係我概念入面 成功既甜品，係第一啖入口會有好幸福好幸福既感覺 呢度既梳乎厘班戟真係冇得輸 試過買現成梳乎厘班戟粉想試下自制 em..可能因為我係廚房終結者既關係 最後係變到一pat漿咁既 結論係，都係出去食開心好多 入正題介紹番今次點既食物先 主食 - 煙三文魚忌廉汁扁意粉 ($88) 賣相好靚，直頭靚過menu既相片，完全不存在「圖片只供參考」既說法 濕度控制恰當，唔會濕到有水咁，亦唔會乾爭爭 醬汁夠杰掛在意粉上 三文魚不帶腥味，不會過咸(本人有點怕有啲煙三文魚會腌得好咸) 甜品 - 心動榛子梳乎厘 ($92) 好靚既外型，望見已經流晒口水 有好濃郁既蛋香味，甜度適中，口感好綿密空氣感好重 但又不至於好似食空氣咁虛無，係實在同令人滿足既質感 超高分既甜品!  小蛋糕 - 士多啤梨Mousse Cake ($48) 同朋友二人進餐，一份甜品有啲唔夠喉就去櫥窗揀多個甜品 第一眼就比呢個士多啤梨形既士多啤梨蛋糕吸引住眼球 Mousse有好香果味，酸甜度調和得恰到好處 食完發現好像又更開胃了XD 飲品 - 抹茶鮮奶 ($42) 漸變顏色好吸睛，奶味夠重 味道雖只帶微甜，但都不會帶抹茶澀味 啱晒唔太鐘意太甜飲品既朋友 飲品 - 提拉米蘇咖啡 ($48) 將tiramisu既味道及元素以飲品方式逞現 仲有餅底用既手指餅添 我個人比較喜歡飲品頂既忌廉同餅仔 朋友愛飲咖啡就好鐘意呢杯 話咖啡味夠濃香 總括黎講，今次既點餐都好滿意 決定等屯門市廣場D字大店開幕時黎食多次!!

Running Pig專做韓式外賣，最近自取仲有八折！ 主廚係韓國人，係真正宗韓國料理呀！因為係外賣自取，所以上到去直接就拎得！拎前老闆好細心咁講解每一樣野係咩，要點樣食，好貼心！ 呢款係無骨炸雞粒，食落夠香口，仲有肉汁，唔會覺得好油～雞粒入面唔算太多脂肪，咬落係啖啖肉，好味阿！ 韓式炸魚糕嘅份量都幾多，食落煙煙韌韌，唔係好林果隻，上面有D糖，會甜甜地，惹味！ 雜錦薯條好大份，有齊薯角、薯格、粗幼薯條，全部都好脆口，絕對滿足到唔同人既口味～ 炸蝦天婦羅嘅粉皮唔會太厚，炸得岩岩好，食落夠酥脆，而且蝦嘅生熟程度啱啱好，咬落仲係彈牙～另外嘅年糕都好好食，好入味，正！ 最後係韓國飲品，揀咗梨汁同提子汁～食完呢餐感覺真是好像去了韓國，好好味！價錢算平，份量又多，非常豐富，可以一試！！

前排已經食過呢間，朋友話想食有大排檔，我就帶佢試試呢間，係好食㗎！估唔到仲keep到水準呀！

雖然呢到係大排檔，但係環境係好乾淨，又有冷氣，係幾舒服㗎。而且好多人，係信心保證，哈哈！得2個人，叫左兩個餸同啤酒。 呢款係水煮魚，勁大碗。裡面除左魚仲有粉麵，再加碗飯都好夠飽。睇隻色就知有幾辣啦，夏天食食到流汗好爽，哈哈。 另外叫左碟炒菜，真係好夠穫氣！炒蝦醬既菜係無得輸～再同友一人一枝青島啤酒，都係$25枝，都算平啊。

今日同友人食了阿久根和牛立燒店 這間店是自助燒肉形式。舖面面積不大，如不是疫情應該會頗逼夾，哈哈。 小編與友人叫了一個二人套餐 $388 雖然份量略不是很多，而且每件牛不算好大塊，但吃落口是感受到肉質及味道比平時吃的好～ 個人感覺牛舌是最好吃的～其他牛肉分類確實分別不大。 另外是燒起時油分略多，最好是隨餐的燒醬中和返。 同朋友另外叫了份串雞腎，份量還好，好細粒，味道ok 個人較喜歡隨餐送的飯，有加炸機蒜紫菜碎，令碗飯好食好多！

好開心！😆我個人就好鍾意食拉麵，聽朋友講有間係明星拉麵店，味道唔錯，介紹我去食😎 食完，又真係ok！雖然呢間係食和牛，但我唔食牛，所以我叫左雞肉食，都好好食！為大家介一介紹～🤩 呢款係慢煮雞肉湯拉麵，湯無咁濃既就$78一碗，濃D就$90一碗。我叫左濃既版本。首先要講下個湯底，聽聞係煮左一段時間既濃郁雞湯，白色底，睇得出好濃味！之後拉麵叫左煮軟身D，口感對我黎講係岩岩好。最後係款雞肉，又估唔到！雞肉係慢煮，煮到好靚，肉質好軟身，好食呀，再加少少胡椒，吊到味出黎，有雞肉最原始肉香，好食！食食下會有D膩，可能因為濃湯關係，呢個時候就要加D辣椒粉，正，即刻醒神，哈！

朋友之前黎過，話呢度燒野食每人$228，可以任飲任食，勁抵 呢到以市區黎講，燒烤場都算幾闊落，仲可以係室內打機同休息，算係幾高質！ 一開始職員會幫手開爐，幾nice。食物方面，呢度既種類都有好多，差唔多成百款，質素都幾高。個人最推薦海鮮類，超級回本，係必食！海蝦雖然係急凍，但燒出黎都好彈牙！另外蠔同扇貝都好有鮮味！ 燒烤必食既雞翼有好多味可以揀，有辣有唔辣，味道都唔錯。另外仲有漢堡扒、牛脷等等都幾好食！
總括黎講，去自助燒烤場乾走淨腳真係好正，又唔駛透爐，又唔駛買野搬野，食完唔駛執野就走得！下次想燒野食一定會再黎～

好開心，今日撞正朋友生日，可以食豪D。見呢間韓燒咁多like，就黎book枱食！食完真心，超級滿意，不論係食物質素定員工服務態度、上菜速度全部都好好，好快，又好食！

個人覺得呢間餐廳好適合聚會，因為每人既套餐價錢包括任飲茶水和任食。同朋友都係食肉獸，每款肉都叫左一份，仲叫埋海帶湯（韓國慶祝生日傳統）。肉方面，特別想強調佢地既豬肉加上秘製韓式醬汁醃製，超好食！叫左勁多碟～ 食到中途，店員推薦我地再另加錢去升級餐單，因為裡面有3A肥牛高級肉揀，仲會有海鮮帆立貝同羊扒，真心好正！

朋友介紹咗呢間小店Coffee Shop比我，話呢到嘅brunch 好正，尋美食嘅我當然要黎試下啦～ 一到門口，外面有壁畫，牆身文字、餐牌都係由自己寫嘅，好有心機。 點咗一份Everything Toast，有Smoked salmon, avocado, cream cheese等等。一上菜就知廚師幾有心機，牛油果花整得勁靚！打卡一流。Toast係好脆而薄身，加埋cream cheese 同salmon 一齊食係唔錯。 另外叫咗杯Matcha Latte，個人好鍾意飲呢杯，一黎唔會太甜，二黎有抹茶回甘味，讚！ 最後緊係食番杯自家製Gelato啦，點咗Lavender 同White Peach，相對較淡味既放外層。Gelato都真心要讚，食得出好足料，桃味係清甜，唔會好人工；而Lavender 仲要聞落都好香花味，食落算比Peach 濃少少嘅，隻色又靚，加分～～

捐窿捐喇搵美食，今次黎到博康邨！感覺格局、形式都同陳根記差不多，不過人流就相差一大截，四周即使係民居，環境都比較寧靜，侍應嘅服務態度唔錯，幾友善招待客人。 先睇餐牌，單係餐牌已經有好幾款，除左一般小菜，亦有蟹宴專設嘅餐牌，更有自助火鍋供應，供錢都好抵，不過今次先黎試試小菜先，哈哈。
今次叫左一共四碟，都係比較下酒嘅菜式：椒鹽粟米、避風塘豬肘骨、鱻潮小炒王同一品海鮮豆腐煲。  其中以避風塘豬肘骨同小炒王最深得我地歡心，因為味道偏重，送飯或者配酒，同一大班朋友食都好有feel！而且份量好夠，大大份，好夠食。
椒鹽粟米都做得好唔錯，果然椒鹽係百搭！要一讚嘅係出餐都好快，唔洗等太耐先有得食。 除左陳根記，大家不坊考慮呢間大排檔！

男朋友媽媽嬴左馬仔，請我地一齊去樓下潮福食蒸氣火鍋！一坐底，我地4人叫左個任飲任食蒸氣海鮮鍋套餐飲品選擇好多，竹庶矛根、汽水，連啤酒都任飲！

之後粥底方面我地擇左瑤柱准山，真係由生米慢慢蒸成熟飯，期待食完海鮮之後品嚐粥底既精華！海鮮唔包任食，每人可以任選四款海鮮加半隻龍蝦同乳鴿，仲要每人有一盎老火靚湯，食完以上食物其實都飽飽地。

4款海鮮我地擇左大元貝、蟶子、鮑魚同象拔蚌首先食乳鴿，乳鴿是剛整起,皮脆肉嫩, 整得好入味，連醬料都可以唔洗沾！而燉湯火喉十足，勁足料，味道不錯！

主菜終於上枱，每樣海鮮都非常新鮮，唔使添任何調味已經鮮甜無比！

龍蝦啖啖肉，蒜味好香，但又唔會遮蓋龍蝦既鮮，肉質都彈牙！貝殼盛盆有兩款蜆,比平時食開既大隻，鮮甜無沙！鮑魚走中式路線加了豉油同有蟲草花既香味，鮑魚夠爽口！而象拔蚌鮮甜爽口，蟶子鮮味非常，元貝亦大大隻，嫩滑無比！食得出全部海鮮都係高檔次，唔會因爲任食餐而降低質素。

食完海鮮已經飽飽地，但話明任食，就算飽都要繼續，叫左碟污糟雞，雞肉蒸完非常嫩滑美味，最後唔夠喉仲叫多碟！食蒸氣火鍋點小得馬拉糕馬拉糕係潮福必食既招牌菜色，糕身鬆軟，甜度恰當，又係要一點再點！

最後壓軸出場既係淮山瑤柱粥，粥身已吸收左海鮮既精華，煮左約兩個半鐘，粥底綿滑，味道鮮甜！就算飽到頂肚都食左2大碗。