小店位於尖沙咀赫德道，舖面唔算好大，但勝在夠晒企理，店內裝潢簡潔又帶少少和風，坐得都幾舒服。 餐牌上全部都係鰻魚，我地叫左沙羅鰻蛇丼同三重鰻魚丼。 沙羅鰻蛇丼: 呢個丼咁出名我地又點可以唔叫呢？上菜時我地真係嘩咗一聲！ 條鰻魚超巨型，有成隻手臂咁長，鋪滿成個飯盒之餘仲延伸到隔離隻碟度，完全遮蓋著啲飯，真係打卡一流。 鰻魚表面烤得好靚，散發出陣彈香味，挾起時就感受到佢幾厚身，食落去好香口，啖啖肉，油脂分布平均，一啲都唔鞋，仲好滑溜添！ 味道方而，甜甜地嘅燒汁中和咗鰻魚本身嘅油膩感，配埋有玉子燒、紫菜絲同毛豆嘅丼飯一齊食，口感勁有層次，簡直系完美嘅配搭！ 三重鰻魚丼： 三重鰻魚丼用六角彩碗盛載，三款鰻魚分別係蒲燒、生燒同穴子鰻魚。蒲燒鰻魚醬汁甜美，生燒鰻魚肉質又肥又飽滿，穴子鰻魚肉質嫩滑。 丼飯加$18 可配餐，有溫泉蛋，鰻魚肝白貝湯及飲品。 溫泉蛋口感滑溜，加入飯食真係好開胃，食完濃味嘅鰻魚飯後，飲返碗既足料又鮮甜嘅鰻魚肝白貝湯，真係非常滿足。 值得一提係，個丼食淨三分一時，可以請店員佢地加入特製昆布高湯，再加入紫菜絲同芝麻去自製茶漬飯，真係有另一番風味。

Odelice 係香港有好幾間分店，早前去過荃灣分店，見佢地無論食物同環境都唔錯，今日剛好去沙田買野，順便係新城市食飯，就打算黎Odelice啦。 餐廳環境優雅舒適，充滿住法國嘅浪漫情調，燈光柔和，佈置典雅。 假日下午有brunch set，食物款式都好多，all day breakfast，三文治，意粉，意大利飯，薄餅樣樣齊，價錢由$88到$252不等，包主菜，餐湯或餐飲。除此之外，亦可以以優惠價加配小食同甜品。 頭盤有牛油果凱撒沙律，是日餐湯同炸黑松露蘑菇球，亦可以加＄15要吞拿魚他他。 牛油果凱撒沙律份量十足，牛油果好新鮮，口感creamy，配埋爽脆嘅生菜、青瓜、雞蛋同埋香脆嘅麵包粒，再淋上特製嘅凱撒沙律汁，真係好開胃！ 炸黑松露蘑菇球： 炸黑松露蘑菇球真係好邪惡！ 金黃色嘅外皮炸到好香脆，咬落去就流出黑松露蘑菇汁，入口好鮮甜，黑松露香味濃郁，好適合黎做開胃菜。 盲曹魚海鮮鍋材料有青口、蜆同燒薯粒。盲曹魚肉質好滑，海鮮新鮮，食落好鮮甜 ，配埋海鮮濃湯汁，真係非常開胃。 阿根廷安格斯肉眼牛扒肉質鮮嫩，油花均勻，煎至五成熟，啱啱好！牛扒嘅肉汁好豐富，配埋黑松露紅酒醬汁，非常惹味。伴碟仲有薯條，非常香脆，同牛扒簡直係完美嘅配搭。 小食： 我地以優惠價加配小食，叫左「巴斯克甜椒煮蜆」。 蜆用巴斯克甜椒醬汁煮成，入口酸酸甜甜，非常開胃。 法式蘋果撻 甜品係我嘅最愛，雖然跟brunch 可以以優惠價加配指定甜品，但係唔係太啱口味，所以我哋另外單點一份法式蘋果撻。 個撻皮好鬆脆，一啲都唔韌，配埋啲酸酸甜甜嘅蘋果蓉，食落去好清新解膩 ，伴碟仲要有一球雲呢拿雪糕，凍冰冰甜甜咁，簡直係Perfect Match。 飲品： 跟餐有指定飲品, 亦可以優惠價轉cappuccino。 cappuccino嘅咖啡味濃郁，奶泡幼滑，口感一流，配埋靚靚拉花，為我哋週末嘅午餐或者完美句號。

LUMOS Restaurant and Bar位於屯門井財街力生大廈，輕鐵景峰站行去都只係5分鐘左右，餐廳以灰色雲石搭配深綠色元素，座位有分室內同室外，室內設有卡座及普通枱座位，適合唔同場合嘅聚餐，天花仲掛有大水晶球體燈，時尚之餘仲好有高級感。 呢度逢星期三/五/六及公眾假期會有live music表演，咁有氣氛，真係相當適合朋友情人聚會呀。 雖然是日假日，但係都有set brunch，包麵包、餐湯或沙律、主菜及普通，亦可以以優惠價加配特品。 是日餐湯： 餐湯係意大利雜菜湯，蕃茄味十足。 雜菜沙律： 沙律菜新鮮爽脆，配搭酸甜嘅柚子醋汁，非常開胃。 麵包： 麵包有兩款，一款口感鬆軟，另一款口感脆身，新鮮出爐嘅麵包，上檯時熱辣辣，入口外脆內軟，上菜時仲會配上牛油，配合埋餐湯同沙律食，真係非常夾。 香煎盲曹魚柳伴欖油蒜香辣椒扁意粉： 盲曹魚柳有兩大塊，非常厚實，表皮煎得香脆可口，魚柳肉質鮮嫩，無咩腥味，配搭埋用左欖油蒜香辣椒炒起嘅意粉，香味十足，非常惹味。 坑烤紐西蘭一級肉眼牛扒（200g)配蔬菜及法式薯條： ​​肉眼扒即叫即烤，外層焦香之餘仲烤出坑紋。牛扒上面放左一塊加左香草嘅牛油，牛扒嘅熱力令到牛油慢慢溶化，散發出陣陣香氣。 5成熟嘅肉眼扒，肉質細嫩，非常高質，配搭蔬菜及法式薯條，真係相當豐富。 飲品： 餐飲叫左熱咖啡，咖啡味香濃，為我地嘅午餐劃上完美句號。

是日星期日，難得放假，梗係同老公去食好野，早幾日見到有人介紹位於銅鑼灣嘅 Wanderlust，非常適合打卡，環境又唔錯，就打算黎食餐飯影下相啦。 餐廳以粉紅色為主題，有好多花做裝飾，之後食物期間我哋亦都影到好多相。食物方面，我地叫左兩個主菜，一份甜品同飲品share。 鹹蛋黃忌廉雞肉闊帶麵： 意粉煮到煙韌適中，配埋嗰個濃郁嘅咸蛋黄忌廉汁，入口creamy，勁邪惡，配埋嫩滑嘅雞肉及菇，真係食到停唔到口！ 紫醉金迷： 呈紫色嘅意大利飯上面放左蝦及藍青口，以及花做裝飾，紫色部分係由奶油醬混合紅捲心菜配合意大利飯整成，裡面掍左菇，上面再放上金箔、蝦同藍青口，擺盤非常吸引。奶油醬香滑得嚟又唔會搶咗紅捲心菜嘅鮮味 ，食落口感亦好豐富，每一啖都充滿著驚喜 ！ 三層班㦸配自家製草莓醬： 上檯時簡直令我地「哇」左一聲，擺盤非常精美，最令我驚喜嘅係有皇冠做裝飾，好有公主feel, 打卡一流，為左方便進食，影完相後，店員就將巨型裝飾拎走。 即叫即整嘅班㦸，上面仲有花瓣做裝飾，班㦸蛋味香濃，每塊之間仲有新鮮士多埤梨及果醬做餡料，整體味道非常夾，好好味。 難得出街食飯，呀仔又唔扭計，兩個人叫杯飲品relax 下傾下計，見佢地奶昔有好多選擇，賣相又吸引，就一人叫一杯試下。 繽紛樂朱古力奶昔/香蕉朱古力奶昔: 兩杯奶昔都有唔同嘅裝飾，有一杯仲極為浮跨，賣相非常吸引，打卡一流。 味道方面，繽紛樂朱古力奶昔除左有好香濃嘅朱古力味之外，仲有Kinder Bueno碎 ，至於香蕉朱古力奶昔，就有極香濃嘅香蕉味，相信係因為加入咗新鮮香蕉嘅關係。 總括嚟講，呢度嘅環境一流， 菜式做得有心思得黎亦有水準，最正係可以影到好多相， 絕對係同朋友 聚舊嘅好選擇之一 ！

荃灣近期開咗一間日式餐廳「哋嘢事無所」，主打輕食，套餐主打一汁多菜定食，有飯有湯有飲品，價錢就視乎你叫幾多個熱菜冷菜，款式相比起附近茶餐廳輕盈，冇咁油膩，價錢亦相當親民，非常適合關注體重嘅OL食，CP 值亦相當高。 由於今日趕住返公司做嘢，所以叫咗外賣，揀咗三款熱菜一款冷菜，價值$88嘅套餐嚟食。 冷菜 冷菜揀左「沙律菜配百香果柚子檸檬汁」，沙律菜新鮮爽脆，百香果柚子檸檬汁酸酸甜甜，好開胃。 是日餐湯 是日餐湯係「蕃茄忌廉雜菜湯」，蕃茄味香濃，雜菜豐富，有紅蘿蔔、粟米、蕃茄，椰菜，入口酸酸甜甜，相當開胃。 熱菜揀左三款，分別係明太子伴海老西蘭花、秘製masala 雞同鹿兒島吉列黑豚肉餅。 明太子伴海老西蘭花 西蘭花爽口，海老鮮甜，明太子醬汁creamy，鹹香濃郁。 秘製masala 雞 雞肉入口嫩滑，masala醬汁微辣，相當惹味。 鹿兒島吉列黑豚肉餅 豚肉餅外脆內軟，肉汁豐富，配上自家製醬汁，更加美味。 飲品 飲品揀左「黑豆麥茶」，黑豆麥茶味香，相當解渴。 甜品 我另外都點咗個「千層調色板」呢個大熱甜品同同事share食，有五款味道，我揀左「朱古力醬香蕉」味，呢個組合真係冇得輸，千層酥皮即叫即整，熱辣辣，非常鬆化，咬落仲聽到酥脆聲，配合埋朱古力醬、吉士醬、香蕉同雜果仁，甜甜地亦極有口感。

今日係星期六，難得好姊妹聚舊，就梗係去啲比較上少人嘅地方傾下計，網上搵到位於荔枝角嘅「孵化生活」，環境同食物都好似唔錯咁，就打算黎試下。

「孵化生活」餐廳裝潢簡約時尚，以木系同白色為主調，俾人一種溫馨舒適嘅感覺，好岩同朋友聚一聚傾吓偈，估唔到假日都有set lunch。

Set lunch 有前菜，主菜同飲品，價錢就因應唔同主菜而有所分別。

前菜可以揀湯或者沙律，我哋各揀一樣。

黑松露泡沫蘑菇湯：
黑松露泡沫蘑菇湯口感濃郁，松露香味濃郁。蘑菇湯味道鮮美，口感細膩，配埋竹炭麵包，非常夾。

田園沙律：
田園沙律用料新鮮，沙律菜清脆爽口，配上酸甜可口嘅柚子蜜醋汁，非常開胃。

主菜：
烤檸檬香草法國春雞：
烤檸檬香草法國春雞外皮酥脆，雞肉鮮嫩多汁。檸檬香草嘅香味完美地融合雞肉嘅鮮味，食落酸甜可口，配菜仲有西蘭花、車厘茄、菇及薯條，呢個組合非常夾。

烤餅：
我地另外加左份烤餅，烤餅口感鬆軟得黎又唔太油，配埋燒雞食，非常夾。

一樓沙律配雞肉、蛋、牛油果、柚子蜜醋汁：
呢個沙律好特別，有別於一般用碟上菜，佢將沙律菜放喺一個透明嘅玻璃筒裏面，再另外放沙律配料，等客人可以因應自己嘅喜好加入唔同嘅配料同醬汁，再倒落碟到。

配料有雞肉、雞蛋、牛油果、藍莓、橙、士多啤梨、腰果同麵包粒等，配埋新鮮沙律菜，以及柚子蜜醋汁，食落酸甜可口，非常清爽。

飲品：
餐飲包果茶，亦都可以加錢配精品咖啡。無啡不歡嘅我地揀左要cappuccino 同dirty。

Cappuccino 拉花精美，打卡一流，咖啡味香濃，奶泡綿密。Dirty 口感醇厚，咖啡同牛奶嘅比例完美，為我地嘅午餐劃上完美句號。

甜品：
我地另外加左份甜品，西班牙油條上檯時會係我地面前點火令到表面砂糖略為溶解，非常吸睛，打卡一流。西班牙油條外皮酥脆，內裡柔軟，帶輕輕肉桂味，搭配巧克力醬或士多啤梨醬，非常美味。

「生生市場」係一間韓式外賣店，係元朗同灣仔都有分店，元朗分店開咗一段時間，一直都冇機會試，今日去完附近買野，回家途中順便買外賣返屋企食。 小店有唔同款嘅韓式飯、小食同飲品選擇。 魚餅串湯： 魚餅串湯係韓式嘅經典小食，一份有兩串，魚餅用魚肉打成，口感彈牙，味道鮮甜，配埋湯底，清澈鮮甜。 韓式炒粉絲: 韓式炒粉絲用粉絲、木耳、紅蘿蔔、菇等食材炒製而成。粉絲吸滿咗醬汁，味道濃郁，口感彈牙。唔同配料增添咗爽脆嘅口感，令到炒粉絲更加惹味。 辣豬肉紫菜飯卷: 辣豬肉紫菜飯卷用紫菜包裹住辣豬肉、飯、青瓜、蘿蔔等食材。辣豬肉味道濃郁，帶有少少辣味。青瓜、蘿蔔等蔬菜解膩，令到飯卷更加清爽。 韓式炒野菌伴飯: 韓式炒野菌伴飯用多種野菌炒製而成，野菌味道鮮香，口感豐富。配上飯同配菜，好似紅蘿蔔，芽菜，紫菜等等，更加滋味。 韓式烤雞伴飯: 韓式烤雞伴飯用雞腿肉燒烤而成，雞腿肉外脆內嫩，肉汁豐富，配埋醬汁，更加惹味。飯粒吸收咗雞肉嘅味道，更加香口，最值得欣賞嘅係飯配有荷包蛋一隻，非常吸引。 整體嚟講，呢間外賣店嘅食物質素唔錯，價錢都算合理，而且份量都幾足，性價比高！佢地仲有到會餐牌，下次開party時試下先。

日式鐵板係餐廳就食得多，主打外賣嘅店鋪就真係第一次試。 位於元朗鳳攸北街嘅「鉄皇子小賣所」主打外賣鐵板，由於係小店，款式選擇唔多，但對於貪新鮮嘅我黎講，又點會唔試下呀。 雖然係外賣店，但係我地都可以好似係餐廳咁欣賞廚師製作食物嘅過程，一樣可以打卡，等候過程中，廚師仲播住輕快嘅音樂，非常chill。 鐵板牛肉沙律： 牛肉有3大塊，肥瘦適中，煎過後表面金黃香脆，食落唔會太韌，配埋新鮮沙律菜以和風醬汁，非常開胃。 鐵板鰻魚丼： 原條鰻魚煎熟，接近全熟時再用火槍輕輕炙過表面，然後烹調醬汁，再淋上鰻魚上。 鰻魚表皮香脆，魚肉嫩滑，配埋自家製醬汁以及粒粒分明嘅珍珠米，味道非常夾，相當充滿日式風味。 日本一口牛粒： 一口牛粒牛味香濃，肉質鮮嫩，配上特製燒汁，非常惹味。 桔仔水： 馬來西亞桔仔水唔係好多地方有，有番石榴同青檸味，雪凍後，用嚟配味道較濃嘅食物，入口非常清爽。

是日特登請左假去維園行花市，貪無咁多人，難得放假又唔洗湊仔，當然兩口子去食個lunch 拍下拖啦。 上網搵左呢間係維園附近嘅Wish You A Mamaday，見到無論食物定環境都唔錯，就一於黎試下啦。 平日午市有set lunch,4 人同行1人免費， 我哋兩個人，覺得a la carte 嘅Menu比較吸引。A la carte 餐牌上食物名稱都非常攪鬼，好適合打卡。 海洋生物沙律： 沙律份量超多，配料有名符其實嘅海洋生物，好似大蝦、帶子、蟹棒同蟹子。除此之外，仲有大量沙律菜，同車厘茄，令到整體味道鮮甜，食落相當清爽，配上芝麻醬調味，味道非常清新，作為前菜簡直一流。 英國熟成28天肉眼： 老公勁鍾意食牛，呢個熟成28天肉眼真係吸引到佢。牛扒整得非常好，五成熟剛剛好，食落鮮嫩，亦能鎖住肉汁。 配菜方面除左有沙律同蔬菜外，亦有咖喱蔬菜薯餅，新鮮製作，熱辣辣，食落香脆，值得一讚。 豆腐豆腐豆腐咖啡： 凍牛奶咖啡加入豆腐花，上面加左豆腐雪糕，只係賣相已經非常吸引。入口會飲到豆腐花稅，一口咖啡，一口豆腐雪糕，極有口感。 Cappuccino： Cappuccino 有好靚嘅拉花，入口非常Creamy，為我嘅午餐畫上完美句號。

銅鑼灣希慎裝修過後多左好多新店，Sarasei係其中一間，主打蛋榚甜點，件件都色彩繽紛，非常可愛，趁住團年，人多可以試多啲款式，我都忍唔住買左啲返屋企同家人一齊食。 戚風蛋榚切件裝有多款選擇，即日新鮮製造，入口非常鬆軟。 京都焙茶同皇室紅茶茶味香濃，濃厚朱古力亦唔會過甜。 蛋榚卷賣相極為吸引，原條一條＄88，有兩款味道，分別係北海道生乳忌廉同皇室紅茶北海道生乳。由於兩款都想試，亦唔想買兩大條，所以買左兩件切件。 蛋榚入口濕潤，甜而不膩，食落非常軟熟。北海道生乳忌廉非常幼滑，牛奶味香濃，皇室紅茶北海道生乳茶味則帶濃濃紅茶香氣。 飯團蛋榚對我黎講真係好新穎，外型非常可愛，包裝同飯團一模一樣，法式薄餅包著忌廉蛋榚，十足蛋榚三文治咁，食嘅時候好似食飯團咁撕開包裝就食得，非常方便。 味道方面，楊枝甘露芒果味相當清新，伯爵茶朱古力茶味香濃，中間仲夾雜左唔少伯爵茶碎片，極有口感。 除左切件裝蛋榚外仲有原個蛋榚買，下次有家人或朋友生日，一定要試下。