有時想去近郊呼吸吓新鮮空氣，東涌係唔錯嘅選擇。原來呢區海邊有一系列餐廳，有時仲會睇到飛機飛過幾特別。“Maison Du Mezze”就係海邊餐廳之一喇，佢哋主打黎巴嫩菜，異國風環境更曾入圍國際餐飲設計大賽㗎。
“Maison Du Mezze”環境好有異國氣氛。
黎巴嫩海鮮饗宴 | 主菜低至$128
今個夏天，“Maison Du Mezze”外籍大廚Samer準備一場限定海鮮饗宴“Symphony Lebanese Seafood”。全部外國食材入饌，一嚐新鮮魚貝撞上香料嘅濃郁風味。熱湯、前菜、主菜都可用相宜價錢order，食幾多嗌幾多，豐儉由人。主菜更低至$128，CP值好高呀！
外籍大廚Samer，設計限定海鮮饗宴“Symphony Lebanese Seafood”。
“Symphony Lebanese Seafood”菜單。
限定套餐有激多海鮮，好豐富。
【熱湯】
Seafood Harira Soup$88
大廚Samer用黎巴嫩香料高湯，熬煮多款海鮮。湯身較濃稠，海鮮份量又夠多，真係做到啖啖海鮮，淨係呢個湯已經好滿足。
【前菜】
Prawns Fattoush$98
呢款傳統嘅黎巴嫩沙律，加咗炸皮塔餅香口好多。烤蝦串完全係主菜份量!! 全部大大隻，燒到微焦勁惹味。
Hummus Topped with Lemon Herbs Octopus$88
講到黎巴嫩菜，一定會諗起經典嘅鷹嘴豆蓉。當地人真係好鍾意呢種豆蓉，綿密香滑，原來健康嘢都可以咁好食!!
今次鷹嘴豆蓉加咗檸檬香料八爪魚，八爪魚好彈牙，撈埋鷹嘴豆蓉一齊食有雙重口感，酸酸地仲好開胃。
Lebanese Shrimp$98
“Maison Du Mezze”食材夠新鮮，所以嚟食海鮮真係啱晒。好似呢道黎巴嫩蝦球咁，用經典蒜蓉、牛油、檸檬煮已經好好食!! 用高溫煮蒜蓉同牛油真係無得輸，一上枱已經聞到好香啦，飲酒一流呀。
Seafood Kibbeh$108
黎巴嫩地道小食Kibbeh，係用布格麥、香料搓成波波油炸，口感硬脆，邪惡得嚟又健康。餡料就有魚肉、海鮮，蘸啲番茜Tahini芝麻醬好好食。
Cabourya$98
召喚所有軟殼蟹迷!! 軟殼蟹好大隻呀，炸到金黃脆卜卜。配茄子蓉食，一脆一綿好平衡，伴碟仲有Harissa辣蒜醬。
Lebanese Seafood Scampi$98
Scampi係好清新開胃嘅海鮮煮法，今次黎巴嫩風味就揉合柚子、橄欖油、新鮮香草煮製多種海鮮，忍唔住叫份皮塔餅蘸埋個汁嚟食。
【主菜】
Stuffed Squid$148
如果你鍾意QQ彈彈口感，呢份珍寶墨魚一定要試!! 墨魚釀滿香料飯，仲有滿滿特製Kashkash醬，豐富香料味更有層次。
Beirut Fried Fish$128
想嚟飲杯啤酒chill吓，可以揀呢份炸魚薯條。鱈魚沾滿麵包糠後炸到金黃。仲有勁多薯條，特配刁草醬平衡炸感。
Sea Bass$298
呢度有特製炭爐，高溫炭燒可以瞬間鎖住鮮味，所以燒海鮮、燒肉扒特別好食㗎。海鱸魚燒到微焦輕脆又有炭香，配松露蘑菇及檸檬牛油醬好好食。
One Pot Seafood Freekeh$158
呢道海鮮飯好有儀式感!! 小鍋放滿海鮮飯，飯粒飽滿吸晒海鮮精華，幾個人share都夠食。
Samak Matfi$158
有時夏天無咩胃口，揀呢份烤魚就啱晒喇。烤魚夠新鮮，所以簡單烤熟已經好鮮甜。薯仔再淋滿香料、蒜蓉汁，綿滑口感唔覺唔覺就清碟啦。
Clams Pot$148
馬尼拉蜆出名鮮甜，簡單用番茜、牛油、檸檬逼出鮮味已經好好食。記住用跟配嘅麵包，吸埋蜆汁食好正。
Maison Du Mezze
地址: 東涌怡東路9號灣景薈地下G10號舖
電話: 23300131