今個sem break得果幾日，無得去旅行!!唯有豪食韓燒解下愁囉…

話明豪食，緊係揀d正野食。點左個濟州島黑毛豬五花腩黎燒燒，聽個名就個架勢! 呀姐仲教左我地唔同食法，可以好似韓國人咁用生菜包住配料醬汁同juicy既五花腩一齊送入口，又食到肉又食到菜,好健康，哈哈。不過都係就咁食最有肉感。韓燒呢家野太大油煙唔太岩我，我都係坐定定等人煮比我食算。點左個紅炆牛肋肉，熱乎乎原煲滾住上。夠熱不特止，味道真係一流，入味到爆，連配菜蘿蔔都浸曬汁。份量仲要夠多!!!!呢排生牛肉都有好多人介紹，見佢價錢都唔算貴，所以就黎個小挑戰。一上菜驚見大堆紅色肉類，堅係生勾勾咁食。其實都幾驚會腥，但食落口又唔覺好腥，反而好有涼拌菜既感覺。又唔會太冰，你知啦，食肉食到未溶既冰都幾失望…不過怕生既女仔就唔好試啦，因為都幾大碟…

藍色線延長左咁耐，都未有機會explore下，今日屎忽癢搭左去西營盤，順便搵下有冇平靚正美食。

金記冰室裝修真係好靚好vintage,引唔住吸左我地入去。睇左陣餐牌，伙記話得呢度有鐵板雜扒，所以就叫左個
海陸空鐵板餐 $90 有湯有野飲
先來個羅宋湯， 諗住佢冇咩特別啦。一飲落去就知好大分別!!呢個唔可以叫羅宋湯，應該叫羅宋濃湯，因為真係好似濃湯咁杰，超足料!!!鐵板上到黎jar jar聲，熱辣辣，正！啲扒多到一塊疊一塊。味道唔錯，雖然味道唔算突出，但勝在夠熱辣辣!!

兩條友食完唔係好夠喉，另外點多左個沙律。
沙律 $20你一定心諗我係咪玩野，沙律都要介紹。但呢個沙律真心要推，佢唔係就咁沙律醬撈埋一堆，佢仲加左蛋黃醬，超香＆好味!! 下次有機會可以試下沙律餐，嘆下tea，又正又飽肚!

難得dayoff,緊係要對自己好d!! 聽人講有間韓燒幾抵食咪黎試下囉~
黎到先叫左個熟食醫下肚！

紅燘牛肋骨 $98

呢個肉認真不得了，首先個汁好惹味，燘到個牛肋骨好入味，夠冧又好肉地，一咬落去真係有爆汁感覺。
黎韓燒唔燒返d野食點得，點左個無醃既牛肋骨。
特選牛肋骨(無醃) $168/350g

有咁正既牛，緊係要試下原汁原味啦！呢個燒肉版牛肋骨雖然冇燘既咁juicy,不過好有油香，配埋海鹽醬汁更加完美，更食得出肉汁鮮味。

再黎個鮮大蝦 $128

咪睇佢咁普通，隻隻都好大隻又好多膏。一燒起上黎真係勁香，咬落去啖啖肉，好彈口!!!

餐廳坐得好舒服，服務又好好，會再去試曬唔同野食!!聽講下午茶餐仲抵。

話說前幾日去完銅鑼灣血拼xd~行完一大輪之後又攰又餓……咁又比我地搵到間平令正既冰室!! 即刻睇下我地叫左咩好野食: 先黎個焗豬扒飯 $47

鮮茄豬扒用料都好足，好入味。我最鍾意係佢個炒底，同一個價錢，出面食到既只係白 飯底，但呢度係炒底!正! 再黎呢個真係要推介: 咖哩牛脷撈公仔面 $41

一上菜，個面已經完完全全比咖哩汁覆蓋，每條面都痴到d咖哩汁。
仲有d牛脷多到…呢度起碼都有6~7塊，塊塊都炆到好夠冧，勁正呀！作為牛脷fans,真係要比like。咖哩好有椰槳 味，微辣，唔食得辣既要小心啦！ 呢度仲有好多茶餐廳冇既特色飲品: 黑牛-朱古力雪糕加可樂，味道唔太甜

白雪公主

可以揀雪碧底或者忌廉底嫁! 成間店好有懷舊香港風味，可以係鬧市之中搵到間平靚正既餐廳真係好正!!

紅磡開左咁多特色食店，但賣韓國野既真係唔多。今日黎到韓點，舖仔細細主打外賣韓食，不過我地都選擇左堂食。一黎到睇睇個餐牌先啦！
都幾多野食揀，價錢又唔算好貴喎!(你知啦，而家出面食韓國野貴到hihi) #1 泡菜煎餅 $30

本人熱愛泡菜煎餅，簡單得黎又食得出間野既泡菜正唔正。雖然上碟賣相頹頹地，但味道絕對唔頹。我鍾意佢泡菜夠味得黎爽脆，煎餅又有泡菜辣辣地既味道，食得出佢係夠料既！ #2 水冷麵 $40 呢個係因為唔知叫咩好，所以跟左人地叫…

一上枱真係嚇左跳，咁多冰會唔會冇味嫁? 所以撈兩撈之後就即刻試番啖。

其實食落個味真係唔差喎。因為佢夠冰夠凍，所以個麵好彈牙爽口。不過個麵有d似蒟蒻咁，可能唔係個個都鍾意個味。不過有一點美中不足既係，個泡菜浸左水之後得番陣酸味，沖走左陣辣味…不過夏天食真係好爽，忍唔住一啖又一啖。 雖然間舖細細又唔係好起眼，不過都幾多人黎買外賣。而且價錢都好合理，服務態度仲超好，一定會再黎食!!

天氣無啦啦轉涼，最啱就係去打邊爐！知道阿一小廚出左個層層塔，趁咁好時機緊係要去試試！ 層層塔有兩個套餐，有四層或六層可以揀。我地揀左六層$666套餐。仲有不同既湯底可以揀(豬骨/人蔘/瑤柱粥)，KO完個塔就有充滿鮮味既湯底繼續打邊爐! 六層塔入面既食物包括:蜆，魚，蝦，蟹，帶子，鮑魚同雞。店家好貼心咁教我地要一層層蒸先可以保持食物夠熱夠新鮮，仲有指引提我地每層要蒸幾耐。啲海鮮蒸完出黎全部都好甜，就算唔點豉油都好夠味，又啖啖肉，正!!lol 蒸完野食就可以打邊爐，湯底充滿左海鮮肉汁。落埋牛肉，粟米，菜一齊煲，即刻整左個生滾牛肉粥嚕！比起平日任飲任食打邊爐，層層塔比較少肉類丸類，但反而顯得更清甜，少左份油膩感。想打邊爐又唔想咁熱氣，層層塔係個比較健康既選擇!