固力果橄欖芝士味百力滋
芝士控見到芝士味嘅百力滋，當然唔會忍得到手，打開聞落都幾重芝士味，而且仲係粗支裝，直徑有成1CM咁滯，係幾開心嘅，不過講真似食餅多過似百力滋。芝士味都幾香，滲出淡淡嘅橄欖味，都幾夾，而且每條百力滋面都有層芝士粉㗎，就咁吮都開心。
價錢：$9.9
數量：14條（2包入，每包7條）
平均每條：約$0.7
翻兜度：****
固力果沙律味百力滋 （超細版）
Pretz嘅沙律味百力滋，可以話係由細食到大，可能你已經食到厭咗。不過，佢呢排出咗新包裝，寫到明係超細版。究竟有幾細？嗯，大約係3、4條夾埋等於平時1條啦，都真係幾幼下。不過幼咗嘅口感，比食開嘅好喎，可能有新鮮感啩，同埋更加入味。而且一包有成100條，食極都仲有得食嘅感覺幾良好。
價錢：$12.9
數量：100條
平均每條：約$0.13
翻兜度：***
Glico 百奇塗層餅乾棒椰子味
Pocky趁住夏天，出咗兩款夏季限定口味，一款係橙味，一款係椰子味。椰子味都幾香，如果就算朦眼要估返呢隻味，未食都會聞得到朱古力x椰絲味。食埋落口就更加唔使講，椰香味比朱古力味重，而且仲有一條條椰絲喺條百力 滋上面，正！
價錢：$15.9
數量：16條（2包入，每包8條）
平均每條：約$1
翻兜度：****
Meiji 明治 Lucky Stick 士多啤梨味
呢排百力滋世界唔知是咪興粗裝，明治呢隻又係粗裝版，不過粗裝並冇令佢層士多啤梨醬跟住變粗。但粉紅粉紅脆脆的棒，係一如以往嘅香甜，而且感覺較creamy。 價錢：$5
數量：約13條
平均每條：約$0.4
翻兜度：**
Kabaya宇治抹茶
比拼點能夠冇抹茶味吖？相信其他牌子嘅抹茶味大家都試過，今次特地搵嚟最近新見嘅呢款包裝試下。喺便利店見到大大包都不過賣$13.9，係幾抵，一大包入面仲有9小包，好多呢。未食都聞到抹茶嘅香味，但反而食落口又唔算話太濃，可能因為醬太薄喇，唔夠重同突出。
價錢：$13.9
數量：54條（9包入，每包6條）
平均每條：約$0.26
翻兜度：**
樂天（Pepero）白朱古力曲奇
呢隻韓國進口嘅百力滋，首先吸睛嘅，可能係包裝盒上面嘅囝囝，不過佢有外表得嚟都有內涵嘅。白朱古力曲奇甜得嚟唔會太膩，仲真係有好多曲奇碎黏附住喺條百力滋上面，惟一要挑剔嘅就係醬嘅住太少，齋百力滋嘅部分有成三分一條咁多，sad咗少少。
價錢：$9.5
數量：9
平均每條：約$1.06
翻兜度：***
樂天Toppo餅乾條 – 黑蜜黃豆粉味
呢隻初初見到係會覺得有啲貴，成廿幾蚊盒百力滋係咩玩法？但當你食咗第一啖之後，你就唔會再出聲，因為真係好！好！食！首先黑蜜黃豆粉已經係比較少見嘅口味，通當都係食日式甜品嗰陣先會食到，而家轉咗嚟做百力滋味，一打開已經聞到好香好香嘅甜味，同樣都係粗條裝，中間似係通心但又通唔晒，百力滋中間就係包住黑蜜黃豆醬，黏黏地，甜甜地，有少少漿住咁，一試就愛上。BTW，另外仲有隻抹茶味，應該同樣出色。
價錢：$24.5
數量：14條（2包入，每包7條）
平均每條：$1.75
翻兜度：*****
甘大滋盒裝40克
講到百力滋，點可能少咗甘大滋先得㗎？仲要係藍色呢隻原味絕對係最經典嘅童年回憶！其實對比起而家咁多款百力滋，咁多款味，呢款真係最dry，最平平無奇，純餅乾一條，咩味都冇。但我哋對最簡單最原始嘅佢，偏偏就係最有情意結！
價錢：$6.5
數量：20條
平均每條：約$0.3
翻兜度：***
文：Kar
隨時接收最新資訊
讚好OpenRice專頁！