抹茶甜品就聽得多，但加落日式燒肉同Shabu Shabu度係搞邊科？今次牛角同温野菜就同日本京都宇治嘅百年老店北川半兵衛商店玩Crossover，17/8起推出期間限定Menu。無論係抹茶控，定鐘意試新嘢嘅朋友仔都可以留意一下！
 

首先介紹牛角限定（奧海城及香港仔店除外）嘅熊本豚腩肉配抹茶鹽醬。以北川半兵衛商店抹茶粉調製嘅抹茶鹽醬帶出熊本豚腩肉嘅脂香，令柔軟嘅豚肉食落更清爽。
 

仲有「北川半兵衛商店」宇治抹茶雪糕做甜品，雪糕用咗京都直送抹茶粉同北海道牛乳製成，配埋紅豆白玉更有和風Feel。
 

而温野菜就有宇治抹茶湯，喺雞湯當中加入北川半兵衛商店頂級抹茶粉，可以試到抹茶獨特嘅甘香。餐廳建議配牛肉或各種野菌，咁就既有食材鮮味，又唔會搶走抹茶茶香喇。
 

甜品方面都有宇治金時布甸，用嘅當然都係北川半兵衛商店嘅宇治抹茶粉，再加埋紅豆一齊食，口感同味道都更有層次。
 

以為已經介紹哂？未！最後仲有牛角同温野菜同步供應嘅抹茶啤酒，以七寶札幌啤酒做基底，加入京都直送嘅宇治抹茶粉，茶香餘韻十足，女士們都可以一試。

文：Cathy