幾時都話「香港人鐘意食日本菜是常識吧」，呢個月10強榜嘅三甲清一色日本菜餐廳，而且其中兩間仲係專賣今期大熱嘅海鮮丼！10月霜降時節，10強榜上嘅雪糕店亦慢慢換成火鍋店，不過亦有甜品店靠冬甩甚至係紫薯冰首次打入10強。
第10位 聰少甜品（*新上榜）
喺尖咀新開咗冇耐嘅聰少甜品，極速就打入十強榜，估計應該同佢嘅隱藏menu：紫薯冰有莫大嘅關係。話說聰少係聰嫂嘅新line，大部分嘅甜品都同聰嫂差唔多，即係嗰啲榴槤水晶珠呀、龍眼椰果冰呀咁，惟獨是呢個紫薯冰，menu冇嘅，但有得嗌。靚得嚟仲有紫薯蓉食到，加埋西米同小丸子，係要試下嘅。
第9位 樓下冰室
喺年頭上過榜嘅呢間荃灣冰室，喺年尾又上多次。去到基本上，唔使諗，蕃茄濃湯通粉配牛乳炒蛋、瑞士雞髀，另外再加多杯紅豆冰或者綠椰冰。特別係鍾意蕃茄湯嘅朋友，佢呢度嘅蕃茄湯真材實料嚟，冇用茄膏㗎，夠晒鮮味，隻蛋加埋牛奶一齊炒，零舍滑。
第8位 米走雞
係時候開始出動打邊爐喇（雖然可能你一路都出動開），相信大家對呢間「雞煲」都唔會陌生，芝士迷就應該更加心心眼，成個煲都係芝士，一開頭食嘅雞都畀芝士浸勻晒，拉芝雞不得了呀。之後記得要嗌個麵自製芝士撈丁，仲有其他配料丸呀菜呀等等通通都可以變晒芝士餸，唔夠芝士嘅再加都得！
第7位 Buttery Factory （*新上榜）
喺銅鑼灣地帶嘅呢間冬甩小店，係香港少有嘅冬甩專門店。由兩個喺外國回流返嚟香港嘅90後開嘅。啲冬甩日日新款，最吸引嘅一定係綠茶冬甩同繽紛樂冬甩，但就算係綠茶冬甩，你今日見同聽日見嘅配料都可能會有唔同，而且唔止得甜味，連鹹味嘅冬甩都有，夠晒玩味！
第6位 霸嗎拉麵
呢間拉麵舖好似老是常出現咁，今年已經第4次上榜啦，不過佢舖頭門口嘅人龍都一樣係老是常出現。拉麵款唔算多，都係雞叉燒或者豚肉再配搭唔同湯底咁樣，但係佢雞肉嫩、麵質彈牙，濃湯底同真流心嘅溏心蛋的而且確係會令人食過番尋味嘅。
第5位 CHOO CHOO
長沙灣呢間骨致西餐廳今次已經係第四次登上10強榜，特色係餐廳裝修到一個個長途火車車卡咁，唔通大家10月無長假去唔到旅行，所以嚟呢度食飯當去咗？招牌菜之一牛肩胛配蘆筍黑松露波特菇有肉味香濃又夠腍嘅牛肩胛，中間夾住清新嘅蘆筍，最底仲有隻加咗蒜片同黑松露醬嘅超香口波特菇！
第4位 8鍋臭臭鍋
睇嚟香港有唔少食家都係「臭」味相投，嗱，開飯仔講緊臭豆腐嘅臭味咋下。尖沙咀呢間由台灣傳入嚟嘅招牌臭臭鍋湯底加咗臭豆腐，名副其實「臭」味濃郁。而且唔單止湯底，配料亦相當認真，貢丸、米血糕、甜不辣等都係由台灣入口，連飲品都係珍珠奶茶等台式特飲，又幾地道喎。
圖：拜食族
第3位 豊勝手丼（*新上榜）
今期流行唔係椎名林檎，而係日式海鮮丼！刺身海鮮丼新貴當然唔少得灣仔呢間新店，勝手丼者，自己丼飯自己揀是也。小店可以畀食客任揀自己鐘意食嘅刺身配搭，如果有選擇恐懼症嘅，亦可以揀師傅發板（Omakase）或者定食。唔少食家都大讚呢度嘅刺身新鮮得嚟質素又高，特別係海膽係必食之選！
第2位 味道樂居酒屋（*新上榜）
有時候小店要突圍而出，總要諗下計仔，長沙灣呢間居酒屋就有呢個非常霸氣嘅原條成田醬炭火燒鰻魚飯！原條鰻魚蓋上飯面，除咗似放大版壽司夠吸睛之外，鰻魚肥美厚肉加埋濃郁鰻魚汁，一個唔小心就會食哂成碟。記得嗌埋味道樂特選九品料理，當中以三文魚籽甜蝦蓉丼最吸引，用料認真鮮味十足。
第1位 豊洲水産海鮮丼専門店（*新上榜）
一上榜就空降第一位，呢間海鮮丼到底有咩過人之處？一，由築地市場水產店豊洲水産主理，幾乎每日都會有唔同嘅海鮮從築地直送到港，夠新鮮。二，呢度主打唔同配搭嘅海鮮丼飯，種類選擇夠豐富，由港人最愛大堆頭嘅豊洲海鮮丼，到畀你專心品嘗肥美鮪魚嘅黑鮪霜降腹身丼都有，夠專注。
圖：安娜愛閒遊
文：Kar、Cathy
隨時接收最新資訊
讚好OpenRice專頁！
