都充滿蔥油嘅味道，配飯食就剛剛好了。 雞皮卷外皮十分爽脆，入口帶油雞油嘅香味，而雞肉內餡仍然保持鮮嫩多汁。 香芋魚肉餅口感獨特，除左食到香芋嘅軟糯同時食得魚肉嘅鮮甜，真係值得一試。 再飲埋椰子冰同柚子梳打，大滿足呀。

榮哥私房菜一直以來都好有名氣，今日終於約到腳一齊食。 頭盤先嚟個好精緻嘅拼盤 💡本地水耕沙律菜伴芝麻醬 本地水耕沙律菜非常新鮮，啲菜食落去好爽脆，芝麻醬的味道香濃，超正。 💡榮哥自家甜酸齋 啲齋料好入味，酸酸甜甜，唔會太甜或太酸，啱啱好，好開胃。 💡茶燻流心蛋伴黑魚子醬配厚切茄子 隻蛋好入味，好香茶燻嘅味道。流心蛋黃好香滑，搭配黑魚子醬同厚切茄子，口感豐富。 💡涼伴黑白木耳 呢碟涼拌黑白木耳真係好爽脆，味道又清涼，陣陣麻油香味，好清爽。 然後到燉湯 💡原盅燉哈密瓜螺頭黑毛豚肉湯 哈密瓜燉到好軟腍，入口即溶，好香甜，螺頭好鮮嫩，加埋黑毛豚肉，成個湯好清甜好滋潤。 💡原盅燉姬松茸淮山甘筍燉黑毛豚肉湯 姬松茸味道好香，而且甘筍好香甜，黑毛豚肉燉到好腍，成個湯好清甜。 跟住就係主菜 💡黑松露醬炒花尾躉班球配鮮露筍 花尾躉班球魚肉好鮮嫩結實，鮮味十足。鮮露筍新鮮爽脆無渣，味道鮮甜。黑松露醬提升了整體風味，非常美味。 💡蝦球水芙蓉 蒸蛋口感綿密幼滑，蝦球鮮嫩多汁彈牙，兩者配合口感極佳。 💡蜜椒比利時杜洛克 St.Louis橄欖豬肋骨 肉質鮮嫩多汁，外皮十分香口，蜜椒醬嘅味道好開胃，非常好味。 💡韓泡汁煮牛面肉配雙色蘿蔔(微辣) 牛面肉同雙色蘿蔔炆得好腍，韓泡汁的微辣與牛肉完美融合，增添唔少風味，非常美味。 💡魚湯有機時令鮮蔬 菠菜苗十分鮮嫩，完全沒有草青味，魚湯令時菜更加鮮甜好味。 💡農坊獨頭糖心黑蒜炒飯 一上枱已經香氣四溢，飯粒粒粒分明，金黃油亮，配料豐富，賣相極佳。配合糖心黑蒜的獨特風味，美味更加推高一個層次。 到甜品喇 💡時令甜品 今日嘅甜品係薑汁黑芝麻湯丸，湯丸口感軟糯，黑芝麻香甜濃郁，薑汁十分暖胃。 呢餐真係十分滿足😊

今日收工之後，嚟咗觀塘喺工商區度嘆泰菜，真係估唔到原來喺商業大廈樓下，竟然有間咁大嘅泰國菜餐廳，而且地方夠大，價錢商且，真係啱哂朋友聚腳嘅好地方。 泰式全日早餐 呢個配搭相當特別。有粥，粥夠渴身，唔會稀溜溜，而且有好多肉絲，十分鮮甜。仲有酸種麵包，入口帶微酸，麥香濃郁，配埋牛油果醬食十分清新。仲有仲有沙嗲串、蛋、煙肉同炒雜菇，十分滿足。 泰式豬肉丸串 豬肉丸烤得惹味，而且十分彈牙，上枱熱辣辣。 烤香茅豬頸肉 豬頸肉爽口，燒得夠香，而且有此少燶邊，食落又脆又香，再配埋另上既甜酸醬食更加美味。 蝦炒金邊粉 金邊粉乾爽程度啱啱好，麵條充分吸引醬汁，每一條都好入味，而且十分好鑊氣。另外，啲蝦大大隻，相當抵食。 蟹肉炒飯 炒飯夠乾身，每一粒都有蛋液包裹，粒粒分明。蟹肉鮮甜，配合炒飯一齊食勁正。 煎簿餅 夠香口，層次分明，應該十分吸汁，下次要叫埋咖哩一齊食。

突然好想掃街，但香港地依家又邊度咁多街掃丫。不過，一間小食店就可以食到好多野喇。大圍小食提供嘅種類繁多，魚蛋燒賣、串燒、炸大腸、碗仔翅等等，作為一間街坊小店，性價比高，真係一次過滿足幾個願望。 今日我就掃左呢啲 燒賣 燒賣有咬口，夠煙韌，而且蒸得夠熱，我無任何投訴，呢度仲有炸燒賣，同樣好味。 魚肉翅 顧名思義，就係生菜魚肉嘅魚肉配埋碗仔翅，呢個組合我10次嚟有9次都叫，魚肉彈牙，碗仔翅多料又夠味，一齊食勁正。 狗仔粉 口感軟身，好掛湯。湯底鮮甜，配埋菜脯、肉碎、冬菇絲一齊食，少少辣，好惹味。 油渣麵 同狗仔粉差不多嘅配料同湯底，換上粗嘅麵條同樣惹味，再配埋爽口嘅油渣多一分滿足。 韮菜豬紅豬腸 韮菜新鮮無渣，即叫即煮。豬紅唔會一夾就散，彈牙滑溜。豬腸煮得夠入味，肥膏很香😈😈，好邪惡但好好味。 燒豬頸肉串／燒雞肉串 豬頸肉爽口，油香十足，皮外香口。雞肉嫩滑入味，帶微微焦香。兩者配埋輕輕嘅孜然粉食，真係停唔到口。 煎釀三寶 有多款選擇，青椒、矮瓜、餃子、紅腸等等，就連西蘭花都有相當有特色，而我自己最鍾情都係食炸魚蛋。😆😆

今日嚟呢間韓國餐廳，已經喺尖沙咀䇄立左多年，係同區較經濟實惠嘅鋪頭。佢嘅裝修簡約，位置寬敞，私隱度足，傍邊嘅細枱適合兩三知己談天說地，中間嘅大枱適合家庭聚會或者一大班人飲酒耍樂，真係相當唔錯。 前菜 一埋位就已經遞上3款前菜，每款都很精彩。我特別欣賞個泡菜並唔會十分之辣而很惹味，仲有個簿餅十分軟糯香口。 韓式石鍋飯（牛肉） 賣相一流，而且配料十分之多，除左牛肉之外，一貫傳統韓式飯嘅特色，就係好多唔同嘅蔬菜，既健康又不膩，加埋個底有少少焦，幾好味。 半份芝士炸雞 首先，炸雞上枱係熱辣辣嘅，外皮十分香脆，同炸粉唔會十分之厚。肉質鮮嫩，啖啖都係肉，食得好爽。加上濃濃嘅芝士粉，真係十分惹味。

要食夠鑊氣嘅小炒，大排檔必然係大家心目中嘅number one，而位處於官涌街街市2樓嘅新肥泉海鮮大排檔，交通十分方便，距離柯士甸站／高鐵站都只係5分鐘路程，搵好野食絕無難度。 呢度嘅食物大大碟、分量足、鑊氣夠，真係十分不錯。 油泡田雞 田雞大大件，好厚肉，煮得夠滑，肉質鮮嫩，肉味鮮甜，唔會過老。配埋其他配料爆炒，十分有鑊氣同惹味。 酥炸墨魚餅 食炸野最重要就係夠熱夠脆，呢度正正兩者兼備，佢外皮酥脆，內裡軟綿綿，而且十分彈牙，墨魚味夠濃，有咬口，食得出唔係溝咗大量粉嘅貨色。配埋佢嘅泰式甜酸醬食真係very good。 干燒伊麵 伊麵唔會過硬亦唔會過淋，配料豐富，炆得好香好入味，充份咁吸收調味汁，唔會太濕，同時亦唔會油淋淋。 粟米魚肚雞粒羹 一碗煮得好嘅湯羹絕對不能稀溜溜又或者渴撻撻，擺耐咗亦唔會出哂水。呢個羹就啱啱好，而且十分足料，材料切得十分幼細，每一啖都食到粟米粒、魚肚粒同雞粒，口感豐富而且味道清爽。

要食好味有誠意嘅牛扒，都唔一定要去高級扒房，其實一啲隱世嘅小店都可以做得好出色。 呢間 Fat Belly Butcher & Gin House 夜晚會分成兩輪，而今次我就食第一輪，入嚟見到個肉櫃，有好多唔同嘅部位同重量可以選擇。 我地先嚟點左個 New England Clam Chowder，入口奶香味濃厚之餘海鮮亦都相當豐富，口感唔會過稀或者過渴，調味亦啱啱好，唔會過咸。 而麵包更加係誠意十足，食西餐麵包最緊要就係夠熱，呢個麵包拎上手至麵包內部都係熱辣辣，而且好軟熟好有麥香味，搽埋牛油食真係無得彈。 牛扒方面，我地就分別揀左 US Prime Dry Aged 45 Days Ribeye 同 Argentina Black Angus Prime Tenderlo ，而生熟情度就要叫咗 medium rare。兩款嘅牛嘅烹調時間都掌握得好好，而且有充份嘅 rest time，因此切開嘅時侯唔會成碟血水，食落口就更加鮮嫩多汁，而且牛味十分濃郁，入口好鬆軟。同時表面烤得好乾爽，仲有微微嘅炭香味，真係超正。 Side Dish 同樣係据扒時重要嘅一環： 🍟Beef Fat Fries with Garlic Sprice & Herbs 薯條炸得香口夠熱，入口外香內軟，帶點牛嘅清香，配埋香草碎很不錯。 🍄Grilled Protobello Mushroom 菇烤得好香，佢烤嘅過程已經抽乾菇本身嘅水份，因此食落口菇味更加濃郁。 🥔Daily Potatoes 薯仔同樣烤得好香，軟綿綿而唔會爛溶溶，連表皮一齊烤，入口更添一份質感同香味。 🐮🍚Mini Beef Rice 牛飯呢個真係超級有驚艷，細細一碗飯滿滿牛肉嘅香味。完全咁善用咗平時切牛嘅頭頭尾尾，牛肉粹入口即溶而牛肉煮成嘅汁充份被米飯吸收，配菜都有主菜嘅風範，超級好味。 一餐完美嘅西餐當然要食埋甜品啦。 Classic Apple Crumble 餅底十分之鬆脆，混合埋肉桂同埋蘋果粒，每一啖都食到蘋果同餅嘅口感，味道香甜。表面除左有球雪糕，仲有個細細個嘅蘋果仔，十分特別。 Seasonal Fruit Creme Brulee 燉蛋十分之滑，表面嘅焦糖夠脆而唔會過濃，十分出色。

收工唔想食得太heavy，食個簡簡單單嘅晚餐。呢間喺金鐘嘅一汁一菜，喺正寫字樓樓下，方便一眾打工仔，佢售賣日式嘅外賣定食，選用嘅係日本米飯，而每一款菜式同湯品都好精緻有特色。 北海道產甜粟米雞肉豆乳濃湯 + 自家制野菌醬燒和牛漢堡扒 + 米飯 味道香濃，唔會太過稀，十分之甜，而且十分足料，除左雞肉之外，勁多甜粟米粒，仲有大量蔬菜配料，好均衡健康。和牛漢堡十分鬆軟，而且好香牛味，醬汁香甜，配埋漢堡一齊食十分之夾。呢度米飯除左香軟之外，其中一個特色就係灑上芝麻，食落口更加香。 高麗菜野菌豆乳濃湯 + 南蠻風味雞扒 + 米飯 豆乳濃湯真係好多料，同樣唔會太過稀，啖啖都係野菌同蔬菜，而且十分香滑。南蠻風味雞扒好有特色，除左雞扒軟滑，個汁甜甜酸酸，超級開胃。

今日喺K11行街，發現左間粉紅色，好靚嘅甜品店，就埋去睇下啦。 見到呢度有好多唔同款式嘅甜品可以選擇，除左一般常見嘅musse cake同撻類之外，見到個外貌幾有趣嘅波波。 行近啲再睇睇個description啦，原來除左甜食，仲有鹹式，就好似有款係蝦醬肉鬆饀嘅。 據講，佢嘅靈感源自新月型嘅傳統可頌麵包，所以個外型就咁特別啦，呢款波波真係啱哂做散水餅，夠哂特別。 卡邦尼意粉就食得多，唔知配落甜品會點呢，食落口原來又真係幾有趣，本身咬入去軟軟嘅口味，當中有蛋糕嘅鬆軟，同時間又咬到煙肉嘅香，而個卡邦尼汁又唔會太濕，食完一件都唔會整污穢隻手。 然後再試埋個蝦醬肉鬆口味，啖喺都係肉鬆嘅口感，而個蝦醬味唔會過份搶。

食完鹹，食多個甜嘅朱古力榛子醬，入口同樣鬆軟，而朱古力味十分濃厚，真係好舒服。

嚟龍華絕對唔會唔食佢地嘅乳鴿，呢度嘅乳鴿菜式十分之多 《龍華脆皮燒乳鴿》外皮就乾身，而且肉質鮮嫩而多汁，上枱嘅時候熱辣辣，非常惹味。 《古法紹酒醉乳鴿》喺出面餐廳比較少見，同樣地肉質鮮嫩，酒香味很重很入味。店家幾款乳鴿都用上頂鴿來做，即係指重約9至11兩嘅乳鴿，會較普通乳鴿為大，所以入口啖啖肉。 《蒜片安格斯一口牛》，牛肉唔會煮得過老，黑椒非常惹味，伴以炸鮮奶一齊食，脆脆嘅口感同時鮮奶清甜可以清一清口腔，十分之match。 《帶子大良炒鮮奶》，炒鮮奶十分之滑，同時帶子、蝦令炒鮮奶多一份口感同鮮味，調味唔會過重從而保留材料原有味道。 《瑤柱雞茸粟米羹》 食湯羹最怕就係稀溜溜又或者渴撻撻，而呢個羹就啱啱好，而且十分足料，入口口感豐富同味道清爽。 《馳名沙田雞粥》 雞粥十分入味，好綿好好味，同時雞件唔會過老。配埋脆卜卜嘅油條，趁熱食一流。 《鮑汁金菇炆伊麵》 伊麵唔會過硬亦唔會過淋，菇味十足，充份吸收鮑汁，炆得好香好入味，而且唔會油淋淋。