維記榴槤雪米糍迷你裝
維記雪米糍應該係唔少香港人細細個就聽過嘅名，最近改咗新包裝之餘仲出埋新口味。榴槤味道係迷你裝，一盒四件獨立包裝。糯米皮依然煙韌軟熟，切開聞到少少香味，食落榴槤味道亦對版，甜度適中。
最重要嘅係迷你Size可以成個放入口，咁就唔洗驚身邊同學同事唔鐘意陣味，自己又食得到榴槤啦。
淨重：60g（4x15g）
價錢：$9.9（OK便利店）
甜度：***
驚喜度：****
推介度：*****
維記綠茶雪米糍
唔單止迷你裝，普通裝亦有大熱綠茶新口味。一樣皮薄軟熟，綠茶雪糕餡嘅綠色自然，不過食落就覺得牛奶甜味比較重，不失清新茶香，而甘味就要慢慢嗒真啲先食到。
幸而雪糕口感都幾滑，可以得閒買返盒過下口癮，但綠茶控就唔好抱太大期望比較好喇。
淨重：66g（2x33g）
價錢：$8.2（7-11便利店）
甜度：***
驚喜度：***
推介度：****
榮屋·潤特濃朱古力雪條
甜品當中，朱古力都可以算係其中一款不敗嘅經典口味。見呢條朱古力係便利店嘅秋之推介，所以亦買咗一條嚟試。朱古力味道的確相當香濃，但整體稍嫌偏甜。
明明包裝上面寫係大人嘅口味，但可可獨特嘅澀味唔突出，有啲可惜。勝在雪條口感唔錯，質感介乎於雪糕同雪芭中間，唔算Creamy但亦無一粒粒冰粒。
淨容量：80mL
價錢：$15.9（OK便利店）
甜度：****
驚喜度：**
推介度：***
榮屋北海道紅豆泡芙
試埋另一款秋之推介，今次仲要寫明用咗北海道紅豆。不過打開包裝聞到有少少燶味，要扣分。切開一睇同包裝有啲分別啵，紅豆蓉偏甜，雲呢嗱雪糕正常，如果好似個包裝咁紅豆蓉少啲雪糕多返啲應該會更討好。
泡芙皮乾身但無蛋香，如果唔係甜魔，或者係Keep Fit中嘅朋友仔建議唔洗浪費Quota試。
淨容量：80mL
價錢：$17.9（OK便利店）
甜度：*****
驚喜度：*
推介度：**
隨時接收最新資訊
讚好OpenRice專頁！