「大包整多兩籠~大包整多兩籠~」喂，有聲嘅？

唔止有聲呀，仲有畫面，有得食添呀！有上海菜餐廳整咗嘅款麥兜點心呀！



首先就梗係有大包啦~ 呢個係奶黃流沙包嚟，一籠四個印住唔同表情嘅麥兜，啲包仲係師傅手工自家搓製同發酵㗎，好軟熟，仲有啲彈牙添。我知大家都要餵飽部相機先到自己食，但都要快手啲呀，凍咗就唔流沙㗎喇……

呢個炒飯砌咗成個麥兜個嘜頭出嚟，說穿了係雞絲蝦仁炒飯，仲用咗金華火腿去整，鹹鹹香香，但硬係唔捨得嗶第一羹囉。

另外連甜品都係麥兜嚟㗎，呢件椰汁糕好香椰奶味之外，仲用咗綠茶粉同朱古力粉去整麥兜樣出嚟添。

BTW，其他就算冇麥兜樣嘅嘢食，都係手工菜嚟呀。就好似呢籠小籠包咁，咪睇佢黑麻麻呀，黑松露嚟呀。外皮係師傅將墨魚汁溝埋麵粉整嘅，即叫即包，入面嘅餡就混入咗黑松露，無論聞定係食都好香下，就算唔點醋食都好夠味。

至於呢道「咸豆漿煮花蛤」，聽到個名最初可能係會有啲猶疑。平時食開嘅花蛤通常都係用白酒煮或者薑蔥炒，咸豆漿煮真係第一次聽，原來係師傅自己喺屋企研製嘅菜式嚟，估唔到都幾夾，食到上海風味之餘又保留到花烚嘅鮮味。另外，秋涼叫返杯熱嘅黑木耳露飲都唔錯，特別係女仔，夠晒滋潤。

不過重點係，唔止有得食，仲有得拎。喺限期內叫返指定嘅菜式，就可以拎到麥兜小籠包造型毛巾或者麥兜杯緣子系列，啲杯緣子真係好cute cute呀！阿輝菇時麥太麥兜仲有麥炳，我想要齊一set呀。

詳情
尚點小籠包．上海麵館
日期：10月3日 - 11月6日
叫指定餐點送麥兜 小籠包造型毛巾

日期：11月6日 - 12月31日
叫指定餐點送麥兜 杯緣子系列（一套5款，隨機送出）


文：Kar


最新飲食潮流：
行便利店有新發現 紫薯牛奶 X 新出抹茶雪糕（有片）
台灣西門町燒麻糬 香港都有得食 雙重抹茶試唔試得過？
超豪華珍寶龍蝦刺身丼 到底有啲咩？


隨時接收最新資訊
讚好OpenRice專頁！