真係太太太耐冇喺openrice寫過食評，所以襯今次老闆請食飯就post下先☺️ 其實之前已經留意到呢間ig曝光率勁高嘅omakase, 但一直未得閒試，而呢次老闆包左場就終於有機會喇！ 除了壽司外，我最中意就係鱈魚白子，口感夠creamy, 但個醬油燒稍為咸左少少🥹 壽司就件件都好滿意，特別係我最愛嘅拖羅，油脂豐腴，正！ 最有驚喜係有香箱蟹，好多年冇食，好感動🥹 佢最後仲有玉子燒、湯同甜品。想講個玉子燒係我食過最好食嘅一個，又香又燶邊，不過影之前已經唔小心食左😂 希望睇其他人食評會有相比大家參考haha 整體來講，呢間新嘅omakase地點超方便，壽司中上，價錢相宜 ($1.8k +10% for dinner)，抵試👍🏻

今日要陪家人黎大西北睇醫生，結果okay, 所以揸左車黎附近嘅黃金海岸食晚飯。行左幾轉，家人都係揀左食中菜，所以就入左星小宴。一入去就感覺樓底真係好高！果然較偶嘅地方連建築都唔同啲，好正！另外staff整晚都好幫手，又有禮貌，家人都好滿意。 講番重點，即係啲食物先。我會大推介佢地嘅厚切叉燒王！整整6件超級厚切嘅半肥瘦叉燒，真心口感係非常鬆化，甚至有啲入口即溶嘅地步，真心好好食，仲要價錢非常合理，一定要試！ 另外講下兩樣吸睛菜式，包括酸菜魚同冰鎮咕嚕肉。酸菜魚份量驚人，同埋用料一啲都唔馬虎。魚塊有好多，同埋魚質都認真唔錯，個酸味亦調配得宜，撈飯冇得頂😍 冰鎮咕嚕肉用左最有gimmick嘅乾冰霧化presentation，一上枱連隔離枱都忍唔住問係咩黎😂 本身以為個菠蘿咁細會得一兩舊咕嚕肉，點知份量依然好大，食極都有，並且調味好正！ 其他野包括黃金蝦、菜等等都幾好食，有機會會再黎！

大公館不嬲係我屋企聚會嘅top5地方之一 因為環境舒服 食物亦唔錯👍🏻 以前亦好中意佢地嘅西餐部Cadenza 仲記得個蘑菇湯真係超超超好飲 但唔知咩原因 佢地將西餐部改建成火鍋店 所以今晚就黎試試佢咩料👏🏻 我推介牛頸脊同封門柳 兩款牛都好濃肉味 勒另有亦推介豆腐紙、鮑粒雞肉餃、准山麵等 全部都係較特別嘅選擇 好帶新意👍🏻 湯底我地就揀左鴛鴦鍋 一邊係川蜀麻辣 另一邊係花膠雞 想講隻雞真係份量超大 雞肉好嫩滑 當成個餸食都仲得！😂 整體滿意 火鍋料夠新意 份量就好足 服務一貫良好 應該會再黎👍🏻

今日星期日 諗住叫外賣食啦 掃下掃下先到蛋包飯想食 所以就叫左呢間🤦🏻‍♀️ 係我錯！冇睇食評就叫左！簡直難食到喊出黎！！！ 叫左兩個蛋包飯 兩個都會見到盒嘅角落頭係一灘黃油 好噁心 另外蛋係又鞋又老又薄 難食過茶餐廳啲蛋！仲有一啲茄汁火腿沙律醬定唔知忌廉汁嘅野撈埋一齊 衰過大學嘅頹飯！ 個炸雞軟骨先係最惡劣 成舊係得炸粉 我基本上十舊得一舊食到有鼻屎咁細粒嘅「雞軟骨」 舊野係冇味 究竟點做到？？？ 想喊 要煮多個麵食先得😨😨😨

因為工作關係 我成日都要黎荃灣 亦都試左好多唔同嘅餐廳 曾經享和街有間西餐廳個burger做得超好食 個burger上嘅流心蛋簡直一試難忘😍😍😍 可惜後來佢執左笠 輾轉變左而家人龍黃店No Boundary 呢日食無可食 見冇人排隊 就試左呢間Lucky Smash 佢成間鋪嘅design都好賀年feel😂 甚至連burger個packaging都好似中國年曆張紅噹噹嘅封面咁🧧🧧🧧 我叫左芝士牛肉漢堡餐 加$10試埋個熱狗 睇住入面兩個員工即叫即整 所以個burger份外熱辣辣！ 塊牛堡係極極極juicy 一咬落去啲汁係咇哂出嚟！💦💦💦 仲要調味調得勁好食 唔會好似而家好多burger咁過咸 另外啲生菜、蕃茄得全部都好fresh好多汁 (即刻諗起某連鎖快餐店啲變啡嘅生菜...) 成個burger份量十足 係好食嘅！亦係暫時荃灣食過最高質嘅burger!!! 薯條反而一般啦 可能我拎得太耐佢已經淋左啲

一向聽聞位於尖沙咀金巴利道呢間喜來稀肉 食物同環境都唔錯 今次咁啱同朋友黎開附近shopping 晚餐就選擇喺呢度食返餐久違的韓燒 我地大約7pm左右到達 可能因為閒日關係, 都唔使點等位 好快就可以入座 不過餐廳一共有兩層, 地下果層係等位嘅地方 有凳坐 就算要等位, 都唔使企喺街度食塵 呢方面幾貼心, 值得一讚 一樓用餐區環境寬敞 裝修帶點工業風嘅感覺 餐椅上嘅蓋可以俾客人打開, 放私人物品入去 食物方面 我地兩個叫左份牛護心肉, 一份喜來五花肉, 嫩豆腐湯同海鮮蔥餅, 再叫左一支啤酒一支燒酒 個人比較鍾意喜來五花肉, 貪佢肉質夠嫩再加上特製醬汁, 夠曬惹味 另外嫩豆腐湯用料十足, 都係一個唔錯嘅選擇👍🏻👍🏻👍🏻

如果話家樂冰廳係荃灣嘅「常滿茶記」 咁The Base Nature就似乎係佢嘅商場版 因為次次經過都好似要等位咁 難得今日係一個我唔洗番工嘅閒日 所以突登黎試個late lunch 終於可以直入😋 試左個黑松露米形粉 賣相就一般 但食落原來好creamy好濕潤 D米形粉比想像中大粒加有韌勁 食落口感幾得意 可以encore😋 加左$15 要埋杯熱玫瑰拿鐵 聞落有玫瑰香氣 奶味都香濃 而且咖啡口感順滑 係荃灣較出色嘅咖啡！ PS 佢啲位都隔得幾開 又有紙板隔住座位 有跟足防疫措施

香港嘅連鎖韓式炸雞店越開越多
但我始終對Outdark情有獨鍾

好彩有提早book定位
閒日未夠夜晚7點去到，已經有大約10位客人排隊等候入座
正如店名所及, 餐廳的燈光陰暗, 營造出庸懶, 舒適嘅氣氛
一入門口見到一塊掛滿愛情鎖嘅裝飾牆, 亦令人聯想到首爾南山塔的特色。

由於這裡的食物份量較大, 所以同朋友本住貴精不貴多, 又唔想浪費嘅原則, 只係點左3款食物。
Outdark炸雞口味眾多，而我最愛嘅就係香蒜蜜糖口味，幾乎10次幫襯，有8次都係揀佢。金黃酥脆嘅炸雞同薯條薯角, 配上幾款唔同嘅醬汁以及酸酸甜甜嘅蘿蔔，爽口又美味🤤🤤🤤🤤
炭豚飯捲用料十足，啖啖都充滿口感，調味亦適中, 不妨一試🤤🤤🤤
最令我驚喜嘅係辣豆腐湯烏冬，食材豐富，賣相一流，湯底相當惹味，連本身唔太食得辣嘅友人, 連湯底都一飲已盡, 完全係色香味俱全,令人食指大動🤤🤤🤤🤤🤤
完成一日嘅工作後，能夠品嚐到正宗嘅炸雞啤酒同韓式料理，確係一賞心樂事👍👍👍👍👍

新冠肺炎關係, 好耐都冇打過邊爐了 近排見疫情有稍為緩和嘅跡象 即約frd一齊去過返個邊爐癮 今次我地選擇左渝味曉宇位於灣仔QRE Plaze(即合和中心對面)嘅分店 由於朋友事先有book位 所以我地馬上就被安排入座 然後侍應就為我地送上紅棗雪耳糖水, 滋潤胃部 枱上有即棄圍裙, 枱底又有籃提供俾客人放隨身物品 剩係貼心程度, 已值得一讚 湯底方面,我地選擇左鴛鴦鍋 蕃茄湯底配麻辣鍋中辣湯底 配合我同朋友唔同嘅口味 湯底味道濃郁, 用料十足 隨住蒸氣飄來嘅香味令我地急不及待想馬上開餐 食物方面, 我地選擇左美國安格斯優質肥牛, 鴨血, 黑豚腩肉,手打墨魚滑, 白鱔, 萵筍片,苕粉, 淮山條, 炸豆皮同凍豆腐。當中肥牛, 鴨血, 墨魚滑同苕粉係我當晚嘅至愛, 每樣都好有水準。肥牛鮮嫩,鴨血一D腥味都冇,非常易入口, 墨魚滑爽口彈牙, 苕粉口感特別, 食落似薯粉但更加煙韌,值得一試。 最後, 我地點左一份紅糖糍粑做甜品, 甜甜糯糯嘅口感, 中和返火鍋嘅辣味。強烈推薦大家黎打完邊爐後, 都可以點一份黎試下。

作為一個韓迷 一向視韓國為「第二家鄉」 每年10月我都會抽空到當地旅遊 今年的訪韓大計無奈因疫情而告吹 只好退而求其次 吃一頓正宗韓國料理, 一解「思鄉之愁」 經友人介紹,來到這家位於尖沙咀麼地道的chumchum味, 門面及裝修簡約中帶特色,地板用不同圖案的瓷磚拼湊而成。餐桌擺放得整整齊齊。量度完體溫以及用酒精搓手液消毒雙手後, 一位韓國籍店員就引領我跟友人入座。 店員向我們推介了一道蟹料理, 蟹肉鮮甜加上滿瀉的蟹膏, 蟹蓋上放有淋有精華湯汁的飯, 令人食指大動。 最近天氣乾燥, 所以我們點了一客人蔘雞湯, 真材實料, 不妨一試。 牛肉紫菜包飯餡料十足, 牛肉醃得帶有一點甜味, 口感、層次都相當豐富。 菜包肉肥肉較多, 如果口味較清淡或怕肥的朋友未必適合。但我和友人都吃得津津有味, 配上附送的泡菜亦可解決肥膩的口感。 最後, 我們點了一客炸醬麵, 炸醬的味道調較得恰到好處, 絕對是一道平凡中帶驚喜的菜色。 值得一提的是, 當晚餐廳內佔了8成的食客都是韓國人。此起彼落的韓語令我有置身於當地的感覺。真希望疫情快點完結, 大家的生活盡快回復正常, 可以到外地旅遊吧。 人均$250