你食過嘅海景餐廳同大海有幾近? 由黎巴嫩人Imran Khaleel夥拍埃及總廚Maged Makram開設“Maison Beirut”，行十幾步就去到海邊影相，真正超近距離海景餐廳呀!!
“Maison Beirut”位於將軍澳海傍風景如畫，可以飽瞰大海迷人景色。餐廳擁有迷人環境，食客可以享受寧靜海岸風景，同時沉醉於正宗黎巴嫩美食中。呢度提供露天用餐體驗，將美味食物同美麗自然環境相結合。
最吸引係價錢好抵，藍天白雲下嘆個Lunch只係$118，8道菜+甜品+唯美熱茶。晚餐必食炭香阿拉伯烤肉低至$198，外國人份量大滿足!! 仲有多款黎巴嫩地道鷹嘴豆蓉、香烤哈羅米芝士、香烤羊肉腸等。趁新開業推出多項優惠，嚟飲酒慢食Chill吓～
“Maison Beirut”新開業優惠詳情
優惠1) 生日優惠 3月壽星享免費甜品一份
優惠2) CP值高唯美午餐 逢星期一至五(12:00pm - 3:00pm)，午市套餐只需$118
優惠3) 全日菜單85折 於3月1至3月31日(星期一至五) 全日菜單85折優惠*
*週末和公眾假期不適用 |
“Maison Beirut”有戶外座位，春夏望海景食飯好Chill。
室內座位都好寬敞。
黎巴嫩菜大受健康人士追捧
當初黎巴嫩老闆Imran選址將軍澳海傍開店，就係鍾意呢度可以望到無敵大海景，所以“Maison Beirut”特設戶外座位，踏入初春坐戶外吹吓風真係幾舒服。
Imran特邀擁40年經驗埃及總廚Maged Makram主理，踏遍埃及各地鑽研廚藝知識，對食材、味道都好堅持!! 所以“Maison Beirut”都不計成本用高級食材、黎巴嫩香料，甚至引入黎巴嫩最高級橄欖油，煮出黎巴嫩風味。
平時覺得健康嘢多數唔好食，黎巴嫩菜就用味道證明健康&好食可以並存㗎。因為黎巴嫩菜用天然蔬菜、豆類、香料調味，標誌性嘅豆蓉、炸鷹嘴豆餅仲可以補充優質蛋白質𠻹。就算當地人好鍾意食嘅烤肉都唔使大量鬆肉粉、調味劑，烤肉原汁原味又有炭香。
(左)主理人Imran Khaleel、(右)埃及總廚Maged Makram
二人完美呈現黎巴嫩風味料理。
【CP值高】唯美午市套餐
呢度嘅午餐真係值得一試，係將軍澳區內極罕超抵價!! 只需$118有8道菜+甜品+飲品，仲要係好精緻唯美。私心推介飲品一定要揀靚靚阿拉伯茶壺呈上嘅阿拉伯薄荷茶，即刻好有儀式感。
午市套餐咁豐富只係$118，CP值好高。
Lunch跟配阿拉伯薄荷茶，茶壺呈上好唯美。
黎巴嫩開胃菜
一坐低會有是日餐湯暖吓胃先，跟住就有午餐會一大盤上枱，真係俾佢嘅珍寶Size嚇親呀。全部開胃菜、主菜、配菜都喺晒度，幾鍾意每樣食啲嘅感覺，幾有新鮮感。
而且好多黎巴嫩料理都未接觸過，好似4款黎巴嫩開胃菜之中嘅鷹嘴豆蓉、烤紅椒核桃蓉，可以隨心用阿拉伯烤餅蘸嚟食。鷹嘴豆蓉綿密淡雅；烤紅椒核桃蓉就會酸辣啲啲，幾香口惹味。
首先飲是日餐湯，之後享用一大盤Lunch Set。
鷹嘴豆蓉
烤紅椒核桃蓉
開胃菜仲有薄脆紅石榴醬沙律、炸鷹嘴豆餅，好鍾意沙律加咗紅石榴醬甜甜地。而外國人好鍾意食嘅炸鷹嘴豆餅，同樣炸到好脆內綿，單單呢幾款前菜已經幾滿足。
薄脆紅石榴醬沙律、炸鷹嘴豆餅
主菜5選1
5款主菜選擇都幾廣泛，相信中東羊肉丸、雞肉串燒、牛肉沙威瑪係熱門選擇，佢哋嘅烤肉真係燒到有炭香，肉味濃又有肉汁。下晝未想啖啖肉都有香煎盲曹，總廚Maged Makram將盲曹煎到啱啱好，魚肉嫩嫩滑滑。
其實黎巴嫩菜好啱素食，因為當地人真係將天然蔬菜煮到出神入化，常見嘅鷹嘴豆、紅菜頭、茄子、番茄都煮得好好味!! 今次午餐主菜都有番茄香草釀茄子(V)揀。如果你身邊都有Go Green朋友，真係可以帶佢嚟試吓。
中東羊肉丸
雞肉串燒
最後仲有米布甸食，咁豐富只係$118真係好抵食。
甜品米布甸
“Maison Beirut”午市套餐$118
黎巴嫩開胃菜 是日餐湯 鷹嘴豆蓉 烤紅椒核桃蓉 薄脆紅石榴醬沙律 炸鷹嘴豆餅
主菜5選1 番茄香草釀茄子(V) 中東羊肉丸 雞肉串燒 牛肉沙威瑪 香煎盲曹
配菜 黎巴嫩米粉飯 阿拉伯烤餅
甜品 米布甸
飲品 咖啡 檸檬茶 阿拉伯薄荷茶 汽水 |
【晚餐啖啖肉】
2人份燒烤拼盤
燒烤拼盤堆滿烤羊架、牛肉、雞肉，上枱嗰陣炭盤依然飄緊煙，真係又香又靚呀，而且呢個烤肉份量真心滿足。
2人份燒烤拼盤，烤盤上枱幾震撼。
雞肉串燒／牛肉串燒
串燒烤肉又係另一種風味。唔係一般串燒份量，係大件珍寶份量，同樣滿足到啖啖肉渴求。
雞肉串燒，比平時食開嘅串燒大份量好多。
牛肉串燒，下面嘅烤餅吸晒肉汁。
招牌慢煮羊腿
羊肉係黎巴嫩菜名物之一，就算羊腿咁大隻一啲都唔韌，慢煮後依然軟嫩。
招牌慢煮羊腿，大大隻一啲都唔韌。
牛肉燉湯汁
鍾意撈飯可以揀呢道牛肉燉湯汁，牛肉燉到好軟腍，湯汁有晒肉味精華呀。
牛肉燉湯汁，一嚐牛肉精華撈飯。
黎巴嫩雞卷
啖啖肉選擇以外，呢款雞卷用雞肉包住米飯，雙重口感幾特別。
黎巴嫩雞卷做出雙重口感。
【飲酒必食】
黎巴嫩料理都幾啱佐酒，好似香烤哈羅米芝士，軟糯鹹香；香烤羊肉腸，一咬爆出羊肉幾惹味；紅石榴蜜煎雞肝有獨特口感，外甜內嫩好獨特。
香烤哈羅米芝士，軟糯鹹香好啱飲酒。
香烤羊肉腸，羊肉綿密飽滿。
紅石榴蜜煎雞肝，鹹甜交替。
【黎巴嫩地道料理】
平時Go Green同朋友食嚟食去都係沙律，黎巴嫩菜真係有新鮮感得多，如多款地道素食Mezze—甜菜根鷹嘴豆蓉、貝魯特鷹嘴豆蓉、烤茄子蓉等，全部跟配好鬆軟嘅自家製阿拉伯烤餅&粟米片。同場亦有薄脆紅石榴醬沙律、塔布勒沙律。
(左上及左下) 甜菜根鷹嘴豆蓉、貝魯特鷹嘴豆蓉
(右上及右下)羊肉鷹嘴豆蓉、烤茄子蓉
(中間)跟配自家製阿拉伯烤餅&粟米片
塔布勒沙律
塔布勒沙律
Maison Beirut
地址: 將軍澳唐賢街29號藍塘傲格林威治村地下10號舖
電話: 23210368