踏入情人節嘅月份，各位情侶們諗到點慶祝未呢？無論你哋係第一年慶祝，定係已經慶祝咗好多年，心思都係必須嘅。如果另一半熱衷打卡嘅話，以下呢4間襯晒色tone嘅主題下午茶一定可以幫你加分，記得襯埋衫去為放閃做準備呀。

目錄

「紫綴金炫」煥肌下午茶 alibi    

紫色總係畀人一種高貴同浪漫嘅感覺，呢間酒店推出 「紫綴金炫」煥肌下午茶，包括前菜紫甘藍醃三文魚配西芹頭沙律及烤薄脆餅、森林蘑菇馬卡龍、鮮味彈牙嘅加拿大龍蝦可樂餅同白毛豬火腿曼徹格芝士多士。甜品就多以天然紫色食材如藍莓及紫薯入饌，清香幼滑嘅無花果乳酪意式奶凍、濃厚綿密嘅紫薯抹茶慕絲蛋糕同多重層次口感嘅藍莓伊斯法罕馬卡龍，食材天然又好味，仲好啱打卡呀！

供應時間：2023年1月9日至2月28日，每天下午3時至5時30分

「粉紅甜蜜 ‧ 果漾下午茶」 pitstop 

粉紅控要出動喇！呢個下午茶以多種優質野莓同香桃入饌，無論甜鹹點嘅配搭都令人驚喜，而且粉紅色真係好夢幻。鹹點推介士多啤梨粉紅大蝦雞尾酒，蝦肉鮮甜爽彈，士多啤梨雞尾酒醬又夠開胃。軟殼蟹三文魚籽魚鬆卷以米飯包裹金黃酥脆嘅軟殼蟹，味道鹹香又多層次～甜品方面紅桑子白朱古力撻同玫瑰瑪德蓮蛋糕都好吸引，前者以香濃嘅朱古力配新鮮紅桑子，酸酸甜甜唔會甜膩，後者鬆軟帶淡淡玫瑰香。

供應時間：即日起至2023年3月31日下午2時30分至5時30分

抹茶下午茶套餐 Matchali x Moxie  

中環西式咖啡店同本地現代抹茶品牌合作，推出以抹茶為主題嘅下午茶！成個tea都係綠色~ 下午茶三層架套餐包括3道 Moxie招牌鹹味小食同4道甜品，鹹味小食有黑芝麻蝦多士、炸鷹嘴豆配紅椒醬等；甜品均採用 Matchali嘅茶道級抹茶同手工焙茶，款款茶味都好香濃又精緻，抹茶控不可錯過。

供應時間：即日起至2023年3月9日

「沁人柑香」下午茶 YAMA     

見到咁多橙色嘅甜鹹點真係令人難以抗拒！溫州蜜柑帶有恰到好處嘅酸味同濃郁甜味，用嚟整甜品就最啱。以時令溫州蜜柑入饌嘅「沁人柑香」下午茶，岩鹽蜜柑撻以蜜柑果肉點綴香脆嘅岩鹽牛油撻，味道香甜而不膩。柚子芝士慕絲伴柑果凍嘅mousse香滑濃郁，頂部灑上酸甜清爽嘅柚子碎，超清香～另外當然唔少得鹹點，包括日本甜番茄伴酢啫喱、特上刺身盛合同自選串燒三款，除咗視覺，絕對滿足埋味覺！

供應時間：即日起至2023年2月26日，星期六、日及公眾假期3pm - 5pm (最後點餐4:30 pm)

文: Yanica
編：Kar