秋冬天，番薯天 5大蕃薯味零食大比拼

最近喺街度，開始見到一檔檔嘅煨蕃薯檔出現喇，又進入食蕃薯嘅季節。而行入便利店、超巿同零食店，都多咗好多蕃薯呀、紫薯呀、甜薯呀之類嘅零食。究竟邊隻好食，邊隻真係重薯味呢？開飯仔即刻同大家試過：

百邦甜薯夾心餅

呢隻甜薯餅，寫到明原產地係日本，梗係要買返盒嚟試。細細盒，啲餅仔都係細細塊，總共12塊。夾心餅咁嘅樣，不過你唔好睇佢雖然好細塊，但食落嘅味道係幾豐富，首先係鬆脆餅皮嘅牛油味，正當你筫疑緊點解冇甜薯味嘅時候，即係塊餅差唔多食完嗰陣，甜薯味就慢慢出嚟喇，食完都幾甜。

甜薯度：****

桃哈多Poteko薯圈 – 燒蕃薯味

平時食開嘅薯圈通常都係煙肉味，最多計埋你芝士或者鮑魚味，見到甜薯味當然又買嚟試下。打開包裝，擺埋個鼻度聞下，都聞得到啲蕃薯味，再拎一粒放落口，比想像中更突出，好重蕃薯味呀，仲要係甜嗰隻。如果一次過啪多幾粒入口，就好似食咗啖蕃薯咁。

甜薯度：*****

桃哈多焦糖粟米條 - 蕃薯味

桃哈多粟米條成日都出唔同嘅口味，今次呢隻蕃薯味就寫住期間限定嘅。一食，都係平時食開嗰種熟悉嘅味道，甜甜der焦糖，但焦糖甜味過後，就會食到多咗重蕃薯味。由於蕃薯同焦糖都係甜嘅關係，呢包嘢的確係幾甜。

甜薯度：***

紫薯味蛋捲

見到佢個包裝係幾興奮，條蛋捲嘅紫薯色粉粉地幾靚。不過呢個世界，通常都係期望愈大，_ _ 愈大。打開，說好的粉紫薯色呢？淺色到呢。好，蛋捲不可貌相，試埋味先。咦，說好的紫薯味呢？淡到幾乎食唔到。作為一條蛋捲，佢係香口、係脆嘅，蛋味都夠香嘅，但作為一條紫薯蛋捲就……

甜薯度：*

固力果百力滋 - 甜薯

呢隻甜薯百力滋，就咁聞都聞到好香嘅甜薯味。細望每條百力滋，有一粒粒砂糖黐住喺面，比平時食開嘅多咗一個層次。再加埋都係甜甜的甜薯味，係會令人忍唔住食完一條再一條囉，特別係做緊嘢嗰陣呀。

甜薯度：****