難得放假就去咗西灣河嘅Cs’ Bakery chill下～ （原來呢條街有好多間黃店架！） 黑松露雜菌意粉 $88 有淡淡嘅黑松露香氣，雜菌好新鮮，意粉唔會過淋有咬口，仲要勁多忌廉汁，好味～ 卡邦尼意粉 $75 最近戒緊食生雞蛋，呢款白汁煮嘅卡邦尼就啱晒我～煙肉令個汁有濃郁嘅咸香味，加埋大量嘅芝士，真係好邪惡～ Cappuccino +$15 可以自選拉花，嚟黃店緊係要拉返隻連豬～～超可愛！而且咖啡味道都唔錯啊～ 紫薯鮮奶 +$20 原來呢款都有得自選拉花架～我就揀咗貓～一樣好cute ~紫薯味唔算好甜，有奶香，啱晒女仔飲～ Cs’ Bakery 仲有好多靚靚cake，下次要再試～

第一次幫襯慢煮屋，喺疫情下依然要攞飛等位，可見佢嘅食物質素有一定嘅保證~ 試蕎麥麵定丼飯好呢？最後我哋揀咗... 慢煮火炙牛腹扒蕎麥湯麵 $88 慢煮將肉汁鎖住，炙燒後仲有股焦香味，加埋惹味嘅燒肉汁，塊塊牛腹扒都又juicy又有肉味，正~ 蕎麥麵揀咗清湯底，食落清新啲唔會搶走牛味~配料有油豆腐絲、冬菇，同埋好好味嘅糖心蛋，超滿足❤️ 北海道牛油海鮮蕎麥湯麵 $98 海鮮包括有蝦、魷魚、帆立貝、魚，全部都有炙燒過，非常香口！最特別係件魚塊，滑得嚟竟然有西京燒嘅味道，好好味~湯底揀咗咖喱味，加埋牛油勁香濃~🤤

受疫情影響，呢排多咗用food panda叫外賣，今次試咗尚亞軒，平歎港式嘅新、日、台美食，CP值超高呢！ 去骨海南雞飯 $50 雞肉軟滑，外賣都唔會過熟，有雞味，啖啖肉，配埋由蒜蓉、南薑等食材打成嘅惹味醬汁，同勁香香茅味嘅油飯，真係食到舔舔脷~ 日式鰻魚丼飯 $52 雖然只得半條鰻魚，但係肥美肉厚，好食過原條但薄過紙嘅鰻魚多多聲！最驚喜嘅係塊煎蛋，脆邊、半生熟，仲索埋啲鰻魚汁，正~~ 珍珠奶茶 $25 呢個有少少失色，可能怕外賣會浸淋啲珍珠，所以特登煮硬少少，但車手超快就送到了，所以我飲時有啲硬。不過個茶底好好飲，味道有啲似“純萃。喝”~~ 尚亞軒依家做緊滿$80減$10優惠，加埋food panda又有滿$100減$25嘅code（FP25MINS），真係好抵呀~~~

本身諗住喺荃灣donki買壽司食，點知比人掃晒...唯有改去海之戀商場新開嘅廿一堂試下啦~ 廿一燒豚丼配麵豉湯、美年達、大福 $65 半肥瘦嘅豚肉燒得香口，紅薑唔會太辣，配埋炒香咗嘅洋蔥，撈飯食不錯。麵豉湯中規中矩，大福餡有cream，唔太甜，味道不錯，唔揀大福的話可以揀泡菜。 廿一厚切牛舌丼配麵豉湯、忌廉、大福 $70 喺仙台食過厚燒牛舌真係返唔再轉頭，呢度嘅牛舌係就係厚，但仲好清楚睇到脷胎，好嘔心...食落係淋，但冇焦香味，而且仲有少少牛羶味添...

平時經過魚一都見大排長龍，今次難得人少啲，緊係要試下啦！ 我哋叫咗竹（火炙壽司）$98同燒汁牛柳飯配溫泉蛋$52~兩個set都有前菜（沙律）同三文魚麵豉湯，碗湯有大大件三文魚肉同白蘿蔔，好甜好好飲~ 竹仲有茶碗蒸，不過啲蛋有啲老，麻麻地~但啲壽司件件都好正~隔離枱新客見到都忍唔住問我呢set係咩，跟我嗌~~✌️咁多件壽司入面我最鐘意係左口魚邊，好肥美，燒到少少焦，好鬼香~唔係度度有得食架~至於珍寶蝦鮮同皇帝蟹肉棒我都勁鐘意，啖啖肉，大滿足！ 牛柳飯啲牛柳多到鋪滿晒碗飯，抵食+好食過吉x家嘅牛肉飯多多聲！味道拍得住日本食嘅牛肉丼，係個飯差啲啫~~ 全餐都係$165埋單，CP值太高了~~

最近鐘意睇住“地圖”幫襯良心小店~今次揀咗真台客~~ 但當晚人手不足，晚市只有set lunch供應~ 台式烤雞腿便當配冬瓜茶 $45 轉咗麵，配醬燒雞脾一隻，女仔食量就啱啱好~雞脾皮脆肉嫩，好味~冬瓜茶甜甜哋，夠凍夠解渴~ 台式炸排骨便當配冬瓜茶 $45 排骨炸到好香，不過薄咗啲，都係雞脾正啲~ 店內仲keep住播歌，free埋精神食糧比食客添~~

最近愛上翠興粥品嘅早餐，11：00am前有售，CP值高~ 雪菜肉絲米+多士+反蛋+火腿+熱菜蜜 $30 米粉口感煙韌，加上大量雪菜肉絲，夠味又夠飽肚。多士係成份早餐嘅亮點，多牛油，仲要成塊都咁香脆。其他正正常常，不過不失。 香葉肉碎河+多士+火腿奄列+熱菜蜜 $30 肉碎河偏油，但好香，味道濃郁，正呀~奄列都不錯。 之前試過食粥+腸粉+熱飲（$38），粥好清，蝦米腸好食，個人鐘意食西餐多啲~另外沙嗲牛麵味道都ok，但略咸~

繼續睇住地圖搵好西！ 今次試咗夏捌月嘅晚餐~ 威靈頓牛柳配薯菜（黑椒汁）$168 + 羅宋湯$0 + 凍朱古力$3 根據維基百科，威靈頓牛排是用上好的菲力牛排，大火煎上色。包上一層有鵝肝醬的蘑菇泥，再包一層火腿後，用酥皮包裹並刷勻蛋黃液，入烤箱焗熟而成。之前睇她她她的少女時代，成日聽到威靈頓牛柳，今日一試，又真係好好味！用酥皮包住軟嫩嘅牛柳，中間仲夾住脆口嘅火腿加添一層咸香味，正~ 配菜都唔馬虎，薯角香脆、紫薯香甜，大滿足👍 羅宋湯有少少辣，足料、好飲。 樽仔朱古力其實係係雀巢朱古力嚟，味道ok~ 煙三文魚蛋黃卡邦尼意粉 $82 + 跟餐 $20：酥皮忌廉湯 $18 +凍奶茶 $3 我好鐘意食卡邦尼意粉，所以試過喺唔同餐廳度食，呢間算一般啦~忌廉湯都係麻麻地，加$18酥皮好似唔太抵，樽仔奶茶夠香，唔太甜，不錯。

Aello最近人氣急升，買杯嘢閒閒地要等一粒鐘架！ 襯夜晚人少少，我哋就試咗新出嘅竽頭鮮奶$34，大大杯，竽頭同奶味都好出、好夾，㗳真啲仲有陣人情味添架~正呀喂~

成日經過Five Guys都見好多人幫襯，於是我哋都去湊下熱鬧。 花生係免費任拎嘅，少少咸，多多脆，好邪惡。 Cheese Burger $85 雙層芝士漢堡，toppings揀咗all the way，即係有齊蛋黃醬、生菜、酸瓜、蕃茄、煎炒洋蔥、煎炒磨菇、茄汁，同埋芥末醬，個包大到一啖咬唔晒，味道不俗，餡料豐富，不過雙層太飽，其實叫單層已經好滿足。 Little Bacon Burger $65 單層煙肉漢堡，toppings同樣揀咗all the way，但我食咗3分1都睇唔見同食唔出有bacon，以為比漏咗，於是問問店員。店員1都表示唔見bacon，店員2就指出夾雜喺醬汁同餡料之間有少量bacon碎，知道冇比漏就諗住thank you走人，點知經理就醒多兩塊bacon比我哋，哈哈~（心諗：既然加咗都食唔出，叫little cheese burger慳$10好過） Regular Fries (five guys style) $50 份量超級多！條條實心架，好似食咗兩個薯仔咁，雖然好味，不過叫份細都好夠食了~ Five Guys味道不錯，但我個人認為天水圍站隔離間木人巷更平更好食囉...