彩虹果汁 避暑山莊
最近都成日見到有人拎住一包包五顏六色嘅嘢飲，原來就係呢間舖嘅彩虹沙冰。好似話條「彩虹」日日唔同色㗎，呢日就係藍、綠、黃、紅四層色，分別係柑桔荔枝、青蘋果、水蜜桃同石榴味，支筒拉上拉落都仲飲到幾種唔同味嘅，但好快就會溶為一體，變咗「果汁」。
除咗一包包嘅嘢飲，仲有一桶桶嘅梳打，好大桶下㗎都，至少都要兩三個人開心些牙。望住勁多選擇嘅餐牌，有選擇困難好正常，咁就揀返杯「選擇恐懼症」梳打啦，真係有呢杯㗎，唔是我呃你，不過係咩就要睇下店員嗰日嗰個moment想整咩喇。
彩虹果汁
$25好飲度：***
二合一果汁 Oh my cow
呢間明明有得食，點解歸咗入嘢飲？因為佢係二合一囉。設計係方便嘅，上層有個兜仔裝小食，下層就係果汁，一杯過唔使咁論盡。小食有薯角、吉列蝦、花枝條、鹽酥雞同安格斯牛柳揀，果汁呢就水蜜桃呀巨峰提呀荔枝呀等等都係偏甜少少嘅。開飯仔叫咗杯水蜜桃配安格斯牛柳，不過……啲牛柳略為韌咗少少，唔係好咬到，而水蜜桃汁就……嗯，如果有下次我會揀其他味。
水蜜桃配安格斯牛柳
$25好飲度：**
文青健康果昔 告白果屋
雖然係一間冇座位嘅飲品店，但係佢嘅裝修同擺設，甚至係飲品嘅名，都好有文青feel。咩「野孩子的天空」、「溫柔的巨人」等等說穿了其實即係唔同生果同乳酪、牛奶嘅配搭，每杯都有三片士多啤梨掛喺杯邊，好靚。有杯叫「青出於藍」就更加有埋羽衣甘藍呢種含豐富營養嘅菜喺入面，再加蘋果、菠蘿同牛奶，每一杯都係新鮮即叫即榨嘅。有生果嘅清甜，同時都有啲草青味，仲有咬口嘅粒粒，幾fresh，不過就唔多飲到菠蘿同牛奶味。
舖頭仲有一款叫慢磨鮮榨果汁，係用慢磨榨汁機榨嘅。比起一般榨汁機，呢部機唔會攪爛晒啲生果，而係將佢慢慢壓碎，就咁飲落，味道上唔覺有咩分別嘅，但相對上留得低嘅營養就多好多嘞。新開張冇耐，每日都有唔同嘅買一送一優惠做緊，但講真價錢都唔平，約莫都要$30蚊杯。
青出於藍
$45好飲度：****
重口味榴槤沙冰 冰砂榴槤大王
講清楚先，呢間都係開咗大約兩星期左右，不過就唔喺2樓嗰個飲食區度，而係喺地下最底層嘅。鍾意榴槤嘅朋友先好嚟，全間舖都係賣榴槤嘢，榴槤酥餅、榴槤雪條都係入口貨，仲有長洲嘅D24榴槤糯米糍，而榴槤沙冰就係每日新鮮即整嘅。有泰國金枕頭、馬來西亞D24同貓山皇3種榴槤揀，睇住老闆將成嚿榴槤肉放入攪拌機，加煉奶同少少水，好快就攪好一杯。堅係好香榴槤味，忍唔住要即刻飲返一大啖。可能榴槤本身texture嘅關係，攪出嚟都比較杰身，唔太似沙冰，但係幾好飲。
榴槤沙冰（貓山皇）
$32好飲度：****
文/相/片：Kar
隨時接收最新資訊
讚好OpenRice專頁！