開飯仔都去咗巡一個圈，睇下有咩好食，唔使心急，而家慢慢話你聽：
日式卷物 古今二
喺觀塘有店嘅古今二，今次嚟到共和國，當然都帶埋佢哋嘅招牌卷物過嚟啦，特別係富士山戀人，鰻魚、牛油果、蟹柳同脆片，全部嘅配搭都咁吸引，包埋一齊係開心嘅，所有卷物都係即叫即整，所以可能要等耐少少喇。另外，鰻魚飯都係好吸引㗎呢，條鰻魚長到呢，連埋啲燒汁撈飯好開胃。就開飯仔嘅觀察，呢間應該係最受歡迎之一嘅餐廳，晏多少少上嚟，啲卷物就賣晒喇。
東南亞飲食 越泰星廚
睇個名就知道呢間餐廳集合咗越南、泰國、星加坡三地嘅美食啦，肉骨茶、牛肉湯、越南咖啡通通都有得飲，當然唔少得金邊粉同喇沙呢啲東南亞嘅招牌菜啦。一碗40幾蚊嘅海南雞喇沙有4、5嚿雞，都算係咁，不過如果可以再多多少少香料就好喇！
台式麵食 台灣麵
一個碗有兩種麵係咩玩法？呢度有種雙拼麵，可以任揀兩個餸同兩種麵/飯拼埋一齊，啱曬啲三心兩意咩都想食嘅朋友仔。但你又唔使擔心啲汁溝埋一齊會好伏喎，因為佢哋個碗係兩格㗎，好似開飯仔咁一邊叫咗香酥雞腿乾伴麵、另一邊叫咗紅燒牛肉新竹米粉都唔怕。伴麵食落幾香濃，但係啲雞就略嫌乾咗少少，牛肉湯底就相對清淡少少，下次再試下其他配搭先。
蛋包飯 米飯主題餐廳
呢檔又係目測嚟講都幾受歡迎嘅一檔，望埋去都有幾多枱係食緊佢哋嘅蛋包飯或者鐵板飯。蛋包飯隻蛋金黃色，好似好綿滑咁包住啲飯，可以配白汁、茄汁、胡麻汁、黑椒汁或者咖喱汁都得，再加埋塊扒或者蝦，其實都幾飽肚。唔怕熱氣嘅叫個鐵板飯都幾開心，聽住佢「炸炸」聲咁好令人興奮！
其他餐廳仲有：大時代燒味專門店、歐陸嘅Master Za's Kitchen 、專食韓食嘅藝餐、魚湯米線嘅漁民樂，同埋食印巴菜嘅穆斯林餐廳。早、午、下午茶同晚餐4個時段都有嘢食，有平有價，如果一個lunch廚嚟計，最平大約40零蚊都落得樓。老實講，選擇多時人都多，雖然要搵個位坐並唔太難，但排隊等嗌嘢食同等拎嘢食就真係要預返多少少時間喇，不過而家都仲只係試業階段，聽講遲下可以直接用手機點餐同畀錢，希望可以快啲啦。
詳情：
7號美食共和國
地址：鰂魚涌英皇道971號英皇大樓2樓
文：Kar
隨時接收最新資訊
讚好OpenRice專頁！