都幫襯咗好幾年喇，lunch set 必食 supreme sushi set，見到上文有朋友覺得有熟蝦好搵笨，但係$470有15件壽司加1件手卷，平均三十蚊件，有海膽拖羅和牛都算係咁啦，又坐得舒服，喺銅鑼灣區嚟講，我就覺得性價比幾高喇。 星期二晚我就去食all you can eat shabu shabu, 約$1200可以兩個鐘任食日本牛，雖然食到第五塊開始戰鬥力減弱，因為啲日本牛幾肥美，但有拖羅等sashimi 做前菜，又係真心抵食！

讀書年代大時大節果陣，去完銅鑼灣或者維園玩，都會直落去天后晶晶食玫瑰露酒湯圓，因為好味，同可以當酒飲 😂 上年9月因為業主逼遷，要同有28年歷史嘅晶晶講再見，我果個月係咁食玫瑰露湯圓，應該肥咗幾磅，但係值得嘅，因為怕之後無得食。 而家佢喺灣仔重開，真係超開心，可以繼續輪流食奶黃丸子、薑汁奶冰、蛋白杏仁茶、玫瑰露湯圓！不過夜晚灣仔人流比起天后少，希望疫情中都可以撐得住啦！ 個湯圓比起之前喺天后果陣，落重咗酒，咬一小啖已經漏酒餡出嚟。至於個杏仁芝麻糊呢，係阿媽指明要買返屋企俾佢食，佢話好香，然後咕嚕咕嚕好快飲晒，我都嚟唔切試味😂

見OpenRice好評如潮，平時又有人龍，即管試吓。 麻辣鴨血 - 份量係四大舊，可惜味道淡如水、少少麻又唔辣、成碟只有一粒麻椒，係我食過最差嘅鴨血 魯肉飯 - 正常無驚亦無喜，好彩只係叫個細嘅 就算係黃店，做餐廳應該要有誠意，加多幾粒麻椒，汁唔好煮咁水，我諗都只係一兩蚊成本嘅分別卦，但起碼唔會令人覺得 - 無下次。 至於服務，咁嘅價錢，無高期望，但店員態度比起茶記伙記更冷淡，更冷漠，其實如果你唔太想喺食肆度做，就唔應該留喺度。

服務態度有好大進步空間。 其實以呢個價錢，我都預咗係茶記質素，不過落單姐姐嘅態度令阿爸成餐飯食得好唔開心。 事緣阿爸話上兩個星期兩老嚟過食炒飯同意粉，味道對得住價錢，今次又嗌同一個飯同意粉。 佢話上次嚟侍應有問佢要咩湯要咩野飲，咁今次落單我嗌完主食就問係唔係連湯同野飲，姐姐話「無架喎，不嬲唔做套餐，我喺度做咗成一年，我好清楚不嬲都唔做。」咁我阿爸回應「唔係喎，上次嚟食都有架。」咁姐姐就話「哦，你上次係唔係叫晚餐呀？」然後喺counter搵咗2分鐘，搵張我從未見過嘅晚餐餐牌show俾我睇，話呢個先有湯同野飲架（我心諗，咁咩叫做不嬲唔做套餐😂）。阿爸堅持話「唔係呀，我上次都係喺張主餐牌度揀架，我無見過呢個晚餐牌。」侍應姐姐都幾大聲講第二次「我喺度做咗成年喇，我知道嘅係從來都無。」（註：香港仔分店開咗應該唔夠半年） 阿爸有啲委屈話「你咁講就唔啱，咁上次你哋真係有問我，所以我哋今次先覺得奇怪。你講到從來都無，即係話個客講大話？」姐姐回應「使唔使搵經理同你講？」結果我阿爸成餐飯粒聲唔出，食都好委屈。 其實，一個湯一杯野飲唔值錢，我唔係R咩著數，我亦唔介意俾正價叫個湯叫杯野飲。我唔係話客係大晒，但我希望你哋嘅員工可以尊重客人。你可以講：「哦，等我問返我啲同事先，但而家無喇」大家會好過啲。

食物- 炸雞：唔脆唔香，似微波爐叮熱 明太子玉子燒：蛋熟到透無蛋汁，只有甜味 明太子撈烏冬：明太子少到呢，不過唔平㗎 明太子茶泡飯：索價過百，不過湯無鮮味，明太子味唔出，靠wasabi吊味 明太子燒年糕：明太子都係少得可憐，靠芝士同粟米粒襯托出明太子少少咸味 除咗茶泡飯個湯，同埋熱鍋上嘅燒年糕係熱嘅，其他都係好快涼，真係唔似即場煮。 只不過香港真係無明太子專門店，所以想食明太子只可以被迫幫襯。 服務- 300蚊人均消費，水都無杯，味千服務水平