真心講句，即使各大酒店自助餐有咩新主題，最受食客們歡迎嘅始終都係海鮮、海鮮同海鮮。既然係咁，尖東呢間酒店自助餐就同你嚟個海鮮大晒冷，除咗有龍蝦麵包蟹蟹腳大蝦等冰凍海鮮之外，連熱盤、串燒、湯水樣樣都海鮮出場，等你哋班自稱好擦得、好鍾意海鮮嘅buffet迷都投晒降，捧腹離場！

唔講廢話，首先即刻介紹一下各位必食嘅冰凍海鮮吧，海鮮款式有7-8款，包括：波士頓龍蝦、加拿大長蟹腳、法式麵包蟹、蟹鉗等，（左）蟹鉗被餐廳預自處理，食起來非常方便，啱晒一眾又懶又想食海鮮嘅各位；而蟹腳亦見粗身，蟹肉都幾多！（右）波士頓龍蝦可算係最受歡迎嘅凍海鮮，採訪當晚，開飯仔眼見廚師一refill，龍蝦迅速被夾走，好在廚師們都密密refill，各位唔使擔心。

另有蜆、蝦、青口及翡翠螺，旁邊除咗有檸檬，醬汁亦設6-7款，好多選擇！

除咗冰凍海鮮，餐廳更設日式爐端燒，由師傅不斷即席燒製各位串物，包括蝦串、菠蘿、匈牙利鬈毛豬肉腸、番薯、南瓜、牛舌、車厘茄、粟米、茄子。開飯仔推介 (左)匈牙利鬈毛豬肉腸，賣相雖然無普通腸仔無異，不過呢款豬肉腸係由純皇鬈毛豬肉及天然腸衣製成，豬肉好有油香，肉味亦夠濃；而即燒即食嘅（右）雞軟骨、蝦串味道亦見鮮美。

相比起刺身，壽司款式較有驚喜。雜錦燒壽司有3-4款火灸壽司如灸燒三文魚壽司畀客人揀；至於刺身壽司，有三文魚、八爪魚、油甘魚等5-6款常見選擇。

呢款越式粟米片炒蟹聽落幾盞鬼，但微甜嘅粟米片可增添炒蟹味道及口感，蟹肉更為惹味。

洋蔥煙肉焗蠔調味不多，蠔肉都幾大粒，而且依然juicy，配埋有咬口嘅煙肉，口感不俗。

爽口嘅田螺，加埋軟腍腍嘅薯蓉，呢道法式焗田螺無得輸！

嫩滑嘅（左）泰式焗青斑吸收多款香料嘅味道，香味十足；（右）椒鹽蝦唔使多介紹，相信係各位必愛嘅菜式。

西班牙海鮮炒飯以青口、蜆、蝦等海鮮煮成，米飯盡吸海鮮嘅鮮味，食落更為鮮甜。

湯水都用海鮮熬煮而成，採訪當晚有帶子海鮮周打湯、燉螺頭湯。

除咗海鮮，餐廳新增即製澳洲藍蟹鴨肝大阪燒，入面有椰菜、洋蔥、木魚絲、紫菜絲等配料，並以照燒汁、沙律醬作調味，好滋味。而且分量細細件，食完都仲有大把quota可以食到其他食物。

肉食方面有即切燒美國特級肉眼，牛味濃郁，另有燒汁、黑椒汁等醬汁選擇。

除咗牛肉之外，仲新增香草燒全羊，廚師喺客人面前即切出片片羊肉，羶味都幾濃。

至於甜品，餐廳新增幾款芒果甜品以及賣相好靚嘅法式甜品，數埋都有10幾款選擇架！雪糕則採用Häagen-Dazs，有呍呢嗱、咖啡、士多啤梨、tiramisu、藍莓及曲奇呍呢嗱6款口味，可單食或配以即製法式crepe同食架！

最為eye-catching嘅，當然係呢個以糖絲包圍住嘅（左）泡芙山，每粒泡芙都細細粒，入面仲有香甜吉士，好甜。仲有呢個充滿蛋香嘅（右）焦糖燉蛋，甜度亦都調得啱啱好。

而（左）朱古力歌劇院蛋糕採用嘅朱古力好幼滑，食完都不太感膩；呢款（右）法式檸檬撻賣相睇落以為好甜，食到檸檬撻時口感頓時好fresh，正！

呢個用菲律賓呂宋芒做成嘅（左）芒果腸粉，既香甜又夠滑；而（右）芒果紫糯米好有泰國風味。

每位客人可憑券換領法式釀麵包蟹蓋配鱒魚籽，麵包蟹蓋中釀咗鮮甜藍蟹肉、薯蓉、雜菜等，面層再有大大粒又bling bling嘅三文魚籽，分量十足，一定要記得換呀！

自助餐餐廳設於酒店中庭，感覺似置身於後花園般舒適，今晚仲會有live music performance，情侶或夫妻去食都幾romantic架！

「海洋奇緣」海鮮自助晚餐
供應日期：即日起至5月31日
供應時間：（星期日至四、公眾假期）6:30pm-10pm、（星期五、六及公眾假期前夕）6:30pm-9:45pm
價錢：（星期一至四）成人$598/位、小童$468/位；（星期五至日、公眾假期及前夕）成人$678/位、小童$508/位
注：另設加一

雅苑座
地址：尖沙咀麼地道69號帝苑酒店3樓

文：Joy