之前多次路經此店，覺得這家店挺特別，很想試一下，今天終於有時間光顧品嚐這店的食品。 店內用的餐具，富有中國功夫茶氣息。附上的普洱茶香淳解膩。 到店時，差不多到下午茶時間。下午茶時間可以點指定的特價點心，當然不能錯過。是日星期四，指定的特價點心為鮮蝦炸雲吞，原價＄22，今天只需＄4，每人限點一份。需然只需$4，但絕對無將貨就價，食得出新鮮即炸，熱辣辣、脆卜卜，涵料豐富。 如翅高湯竹笙灌湯餃 $42 好多翅。高湯好鮮甜，涵料仲有帶子！ 鮮上肉響玲腸 $29 見到餐牌上介紹了這全港首創的點心，當然要試下。集「軟」、「脆」、「鮮」於一身。 咸香黑魚子燒賣 $20 好大粒，蝦肉爽口彈牙，黑魚子提升了整體味覺享受。 清酒雲吞雞 $32 酒味融入於清湯當中，雲吞皮薄涵靚。 海蝦肉餅竹筒飯 $32 加了蝦肉的肉餅，口感特別好。飯的軟硬度適中。以竹筒盛載，別具特色。 高湯浸菜心 $24 菜心新鮮清甜，健康之選！

晚飯時間經過這家店，看到佈置很有情調，便吸引了我倆進店光顧。 看到餐牌上的經典二人晚餐，三百幾蚊就有好多嘢食，選擇好多，而且好吸引。毫不猶豫地點了這個套餐。 朋友看到餐牌上介紹的3款生蠔，挺特別，$130可任選6隻，所以都忍不住點了。 生蠔排得靚靚的上桌，店員還很細心地介紹每一款及食用的次序，由小至大順序食，口感及及味覺享受會更好。 先食左較小的，質感較creamy ；再食右上中size的，口感爽滑；最後食右下最大隻的，海水味好重、好新鮮。 晚餐的前菜選了青蘋果鵝肝多士和巴馬火煺蜜瓜。原來每款有兩份，性價比又高了。 鵝肝好香，青蘋果中和了油膩感，配上脆多士，完美配搭。 巴馬火腿又香又軟又滑，配上甜甜的哈蜜瓜，濃淡得宜。 套餐的傳統凱薩沙律，每片生菜都薄薄均勻地附著沙律醬，不多不少，就是剛剛好，芝士碎提昇了味道口感。 是日餐湯是麵包洋蔥湯，濃郁美味。 主菜選了忌廉海蝦墨魚麵及燒醬烤原味豬肋骨。 有4大粒爽口彈牙的新鮮海蝦，墨鮮麵好鮮味。 豬肋骨肉鬆化，夠惹味。 餐飲要了熱檸茶，係Lipton yellow label tea, 仲可以按個人喜好自己擠檸檬汁。 甜品係芒果雪糕，好味。 好飽，好滿足的一餐！

見到餐牌每晚九點半後係宵夜時段，有個宵夜套餐，有齊豬牛雞三款肉，仲有四支啤酒，好抵食咁！決定試下！ 呢個套餐包括： 安格斯牛柳粒100g 五花腩150g 韓式醬烤雞肉150g 韓啤4支 有幾款前菜免費任食，包括泡菜、芽菜同埋一款深綠色的海藻類菜，唔肯定係乜，但幾爽幾好食，好似好健康咁。 爐邊蛋應該係免費，蛋漿加了泡菜，味道更豐富。 我哋還點了一個四色雜菜籃，無想到店員上菜時還幫我哋燒埋，感受高級咗。 菜籃有南瓜、翠玉瓜同三款菇，包括金菇同冬菇，全部都好新鮮。 店員幫啲菇搽咗牛油味，食到有淡淡牛油香味，滋味倍增。 韓式海鮮湯 $78 夠熱，鮮味濃郁帶點辣。 安格斯牛柳粒100g 牛柳粒的雪花紋路均勻，牛味香濃。 五花腩150g 好邪惡！厚厚的脂肪燒過後好香。 韓式醬烤雞肉150g 雞肉好新鮮好滑。 韓啤4支 如果飲唔晒四枝啤酒，可以換做汽水或者果汁拎走。 食完先發現，牆上面掛住圍巾，圖案仲好特別，用咗就唔使驚整污糟件衫。

下午二時嚟到，過咗午飯時間，較為清靜，唔多人。呢度嘅裝潢很有特色，以透花屏風間隔開用餐桌子，每枱食客有私人空間得嚟又唔會覺得焗束。 這裏清幽的環境令人進店已覺得心情輕鬆平靜。價格相宜，$58-$78不等。 中午12點至下午4點都有台式午市套餐供應。 我們點了兩個套餐，汁煮安格斯肥牛套餐配白飯及藥燉排骨配白飯。 汁煮安格斯肥牛套餐配白飯的餐湯應該係藥燉排骨湯，燉湯有紅棗杞子、淮山，好夠火侯。安格斯肥牛粒份量很多，好抵食，醬汁甜甜地，好惹味。 藥燉排骨套餐配白飯的餐湯應該係竹絲雞湯，有杞子蔘鬚，真材實料，飲完喉嚨好舒服。套餐的藥燉排骨湯好大碗，淨係飲湯都好飽。 每個套餐亦有三款前菜，包括金針腐皮、酸薑和泡菜。鹹甜酸辣都齊晒，好醒胃。 套餐的白飯係有質素嘅珍珠米。餐飲係杞子菊花露，夠清心。 喺度用餐真係養生又養心！

店鋪位於利舞臺廣場20樓，利舞臺廣場入口喺正時代廣場對面，十分就腳。從地下扶手電梯上一層，經過商店便見到電梯大堂，有電梯直達20樓。 上到嚟全層都係呢間酒樓，裝潢十分華麗。嚟到一點半，午飯時間，都比較多人，好彩店員都好迅速咁幫我哋搵到張二至四人枱俾我哋兩個人坐，座位很舒適。 兩點前落單可以點優惠點心。 落單後，食物很快便送到。 潮蓮燒鵝瀨一碗 $48 燒鵝皮好脆，絕對係皮脆肉香，估唔到酒樓都可以做到呢個水準。瀨粉還附有兩條新鮮菜心。 黃金炸饅頭 $18 呢個係優惠點心之一，熱辣辣，外皮脆卜卜，應該係即炸先有呢個效果，高水準，好抵食。 雞絲滑粉卷 $18 粉卷熱得燙口，好新鮮，粉皮好滑，肉涵香甜。 海味扒瓜甫 $18 都係優點心之一，清清地，健康之選。 鮮人蔘淮杞燉雞湯 $48 呢個廚師推介嘅燉湯，人蔘味濃，好夠熱，感覺好下火，仲附有好多湯料。 喺銅鑼灣呢個地段，可以舒適咁坐咗一個下午邊食邊傾談，由好多人坐到啲人散晒都冇俾人趕，哈哈，價錢又唔算貴，可以再來！

店鋪位於君怡酒店內，從地下扶手電梯上一層便見到。 甫坐下，店員便奉上一壺清茶及一碟鹵豆腐乾。 手工擔擔麵 $52 淡淡的辣味帶有花生香， 唔太食得辣嘅朋友都可以食。麵質爽彈幾特別，有別於一般的軟稔麵質。配料是典型的肉碎和花生，份量也很多。 鹵肉麵 $68 湯底看似平平無奇，味道卻十分濃郁，鹵肉是超多的，肉稔而且香甜，麵質跟擔擔麵的一樣。 口水雞 $78 口水雞都幾辣，辣中帶著的香味令人回味。唔食得辣嘅同行朋友都讚不絕口，還要將雞放入湯麵的湯中減辣，以求多吃幾件。涼涼的雞肉很鮮嫩，配菜有青瓜絲和花生，青瓜絲醮滿香辣的醬油汁，是伴麵吃的絕佳選擇。 鮮菌紅燒豆腐 $128 醬油汁好特別，嘅有蠔油的鮮味，又有麻油的香味，豆腐和鮮菌的份量十分多，我哋兩個人都食唔晒，還附送了幾條新鮮的菜心呢。菜心又爽又甜，豆腐很滑有豆香。 要特別一讚呢度嘅店員。我哋食唔晒問店員拎咗個外賣盒，店員送上外賣盒嘅同時還幫我哋用新嘅筷子將剩餘食物入盒，十分貼心和殷勤！

媽媽成日都話想食泰國菜，今日得閒就帶咗佢來呢間成日都好多人嘅泰國菜館。其實之前自己行街經過都想試，哈哈。 雖然已經晚上九點，但人龍都仲未散，等咗15分鐘左右先有位。有好嘢食，都值得等待一下吧！ 店內冷氣充足，從悶熱的街道走出店，即能一消熱氣。店面有兩層，我哋坐喺給地面嗰層。店面面積雖不大，枱與枱之間的空間亦很充足，坐得尚算舒適，不迫陝。 A01 泰式小食拼盤 小 $85 這個拼盤有五款小食 ，包括串燒雞、春卷、蝦餅和魚餅各兩件，以及一堆好多塊嘅蝦片。蝦片好香脆。串燒雞上面已塗上沙嗲醬，肉質彈牙，醬汁集香甜小辣於一身，十分惹味。春卷、蝦餅和魚餅可以醮碟上附上的泰式辣醬食。一盤有齊咁多款泰式小食，最啱二人撐枱腳，每款試一件，留返啲quota食多啲唔同嘢。 E11 馬拉盞炒什菜 $67 碟炒什菜都幾豐富，有芥蘭、椰菜、西蘭花、甘筍、秀珍菇、紅椒、蒜及薑。啱晒樣樣都想食少少嘅我。醬汁鹹鹹香香的，好啱送飯食。 i01 泰式炒金邊粉 $68 金邊粉煙韌彈牙，炒得夠乾身，配料有蝦、雞肉、豆腐乾、花生碎、蛋絲和芽菜。 j07 泰式墨丸湯河 $42 有四大粒𠝹咗花嘅墨丸，仲有蘿蔔、生菜、芽菜和芫茜粒做配菜。清湯好香甜。仲可以問店員拎傳統泰式調味架，加辣加酸更可口。 K01 泰式椰青 $38 食泰菜怎能無椰青，我哋叫咗個。椰青水滿到寫，超清甜，雪到好冰凍，爽！ 泰式木瓜沙律$1 因為食滿$200，可以$1點一款指定食品，四揀一。爽脆醒胃，有啲花生碎喺面，好香口，木瓜絲可以當麵咁食，但健康好多。 綜合食物質素果然不錯，怪不得咁多人幫襯，等下位都值得。

小妹一向嗜辣，川菜以辣見稱，當然啱晒我。呢度地方唔難搵，喺旺角行完街再過嚟好方便。 店舖外的小菜圖片好吸引，餐牌也是圖文並茂，選擇非常之多。除咗小菜，仲有重慶串燒，一次過可以滿足兩個願望。 串燒的價錢很實惠，選擇多之餘還有些很有特色。我哋當然都點了幾串食下。 燒菠蘿 $9 薄薄一片，一分為二，清甜多汁。 燒雞中翼 $12 有兩隻，一人一隻啱啱好。雞翼好大隻飽滿，外層燒得好香脆，雞翼肉質鮮嫩。調味粉好惹味。 燒金菇肥牛 $20 食串燒點可以唔食金菇肥牛，一串有四件，好抵。金菇完全包裹在牛肉塊入面，鎖住水份，食入口外香內juicy。 燒白鱔 $25 好多餐廳都冇白鱔供應，白鱔串燒更加罕見，呢度$25就食到，一串仲有三件。即叫即燒，好有魚嘅鮮味。 串燒可以揀辣度。因為同行嘅朋友唔係好食得辣，所以揀咗中辣，辣粉唔算太多，如果食得辣嘅朋友，不妨可以揀高層次啲嘅辣度，應該會更惹味。 我哋仲叫咗兩個小菜同一碗酸辣粉，估唔到除咗酸辣粉可以揀辣度，連小菜都可以揀辣度。 鐵板茄子 $70 份量都幾多，熱辣辣，好吸引。茄子厚切，好咬口，又唔會吸得太多汁，冇咁膩。 香蒜爆豬頸肉 $65 同餐牌嘅照片近乎一樣，好大碟。蔥蒜夠稔，好香口，豬頸肉夠爽口。送飯或送麵都一流。 重慶酸辣粉+花枝丸 $24+$6 ＄30好抵食，有兩粒花枝丸，配菜有好多新鮮芫茜，又有花生同炸菜，薯粉好彈牙。湯底雖然小辣，但係好香，忍唔住飲咗好多。 店舖雖小，但都算坐得舒適，仲有高清電視直播。酒樓格局，但係唔使加一，性價比高的晚飯選擇。

行街行到夜夜地，過晒晚飯時間，經過見到呢度仲好似好多人，店名又幾特別，最重要係似有辣嘢食，應該滿足到嗜辣嘅我，所以同友人一齊上咗嚟試下。 已經是晚上九點，都座無虛設，要等左一陣先有位，似乎有唔少捧場客。 原來呢度主打係火鍋，首先當然要揀番個湯底先啦，有15個選擇，款款都好有特色，指定鍋底可以雙拼做鴛鴦鍋，以較高價錢嘅鍋底個價錢加＄20就可以雙拼。要鴛鴦鍋可以一次試兩款湯，梗係開心啲啦。我哋揀咗招牌麻辣火鍋小辣同菜干豬骨窩。 雖然係小辣，辣椒份量都唔少。半個菜干豬骨窩已經有三大舊豬骨，好足料。豬骨肉仲好嫩滑入味。 火鍋採用電磁爐，可自行調教火力。 點完鍋底，店員送上調味盤俾我哋自己落鍾意嘅調味料。有成11款咁多。放晒自己鍾意嘅調味料入自己個碗度之後，店員就會收返個調味盤。 蘸料 $15 /一位 呢度嘅火鍋配料都有好多選擇。 鮮滑豆腐 $28 係原條百福豆腐。 白菜仔 $38 有一大籃，好新鮮。 川婆婆招牌紅薯粉 $32 好特別，扁身，但係好粗。滾耐啲都唔怕變漿糊。稔啲仲好味。 雜丸拼盤 $48 二人同行，極力推介之選。每款兩粒可以食多好多款式。 黑松露鮮蝦雲吞 $68 有六大粒。黑松露味好香，鮮蝦爽口彈牙。 藍妹 大枝 $32 食火鍋，飲番杯啤酒先夠完美。 有雜物架在餐桌旁，叫多幾款配料都唔怕無位放。 本來想叫埋塔菜、韭菜豬肉餃同美國肥牛，可能太夜，呢幾款全部都售罄。唯有下次早啲嚟先再試。

之前聽朋友提過呢間食店又平又特別，今夜嚟開呢區，便打算嚟填下肚，順便探過究竟。食店位置有啲隱蔽，九時多，週邊的店都好像關了，只有這還燈火通明。 店鋪不算大，但四四方方，也坐得舒適。兩旁是吧枱，我哋揀咗中間嘅方形長枱坐。兩邊牆身掛著精美的食物畫，有點日式風情。晚上九時許仍有不少食客。 一進店，全店彌漫好香串燒味，本來只係諗住食碗麵，見隔離枱啲串燒成品又香又精美，忍不住點了幾款串燒食下。 枱上放了點食物的紙張及筆，自行填好交給店員落單便可。 先來一碗麵！自選兩餸麵都係＄23一碗，呢個價錢實在係久違了。 蝦香卷+滷水雞中翼大辣咖喱汁米線$23 賣相不錯。雞翼大隻肥美又夠入味，肉質嫩滑。蝦香卷外層脆脆的，包著鮮甜蝦肉，第一次見車仔麵有呢個選擇，值得一試。大辣有好多辣醬，配埋咖喱汁湯底，雙重滋味。$23有這個食物質素，實在係無可挑剔。 串燒方面，先來了一客燒茄子。 燒原條蒜蓉茄子$24 一上桌已香氣撲鼻，除了外表有睇頭，還十分有内涵 。全條熟度均勻，茄肉好juicy。一問下原來燒茄子技術傳自酒店五星級大廚，用少油都燒到呢個效果。平民價錢，五星級質素。 金菇肥牛卷$18 一客有3件，燒香了的肥牛包裹著好大扎金菇，鋪上香香的調味粉，最佳配搭，好惹味。 花枝丸$14 一客有4粒，外層燒到乾乾脆脆，丸質彈牙，味道鮮甜。掂！ 眼見全店由兩位年輕人主理，由店面到廚房都一腳踢，十分忙碌。看到兩位年輕人，不怕辛苦經營店舖，為街坊提供大眾化價錢嘅高質素食物，感受到店主經營的熱誠，令人感到鼓舞，值得支持！