【飲食潮流】邪惡五層芝士包又有新期間限定味：五層流心紫薯芝士竹炭包（有片）

呢個世界有種吸引力叫「期間限定」，本身有興趣嘅話見到呢四個字就更加想試。喺尖沙咀同灣仔都有分店嘅呢間烘焙屋，王牌產品五層流心芝士軟包本身已經夠邪惡，前排先又出完蜜瓜乳酪、流心玫瑰兩款新期間限定味，而家仲再出多隻再令多啲人尖叫嘅限定新味添，叫班芝士控點忍喎！

今次係……粉紫色嘅五層流心紫薯芝士竹炭包呀！雖然個包變咗黑麻麻嘅竹炭包，但同樣都係超軟熟口感，紫薯味香口得嚟，食食下仲要見到有深紫色嘅紫薯肉，差啲就尖叫咗出嚟喇。

不過暫時未有得單個咁買，一定要買埋其他產品滿$100再加30先有得食。每日仲係得50個添咋！要食好西都真係唔容易呀。

至於之前嘅五層流心蜜瓜乳酪包同五層流心玫瑰芝士包，蜜瓜口味特別選用韓國乳酪搭配優質蜜瓜，清新甜美；而玫瑰口味就以玫瑰醬配以澳洲同新西蘭忌廉芝士，香而不膩。

三款口味同原味一樣有三種食法：室溫、熱食同凍食。最方便嘅當然係室溫，如果想有流心效果就記得用微波爐稍微叮熱，而唔怕凍想食雪糕效果嘅就當然係放落雪櫃雪凍嚟食啦！

除咗買五層芝士包返屋企或者Office慢慢嘆之外，其實灣仔店會有更多特色麵包同輕食，經過嚟個Light Meal亦得。例如蝦沙律竹炭三文治同焗芝士魚柳法包都相當惹味。

想再食Light啲？咁呢個風乾火腿鮮橙沙律或者德國薯仔沙律都係灣仔店限定嘅好選擇。買完食完再飲杯奧地利百年品牌Julius Menil嘅咖啡，成個Package夠哂完滿啦。