日本菜講求不時不食，現時雖然已經4月尾，但係日本仍然屬於春天。呢個季節盛產好多獨特嘅時令食材，尤其是一系列海鮮，呢個Omakase套餐就可以一次過品嚐晒春旬滋味！

五道前菜有海老伴烏魚子、池魚他他、八爪魚伴秋葵醬、木魚昆布煮露筍及螢光魷魚，用唔同食材配搭，都係味道清爽嘅菜式。

刺身先來鰤魚、象拔蚌同伊佐木，白身魚味道較淡，食完唔會有膩滯感，之後上枱嘅櫻鱒來自青森，脂肪少，味道似三文魚但肉質更細嫩。中吞拿魚腩油脂最豐富，又不失魚鮮。

再來一道櫻花百合蟹肉饅頭，饅頭以百合及松葉蟹肉製成，加上一瓣瓣櫻花形百合，味道清淡優雅。牛油炒青柳大蜆則好鮮甜，爽口帶嚼勁。

壽司係今餐中嘅主角，有吞拿魚腩、春子鯛、針魚、鳥貝、沙鮻昆布漬同海膽。師傅用唔同方法處理，好似昆布漬、酢漬或者加少少青檸、紫蘇葉提鮮，令魚味更有層次。個人最鍾意沙鮻昆布漬同春子鯛，春子鯛係春天先有嘅食材，擁有幼魚獨有嘅軟身口感，魚鮮突出。

最後有師傅以豆乳加入櫻花自家製成櫻花豆腐，有沖繩黑蜜糖、葛絲及時令水果，甜味輕盈。

呢個菜單只係供應至5月31日，想試就要捉緊春天嘅尾巴喇！

竹壽司春旬の味菜單

供應時間：即日起至5月31日，晚上6時後供應

價錢：每位$1,680

文、相：Perrins