上個禮拜食完飯之後經海之戀搭西鐵，行商場嘅時候見到有間西餐廳又唔算好貴，今日就同朋友嚟呢度食下喇。入到去見到座位都非常之寬敞除咗有室內雅座之外，仲可以坐喺戶外，不過怕怕又再落雨，所以都係坐返室內就嘆吓冷氣。一入去嘅時候服務員都好有禮貌，仲同我哋介紹今日有半價嘅食物。 同屋企人揀咗美國穀飼安格斯牛肉眼，加$38就有個套餐，另外就用半價優惠要咗個豬仔骨。加$38套餐，除咗有龍蝦湯炸蠔之外仲有埋沙律同飲品，飲品佢話轉咗百香果紅茶我都覺得OK。
話咁快就上咗麵包先，我估應該係麥包，麵包非常鬆軟，有微微嘅甜味。而且係熱辣辣，唔會焗到個皮好硬好刮口，搽上牛油就好好味，兩個人食個包就啱啱好。飲品亦都送到叫咗佢小冰都真係唔會話落咗好多冰，而由於而家要用環保餐具，佢嘅紙飲管去到最後一刻都冇軟到。 食完麵包就開始上前菜， 餐湯可以揀龍蝦湯或者蕃茄湯，咁梗係緊龍蝦湯啦，然後就仲有兩嚿炸蠔同埋一份西柚沙律。炸蠔方面都係熱辣辣夠酥脆嘅，而沙律就有酸酸甜甜嘅汁令到更加開胃同埋可以解除返食炸蠔嘅飽咁。不過我覺得前菜最重要都係個餐湯，雖然呢個龍蝦湯冇龍蝦肉喺度，但係飲落去呢就相比起係更加有返海鮮嘅嗰種鹹味，唔會話太重茄醬嘅味道。呢個湯我覺得有驚喜，最重要係個湯都好夠熱飲完個湯之後個碗都仲有冒煙。 我覺得呢間餐廳佢上菜都上得好合時候，唔會話一口氣上曬所有菜式令到啲食物凍曬。首先上嘅主菜係肉眼扒，呢間店舖嘅暖碟做得好足，所以上枱嘅時候係feel到隻係暖嘅，而牛扒見到佢燒到有格仔紋，切落去嘅時候啱啱好係五成熟，唔會話有過熟嘅情況發生。咬落去肉味好多肉汁，唔會話好韌，亦都唔會話有好多根搞到好似咬橡筋同埋咬唔到咁樣。 佢嘅伴菜除咗有薯蓉之外亦都有唔少蔬菜例如蘆筍同埋蘿蔔等等，全部都係煮得啱啱好，例如蘆筍係啱啱好爽口，唔會話有叫過老嘅情況。薯蓉雖然唔會話好濃味，但係喺食完肉之後再食返一啖薯蓉，可以中和返口入面嘅油膩感。如果想濃味啲可以點佢配上嘅岩鹽同埋燒汁， 點咗岩鹽就會令到肉有多一種嘅鹹香，同令食牛肉嘅時候多咗一種層次感。而燒汁嘅調味做得好好唔會話搶咗牛嘅味道，反而我覺得係帶到牛嘅另一種本身嘅甜味出嚟。 食到差唔多豬骨仔都到喇，一上枱嘅時候見到佢係熱辣辣，除咗有薯條之外亦都有西柚沙律，方便食豬仔骨食到有啲滯嘅時候可以用嚟解膩。店員上菜嘅時候放低咗好大支茄汁，方便我朋友係咁點薯條，非常貼心。 豬仔骨煮得非常之夠時間，一切嘅時候，肉就已經好軟熟咁樣分離咗。當然啦食豬仔骨咁係要用手拎嚟食㗎啦，一咬落去肉類唔會變得好鞋口， 醬汁同肉嘅比例好適中，咬落去係啱啱好。醬汁一樣唔會話太濃味，可以食得出肉本身嘅鮮味同埋佢一絲絲肉嘅纖維。本身食牛扒都已經開始飽飽地食半份豬仔骨就真係啱啱好啦每人都可以分到兩至三舊豬仔骨。佢嘅薯條反而令到我同朋友更加驚喜，佢係中尺寸嘅薯條，仲有啲連皮添，咬落去熱辣辣， 食到薯仔嘅真味，我朋友就拎嚟點茄汁但我覺得拎嚟點牛扒嗰個燒汁就更加一流。  見到餐廳有做全日happy hour 優惠，有唔同嘅啤酒選擇，我見到前面張枱嗌咗成大桶啤酒都覺得好厲害，下次可以叫朋友三五成群嚟呢度飲返杯！慶祝生日都好適合，咁啱隔離枱今日應該有人慶祝生日，餐廳都播咗唔同版本嘅生日歌同埋喺生日蛋糕點埋蠟燭同隔離枱慶祝生日。 

之前有朋友送咗電影券比我，所以呢今日就用咗佢，睇戲之前梗係食返餐飽先啦，朋友話想食西餐，於是就帶咗我去地庫嘅一間餐廳。喺門口已經見到好有心機裝飾，而個櫥窗仲有好多蛋糕同埋唔同嘅啤酒，一於就入去食啦。一坐低侍應就畀咗qr code我哋落單，而見到碟呢都係唔係淨係普通白色碟，而係有唔同水果圖案嘅碟。朋友話好肚餓，所以話想食好多嘢喎。佢就見到又唔同嘅套餐，佢就計過pizza餐都好抵食，所以就叫pizza啦，個餐仲有沙律湯飲品同埋兩個主食。等嘢食嘅時候都留意下呢度嘅裝飾都有唔同例如有畫同埋有花，打卡真係一流。見到隔離枱生日仲有生日蛋糕同埋即影即有相影添。話咁快慢煮雞胸日式胡麻沙律已經嚟到，一見到醬汁已經畀得好足同埋有好多唔同嘅蔬果，例如粟米，車厘茄，沙律菜同埋有迷你蘿蔔等。食落去非常之爽口，而且隔水隔得好好，唔會溝稀咗啲沙律醬，唔會話係好梅嘅菜。而我特別欣賞佢個雞胸，完全顛覆咗平時雞胸好嚡嘅感覺。咬落去非常之軟身而且雞味都好足。溝埋芝麻醬就非常之惹味！餐湯方面我同朋友都加咗錢要龍蝦湯，上菜嘅時候已經見到佢有用淡忌廉拉花，所以賣相都好不錯，一用匙羹畢落去嘅時候，仲見到又好多嘅蝦肉，飲落去唔會係死鹹，飲完之後要係咁飲水嘅味道，而係飲得出嗰種鮮味。餐包係蒜蓉包，我覺得佢落蒜蓉牛油嘅份量適量，啱啱好咬落去嘅時候有微微嘅蒜香味，唔會話食完之後好驚會臭親隔離，而且佢呀烤嘅程度啱啱好，唔會話咬落去會刮傷個嘴。拎嚟點湯或者就咁食都好好食。食到一半嘅時候煮菜就到，係波士頓龍蝦占米多黑松露闊麵，一見到龍蝦就已經流晒口水上面仲有啲魚子醬喺度。龍蝦肉唔會焗到好老有佢嘅蛋口，而且上面嘅芝士汁唔會話過度喧賓奪主而蟹籽同埋魚子醬就用嚟增加口感，配落去煙靭嘅闊條麵就好啱啦。闊條麵吸收晒龍蝦醬嘅汁，食落去非常之惹味，意粉仲有唔同種類嘅菇配搭返就會健康好多。其實食完意粉都已經開始有啲飽，然後主角pizza就出現啦。今次我哋叫咗招牌明太子海鮮薄餅。佢嘅明太子汁唔會話辣所以唔食得辣嘅，我都食到入邊除咗有三色椒，洋蔥之外，海鮮方面有小龍蝦，吞拿魚，煙三文魚，蟹柳等。佢係薄批，所以呢就唔會越食越肥膩，有龍蝦嘅爽口，食嘅時候就會聞到煙三文魚同吞拿魚嘅香味，再配上木魚同紫菜碎。食落去口感就豐富多兩倍。。Pizza嘅每一個部份都鋪滿晒材料，所以就唔會話一邊有另一邊冇嘅情況出現。本身都已經飽晒，但係女仔總有一個甜品胃。所以就加咗一個柚子芝士蛋糕。柚子芝士蛋糕軟硬適中，啱啱好唔會越食越滯。而佢隔離嘅馬卡龍餅又係一咬即斷，唔會硬到好似石頭咁。而擺盤嘅朱古力熊仔餅同埋綠色餅乾脆口得來又有另一樣嘅風味。店家仲好貼心除咗士多啤梨醬之外，仲有另一款醬俾你去點又可以豐富咗個口感啦。最後飲品，我同朋友分別叫咗蜜桃果肉芝士奶蓋同活乳酸覆盆子梳打，奶蓋係相對清爽，撈埋蜜桃茶飲就非常之夾，而蜜桃嘅果肉亦都唔會甜到好似化學味咁樣。梳打方面，朋友就叫咗少甜，一方面話梳打好夠氣，而少甜得來真係做到少甜嘅效果。下次就可以試吓佢嘅海鮮拼盤。

約咗朋友仔去佢屋企打pubg，打機前當然要醫飽個肚仔，但係出面街有啲熱，朋友就叫去一間附近幾出名嘅海南雞飯上去佢屋企食。去到門口見到係一間主打星馬菜嘅餐廳有喇沙同侵侵去到海南雞飯都有，甚至海南雞飯都有兩款。見到一個係黃油雞，另一款係走地雞，因為依排要減肥，所以店員就介紹咗走地雞俾我，朋友就話要香煎豬頸肉湯米，另外我就嗌多咗豬肉同雞肉串燒。見到依家餐廳應該都有啲名氣，落單嘅時候都見到佢哋嘅外賣機係咁響。見到佢其實有一人便當餐，不過朋友屋企有嘢飲，所以就唔加嘢飲了。
等咗大概10分鐘就已經可以攞走店員嘅包裝技巧都好好，一個袋就已經載晒咁多樣嘢，放得好平均，所以我拎過去朋友屋企嘅時候都冇任何倒瀉嘢嘅情況出現。
打開個盒，所有美食都好香，份量都好足。
先講豬頸肉米線豬頸肉米線有格開到，所以就唔會變得好腍，而湯應該係豬骨湯，係咁飲都唔會覺得好口渴，入邊有幾粒魚蛋同埋豆卜，豆卜索晒湯汁，魚蛋都係彈牙嘅。豬頸肉就肥瘦適中，肉味好重，唔會話有雪味，而且烹調得好適中，一咬即斷，唔會好韌同埋好柴，食落去仲有豬頸肉嘅焦香味。
然後講海南雞，冇其他海南雞嘅外表咁金黃，但係佢做到皮薄肉滑，冇平時食咁多海南雞咁多啫喱喺度，咬落去雖然唔算話雞味好重，但係食得出佢嘅甜味，而且雞肉亦都好嫩。反而就係因為佢肉味唔算話太重，所以點唔同嘅汁就有唔同嘅協同反應，佢辣汁方面有啲似泰式嘅酸辣汁唔算好辣，但係點一點之後就為呢個夏日帶嚟清新嘅感覺，而薑蓉呢佢就磨到好細緻，就唔會咬落去又好辣嘅情況發生，豉油就唔會算好甜，就咁單食都可以。雞飯又好香嘅雞油味相對上就唔會太重嘅香茅味，食落去軟硬度啱啱好。雞湯非常清甜，而且入邊仲有薏米。
最後講講個沙嗲串燒，沙嗲醬非常香口咬落去仲有一粒粒嘅花生增加口感，豬肉同雞肉都冇過熟嘅情況發生，口感亦都係非常之爽口，尤其雞肉嘅薑黃粉醃得非常入味，值得下次再買嚟食！

愛打卡的朋友發掘到一間影相一流的餐廳，所以帶我嚟到觀塘翠屏河畔的Be Leaf晚餐。喺門口已經好有打卡嘅感覺，門口嘅梳化位好適合拎嚟打卡，裝修比到人一種好放鬆嘅感覺，入到去見到佢嘅枱都好有復古嘅感覺，入面仲有一個打卡位，好似係樹洞入面生活嘅感覺，環境舒適，如果唔係望見到出面工廠大廈嘅景觀，以為自己真係置身喺一個西方嘅小村莊咁樣。點餐方面就用咗QR code落餐咁就可以知道有啲咩材料係入面！叫咗香煎北海道刺身帶子黑蒜黑松露野菌忌廉意大利飯福袋，用腐皮做成袋子包裹意大利飯，配上帶子和黑蒜伴以西式蕃茄汁。出奇地腐皮與意大利飯並無違和的感覺，加上意大利飯恰到好處的芝士口感，較之傳統中式腐皮卷別有一番風味。本身就咁食佢嘅意大利飯就已經覺得好夠creamy，入面有菇同埋洋蔥等等所以口感非常豐富，到撈蕃茄汁嘅時候反而又會變得酸酸甜甜同好開胃，有兩個口感，然後意大利飯和腐皮一起咀嚼時又是另一番滋味。黑蒜會係甜甜地，唔會好似平時嘅生蒜咁爽口，但又唔會有平時生蒜嘅嗰種蒜頭味。另外帶子煎得非常好外面煎得好金黃而入面非常之嫩口。 第二道菜是香煎法國鵝肝伴焦糖蘋果，一見到塊鵝肝都好厚身，夠足料。鵝肝外脆內軟，唔會有過熟嘅情況，十分惹味香而不膩，入口柔軟，為整道菜增色不少。佢好巧妙咁樣用咗士多啤梨同埋上面嘅蘋果去中和咗鵝肝嘅油膩感。蘋果又係煎得啱啱好唔會話煎到好乾，咬落去啖啖滿足。 等待甜品的期間淺嚐了杏仁特飲，配上曲奇及雲呢嗱口味雪糕，有認為相比之下雲呢拿雪糕嘅尾會畀杏仁味更加濃，不過仍然食到一粒粒杏仁嘅口感同埋沙冰嘅感覺，唔會因為放耐咗而變到好水，係炎炎夏日的消暑之選。朋友話飲到最後將啲曲奇、雲呢嗱同埋飲品撈埋係最好飲。我就揀咗Ocean Paradise，係清新藍橘配荔枝乳酸，一上枱就係我最鍾意嘅藍色，飲落去酸酸甜甜，洗走夏日嘅鬱悶感，唔會話好大陣化學嘅甜味，仲可以透過佢嘅檸檬再加重酸味。來到壓軸的甜品泰鍋心，入面有桃膠，雪燕，movenpick楓糖合桃雪糕，意式奶凍，七彩芋圓，同埋牛角包窩夫，一上枱已經見到好有仙氣，用「阿拉丁神燈」可以加強雲霧繚繞嘅特效，再用泰國奶茶倒落去，令所有食物都可以有奶茶嘅味道，而且全部都好夾，芋圓大大粒，雪燕爽口，奶凍比較杰身，溝埋奶茶就啱啱好，牛角包窩夫好夠鬆脆，但因為雪糕變水會快啲溶所以一定要快啲食咗佢，個雪糕movenpick就一定質素有保證喇，確實如菜式介紹一樣是打卡必選。份量連同前兩道菜份量剛好，飽饗而歸，下次再食下佢唔同嘅菜式同再繼續打卡先！ 

早幾日食過九展嗰間中菜館嘅時候，見到枱上面有一個單張係介紹四樓嘅餐廳，望落去有空中花園，同埋係寵物友善餐廳，所以就第二日就去試吓。入到去見到裝修都好舒服，座位都係好寬敞，行出去空中花園都係好寬敞，而且有冷風機，唔怕熱親，要讚讚餐廳唔會話有狗毛或者好污糟，鼻敏感嘅朋友都冇事。 餐點方面，佢有唔同嘅選擇我就揀咗個輕盈版嘅，不過都唔少嘢食㗎，又有餐湯餐包等等。

餐湯係忌廉蘑菇湯，湯碗size。不過當中亦都可以見到好多嘅蘑菇碎喺入邊，所以其實都好足料。味道同口感方面，湯嘅口感非常之順滑，好易入口。調味亦都適中，唔會太鹹，亦都唔會太淡。口感就有啲驚喜啦，淡淡都可以食到蘑菇碎，而且蘑菇嘅味道亦都好香好濃郁，味道值得一讚。 餐包有唔同款，同時附上一碟牛油。值得講吓嘅係餐包嘅溫度，侍應俾我哋嗰陣時熱辣辣，甚至有啲辣手，令到夾上牛油嘅時候，牛油好快溶化喺包入邊，食落暖入心。餐包口感亦都好軟熟。 健康之選套餐其實就係一個沙律，配一個三文治，而沙律、三文治嘅包、包入面嘅配料就可以自訂。

雜菜沙律（青瓜，粟米，車厘茄）雜菜沙律佔咗成碟嘅一半，份量都好多㗎，除咗有沙律菜，當中亦都有青瓜絲、粟米、同車厘茄。以上嘅食材都非常之新鮮，沙律菜同青瓜絲亦都好鮮甜爽口，有refreshing 嘅口感同味道。可能都係沙律醬比較少嘅原因，令到成個沙律冇咁heavy。 忌廉芝士醬配煙三文魚就係成個三文魚嘅餡，煙三文魚有兩大塊，每塊都有少少厚度，唔會薄過紙咁。煙三文魚嘅味道方面，三文魚嘅顏色呈現粉紅色，味道鮮甜，口感煙韌。同時亦帶着少少煙熏味。煙三文魚上面仲有啲忌廉芝士醬，不過呢啲忌廉芝士醬味道較淡，口感滑溜，所以並唔會搶咗煙三文魚嘅味道。

意大利包作為成個三文治嘅包面同包底，其實都好大塊，食完係真係有飽肚嘅感覺。味道同口感方面，意大利包比較甜同埋軟熟，不過同時其實佢亦都有烤過，所以其實表面亦都有脆脆嘅口感，外脆內軟，就咁食個包其實都好好食。

我就叫咗芒果莎莎配蟹肉沙律嘅牛角酥，芒果嘅份量都好多而且每一粒芒果都係切到一粒粒所以好容易入口唔會話食落有筋，芒果嘅調味都好好唔會太酸亦都唔會太甜。佢哋嘅配菜除咗生菜之外，都有其他嘅蔬菜就唔會話好孤獨一味，而佢嘅蟹肉沙律食落去都真係食得到蟹嘅味道，唔係話係全部蟹柳，食落去你會見到一絲絲嘅蟹肉，有海鮮嘅鹹香味，除咗蟹肉同埋沙律醬之外亦都有其他嘅配料撈落去，例如青椒同埋紅椒，食落去十分之爽口， 每一啖咬落去都覺得好豐富，唔會話有肥膩嘅感覺。牛角包係有輕輕咁樣烤過所以亦都係有脆口嘅感覺。 佢嘅凱撒沙律上面嘅麵包脆脆非常之脆口唔會話腍晒，而佢嘅煙肉同埋唔會話太鹹，沙律醬嘅比例都啱啱好生菜亦都非常之新鮮，食落去覺得係十分之健康，唔會話覺得係過夜嘅感覺。 甜品係麵包布甸，都係以熱辣辣嘅方式上枱，上面仲有麵包，提子乾同士多啤梨乾做配料。大細就同蛋撻一樣，唔會太多，唔會太少。麵包值得一提，非常之香脆，同時上面都有好多舊。下面嘅布甸味道方面，蛋味濃郁，奶味香濃，口感軟嫩。 飲品都係叫咗凍檸茶同埋凍奶茶分量都係好足夠，最後離開嘅時候見到小狗「朱古力」，十分之活潑，令我好想下次再可以嚟見下唔同嘅狗仔！

早幾日要去九龍灣展貿做啲嘢，所以晚飯都決定喺嗰邊食埋。見到喺大堂有一間食潮州嘢，所以就依間啦。入到去見到環境都好寬敞，坐落去都覺得係乾淨嘅。店員俾咗QR code我哋自己落單，亦都有比一啲唱牌，我哋睇見到都有唔同嘅菜式同埋套餐。不過因為我同朋友得兩個人，所以就散叫。

啫啫蝦乾蝦醬通菜成碟通菜非常之大兜，同時上菜嗰陣時熱辣辣，聞到好大浸蝦醬味，風味十足，令人食指大動。味道方面，除咗有大量通菜同埋蝦乾之外，仲有好多蝦醬同埋肉碎，呢啲肉碎同埋通菜都充滿着蝦醬咸香嘅味道，十分有風味。通菜食落亦都新鮮幼嫩，唔會煮得好老，咬落爽脆。 講講個湯，粟米魚肚羹非常之大碗，飲晒真係好飽肚。味道方面，調味適中，打芡打得非常好，唔會話成煲嘢覺得好膠或者太水。值得一讚嘅地方係魚肚非常之大塊，而且口感非常順滑，味道清爽冇腥味。感覺充滿着膠原蛋白，再加埋蛋花，令口感更豐富。佢都有俾埋胡椒粉等食客自己落，所以就唔使怕唔食得辣。
芝士蝦球伊麵同樣大碟，蝦球嘅大細都好夠大隻啖啖肉。伊麵嘅芝士汁，亦都好多，令到成個麵都充滿濃郁嘅芝士味，誠意滿分。味道方面，蝦球口感彈牙爽滑，味道清甜。芝士伊麵麵質扁身，口感較軟，所以非常之容易咬開。加上每一條麵都充滿着邪惡嘅芝士汁，芝士汁亦唔會杰撻撻，令每一啖麵都有淡淡都有芝士味，令人食唔停手。 甜品係反沙芋頭，依個要同職員落單，就冇得Qr code落。反沙芋頭其實就即係將砂糖均勻咁包係芋頭外層，之後不停翻炒，直至砂糖變成一層外皮包着芋頭咁。成碟反沙芋頭有足足八舊，真係都差啲食唔晒。味道方面，上碟嗰陣時舊舊都熱辣辣，雖然有啲辣口，但熱力令到砂糖外皮更加脆口同香甜，芋頭亦都好甜，同埋軟滑，外脆內軟，令口感更豐富。而且個砂糖皮唔會話太厚令到面太膩嘅感覺。 總括依度嘅水準都好唔錯，下次會再想試吓食佢嘅雞同其他湯！

同朋友慶祝生日，朋友話睇中咗間西餐廳，咁就跟佢主意，餐廳喺APM附近，行過去都好方便，見到星期日嘅都係單點嘅嘢食，咁就可以同朋友想食乜就食乜。

先叫一個黑松露白菌湯，佢係用一個大嘅咖啡杯裝住。表面就將湯打成泡沫，下面就係湯，上枱時熱辣辣，飲落暖入心。味道同口味方面，黑松露嘅味道比較濃郁，令到成碗湯都充滿着黑松露嘅香氣，非常之香郁。泡沫撈埋啲湯入口亦都非常之順滑。
小食叫咗薯條（加黑松露醬），薯條非常之大碟，份量極之龐大，兩個人都差啲食唔晒。口感方面，薯條全部都炸至金黃色，佢哋嘅薯條係比較幼但香脆可口，冇一條係淋嘅，而且薯條上面亦都有啲皮喺度，更加有風味。同時亦都唔會非常之油膩。調味方面，每一條薯條亦都充滿着鹽嘅鹹香，風味入足，加上濃味嘅黑松露醬，令到薯條充滿香味，更食到唔想停口，好貼心咁比多咗醬，唔會怕唔夠醬。
主菜叫咗美國1855安格斯肉眼牛扒，叫咗5成熟。另外叫咗燒西班牙伊比利亞豬鞍。佢哋分別都係有一個鐵板仔咁樣上枱，而且下面都會再有蠟燭保溫。醬汁方面除咗提供燒汁之外，亦都會有青醬同埋粗鹽。
牛扒每一塊都肉質均勻，而且切得都非常之厚同大件，所以其實一碟都可以好飽肚。味道方面，牛扒肉質鮮嫩多汁，油花分布均勻，每一件牛肉中間都呈粉紅色，唔會話Overcooked。牛扒入口即化，脂肪同肉嘅比例大概7:3，牛肉味亦好香濃，其實唔使點汁都得。
伊比利亞豬鞍份量同肉眼扒差唔多，除此之外仲有一條ribs，都好好用所以我自己都拎埋嚟食，中間都有肉，鍾意食就唔好嘥咗佢。味道同肉質方面，豬肉同樣肉質鮮嫩，相信應該曾經慢煮過所以肉嘅顏色都係比較粉嫩，而且多汁，每塊唔使點用力就可以咬到。除此之外，豬鞍肉本身仲帶少少炭燒香味，食落風味甚佳，同樣咩醬都唔使點都可以好好食，如果係落燒汁嘅話就會增加咗個肉味，青醬就會清新啲。
甜品叫咗一番宇治抹茶梳乎厘班戟配牛奶麻糬。呢個甜品亦都非常之大碟，而且飽肚。不過製作需時20至40分鐘，想食就可能要留意吓啦。其實驟眼睇，就係一個宇治抹茶cream，加上兩件梳乎厘班戟，班戟上加上一塊牛奶麻糬，再外加兩份紅豆抹茶蕨餅。但當然食落就唔簡單！
味道同口感方面，梳乎厘班戟本身都微甜，加上口感煙韌，滑捋捋嘅牛奶麻糬，其實味道已經甜而不膩。不過加上宇治抹茶糖漿之後，反而就有一濃濃嘅抹茶甘香味蓋過返班戟嘅甜味。味道變化非常之豐富。抹茶cream同糖漿苦而不澀，味道雖少少苦，但口感柔順，所以好易入口。綠茶蕨餅，口感軟滑，煙煙韌韌。喺牛奶麻薯嘅下面有紅豆喺度所以就會中和返苦澀味，令到佢味道甘而帶甜，一甘一甜，非常匹配，同時可以沖散糖漿同cream帶嚟嘅苦澀味。整體嚟講好適合綠茶控嘅朋友！

飲品分別叫咗Cheapest Flight同雜莓乳酪碎冰。前者用咗菠蘿、橙、青檸同梳打水製成嘅特飲。份量都唔細杯㗎，飲落好清新。味道方面，呢杯特飲其實就好似雜果賓治，非常之消暑解渴，而且開胃。好適合食呢啲煎炸嘢嘅時候飲，飲落非常之清爽同refreshing。梳打水氣泡量亦都非常之足夠，令成杯特飲口味更上一層樓。而另一杯佢嘅甜度非常適中,唔會話有種化學嘅味道，沙冰亦都打得好勻循，唔會話食到好大粒冰嘅感覺。飲落去十分順口，就算食飯食到最尾，杯嘢飲都唔會變曬水，上面仲有幾粒藍莓都好好食㗎。 

見到其他客人又叫到烤雞，份量都唔少，下次就嚟試下呢個啦。

最近朋友話想去一間餐廳打卡，話嗰度有好多好靚嘅花，所以我就跟住佢去啦。入到去見到天花板有好多唔同嘅花喺度，窗邊亦都有唔少嘅花，牆上都有外國嘅景色令到自己真係好似置身喺外國一樣。入座後，店員就會畀餐牌同埋喺枱上面放上蠟燭，蠟燭係有香味嘅，而且每一款都唔同，似置身唔同嘅花海一樣！見到隔離枱嘅餐點都好大份所以就擱置嗌咗個意大利飯同埋意粉去食再加錢要咗個餐，包埋餐湯，餐包同埋飲品！ 見到佢上枱嘅餐點都係好精緻，上枱嘅時候見到係兩個大杯同蒜蓉包一齊上，如果杯就係用長頸鹿嘅花紋，打卡一流！而其他菜式都係用個盤去上，然而喺隔離放上假花，增添浪漫感覺！
  是日餐湯係南瓜忌廉湯用一個大杯裝住，上枱時都幾熱辣辣㗎，份量非常之充足。味道方面，南瓜嘅香氣同埋甜味好突出，香甜濃郁。湯嘅口感亦都好rich，好creamy，亦都飲落去會都到南瓜蓉嘅感覺。調味亦都啱啱好，唔會搶咗南瓜嘅甜味。 餐包係蒜蓉包就有4塊。味道方面，佢唔似出面咁樣係打爛曬啲蒜蓉，而係會有啲蒜粒喺上面，而且佢嘅牛油應該係再有特別調配過，相比平時出麵食嘅蒜蓉包更加深色，蒜蓉味香口，酥香惹味。不過麵包就唔會烤焗或者油炸，所以就唔會好似平時出面食嘅香脆，反而口感同食牛奶麵包一樣，柔軟鬆化。 主菜就叫咗日式原條鰻魚意大利飯，鰻魚有成隻碟咁大條，而飯嘅份量就都足料啦，一個人食嘅話一定足夠。除此之外飯底仲有翠玉瓜，少量沙律菜，及大量木魚碎。鰻魚方面，肉質肥美紮實，啖啖肉亦都唔會食到有骨，而且佢燒到唔會話好乾柴，燒得啱啱好。蒲燒鰻魚汁亦都令成條鰻魚好惹味。意大利飯方面，佢都唔會煮至太濕，米飯口感煙韌，甚至吸收咗鰻魚汁嘅甜味，加上少量菇類，令到成碟飯雜菌香氣迫人嘅同時，亦散發住鰻魚同鰻魚汁嘅香味。煙韌嘅飯，再加埋爽脆嘅翠玉瓜同埋菌令到成個口感豐富咗。 法式蟹肉蝦膏汁扁意粉份量就同鰻魚飯差唔多大碟，蟹肉亦都落得好慷慨，表面已經見到好多蟹肉碎，同時仲有少量沙律菜，有時仲食到蝦，蜆同八爪魚添。味道方面，海鮮嘅鮮甜味可以講非常之濃烈，佢嘅蝦膏汁蝦味濃郁入味，用嚟撈扁意粉一流。蟹肉鮮甜。扁意粉亦都好彈牙，加上濃烈嘅海鮮鮮甜味，令人想食完再食。 飲品方面我同朋友都各自嗌咗一杯梳打，荔枝同柚香菠蘿檸檬梳打。兩杯都幾大杯㗎，而且佢嘅匙羹係貓形狀，好得意呀！同時佢唔會落好多冰，所以都有一定嘅份量。味道同口感方面，梳打水落得充足，所以氣泡亦都好多，飲落就非常之清爽啦。荔枝味亦都唔會假或者好甜，但有荔枝嘅香味同埋清甜味道。杯中仲有一粒荔枝肉，果肉偏甜。另一杯佢嘅柚子蜜都落得好足料，篤埋檸檬就酸酸甜甜，唔會話飲到最後好淡！ 食完都好飽，所以都食唔落甜品，下次有機會都想試下食佢嘅窩夫！

上次去駱駝漆嘅時候經過一間餃子店見到入面都好多人，所以今次帶個好鍾意食餃子嘅朋友陪我去食下！入到去見到都好光猛，位置都算係寬敞嘅本身七點鐘入到嘅時候都唔算好多人，一點完餐食一陣就好似滿座了。點餐方面都係用QR code，咁就可以慢慢揀嘢食，分別同朋友揀咗煎餃同埋湯餃。附上嘅菜脯都係非常爽口，如果有唔辣嘅菜脯就更加好啦！ 叫咗個雞絲粉皮，份量好大碗，雞絲同粉皮份量均勻，仲落咗好多芝麻醬調味添。整體嚟講雞絲粉皮清新惹味，雞肉唔會煮得好老，反而有肉汁，肉質鮮嫩。青瓜絲亦都清爽鮮甜。粉皮口感好煙靭，但撈勻芝麻醬同醋之後，就吸收咗芝麻醬同醋嘅味道，食落帶來一陣濃郁嘅芝麻香同酸味，唔會話有種肥膩感。
  先上湯餃，我就叫咗京蔥豬肉餃同蒜芯鮮蝦豬肉兩款，都係加多少少錢就可以雙拼，另外湯底方面我就再加錢要咗蕃茄湯，蕃茄湯入面都好足料，除咗真係見到番茄粒之外，仲見到紅蘿蔔，薯仔粒等等，佢好好咁樣切到一粒，所以飲落去就唔使係咁咬啦，飲落去好鮮甜。然後再講講餃子，餃子嘅尺寸全部都好大嚿，差唔多成隻「湯殼」咁大。京蔥餃肉味好濃郁，而且京蔥嘅口感爽口，食落去就豐富咗成個餃子嘅口感。另外蒜芯鮮蝦豬肉鮮蝦都非常大舊爽口，唔會話梅曬，入面蒜芯嘅份量都好多食落去小小嘅蒜味，爽口得嚟又唔會好似成個蒜頭咁樣第二日個口腔仲有陣蒜頭嘅味道，真係好好呀！    煎餃都係雙拼餐，每款有五隻，每隻都好大隻，豬肉一樣肉嫩多汁，唔會話因為煎得太耐而乾曬，外皮香脆唔油膩。叫咗黑松露芝士豬肉餃同蘑菇煙肉芝士豬肉餃。 味道方面，黑松露芝士豬肉餃黑松露味道濃郁，咬開之後香氣撲鼻，芝士仲可以拉絲。芝士咸香味亦唔會過重cover咗黑松露嘅味道，同時為豬肉餡增加風味，令豬肉嘅味道更濃郁，見到餃子入面都有好多黑松露喺度，真係好足料。蘑菇煙肉芝士豬肉餃嘅唔同之處係加咗蘑菇同煙肉，咬開之後嘅味道就好似食卡邦尼意粉一樣，鹹香味更重，口感濃稠，火腿口感偏向煙韌，整體口感偏向柔滑，味道豐富。煎餃配咗上海麵，入邊嘅湯底揀咗豬骨湯，豬骨湯味道清甜，唔會有腥味，口感清新。上海麵麵線偏粗壯，唔會太淋，反而有少少咬口，用嚟餸餃子一流。

叫咗佢嘅樽裝檸檬茶，非常夠凍，消暑一流！見到佢有生嘅餃子賣，可以下次早啲預訂定買返屋企食！

天氣熱辣辣，最適合就係清涼嘅東西。朋友話駱駝漆，有一間泰式餐廳叫Add Some Thai唔錯，就約咗我去食。呢間餐廳唔係最多人嗰幢，所以等lift就唔會等到熱辣辣。一見到門口已經有泰式風情！入咗去坐見到座位都好寬敞，而且裝修亦都好似置身係一個泰國嘅草屋一樣。見到隔籬枱好多都係2人餐，我哋都一於叫埋一份！ Add Some Thai 二人餐選擇都好豐富，有前菜，小食，主菜去到飲品都可以有好多元化嘅選擇，仲可以加錢要埋甜品！ 前菜叫咗青木瓜沙律，除咗有青瓜絲之外，亦都有唔同嘅蔬菜，以及白灼蝦做配料，分量充足。蔬菜以及木瓜亦都非常鮮甜，配上少少酸辣嘅醬汁，每一啖都好refreshing。白灼蝦亦都爽口彈牙，餐廳好貼心咁樣剝埋學，所以一咬落去就已經係蝦肉。 湯就叫咗椰子雞湯，味道鮮甜，表面非常清澈，見到入邊都有唔同嘅材料除咗雞之外仲有椰子，唔同嘅菇菌類等等，雞湯嘅味道亦都非常之香甜，雞肉十分之嫩滑，唔會話煲到老晒，亦帶有椰子嘅香味，生津解渴。佢哋以一個鐵煲咁樣嘅方式去上枱，所以去到食到中段嘅時候碗湯都仍然保持暖笠笠。 小食拼盤可以揀唔同嘅串燒，我就揀咗手打蝦餅、牛柳串、沙嗲雞肉串、同豬肉串，一碟拼盤有唔同嘅串燒，非常之豐富。手打蝦餅香脆可口，外脆內軟，蝦味香濃，咬落去唔會話係好多粉嘅感覺，令到食唔停手。而串燒方面，燒完之後肉質依然多汁，唔會話燒到好乾柴，仲有淡淡炭燒香味，風味十足。佢入面仲有蝦片，好脆卜卜！ 菠蘿海鮮炒飯用半個菠蘿承載住，分量充足，食後有飽腹感。米飯粒粒分明，仲有淡淡菠蘿嘅香味同甜味。菠蘿肉亦都大大粒，味道鮮甜，只有少少酸，非常開胃。飯入邊仲有青口，墨魚仔同埋白灼蝦等等，白灼蝦味道清甜，肉質亦都唔會太老，爽口彈牙。佢仲會有啲花生，有爽脆嘅口感。 蒜蓉椰菜苗份量都幾大碟，椰菜苗新鮮得黎，炒得非常之香，色香味美，口感爽脆，味道清甜。蒜蓉亦都非常之多，同時間入口仲有一陣淡香嘅蒜蓉香味。 甜品係芒果糯米飯，配椰子雪糕，芒果鮮甜多汁，而糯米飯亦都因為表面淋咗椰漿，亦都淡淡鮮甜椰香，食咗之後有飽腹感。雪糕非常清甜冰涼，同時唔會話太甜。最好食嘅食法就係芒果糯米飯再加埋雪糕一齊食！ 飲品就揀咗大象梳打水，份量中規中矩，好夠氣同凍，飲一啖就透心涼，清暑解渴。我就叫咗桑格尼亞，入面有芒果，蔓越莓，橙，檸檬等等，酸酸甜甜，仲有蘋果粒，十分醒胃！ Add Some Thai喺枱上面嘅墊枱紙有寫到佢哋嘅下午茶，見到價格都幾相宜，見到佢有個泰式西多士好有興趣，喺觀塘返工嘅朋友都可以上去買返個3點3下午茶。