今日朋友請客話帶我去尖沙咀食海鮮🦞火鍋放題，我哋食5:00-7:30 $368/位（另收加一服務費），包含2.5小時火鍋放題、任食雞煲、海鮮拼盤、時令燉湯及火鍋湯底，另外我哋每人加咗$20可以任飲汽水🥤（啤酒除外）。 先嚟一壺湯，今日係海底椰鱷魚肉煲豬骨，好滋潤，好飲。 雞煲有3款口味，我哋揀咗韓式芝士雞煲。煲內除咗雞，仲有好多芝士同紫洋蔥，好香！雞嘅份量亦好多，味道剛剛好，好滑👍👍。 刺身拼盤，有北寄貝、希靈魚、牡丹蝦等…新鮮鮮甜。 湯底係冬瓜魚翅花膠湯底，嚟完湯底就上咗一盆霸王海鮮盆，有越南大虎蝦、澳洲大龍蝦、蘇格蘭大元貝、臺山奄仔蟹、新鮮鮑魚。隻鮑魚仲會郁架，好新鮮！龍蝦啖啖肉，龍蝦同蟹都有好多膏，食落彈牙鮮甜。 另外仲有各款肉類、海鮮、蔬菜選擇，我比較鍾意安格斯肥牛、黑松露墨魚滑，安格斯肥牛肥瘦剛剛好，好香牛味👍，黑松露墨魚滑，好香黑松露味仲好彈牙！放題價錢有海鮮、有雞煲、又有湯飲，真係一條龍服務🤣。

今日同兩個friend諗住去旺角上海街買嘢，點知佢哋太醒，帶我落錯車，跟住就熱死辣辣行到成隻嘢咁，喺行嘅途中，見到有間米線好多人，喺門口見到佢有個銅鍋裝住啲米線，好得意呀！所以我哋決定買完嘢要返返去食😂。 我哋去到啱啱仲有1張枱，Lucky😆!我哋叫咗2個主食+2個小食一齊share，我見店舖外keep住都有人等位同入座，我哋食完都仲係座無虛席，要讚吓自己，識揀👍。 蟲草花椰子雞米線 （+$8 轉雞髀）$68 好香椰香味，新鮮嘅蟲草花配木耳、紅棗同雞，好夾呀！雞好滑，米線軟硬度適中，仲要好大碗呀！湯底唔漏，食完一碗仲想食，推介👍，我覺得轉埋雞髀都只係$68，值得轉嘅，但係我呢個米線係用碗上，如果用埋銅鍋會更開心🤣。 豬扒雞翼酸菜飯 $62 豬扒鬆化，雞翼好入味，仲好滑添，酸菜有少少酸辣好開胃。 日式炸雞荷葉包 $40 我好鍾意食刈包架，可惜唔係度度都有得食，呢度加埋炸雞都只係$40，仲要有2件，我覺得好抵。炸雞好脆，肉嫩又多汁，配搭芫茜同秘制醬，食落好夾好香，芫荽控必食推介，秘制醬會有啲辣，唔食得辣嘅朋友要注意喇！anyway 我好鍾意呢個刈包。 炸脆脆蝦膠豆卜（5件）$32 呢個無得輸，我覺得一個人應該最少食5件🤣，超級無敵勁脆嘅豆卜包住超彈牙仲有原隻蝦嘅蝦膠，點泰式辣醬，超好食，簡直食到停唔到口。必點👍。 凍咸檸七喜 （跟餐+$12） 食咗咁多熱氣野，緊係要飲杯咸檸檬七喜，解吓熱。 熱檸蜜 （跟餐+$3） 朋友話好鍾意，仲可以自己選擇要1片定2片檸檸。 店鋪資料 🏢: 春城銅鍋米線 地址: 旺角砵蘭街175號地舖

老公揀完午餐食台灣菜，夜晚嗰餐仲唔輪到我揀😆。
今次我揀咗食串燒，我想食好耐架喇！呢間係我見到個friend喺社交平台post過，個場睇夜景好靚，啲嘢食又好似好正咁，今日有老公找數，仲唔機會嚟。


餐廳座位設計都係以吧檯為主，喺座位上可以睇到廚師烹調美食😍。場內燈光微暗，好有氣氛，我由5:30食到7:00，真係由朝食到晚🤣，香港夜景真係好靚。


打開menu，見到有Bon Omakase set，串燒都有Omakase，即刻心心眼😍。


我哋叫咗一個Bon Omakase set, 再加咗幾串串燒。

Bon Omakase set $480


包10串廚師推介串燒、特製燒飯團/梵特製雞湯素麵/梵特製迷你滑蛋雞肉飯 任選其1，雪糕


雞翼-雞皮燒到好脆，雞肉多汁👍


雞頸肉-我第一次食，好有驚喜，好滑又多汁，超好食。


雞肉紫蘇葉忌廉芝士-雞肉面有酸梅，再配搭紫蘇葉同忌廉芝士，剛剛可以平衡到食物嘅味道，配搭好夾，唔會覺得好漏。


豚肉紫蘇葉-估佢唔到，咁樣配搭，紫蘇葉味唔係好重，配搭豚肉，好好食。


鰻魚-鰻魚肥美，燒脆咗外皮，好香口。


牛肉蔬菜串/免治雞肉軟骨棒/雞腎/秋葵/露筍-燒得剛剛好。


特製燒飯團
飯團燒到脆卜卜，好似飯焦咁，好香口，再用紫菜包住嚟食，簡直係不一樣的飯團🤣。


單點


和牛沙朗 $70/串
牛肉油脂分布平均，食落香牛肉味。


牛脷 $40/串
正呀喂！期待已久，最愛嘅牛舌心，完全冇令我失望，好有咬口，好香牛味👍👍👍。


厚揚燒（炸豆腐） $35
豆腐超脆，堪稱外脆內軟，無得輸。


牛油燒帶子 $120
帶子鮮甜，好香牛油味。


前菜$40/位
鯖魚配搭青椒絲、洋蔥絲及甘筍絲，酸酸微微的味道，好開胃。


掠拌海蜇頭配青瓜片
海蜇頭爽口配搭特別醬汁，都係令人好開胃嘅前菜。


雪糕-可選威士忌味/抹茶味/榛子味
我揀咗榛子味，唔會好甜，雪糕內有榛子碎。


可口可樂 $40/杯


另加收10%服務費（前菜需每位計算）

老公放假，我哋諗住去灣仔行吓，我哋搭巴士去到菲林明道（軒尼詩道）巴士站，一落車，就見到呢間台灣菜，佢就話想食台灣嘢，就入咗呢間😂。 我叫咗魯肉飯、台灣腸、鹽酥雞（幾大食🤣），老公就要咗紅燒牛肉麵，唔輸蝕咁加多隻魯蛋😂。 魯肉飯 $69 肉燥有好多，肥美嘅豬肉加上香濃嘅醬汁，就係咁，我又食咗一大碗，份量好多，除咗肉燥之外，仲有配搭一啲酸菜粒，酸菜粒唔會太酸，好開胃，推介👍。除咗飯之外有一碗清湯，同埋有3款前菜。有日式小蕃薯、涼拌日式海草、日式蕨餅。 烤台灣香腸 $32 肉質飽實、味道適中。 鹽酥雞 $48 熱辣辣，好好食，脆得嚟又唔會好乾，肉質鬆軟多汁，對食比我更有要求嘅老公大人相當滿意。 紅燒牛肉麵 $92 麵有啲似稻庭烏冬，牛肉用咗牛肋條，肉質淋得嚟有咬口，湯底喺台灣嘅味道啊。 凍鮮草奶茶 lunch set +$14/杯 我揀咗半糖，味道剛剛好。

今日同亞女去咗安圃村嗰邊探親戚，走嘅時候，親戚介紹仲間cafe比我，話係附近，嗰度種咗好多好靚嘅植物，仲有好多寵物會去架。亞囡一聽到話有寵物，就話要去，好啦！放假去吓郊外享受一下大自然，都係唔錯嘅選擇。 係安圃村搭巴士3個站就到喇！方便！落咗車大約行8分鐘，都好容易搵。 入面真係有好多植物，有魚池，仲有3隻好乖嘅狗狗添呀！可以坐室內或室外，但而家天氣咁熱，緊係要坐室內涼吓冷氣啦！ 我哋叫咗一個沙律🥗、1碗麵、1個咖喱、2個甜品🍮、2杯果汁。 香草有機農場沙律 $58 啲水果好新鮮呀！有蘋果、新鮮菠蘿、西芹、青瓜、紫洋蔥、什菜，再配搭黑醋，沙律菜同水果非常鮮甜👍👍。 雪梨紅蘿蔔汁/菠蘿椰奶 $39 炎炎夏日，飲杯新鮮打出嚟嘅果汁🍹，真係透心涼😍。 特濃鮮茄封門牛柳擔擔麵 $98 店員話可以走辣，因為同阿女食，所以我就走辣，不過我覺得如果你可以食到辣嘅，有啲辣味會更加惹味。 咖喱牛肉配法包 $98 好鍾意呢個咖喱，有少少辣，牛肉用咗牛肋肉，好淋，咖喱配搭埋法包🥖，very good! 必食自家芝士cake/ 日式焦糖布丁 $48 我食嗰個係檸檬芝士凍餅，好有清新嘅檸檬味。亞女食日式焦糖布丁，唔會太甜。

喺元朗帶完亞女補習，經過見到一間新開嘅外賣店，門口個牌寫住咖喱雞飯$30，嘩！咁抵嘅！睇真啲，原來係清真菜😳，清真菜我又真係未食過喎。 睇吓個menu，發現佢嘅菜式有啲似西式，店員話係融入左香港人嘅口味，所以係新一代嘅清真菜。 佢話清真菜只係唔食豬肉，咁又ok 喎，同埋價錢好平，所以就買番屋企試吓，要撐吓本地小店💪🏻，如果唔食得辣，記得同店員講呀！ 我叫咗1個Pizza，串燒、炸雞同咖喱雞飯。 Chicken Tikka Pizza 9” $70 Pizza 可以揀厚批或者薄批，我就揀咗厚批，佢厚得嚟又唔會好似啲連鎖店咁厚，個批同配料都好Juicy，亞女好鍾意食。 串燒 雞翼/雞肉/羊肉/牛肉 $16-$18 串燒係即燒嘅，食到用咗好多唔同嘅香料去醃製，燒得剛剛好，我最鍾意就係佢嘅雞翼，又滑又多汁。 脆炸雞粒 150g $25 炸雞都係即炸，熱辣辣，脆卜卜。 咖哩雞飯 $30 呢個咖喱雞飯同平時嗰啲唔同，佢冇另外一個咖喱汁，佢用咖喱煮咗啲雞放係飯上面，飯就用咗印度長生米，另外配搭咗一包乳酪，用嚟加入咖喱雞飯食嘅，好特別啊！有食印度菜嘅感覺😍。

上次食完「寺」嘅甜品，念念不忘，所以今日同朋友去食lunch，順便去食個甜品，今次冇叫牛角窩夫，叫咗我好鍾意食嘅梳乎厘pancake。 香煎比目魚配墨魚汁意大利飯 $138 今日餐湯係蕃茄湯，但係我揀咗食沙律菜，扮健康🤣，比目魚墨魚汁意大利飯，上次嚟都有食過，比目魚煎得香脆，意大利飯質感好食唔漏。 全日早餐 $138 有大啡菇、肉腸、炒蛋、車厘茄、乳酪、煙肉、牛油果、牛角包窩夫、沙律菜，如果想追加煙燻三文魚就加$20。炒蛋好滑，牛角包窩夫好香脆、牛油果好creamy，原味乳酪面加上杏仁碎，味道配搭得剛好。 凍鮮奶咖啡 咖啡味香濃。 榛子焙茶梳乎厘pancake $148 好鍾意呀！疏乎厘pancake非常軟熟，焙茶味好香，唔會苦澀，味道配搭得好好，唔會好甜，好想食多個😂。 +10%服務費 📍店舖資料：TERA 元朗店（寺） 地址：元朗朗日路9號形點1期1樓1075號舖

今日真係超嬲，放工去咗天澤商場諗住食晚餐，天氣咁熱，唔係幾想食飯，最後去咗大囍，點知咁啱冇位，所以就買咗個外賣返屋企食，叫咗個肥腩麵，點知，七嚿牛腩俾咗四大件肥膏我，係全肥膏，有冇攪錯呀？我係要牛腩肥啲，唔係要肥膏囉！要肥膏使鬼買牛腩咩！ 上次買過一次又係咁，我以為佢咁啱得咁蹺，點知今次又係咁，真係好過份，你叫人哋點食呀？咁都做得出，啱啱放工，想食個晚餐都搞到唔開心，仲要食唔飽，真係唔會再有下次囉。

今日行街行得攰攰哋，又有啲口渴，經過一間飲品店，見到有得坐吓，就同friend喺度買杯嘢飲。 見到傳說中嘅鴨屎香檸檬茶，人一世物一世，咩都要試吓，我叫咗杯香水檸檬鴨屎香茶，朋友就叫咗杯熱星鑽芒果奶綠，仲加咗一個小食坐低傾吓偈。 香水檸檬鴨屎香茶 $40 本來好驚飲落口會有一陣鴨屎味，好彩，係無嘅🤣，入喉清甜甘爽，茶味香芳濃郁，配搭青檸檬，好解渴。有人問點解佢會叫做「鴨屎香」？傳說一：話啲茶樹種喺鴨屎土（黃壤土）上面，所以叫做「鴨屎香」，另外又有人話，係因為見茶樹下零星有幾堆鴨屎，所以叫佢做「鴨屎香」。真實係點，我就唔知喇🤣！ 熱星鑽芒果奶綠$32 奶綠內有星星型的椰果，滿滿芒果香。 鹽酥雞（小食） $36 即叫即整，熱辣辣，好酥脆，肉嫩多汁。 📍店舖資料：閑茶-元朗 地址：元朗朗日路9號形點1期1樓1087號舖

今日想同大家介紹一間西餐廳，我覺得佢嘅出品同佢個名一樣，咁有heart，話說今日同朋友出咗佐敦，中午時經過見到廟街有間裝修幾靚嘅西餐廳，咁啱隔離有途人行過話：「咦！呢間新開架喎，不如入去試吓！」，有啲興趣嘅我，都捧住一種行過路過唔好錯過嘅心態，跟住同個friend講，不如我哋都入去試吓😂。 我哋叫咗2個set lunch。 是日餐湯-意大利青瓜🥒薯仔湯 本來聽個名配搭好似有啲怪，但飲落又幾好飲，唔會有草青味，又唔會得個咸字，味道剛剛好，Good! All Day Breakfast $128 全日早餐嘅食物同平時出面嘅差唔多，有脆薯餅、煙肉、豬肉腸、蘑菇、粟米粒、炒蛋、沙律菜、煙三文魚及酸種麵包多士。 但呢間係我食過咁多間嘅全日早餐，覺得比較好食嘅一間，沙律菜好新鮮，好嫩，完全無苦澀味，配搭日式芝麻醬，好食。煙肉、脆餅好香脆、炒蛋嫩滑，豬肉腸、煙三文魚唔會好咸，肉質ok，值得一提酸種麵包多士，脆卜卜好好食，整體呢個全日早餐100分。 香煎澳州草飼肉眼牛扒（8安士）$178 叫咗5成熟嘅牛扒，火候控制得啱啱好，唔會過熟，牛扒好香牛味👍，薯條香脆，沙律菜新鮮好食。 熱抺茶鮮奶 +$20 叫set lunch 就可以+$20叫一杯$60以下嘅飲品，抺茶好香唔會苦👍。 凍焦糖鮮奶咖啡 $20 鍾意飲咖啡嘅我，唔會放過任何機會🤣，呢度嘅咖啡好香濃，唔苦澀，佢有好香嘅焦糖味，但唔會過甜搶咗咖啡味，相信係靚野。開頭送嚟，我係到諗咁細杯嘅，但飲落原來又唔係少喎，我食完嘢仲飲緊😂。 餐牌寫推廣期內11:00-2:30 不收10%服務費，不過唔知推廣到幾時喇！ 整體評價，我覺得食到好食嘅嘢好開心，食到廚師用心製作，食材新鮮，明顯係靚啲嘅材料，擺盤靚，環境舒適，味道好，一定會再去。 店鋪資料 🏢: Heart Bar & Restaurant 地址: 佐敦廟街285號地舖