【國際新食力】日本愛心Pocky 任你改名表白！

唔少節日都有特別意義，而新年同情人節就係對屋企人同情人表達心意嘅好時機。平時怕醜唔敢講出口嘅話，不如用特別方法寫低送比佢。日本Pocky新推出嘅藍莓Full Heart Pocky有祝福嘅意思，另外仲有五款Pocky比你自己改名傳心聲！

Full Heart Pocky最得意嘅地方係將平時圓條形嘅餅乾變做心形，無論點咬都會見到心心。之前只有士多啤梨味，今年就新出咗藍莓味，以世界十大童話之一嘅青鳥為主題，而喺故仔裡面青鳥象徵幸福，簡單啲講即係希望將幸福送比你囉。

青鳥都唔夠？將感謝嘅說話直接寫出嚟啦。五款Pocky各有兩款情人節特別包裝，無論你想搵送比男朋友嘅本命朱古力，比上司朋友嘅義理朱古力，或者送比爸爸媽媽嘅心意朱古力都一樣有！例如Sukky（スッキー）代表我鐘意你（あなたが、好きです），Thanky（サンキー）就係一直以來唔該哂你（いつもサンキューです），Papacky（パパッキー）同Mamacky（ママッキー）就分別指爸爸或者媽媽多謝你（パパ / ママ、ありがとう）。

Pocky後面留咗位比你自己再寫心意字句，加上可以自己改名，將你諗到ky字尾嘅字Send過去仲有機會可以實體化！唔知有無人會整比開飯仔呢...（篤手指）

Pocky創意改名活動
活動期間：即日至2016年2月14日
資料來源：Pocky Street

隨時接收最新資訊
讚好OpenRice專頁！