之前都介紹過，喺韓國大熱嘅益力多唧唧冰唔單止Hit到去美食博覽，而家去便利店都買到喇！而且開飯仔發現同時仲多咗唔少韓國零食，嚟睇開飯仔試食報告，搵到心水再去大手掃貨都唔遲吖。

樂天乳酪多唧唧冰


呢包唧唧冰唔單止從韓國開始洗版洗到嚟香港，連喺開飯仔畀錢嘅時候，便利店嘅收銀姐姐都忍唔住講咗句「呢包好飲呀尋日賣咗成箱啦」！係咪真係咁勁先？開飯仔影完一陣等啲冰溶咗少少就開始飲，味道同原味益力多好似，難怪有人喺Instagram上話覺得太甜，如果同港版益力多一樣有Light版就好喇。

雖然味道差唔多，不過Package就差好遠，袋裝唧唧冰扭開個口就飲得，夠方便。冰粒打得夠細，建議放室溫3-5分鐘等結塊咗嘅冰開始融再飲。而家夏末行到熱入便利店就即刻買到包嚟消暑，係唔錯嘅。不過價錢就比韓國原價貴咗成倍，抵唔抵就見仁見智喇。

淨容量：170mL
價錢：$19.9（7-11便利店）
甜度：***
驚喜度：***
推介度：****


樂天曲奇朱古力餅乾


呢個特大版其實喺韓國已經有咗一陣，最近先喺香港嘅便利店發現佢嘅蹤影。特別在於佢唔單止喺朱古力上面加咗朱古力曲奇碎，而且仲係特大版：一條就有20.5cm長！


Size就夠霸氣啦，食落餅乾條同曲奇碎都夠脆口，但因為朱古力漿再加朱古力曲奇甜上加甜，食一條就啱啱好。好彩係獨立包裝，可以同朋友仔一人一支。一盒唔太貴，偶然過下口癮都唔會太大罪惡感。

淨重：36g（一盒兩包，每包各一條）
價錢：$5.5（7-11便利店）
甜度：****
驚喜度：**
推介度：***


樂天綠茶味百力滋


連普通Size嘅百力滋亦有三款新嘅口味，開飯仔就揀咗最近大熱嘅綠茶口味。包裝上面仲寫住係用咗韓國濟州島嘅綠茶粉。


不過唔知係咪期望越大失望越大，食落口其實綠茶味道唔算濃郁。表面餅乾幾脆，不過無味。咬咗一陣先食到入面嘅綠茶味，綠茶朱古力勝在唔太甜，亦食到少少綠茶清香，可惜餘韻不足。而且頭尾位比較少朱古力，唔係成條實心，要扣分。

淨重：39g（每盒一包，一包約9條）
價錢：$5.5（7-11便利店）
甜度：**
驚喜度：**
推介度：**



最後同場加映呢包喺7-11便利店見到嘅Ready Q 薑黃軟糖，一包三粒就要$29.9。開飯仔就無試喇，唔係因為佢單價高，而係因為佢唔係普通軟糖，而係解酒用嘅！可以喺飲酒前後按自己飲酒嘅分量食一至三粒加快解酒。