想像喺泰國街頭，畀香料香氣、炭火烤肉嘅嘶嘶聲包圍，齋諗已經好想食泰國嘢喇!! 最近中環新開“BKK”主打曼谷、泰國東北部料理，集合兩大地區美食精髓，以豐富香料完美結合甜、酸、辣、鹹。
泰國風味 | 唯美木系環境
“BKK”以木元素貫徹全店，華美拱形天花儼如皇宮，仲有半露天位掛滿吊燈好有情調，真係有種離開香港嘅放鬆感。呢度大部分食材都係泰國進口，好似青木瓜沙律(Som Tum)；抑或富風味嘅粉絲沙律(Yum Woon Sen)都好品嚐到酸辣、香草微妙平衡。
而呢度最最最吸引係炭燒烤肉！泰國沙嗲串燒用咗獨特香料+濃郁花生醬調製，好有泰國街頭風味。串燒烤肉則用炭火燒製，未食已經聞到炭火同煙燻香味啦。
【炭火烤肉】
沙嗲炭燒雞肉
最地道嘅沙嗲串燒，濃郁沙嗲醬好重花生醬味。雞肉外層燒到微焦，咬開又好juicy。
炭燒和牛配Nam Jim Jaew醬
炭燒和牛好有油香肉味，跟配嘅Nam Jim Jaew醬係泰國人常配燒肉、炸肉嘅醬汁嚟。以青檸汁、魚露、辣椒粉等調製，酸辣帶微甜，入口會有多種味道變化幾驚喜。
【Soup & Salads】
如果你都好掛住泰國菜酸酸辣辣嘅爽快感，“BKK”就用泰國食材做出地道沙律風味。
依善青木瓜沙律(Isaan Som Tum)
泰國依善地區嘅著名料理—依善青木瓜沙律，用酸子醬汁、青木瓜、辣椒撞出酸辣。差唔多成個沙律都鋪滿青木瓜，真係可以大大啖爽食青木瓜呀!! 有時又會食到蝦米、花生，鹹甜交替有記憶點。
泰式辣味海鮮沙律(Phla Thale)
Phla、Thale泰文分別意指沙律、海鮮。恰如其名，沙律鋪滿多款辣味海鮮，全部都好輕韌爽彈，越咬越辣真係會上癮呀。同時大廚巧妙加咗薄荷、香茅醬汁平衡辣度，辣得更有層次。
【Mains and Wok】
泰式咖喱蝦(Choo Chee Kung)
Choo Chee Kung係泰國傳統咖喱料理，大蝦(Kung)作為主角真係超大隻厚肉!! 特別選用新鮮蝦，就算咖喱濃味都無遮蓋鮮甜味。
當地Choo Chee Kung咖喱好濃郁，主要用紅咖喱醬、椰奶、香料、柚子葉煮製，微辣富奶香，就算唔嗜辣都可以一試，撈飯一流呀。
和牛肋肉配馬斯曼咖喱(Massaman Beef Short Rib Curry)
泰國地道馬斯曼咖喱，以肉桂、丁香、豆蔻等煮製，風味濃郁，濃味控必食呀!! 和牛肋肉仲煮到好軟腍，係一咬會慢慢化開嘅程度。
【泰式湯麵】
椰汁牛肉咖喱湯麵(Khao Soi)
泰國北部咖喱湯麵以咖喱、椰汁煮製，可以想像到湯底比較濃郁。所以麵條做到特別飽滿彈牙，好掛到湯汁勁惹味。
泰式蝦炒金邊粉(Pad Thai with Prawns)
食泰國嘢點少得炒金邊粉，呢度係用酸子醬、蝦、花生等炒製，加埋魚露、檸檬汁、辣椒等爆炒，蝦肉同香料鮮味滲晒入金邊粉，集合咗鹹、甜、酸、辣多重味道。
【甜品】
“BKK”有多款色彩繽紛嘅泰國甜品，一定要食嘅當然係芒果糯米飯，熟透香甜芒果+軟Q椰子飯，有時諗起都好想再食呀!! 同場仲有泰國Coconut Dumplings、Sago Namkarati等，好值得留肚食㗎。
凡惠顧任何食品，可獲贈Welcome Drink 一杯
“BKK”由經驗豐富泰國大廚主理，抱持對泰國料理熟悉及熱愛，為你帶嚟最地道泰國美食。
BKK
地址: 中環鴨巴甸街35號PMQ元創方A座Staunton地下SG09-SG14號舖
電話: 23300306