【牛扒界天花板】阿根廷牛! 365日抵食Lunch鋸扒+地道料理

食好嘢一向有個抵食策略，就係把握Lunch Time!! 因為午市食材同晚市一樣，但價錢就平好多啦。好似呢間阿根廷高級扒房“La Parrilla”一星期7日都有午市套餐，連放假都食到。

“La Parrilla”由外國大廚主理，引入牛扒界天花板嘅阿根廷牛扒。店內自設熟成牛扒櫃，經乾式熟成(Dry Aged)後牛味更濃㗎。呢度都有多款阿根廷地道料理，好似阿根廷餡餅(Fugazetta Empanada)、傳統炸牛扒(Milanesa)等，午市套餐都食到㗎。

午市套餐$218，就有前菜+主菜+配菜+飲品。想將主菜升級做阿根廷牛扒都只係$298(即係加$80咋)；想再高級啲食靚肉位，可以額外升級，如肉眼扒+$98/250g、牛柳+$98/200g、阿根廷T-Bone扒+$198/500g等。

【阿根廷Lunch】前菜+主菜+配菜+飲品

嚟“La Parrilla”食飯記住揀窗口位，大窗望住紅磚大館幾靚景。加埋歐洲風環境，深木+磚牆設計幾有Feel。

歐洲紅磚小屋裝潢，置身異國氣氛。

窗邊座位好開揚，適合把酒談歡。

前菜

特別推介傳統餡餅(Fugazetta Empanada)

前菜可以揀熱湯／牛肉他他／熱溶Provolone Cheese，並有多款阿根廷地道小食選擇。傳統餡餅(Fugazetta Empanada)就係其中之一喇，外層炸到金黃脆卜卜，內餡係滿滿Provolone Cheese、洋蔥幾濃郁滿足。

新品前菜肉丸(Meatballs)

“La Parrilla”外國大廚好堅持手製多款料理，因為可以控制所有食材、香料確保質素。而新品前菜肉丸(Meatballs)都係用阿根廷牛肉手打而成，肉質紮實又有肉味，連埋番茄蓉一齊食幾開胃。

主菜

阿根廷傳統料理Milanesa

入門價錢$218都有約7款主菜揀，味道一啲都唔入門。好似阿根廷傳統料理Milanesa，當地人會用麵包糠包住薄切牛扒炸香，上面仲有番茄、芝士幾有風味。

新出乾式熟成牛漢堡(Dry-aged Beef Burger)

係直接喺店內熟成櫃拎牛扒出黎手打而成㗎，相比一般漢堡肉味更濃!! 上枱嗰陣仲見到半溶芝士慢慢流落嚟，影完相就即刻趁熱食喇。

烤雞(Grilled Spatchcock Chicken)

除咗牛扒外，呢度嘅烤雞(Grilled Spatchcock Chicken)好有驚喜!! 外層燒得幾香口，雞肉纖維好幼好嫩，有種入口慢慢融開嘅感覺。

升級主菜！Lunch食阿根廷牛扒

用Lunch嘅價錢鋸扒真係好抵，Lunch Set$298(即係加$80咋)就可揀牛腰扒(Rump Steak)、牛腹肉扒(Hanger Steak)、平鐵牛扒(Flat Iron)。想食靚牛位可以再升級滿足一眾牛扒Fans!! 好推介牛柳(Fillet)+$98/200g，因為運動量少，較少筋絡、纖維係最軟最嫩嘅肉位。“La Parrilla”用扒爐猛火鎖住肉汁，外層有啲焦脆炭燒味，一刀輕鬆切到底入面仲係靚靚粉紅色。