唔止得三寶沙田的大牌檔與小餐店

以前講起入沙田食嘢，通常都會第一時間諗起沙田三寶，即係乳鴿、雞粥同山水豆腐花，不過其實沙田仲有好多寶㗎。今次就同大家介紹下幾間沙田獨有嘅餐廳小店。

大牌檔食海鮮蒸氣鍋　　隱世貳館

Photos by ttwasabi & 皇子.KL
大牌檔都有蒸氣火鍋食，仲要有鮑魚餐同龍蝦餐任揀，真係估你唔到呢？其他食材都好吸引㗎，海鮮類有蜆有蟹有魚有蟶子……而湯底方面除咗有粥底、麻辣米線底等等，仲有個維他奶西米露糖水底，夠勇可以試下。

任食打邊爐　　新廣發

Photos by Pockei & Iris Lee Ching
打邊爐嚟講，呢度算幾齊料，要乜有乜，丸呀肉呀菜呀海鮮呀全部都好多種類，重點係，任食呀嘛。而且價錢唔貴，一大班人嚟食都幾抵。就算唔想打邊爐，都可以網燒或者韓燒。

典型屋邨茶記　　榮樂茶餐廳

Photos by takw & ericalau1213
茶餐廳有好多間，但沙田呢間點解特別要講？因為佢真係好典型嘅舊式茶餐廳，無論裝修定係嘢食都係。不過，最深得民心嘅係呢都「有SET等於冇SET」。點解咁講？因為所有嘢都可以任轉，餐包要三文治又得烘底又得，要菠蘿包又得雞尾包又得；蛋又係鍾意煎蛋太陽蛋奄列乜都得，粉粉麵麵都係一樣玩法。

40蚊食到飽　　星期二薄餅皇

Photos by Foodiekay & 愛食
呢間小店嘅Pizza係自家製嘅，唔太厚，不過夠多料，40零蚊一個，好抵食。雖然係小店，但款式都唔少，香辣燒雞批、千島醬煙三文魚批等等都值得試，叫埋意粉、雞翼、青口等等嘅小食都幾開心。BTW，佢個名叫星期二薄餅皇，但係逢星期二休息㗎留意返。

心機特色甜品　　甜椰椰

Photos by janice_lhs & ldawoman
根據國際慣例，最尾點都要介紹返一間甜品嘅（好似係要）。呢間都幾有特色，椰皇有得揀凍食定熱食，仲有雞蛋布甸配。原個椰皇上，入面嘅燉奶又香又滑，滲埋椰汁嘅清甜，就算正餐食飽咗都會想食晒。相反，正餐唔夠飽嘅，可以考慮叫個朱古力窩夫或者雪山意式芝士林餅。後者幾特別，唔係平時見嘅tiramisu樣，而係一層層疊高咗嘅脆脆，入面先至係包住的cream cheese。

文：Kar

隨時接收最新資訊
讚好OpenRice專頁！