每次出開旺角，掃街好似係指定動作，拮返兩串魚蛋或者鹵味咁樣樣。呢排有間舖頭又推咗啲新嘅掃街小食，就咁睇係完全符合「外貌協會」同「邪食」嘅入會資格嘅。

呢間舖頭本身係賣開糖果奶昔嘅，賣下賣下賣過界，連各式各樣味嘅芝士撻都有，最近又再有一堆小食加盟其中最吸睛嘅應該就係海膽焗車打芝士蘑菇同一口海膽芝士厚多士。

先講下個蘑菇，用嘅係韓國海膽，食家應該都會知道韓國海膽本身嘅味都唔算太甜，不過混埋入車打芝士度一齊食又幾match廚，雖然未至於做到拉芝，但係見到堆醬都覺得好邪惡。蘑菇仔細細個，菇味香得嚟都幾juicy。

而個一口海膽芝士厚多士，就係用咗3隻芝士溝埋一齊嘅，所以芝士味係幾香，鹹鹹香香嗰種香，但亦由於芝士味較濃嘅關係，海膽味就相對比較淡嘞。多士切到正方形粒咁去烘，邊邊位幾脆，細心食仲會發現喺包面其實仲搽咗一層用新鮮海膽自家調製出嚟嘅海膽醬添㗎。兩款小食都係33蚊3件，抵唔抵食就見仁見智啦~

另外，佢哋早前亦都有推出超巨型手打墨魚球同埋細細粒可愛造型嘅鵪鶉蛋。



全名係「日本蟹籽芝士手打墨魚哥爾夫球」，即叫即炸，新鮮熱辣拎上手，有成個拳頭咁大係幾興奮。食落都脆口，手打嘅墨魚滑幾彈牙，不過說好的芝士就比較失色了，冇流心，而且份量唔多，只係喺咁大個波嘅一邊仔有。建議大家食嘅話最好同朋友開心些牙，因為真係幾飽肚。



而鵪鶉蛋就有2隻味揀，想light少少嘅就日式照燒芝麻鵪鶉蛋，想豐富啲嘅就蟹籽紫菜鹽鵪鶉蛋。兩款都會有星星形同心形，cute cute der，蟹籽係幾多嘅，不過唔太黐身，所以每粒鵪鶉蛋又唔會真係黐到好多蟹子一齊食……唔好話我唔提你，咪睇佢細細粒咁，膽固醇都幾高㗎。



Candy Shake
地址：旺角登打士街55號

文：Kar



其他最新飲食潮流：
小丸子Cafe登陸 觀塘超萌貓咪造型抹茶咖喱飯（有片）
Hea住過聖誕！聖誕限定梳乎蛋系列
Hello Kitty粉別瘋狂 一田首推Hello Kitty壽司
 

隨時接收最新資訊
讚好OpenRice專頁！