你咪見到個甜品薄餅仲細過個平時食開嘅普通批，但其實佢係超級邪惡。就好似呢個金黃色嘅超薄薄餅咁，表面上佢係一個榴槤薄餅，用真‧榴槤肉混埋忌廉芝士醬整成，但內裡暗藏芝士，仲有成兩層咁多，面一層底一層，夾埋一齊拎去焗，趁熱食仲有拉芝嘅效果~講真，估唔到榴槤同芝士又幾夾喎，唔止隻色夾，味都幾夾，唔會互搶。
唔食榴槤嘅朋友可以試另一款邪惡薄餅——草莓棉花糖薄餅。都係嗰句啦，表面睇嚟冇乜嘢，最多都係話一粒粒細細粒嘅熱熔棉花糖邪惡少少啫，再最多都係話埋面層嘅朱古力醬啫，不過，當你一切開，OMG，批底原來仲搽咗層Nutella㗎！
有罪惡感咩？咁揀返啲健康飲品囉。4款超級乳酪樽同6款鮮果乳酪都係用咗希臘乳酪做主材料，對比一般乳酪係有更高嘅蛋白質同鈣質，其中乳酪樽仲要有埋含大量纖維嘅奇亞籽。開飯仔試咗杯陽光紅柚乳酪樽，入面有蘋果粒、青蘋果料、黃桃、紅柚絲，夾埋奇亞籽同乳酪，甜甜酸酸，口感豐富。畀少少建議，側面嘅麥皮同蜜糖唔好一次過落晒，食下落下咁，咁就可以分得勻啲喇~ 另外杯奇異果X香蕉鮮果乳酪，飲嗰陣啜到真‧奇異果肉㗎！
BTW，有冇試過喺甜品舖飲咖啡？呢度嘅Ice Cube Coffee，係將意式咖啡雪咗做冰，然後倒熱嘅杏仁茶、豆漿或者牛奶落個杯度，等啲咖啡冰慢慢自己溶，開頭個味可能會淡少少，但愈飲就愈濃！講多樣嘢你知，呢間甜品舖其實係滿記副線嚟，所以原本嘅招牌榴槤甜品都照樣有得食㗎。
文：Kar
隨時接收最新資訊
讚好OpenRice專頁！