話咁快又一年，開飯仔又嚟同大家一齊睇睇米芝蓮。三星名單毫無驚喜，但二星同一星名單總共都有8個全新名字上榜，由香港人熟悉嘅中餐館，米芝蓮常見嘅法國菜到高級精緻嘅日本菜都有。呢8間餐廳都唔算平民之選，不過偶然想豪返次嘅話，以下新晉星級餐廳就可以好好考慮一下。
大阪三星懷石料理 柏屋
圖：ryu_ng
舊年年底先開業嘅呢間懷石料理店有咩咁厲害，一上香港米芝蓮指南就得到兩星評級？一，佢係日本大阪三星同名餐廳嘅第一間海外分店；二，特別由本店店主嘅大弟子高橋純師傅擔任香港分店主廚；三，唔少食材都由日本直送以保證食到同本店一樣嘅味道。雖然消費較高，不過可以體驗到同日本一樣精緻高級嘅懷石料理，唔少食家都覺得值得嘅。
世界級頂級牛肉 Beefbar
喺摩納哥蒙地卡羅創立，莫斯科、墨西哥、柏林等地都有分店嘅Beefbar一樣係15年年底登陸香港。餐廳賣點係直接向生產商採購一系列嘅頂級牛肉，包括美國同澳洲嘅安格斯牛、日本和牛同澳洲安格斯牛和牛混種，同近年新興嘅韓牛等等，識食嘅各位「牛魔王」一定為之瘋狂！唔單止主菜，由沙律到甜品都有驚喜。
唔單止奶皇月餅 嘉麟樓
圖：cwng22
講起嘉麟樓，開飯仔相信唔少香港人都會第一時間諗起佢地嘅迷你奶皇月餅。皆因唔少食家封為全港最好食，而且如果唔係一早預訂又好難買到，所以又有人稱為月餅中嘅頂級名牌！不過其實呢間酒店中菜廳嘅其他出品都毫不失色，北京片皮鴨由師傅堂弄，皮薄到可以透光，脆口惹味。點心當中嘅蜜汁叉燒酥同乾清棗皇糕亦食得出大廚功架。
簡約精緻法式盛宴 ÉPURE
圖：迷你黑洞
如果你係法式甜品Fans，應該早就聽過超過300年歷史法國糕點名門DALLOYAU嘅大名，而呢間就係系出同門嘅法式Fine Dining餐廳。麵包堅持每日新鮮自家製作，有食家笑稱好食到可以另開一間麵包店。其他頭盤同主菜無論賣相同味道當然亦非常出色，例如招牌菜Vol Au vent嘅酥皮同海鮮湯就配合得天衣無縫。
銀座三星吞拿魚壽司 Sushi Tokami
圖：Guapo
無獨有偶，呢間日式壽司店一樣有間三星總店：位於東京銀座嘅日本總店鮨 よしたけ仲係由14年起連續三年得到三星評級！佢地最出名嘅係吞拿魚壽司，全因日本店主同時係東京築地吞拿魚專門店やま幸嘅創辦人。而且食材相當講究，吞拿魚選用青森縣大間同北海道內浦灣嘅藍鰭吞拿魚，而飯就依照江戶前傳統製法加上赤醋。
低調小店食酒店級鐵板燒 I M Teppanyaki and Wine
唔係得日本過江龍先可以奪星，呢間由港人主廚莫燦霖主理嘅日式鐵板燒今年一樣得到米芝蓮星級殊榮！門面非常低調而且座位只有19個，不過亦無礙一眾老饕嚟捧場，唔單止因為主廚莫燦霖之前曾經擔任日航酒店、香格里拉酒店、香港田舍家等高級日本餐廳總廚，亦因為佢地用料考究，好師傅加上好食材，自然有高水準。
新派亞洲Fusion法國菜 VEA
呢間新派酒吧餐廳29樓係酒吧而30樓係餐廳，唔單止氣氛比一般Fine Dining嘅輕鬆得多，菜式同Cocktail亦係融入亞洲特色嘅Fusion法國菜。酒吧有各款Cocktail，例如Peanut Butter Milkshake有得意牛奶盒造型，飲落香甜幼滑。餐廳只做晚市8 道菜嘅Tasting Menu，最特別嘅可以加配Wine或者Cocktail pairing！
傳統粵菜精粹 逸東軒
圖：車媽媽
雖然有人覺得米芝蓮係「鬼佬」口味，不過佢地推介嘅中菜館亦有唔少係食家認同值得推介嘅。呢間酒店廣東菜館就以扎實而平穩嘅水準吸引到一眾食客支持，招牌菜明爐蜜汁叉燒嘅肥瘦比例得宜，入口鬆化帶蜜香。鮮沙薑陳皮生煎雞用熱鍋上枱，沙薑香味四溢。加上無論係時令嘅大閘蟹菜式，定係午市嘅點心都相當出色。
開飯編輯推介：
2. 10月份好評餐廳十強
熱門文章推介：
1. 一齊滾起佢！季選任食火鍋
3. 油麻地特色美食地圖
隨時接收最新資訊
讚好OpenRice專頁！