第一次去 Airside
同男友玩冒險樂園玩到好夜好多餐廳開始收
冇幾多餐廳可以揀
見少數開梗既當時都冇乜特別想食
最後揀左依間覺得比較食得落
所以本身無抱任何期待
入嚟安排左坐最入面果排2人枱
覺得有啲迫想轉去出面四人枱
店員態度都好好即刻比我轉
(*首先越南餐廳叫野食我一定要叫全走茜先)

《牛油果沙冰》$42

因為平時都好中意牛油果🥑
見到佢有牛油果沙冰就點嚟試試
但都冇特別期待
因為真係唔係好多地方既牛油果沙冰好飲
點知一嚟到我飲左啖 簡直係驚豔！
可以話係我飲過最好飲既牛油果沙冰！！！
首先最重要既牛油果味濃郁
唔會覺得佢溝稀左或加左好多糖漿
就係原汁原味既牛油果味
最出色既係佢既沙冰超級soft and smooth！！
完全唔似出面啲沙冰會食到碎冰塊
總之就係完美 絕對會因為依個沙冰特登嚟多次
希望佢可以keep住水準唔好變😭
我重介紹左同事去飲
佢帶埋家人小孩去個個都點左依個牛油點沙冰
個個都話真係好好飲～

《叁拼牛Combo粉麵》$98
※生牛肉、牛助條、牛丸，河粉


越南河粉又係唔係到到既湯底都出色
一飲啖湯 正！
完全係我中意既濃郁越南牛湯又唔會死咸或淡
因為我一定要食一啖要一口湯咁食
所以麵未食完啲湯就就嚟飲完
因為餐廳都就收店 抱住僥倖心態問下可唔可以加湯
又真係比左一碗仔牛湯比我 開心～
全程服務態度都好好
而生牛肉、牛助條、牛丸全部都好嫩好好食！
所以介紹比同事佢地一家都係每人點左一碗麵
都話好好食冇介紹錯～

《香芒蝦仁米紙卷》$78

今次食既芒果好彩係又甜又大粒
蝦都多肉大大粒係我個人中意既配合

《Jumbo特大越南大頭蝦配蝦頭油炒金邊粉》$158

由於我係因為想試佢既大頭蝦所以點左依道餸
不過就相比起前面既菜色就我個人覺得冇咩特別
可能我已經飽飽地 而我又比較淡口味
所以覺得金邊粉偏咸
大頭蝦都大隻多肉 但唔夠嫩同蝦膏唔算多
唔算話特別出色 因為有係出面食過超好食既大頭蝦
所以依道餸對我嚟講就還好


又食到人收舖 都唔會有趕客既感覺
雖然係新界人
但絕對會再嚟飲牛油果沙冰同越南湯河！
希望可以一直保持水準🥲唔好變質

舊年有長輩做咗「Mira Plus」會員，為咗要享用其中一張優惠券，所以就組咗小團過海，一試「The Mira」酒店旗下嘅「Whisk」。網上訂座必先預繳訂金，流程相當簡易。上集「不歡時光」其實已經提過西餐廳位置刁鑽，不易到達，真係冇諗過室內問題仲多！用餐大堂雖則寬廣開揚，無奈四周嘅閃閃吊燈及地毯上嘅轉圈圖案令眼睛不太舒適，加上室內氣溫奇高，冷氣開盡兼開埋冷風機連一向怕凍嘅靚靚媽咪都話熱，大家未食已感暈陀陀！另外仲有一點好奇怪，就係服務生竟然幫契妹個哥哥拉櫈都唔幫更有需要嘅契妹拉，當真令人費解！每位席上都擺有齊備嘅餐牌、自用餐具及口罩套。埋位第一時間當然係先用券券換取指定餐酒啦！深知一樽酒一定唔夠飲，大肥爸爸早就備多咗樽紅酒，眼見開瓶費乃幫襯一枝免一枝，結果梗係加多樽汽酒啦，順便可解吓熱嘛。餐牌首頁所示，主廚William Lau先生嶄新嘅料理靈感源自節令嘅日本食材及其法式嘅廚藝。得知會員可以七五折享用六道菜（原價：$980/位）或十道菜（原價：$1,288/位）廚師發辦晚餐，大家就好迅速地揀選合心意嘅份量及主菜項目。話說大食會全員準七點入座，四個字內已點好菜，不過等咗成半個鐘都未有麵包食，中途哥哥仔已經加咗幾次冰，斟添咗幾次酒酒同水，細佬就多口問句隔離枱客食緊嗰啲麵包係咪要另點啦，點知哥哥仔嘅回應係麵包要等頭盤一齊上喎！大家有眼見，全店頂哂盡只坐咗兩成客，絕非繁忙，到咗八點鐘都未有提供任何食物，餐桌上只見花瓶擺設，連小食都冇，大肥終於忍唔住向經理投訴，驚嘆難以接受此為平均千多元嘅酒店晚餐！French Brioche：八點過後終於出場嘅法式麵包又真係好新鮮嘅，皮薄包鬆軟，話哂都係啱啱出爐嘛。哥哥仔背台詞式介紹伴配嘅自家製牛油混入咗麵豉、高菜、芝麻、乾蔥等，食落頭腦簡單嘅小肥口中，即化成咸咸地嘅惹味大集匯；真心覺得靚嘅麵包好多時淨食最正，就算要點都係點原味牛油方才可保留麵包嘅特質，個自家製牛油唔多夾得黎仲有啲喧賓奪主囉。Fleur d’Or：同麵包一齊上嘅頭盤個法文名聽落好似化妝品品牌咁，優雅尤甚，中文可譯作為「金花」就可能俗套咗少少。孖碟上以金箔點綴嘅靚花橙亮秀麗，花心嘅流心鵪鶉蛋蛋原來用咗麵豉醬醃過，芬芳香濃，配上日本大根砌出嘅花瓣極之清爽，剛巧造出中和作用，契合細膩得很！Gillardeau Oyster：第二道上枱之時已經係八點四十分，平均每八個字先出一道，叫咗十道菜咪即係要食到過十二點？！因深覺不妙即同經理哥哥反映，佢竟然答話餐廳其實收十點半，叫大家唔洗擔心，廚房都要收工，之後啲菜一定會出快好多喎。半生熟嘅法國生蠔縮咗少少水後被更為量多嘅提子啫喱、醃漬海藻、青瓜片、青瓜忌廉等配角覆蓋住，故相中唔係好睇得到。平心而論，菜式清新爽潤，但細小嘅生蠔就唔似係主角囉！Sea Garden：顧名思義，色澤彩艷嘅海洋花園由多款海洋生物組合而成，上枱後先斟上油甘魚清湯，閃出海光，睇頭十足。海園主材為肥美柔潤嘅油甘魚他他，混入Daurenki魚子醬、梳魚魚籽及海葡萄即添上鮮濃與爽脆。Hokkaido Scallop：接著嘅北海道帶子好神秘咁用個波波碗蓋住上。碗蓋一打開，即傳出濃濃嘅煙燻味，賣相好似一隻以意大利雲吞皮包住隻帶子，但就被斬開一半咁，同之前嗰幾道菜嘅精美度明顯相差好遠！半生熟嘅帶子質感軟嫩，可惜層餃皮厚嚡粗糙，濃罩著嘅煙燻味蓋過咗帶子應有嘅鮮甜，旁邊幾塊炭燒竹筍片都係一樣咁煙。Iceland Langoustine：橙白紋理分明嘅冰島海螯蝦經過低溫慢煮，肉質爽脆彈牙，連同頂面嘅日本白昆布絲及浴中嘅勝瓜汁混海藻油食落去，即有效地吊出鮮香。Seasonal Winter Black Truffle：明明七月乃夏天，小肥好唔怕羞咁問點解「冬季黑松露」會屬當做季節；哈，原來答案好簡單，黑松露出產地為澳洲！黑松露薄片下暗藏日本名蛋蘭王造出嘅溫泉蛋，蛋黃鮮明亮麗，中間仲夾入咗啲炒香咗嘅舞茸菇及雜菌忌廉，撈勻哂黎食尤其香濃滑溜，超正！Sakana：話名係法國大餐喎，中段當係要多道魚魚啦！碟上貌似三文魚嘅其實係炭燒鱒魚。另上嘅海鮮湯汁上枱後由專人斟上。鱒魚表皮焦脆酥化，魚肉都好軟熟。主菜共有三款可選，其中只有羊鞍「Lamb Saddle」唔洗加錢。契妹揀嘅法鴿「French Pigeon」（另加$168）份量比較少；如相所示，配菜好似大份過鴿肉。Wagyu Ribeye（另加$238）：厚切嘅和牛肉眼扒只係焦香咗個外皮，牛肉粉嫩紅潤，鬆潤軟腍，沾上帶甜嘅黑椒果製秘汁可一解油膩感，極易入口。Summer Oasis：甜品環節共有三部曲。最先登場嘅日本香印提子雪葩以靚提子肉及透明嘅海藻啫喱墊底，食前淋上秘製薄荷清酒汁，碟上嘅綠洲清秀、清涼、清新、仲好清爽，輕盈可口。Hojicha：第二款焙茶撻品好似廚房入面整唔夠咁多份所以夾硬一開為二咁，每人得半件，感覺唔係咁大方同完整。共有三層嘅撻撻由朱古力、羊𡙡、焙茶慕絲造出，甜得黎個茶味帶點苦澀；圍邊嘅蕨餅深色嘅為焙茶味、白色嘅為麻薯味；側旁再加球煙燻過嘅雲尼拿雪糕及紅豆蓉；請恕小弟直言，材料配搭欠缺和諧性之餘，個設計好似求其砌咗啲野出黎去填滿隻碟碟咁囉！Petits Fours：諗住煙燻雲尼拿雪糕已經唔掂當啦，點知結尾嘅小點仲恐怖，師傅好似廚魔上身咁用醬油造出雪糕，另加插咗啲咸咸嘅紫菜脆片同米通加以調味同裝飾！又咸又甜嘅雪糕甜品不倫不類，分子料理絕對唔係個個玩得起，最慘係十道菜餐單最後兩道都要食雪糕，係咪暗吋緊肥肥家族個個身形健碩先？！酒店西餐廳「Whisk」除咗空間感足之外，室內空調欠奉，空氣完全唔流通，部分服務生比較生手，但態度尚算正面，十道菜廚師發辦料理大部份還好算味佳，不過廚房就出哂事！上菜速度拿捏不準，頭幾道菜實在拖得太慢，有啲菜式仲好似俾人切開咗半份咁，唔食麵包根本唔夠飽，唯一最感安慰或許係可以十點半前食得完吧。

是日同朋友出入鰂魚涌繁忙商業地帶，竟然有間素食餐廳俾咗個 sweet surprise 我哋，就係位於林肯大廈嘅 Treehouse
鍾意蘑菇嘅我，揀咗有齊特製豆腐、豆角、燒蘑菇、醃青瓜嘅 Half and half Musella 沙律碗（配藜麥）($88) Musella 整體食落好清新，醇厚味噌醬，配上爽脆豆角、香噴噴燒蘑菇、豆味濃郁特製豆腐，同醒胃醃青瓜，俾人感覺唔似食緊素，似肉菜兼備嘅盛宴，好啱平時肉菜都食嘅人探索素食嘅入手點而且藜麥健康得嚟又飽肚（其實其他纖維高嘅材料都好飽肚），啱晒想食嘢又唔想增重人士另外，我哋試埋 Banyan Sourdough Flatbread ($78)，主要餡料有印尼傳統發酵黃豆製品天貝、炸茄子、蒜香鷹嘴豆泥、椰菜、蕃茄同富芒果香味嘅中東安巴醬 最驚艷嘅係印尼天貝，味道就好似蛋黃咁，好濃郁好香 炸茄子亦都好惹味，配埋其他餡料，食到 lam lam 脷 不得不提Sourdough Flatbread 嘅微酸味同麥香特別怡人，呢種香味實在唔容易喺其他地方搵到，令我對成個Banyan Sourdough Flatbread 念念不忘

呢一餐最具玩味嘅一味，就係 Sourdough Flatbread Chips 搭配蒜香鷹嘴豆泥 ($60)
品嚐過Sourdough Flatbread嘅滋味，再食變奏版香脆Sourdough Flatbread Chips，同樣麥香，不同形態令人耳目一新 加上蒜香鷹嘴豆泥惹味又唔滯，Sourdough Flatbread Chips一塊接一塊，食唔停口，真係開拓我對素食嘅想像

講埋飲品，我嘅嘴刁朋友都大讚Treehouse Lemonade  ($40) 好飲
只係目測杯 Lemonade，就知佢係精心泡製嘅，配方有檸檬、檸檬汁、原蔗糖、薄荷同檸檬香茅，全方位天然健康，不得之了 要大讚嘅係Treehouse Lemonade 係冷藏到透心涼而唔加冰嘅，咁樣成杯飲品先至凍得均勻又唔怕冰融化影響飲品味道 Treehouse Chai Latte ($40) 同係匠心之作 比起市面上嘅Chai Latte，佢多好多重內涵 — Treehouse Chai Latte 係以小荳蔻、肉桂枝、辣薑、紅茶同胡椒粒精煉而成，香氣獨特、層次豐富不在話下，更有迅速暖身、調暖臉色嘅功效，想像到日日出入冷氣吹不停嘅商業大廈，可以飲到一杯真材實料、行氣活血嘅Treehouse Chai Latte實在係如獲甘露，每杯都係為健康加冕

非常慶幸對素食從無認識嘅我，可以遇上   Treehouse，來一趟精彩嘅素食之旅 不論係繁忙嘅上班族，定決心要提升健康嘅人，都必定會喺 Treehouse 遇上你嘅 food for love

約咗朋友仔去佢屋企打pubg，打機前當然要醫飽個肚仔，但係出面街有啲熱，朋友就叫去一間附近幾出名嘅海南雞飯上去佢屋企食。去到門口見到係一間主打星馬菜嘅餐廳有喇沙同侵侵去到海南雞飯都有，甚至海南雞飯都有兩款。見到一個係黃油雞，另一款係走地雞，因為依排要減肥，所以店員就介紹咗走地雞俾我，朋友就話要香煎豬頸肉湯米，另外我就嗌多咗豬肉同雞肉串燒。見到依家餐廳應該都有啲名氣，落單嘅時候都見到佢哋嘅外賣機係咁響。見到佢其實有一人便當餐，不過朋友屋企有嘢飲，所以就唔加嘢飲了。
等咗大概10分鐘就已經可以攞走店員嘅包裝技巧都好好，一個袋就已經載晒咁多樣嘢，放得好平均，所以我拎過去朋友屋企嘅時候都冇任何倒瀉嘢嘅情況出現。
打開個盒，所有美食都好香，份量都好足。
先講豬頸肉米線豬頸肉米線有格開到，所以就唔會變得好腍，而湯應該係豬骨湯，係咁飲都唔會覺得好口渴，入邊有幾粒魚蛋同埋豆卜，豆卜索晒湯汁，魚蛋都係彈牙嘅。豬頸肉就肥瘦適中，肉味好重，唔會話有雪味，而且烹調得好適中，一咬即斷，唔會好韌同埋好柴，食落去仲有豬頸肉嘅焦香味。
然後講海南雞，冇其他海南雞嘅外表咁金黃，但係佢做到皮薄肉滑，冇平時食咁多海南雞咁多啫喱喺度，咬落去雖然唔算話雞味好重，但係食得出佢嘅甜味，而且雞肉亦都好嫩。反而就係因為佢肉味唔算話太重，所以點唔同嘅汁就有唔同嘅協同反應，佢辣汁方面有啲似泰式嘅酸辣汁唔算好辣，但係點一點之後就為呢個夏日帶嚟清新嘅感覺，而薑蓉呢佢就磨到好細緻，就唔會咬落去又好辣嘅情況發生，豉油就唔會算好甜，就咁單食都可以。雞飯又好香嘅雞油味相對上就唔會太重嘅香茅味，食落去軟硬度啱啱好。雞湯非常清甜，而且入邊仲有薏米。
最後講講個沙嗲串燒，沙嗲醬非常香口咬落去仲有一粒粒嘅花生增加口感，豬肉同雞肉都冇過熟嘅情況發生，口感亦都係非常之爽口，尤其雞肉嘅薑黃粉醃得非常入味，值得下次再買嚟食！

最近 赤柱打鑼打鼓，開咗間新餐廳
又話有藍帶廚師主理
又話後生仔班底
致力提供赤柱街坊好食又抵食嘅飲食選擇

喺面書地區專頁
都見到有唔少街坊讚佢
食物質素 豬扒好食 奶茶好飲 地方乾淨 服務到位
所以 身為赤柱街坊梗係要 專登落去試吓

地方感覺係唔同咗嘅
由赤柱酒家演變到赤柱小館，而家就變咗餓底
地方乾淨咗 裝修簡單 勝在光線充足 感覺到清新



後生仔當梗係用後生仔方法營運
掃QR code落單，又方便 又快捷 一目了然 👍🏻

後生仔黨 當然要玩創意 搞搞新意思
一直好期待 藍帶藍帶 會有啲咩新搞作呢？
係咪將法式料理融入香港茶餐廳文化？

掃一掃 望一望
菜單比較保守 款式一如既往
既然街坊話豬扒好食 咁就試吓豬扒啦

焗豬扒飯好？定係 XO醬炒豬扒烏冬好？
焗豬扒飯相信自己都已經整得好好食
炒烏冬反而需要啲技巧
烏冬本身要彈牙，
炒得夠唔夠鑊氣又係另一個重點
豬扒方面 個人比較喜歡鬆軟有肉汁
而且味道要有層次感，死鹹死鹹好難食㗎嘛

手機落單之後10分鐘
大家都讚嘅奶茶到啦
望落去顏色有啲不對
點解？？一睇就知奶多啦！
你都唔緊要 茶味夠係可以cover到
飲咗一啖，果然……只係飲到花奶未？
紅茶味呢？唔見咗嚕。



再等咗8分鐘，
熱辣辣嘅炒烏冬出場啦
外表睇落都OK喎，仲熱辣辣有煙出㗎
當然冇一啖即刻食落去啦，
又熱又辣嘅，想生痱滋咩？

影吓相 擺下鋪 拍拍拍 📷📷📷
直度橫度 近鏡遠鏡 都齊啦
哎呀…唔記得拍片🤦🏻‍♀️



第一啖係食豬扒先
唉！冇期望就唔會失望！
乾、鹹、柴 夠唔夠形容？
相信應該係我唔好彩，
估計應該係一早炸定嘅豬扒，
「內軟外柴」 無肉汁 而且仲好鹹，
係死鹹嗰種，重鹽 重豉油 ！



烏冬都應該係一般嘅餐廳用烏冬
即係超級市場嗰啲包裝都一烏冬嘅質地
當你有食過一啲好滑 可以滑捋捋啜入口嘅烏冬
你就唔會想再食都一烏冬



味道方面，XO醬係有嘅
不過又係重鹹 重鹹 重鹹 冇乜層次香味
而且配料方面，除咗椰菜 都係椰菜
如果多元化一啲 豐富啲
賣相靚啲，口感層次味道都會加分

不過有一個好處，
就係唔算多「油」，
我有個習慣食炒嘢，一定會將隻碟打斜放，
今次由頭斜到尾，唔會淨左一攤油喺碟度，
都算係一個優點

簡簡單單 實測實評
冇美圖秀秀 冇雕琢修飾
直話直說 尚有進步空間




總結：
2024 赤柱新餐廳 藍帶廚師主理 無期望無失望
赤柱本身就選擇唔多 唔見得有必食嘅需要
期待有更加突破 更加創新 嘅飲食體驗
期待一間不一樣嘅藍帶 地區茶餐廳

大約4、5年前，小妹有返夜校進修課程，當時一收工就搭地鐵去到佐敦，見仲有時間可以慢慢食晚餐先番學，於是四處尋找餐廳，發現逸東酒店地庫的food court 有唔少餐廳選擇，其中一間便是「MUM 日常野菜料理」，可能因為呢間小店，令小妹愛上了多品料理❣️ 可惜佐敦店最終結業，搬咗新鋪到極不就腳既新蒲崗🥹佢哋菜色味道仍保存在小妹心中，時不時就諗起個份精緻細膩嘅味道😳😳是日終於‘的起心肝’，專登搭成個鐘巴士嚟新蒲崗，再次光顧呢間多品料理的日系素食小店「MUM 日常野菜料理」！ 新店舖風格好似舊課室咁，木製的枱枱凳凳、舊式放文件的鐵櫃，簡約設計又帶點特色！日常定食餐牌可選三項$108或四項$129，定食包括味噌湯、麥茶和五穀雜炊飯/正氣黃薑飯，飯轉烏冬另加$20，驚食唔晒仲可以揀半份烏冬$14。難得嚟到，當然揀四品轉烏冬啦❤️ 不枉小妹搭接近一個鐘巴士嚟幫襯呀🥰🥰🥰 🔸柚子醋漬番茄：柚子清香唔太甜，凍冰冰適合啱啱在烈日下行過嚟既小妹🫶🏻 🔸味噌湯：白味噌～有豆腐、蘿蔔們、仲有豆豆，第一次飲有豆既味噌湯 🔸烏冬：轉配加$20，麻油海藻撈烏冬，同以前一樣🫶🏻 🔸蘿蔔冬菇車麩關東煮：白蘿蔔入晒味，連蒟蒻都係有味架🤤🤤，車麩外表好似菇但咬落軟綿綿超好味（車麩則是將小麥的麩質蛋白捲在棒子上燒烤，接著再捲上一層麩質，最後切成片狀製成） 🔸浸高野豆腐片絲瓜：本身已經喜歡呢種蔬果，浸煮係甜甜味道，有少少似關東煮隻味，絲瓜亦譯勝瓜，一小碟已有四片，正👍🏻 🔸南瓜薯餅：外皮炸得脆卜卜，金黃色南瓜餡，超級好食❣️ 🔸餐飲係附送的麥茶 感受到每道菜式背後係多麼用心製作❤️希望小店堅持一直做落去丫😉😉小妹仲想幫襯多幾次💗💗

好味指數😋😋😋
回頭指數 ⭐️⭐️⭐️
開心指數🤗🤗🤗🤗

從來都唔知道科大入面有酒店，有屋企人響大學做教職員，因為收到宣傳電郵提前 book 位有7折，問我同家中長老復活節入唔入去食 lunch semi-buffet，我覺得假期同老人家入去行吓都唔錯丫，就去試吓。

坐巴士去到科大南閘，其實呢邊我都冇去過，以前只係去火雞正門嗰邊。落咗巴士後要行15分鐘左右，去到一座會議大樓就係，外表真係完全睇唔出係酒店😅 呢間酒店係由 L' hotel group 營運。



主菜有6款，除咗我哋叫嘅款式，仲有三款係意粉、春雞同牛肋骨，叫咗主菜就可以出去自助區攞嘢食。



🍴燒加拿大豚肉扒配柚子汁（$218）
呢個係煮得最好，厚切豚肉扒熟度啱啱好，中間有少少 pink，肉質爽得嚟有肉汁，柚子汁酸酸甜甜解油膩感，好味！



🍴澳洲穀飼牛柳配燒汁（$228）
牛柳叫咗5成熟，切開後比5成熟多咗丁丁，不過仲係好軟腍有咬口，外皮有焦糖化嘅脆口感，肉質都唔錯～



🍴香煎三文魚柳配蒔蘿香草汁（$208）
呢個係有少少失望嘅，放上檯一刻已經知道煎耐咗，切開時果然魚肉已經好乾，要靠個 creamy 嘅汁救一救。



三款主菜嘅配菜都係一樣，配唔同嘅汁有唔同風味，其實三款汁嘅味道都唔嘅～ 我見到其他檯叫牛肋骨，大大份睇落唔錯呢～

自助區分咗5個部分：
1️⃣沙律區
有3款新鮮蔬菜 + 12款配料 + 4款沙律汁可以自製沙律，另外有3款已調好味嘅沙律。已調味嘅沙律係會換款，用料係普通嘢，味道okay，自製沙律係正常嘢，都算多選擇。
Cold cut 有3款，另外有煙三文魚同4款芝士，呢幾類食物都好一般，尤其4款芝士，勁硬，好似放咗好耐，cracker 係腍嘅～




2️⃣湯、小食及麵包
中湯係粉葛豬骨湯，西湯係野菌忌廉湯，兩款湯味道唔濃郁，稀稀哋，中湯相對比較好飲。
小食有炸春卷同咖哩角兩款，炸得香脆，唔錯。
麵包有4款，隔離仲有個滾動式多士爐可以整熱食，不過我冇試。



3️⃣甜品區
生果有菠蘿、西瓜、蜜瓜。
Chocolate fountain 配有棉花糖同生果串。
蛋糕有藍莓芝士蛋糕、tiramisu、madeleines，另外可能係復活節關係，有一個芒果 mousse cake 配可敲碎嘅紅蘿蔔造型朱古力，蛋糕當中以藍莓芝士蛋糕最好食，其他正常。
亦都可能係復活節關係，有多款朱古力、糖果同兔仔造型棉花糖。
最後有4款 häagen-dazs雪糕杯。






4️⃣ 喇沙
有廚師即場製作，可以揀米線或米粉，另外配有蝦、大魚旦、豆腐卜同菜，可能因為大學入面又唔算太忙，我哋想叫一碗 share 試吓，我哋問可唔可以雙拼米線 ＆ 米粉，配料每樣俾3件，廚師好開心答可以！湯粉配料唔錯，蝦肉爽口，魚旦彈牙，湯底比較淡。


5️⃣ 飲品
近門口位有橙汁特飲，另有咖啡機製作唔同種類咖啡，亦都有熱紅茶同新鮮檸檬，冰同糖漿，可以自製凍飲。咖啡唔好飲，覺得咖啡豆一般，我決定用半個雲呢拿häagen-dazs雪糕整 affogato 食～



整體上自助區嘅食物款式都幾多，亦都有職員睇住進度換一碟新嘅，質素唔算出色但尚算正常，主菜方面除咗三文魚差D 外，另外兩款都幾好食。檯與檯之間有寬闊距離，坐得好舒服，加上人流唔多，自助區唔會好多人攞嘢食，亦都 keep 得好乾淨，食得好舒服～ 景觀方面因為外面大興土木，唔太算靚景。用餐時間相當充裕，可以食到2:30pm，因為唔需要加一服務費，7折後每人都係$150多D，雖然自助區唔算出色，但可以任食4款häagen-dazs 雪糕，以價錢同環境舒適度嚟講，絕對對得起個價錢！

環境清幽帶點有禪意感覺的咖啡店☕️ 餐廳由外至內佈滿大量竹林🎋 門外更有一條石春小路 彷如踏進竹林的感覺😌 店內設有榻榻米座位 露天座位佈置了日式燈籠🏮及竹林 充滿濃濃的日式庭園🎏 有種讓人遠離繁囂的感覺🥰 主打日式料理，意粉及多款特色飲品 早餐一格格🍱 賣相吸睛用來打卡一流💯，運用九宮格拼盤提供多款美食，當中包括有牛油果焗蛋，以半個牛油果🥑去核且中間配上蛋黃蠻有創意🤩，一切開蛋黃慢慢流出蛋液很療癒😍，入口軟糯味道獨特，雞中翼有少許微辣挺惹味，玉子配蟹籽甜甜的，蓮藕切得很薄惹味爽脆，其他配菜還有台灣腸，粟米粒，牛角包，車厘茄及沙律🥗，能夠一次過滿足到口腹之慾😋 龍井蝦仁茶泡飯 配 紫蘇練梅漬蕃茄🦐🍅 6隻蝦仁🦐鮮甜爽彈，配一小碗龍井茶🍵倒入白飯裡，口感粒粒分明且茶香清新，另配上原個蕃茄🍅去皮再用紫蘇梅醃製，使味道增添層次感，酸酸甜甜越吃越開胃🤤 勿忘我☕ 香濃的𝙀𝙎𝙋𝙍𝙀𝙎𝙎𝙊配搭清甜的椰青水，最特別是一入口喝到椰子糖的味道😂 花前月下🍹 以茉莉花茶為基礎，再加入白提子，荔枝及青檸，喝到香甜清新☺️ 吸取上一次到咖啡店沒有提早預約，這次預約用餐很高興安排榻榻米座位，餐廳外至內每個角落都悉心打造美美的打卡位，只可惜當天下雨天未能到戶外拍照感到有點遺憾😢，期待下次再約三五知己或家人到訪，一起渡過愜意的下午時光😊

不止一次說自己很喜歡大坑這個社區，偶然在放假的日子來到這邊呷一杯咖啡渡過悠閒寫意的時光，這次就跟男友來到其中一間咖啡店享用我們的brunch


Full Breakfast Board - Sausage, Truffle Scrambled Egg, Portobello Mushroom, Tomato, Salad, Sourdough on the side $118
名字很長，但其實這就是all day breakfast啦！有香腸、黑松露炒蛋、煎過的蕃茄、沙律菜、磨菇跟酸種麵包，色彩豐富是蠻經典的食材拼配～ 黑松露炒蛋沒有炒到很乾仍保有嫩滑感，味道香濃；酸種麵包烘得暖暖的味道也很好，整個味道都是想像以內沒有太大驚喜


Cheese & Parma Ham Croissant with Spinach, Mayo, Salad on side... $85
另一款選來以芝士跟巴馬火腿為主角的牛角包配沙律，非常精緻的賣相，牛角包內夾著蕃茄、沙律菜、大大片巴馬火腿跟已溶掉的芝士，再加上少許蕃茜碎點綴，芝士跟巴馬火腿帶出不同層次的鹹香，和已經烘得香鬆且帶牛油香的牛角包，再配合清新開胃、已淋上柚子醋的沙律菜，整份完全不覺得膩，只是略嫌份量少一點Honeycomb Cappuccino $55（Hot） $58（Cold)
Black Sugar Café Latte $45（Hot） $48（Cold)
食物不算太突出但飲品卻令人有驚喜！先說兩款非常IGable，特別是Honeycomb Cappuccino，實在很難不多拍幾張照～ Cappuccino上放滿焦糖脆脆超美的，nutty的咖啡加上熱牛奶和奶泡後口感變得更順溜，焦糖脆脆香甜不帶苦澀，也令這杯加添幾分焦糖的甜味！至於Black Sugar Café Latte的外貌就像焦糖布丁一樣，在表面灑上少許糖再用火槍燒至微焦也帶出黑糖的甜香，喜歡黑糖的朋友可來試試看！大坑這個小社區有很多具有特色的咖啡店，店家就處於相對隱蔽的位置並不是特別引人注目，卻是每次來到都是滿座的狀態！這次到訪的時間比較早可以隨意揀選座位，其實這咖啡店的店面並不大，但擁有兩層樓的空間，簡約的裝潢、暖色調的燈光跟適量綠油油的植物，是一個非常舒適的空間～ 客人可以坐在樓上、樓下，甚至是室外露天的位置用餐，而我倆就趁著還是清爽的天氣安坐在室外位置啦！早起的鳥有蟲吃，到訪的客人相對少連帶整個用餐是慵懶放鬆的氛圍，可是時間一晚了就變得太多人興致一下子也沒了，想來用餐的話緊記看好時間啊！

好耐無打食評，因為我並唔係一個打手，亦唔會無緣無故去稱讚或者寫衰一間餐廳。
我自己好鍾意喺未去過一間餐廳之前上OpenRice睇吓其他人對餐廳嘅評語，我覺得真係有幫助👍🏻所以今次嚟ASK Cafe之前都特登上OpenRice睇吓其他食家嘅評語！到底點解我今次要特登為呢一間Cafe打食評呢？係因為佢哋嘅服務實在太好！！由心覺得🩵連我同行嘅兩位朋友都認為佢哋嘅服務好讚👍🏻

首先我哋12:00去到餐廳，我哋三個人點咗兩個set lunch，另外仲有兩個小食想叫(就係因為睇到其他評語話呢兩樣嘢都好好食），點知原來小食係要2:30p.m.後先開始serve，然後有位男職員好好，即刻入廚房問師傅可唔可以整，師傅話可以，然後就已經有一種好一切順利嘅感覺🥰


兩個set lunch跟兩個餐湯/ salad，我哋揀咗餐湯，係粟米忌廉湯。本身我哋三個諗住嚟到之後再問職員攞多個碗自己分成3碗湯，點知個男職員真係超級好！！佢拎咗三碗湯出嚟然後同我哋講話已經幫我哋直接分成三碗，唔洗爭🤣👍🏻真係搞笑又細心👍🏻分完之後大家可以從相片睇到份量都並唔係好少得兩啖！而且粟米忌廉湯非常足料，食到粟米蓉，好味👍🏻


之後就嚟咗我最鍾意嘅黑松露曲曲薯條😍呢一兜薯條一擺喺枱上面已經聞到好香嘅黑松露味，不過一拮落去就有啲失望，因為佢炸得唔夠脆，我覺得可以炸多陣！放耐少少，就開始有少少出水，不過作為薯條控嘅我絕對冇放棄佢😆


第三樣上嘅就係麻辣脆雞柳🍗嘩，真係不得了！一上枱嗰浸四川麻辣味勁攻鼻，唔食得辣嘅我即刻有啲驚😆但係望落炸到脆卜卜，好吸引，所以我鼓起勇氣拮起一舊嚟食，點知… 真係好味👍🏻夠脆夠熱，仲要勁麻帶辣，四川麻辣風味濃🌶️兩片嘴唇真係感覺到好麻🙈



然後到虎蝦意粉+黑松露帶子意粉，2碟都絕對有驚喜！platting 都已經好靚好吸引🥰先講下虎蝦意粉，有3隻虎蝦，都幾大隻亦都感覺幾新鮮，唔係嗰啲霉咗嘅蝦！炒得好香，味道濃郁，略嫌油咗少少🤏另外黑松露帶子意粉，帶子亦都係有3粒，火候控制得剛剛好，帶子咬落仲係軟口，唔韌！用黑松露忌廉汁去煮，成件事係prefect match👍🏻



再嚟跟餐有2杯飲品，加$10就可以升級去其他咖啡飲料。我哋叫左Creme Brûlée Cappuccino 同Latte！ Latte屬正常水準，Creme Brûlée Cappuccino就特別得多，上面真係有一塊燒過嘅糖片，冇用到仲係脆卜卜嘅，塊糖片可以用匙羹”潷”嚟食😆


最後，我哋跟餐加$28加左件士多啤梨蛋糕作為今日午餐嘅終結，亦都順便同我嘅好友補祝生日🎂一去到餐廳我已經問職員可唔可以幫手寫名喺蛋糕個碟度，職員好爽快咁答我可以，仲即刻比張紙我叫我寫低啲字添，真係好好🥹士多啤梨海綿蛋糕，感覺同Italian tomato嘅蛋糕口感好似，啲cream好正呀🤤不過啲士多啤梨就酸咗少少🤏但係作為甜品，甜甜酸酸係最合襯嘅🥂


餐廳又靚，職員又主動又有禮貌又helpful，真係令我同友人今天嘅午餐慶祝聚會變得十分美好，係一個好happy嘅ending (適逢友人揾到新工，生日farewell一次過😆)🩵👍🏻

蓮香樓終於重開🥹
一放工就同朋友約嚟食晚飯



加開 #手搖茶 店喺樓下，夏天熱辣辣行過真係會忍唔住叫番杯

店員用心推介，於是無視「一陣就喺樓上食飯」
樓下買杯「三千紅塵」先，
（英文係「the grand earl grey with milk form」)

店員問我要咩甜度同埋冰量，「乜都唔使變！正常就得啦！我想試吓正常係啲咩味道」

冇幾耐之後店員就拎咗我杯嘢出嚟
然後喺我面前加泡同肉桂粉

佢推介先插飲管品嘗底部茶香，不同於一般手搖茶
蓮香對其茶底有著不一樣嘅堅持，一口入口
「真係好香茶香！入口相當清新，甜度適中」好彩冇叫少甜！
然後佢再推介我吸啜泡沫，個奶泡比我想像中輕盈，完全唔漏

然後再嚐茶底，「嗯？又另一種味！」

頭先我仲諗「飲咗呢杯嘢唔使食嘢啦！」
但係呢個泡比我好大嘅驚喜，輕盈得來又唔係話食咗空氣咁空虛
又唔會話齋落糖水死甜嗰隻！

朋友果杯冇泡，就會有個好似茶杯蓋嘅蓋，設計好特別

搦住杯嘢上去坐返去我哋個位，然後就開始開餐啦

我哋叫咗個蒜蓉炒豆苗

招牌煎鯪魚

炸子雞

蒸魚

雞同魚都整得好滑同好鮮甜多汁！
個雞外脆內滑！口感豐富！

西蘭花炒魚


係人都知我係一個水怪
一路食飯，我會飲好多水，好多時唔係因為口渴
而係因為出面嘅嘢食味精多
但係今次我真係冇乜點飲水
而且雖然都係一啲聽落好油膩嘅餸菜
但係完全感覺唔到油膩嘅感覺

但係比較奇怪嘅係
因為上咗兩味魚，有比較就有傷害
食完野生蒸魚之後，再食西蘭花炒魚，後者就顯得有啲失色🤫

本身想叫個乾炒牛河，但係竟然賣晒河粉
而聽聞呢呢個大廚出名嘅就係乾炒牛河
咁冇辦法啦，就叫個海鮮炒麵，結果個海鮮炒麵俾我清咗底🤭


有人會問「咁 #服務 呢？」
講真，真心驚
啲夥計唔該前，唔該後
就算傾偈傾耐咗都冇催我哋
香港今時今日咁嘅服務態度，邊度搵呀？

一般去酒樓，我都好驚去廁所
多數地下都濕𣲷𣲷
啲廁紙就堆晒喺度咁

朋友去完 #廁所 之後，話廁所好靚
本身唔急嘅我都要去一去廁所
仲要咁啱冇人

真係唔好講笑，個廁所勁soho feel
入面主打綠色，個冷氣機都係綠色
四周圍係中西合璧嘅設計，望真啲天花板係一朵朵蓮花咁嘅設計
如果啲門口嘅牌可以有啲玩味就更加Perfect

美中不足嘅係
食完之後如果有紅豆沙就正到爆啦🤫

下次要再試下叫乾炒牛河！聽廚師講係限量🤔

復活節連假，選擇留港消費的我，與友人一行二人早上11時45分到達屯門的#道 排隊。聞說這家拉麵店前身是吃廚師發辦的，現在則是主打雞湯為主的拉麵小店。 小店十二時才營業，早到的我已是排第十八位。由於店內只有約十二個的吧枱位置，所以，要待第二輪才可入座。最終，於下午1時入座及立刻點菜。一般坊間拉麵店的流轉很快，客人大概等待30分鐘便可入座，但是，當我入座此家「道」拉麵店後，便會明白為何要等上一小時了。 是日點了 #醬油清雞湯拉麵 $98 、#雞白湯拉麵 $98、#唐揚炸雞 $48、#波子汽水 $38 及 #蘋果梳打 $38。 店舖有3名職員，烹調拉麵及迎接客人的是同一位師傅 ; 落單、結帳、清潔枱面及料理湯底、叉燒是另一位師傅 ; 還有一位師傅是負責炸物。 由於坐吧枱中間位置，目擊師傅整過製作過程，不禁讚賞他們的用心，大概20分鐘後，其中一位師傅端上拉麵，並詢問客人是否第一次光顧，若是第一次到訪，便會作詳細介紹。 #醬油清雞湯拉麵 ：第一啖喝到湯底帶麻油味及清甜，不過，吃到一半會嫌略鹹。麵條得一款，亦不可選軟硬度，如果喜歡爽身麵的會是你杯茶。而叉燒是用上九州華味鳥的雞叉燒，有微焦味的凍叉燒。味玉帶少許流心，屬正常水準。 #雞白湯拉麵：濃濃偏杰身奶白色的湯底，不會太鹹，絕對是我喜歡的，而隨附的碎蔥是吃到一半才放入湯底吃，的確是令湯底再度升華。由於麵條質感有點像吃偏硬身的蕎麥麵，感覺不是太掛湯。而雞叉燒如果可以炙燒多一點，不是冷的會更好呢。 #唐揚炸雞：4大件外脆內軟的炸雞，粉漿又不是食評說到的厚，是可接受，咬開亦是充滿肉汁的，蠻不錯，不過，份量較適宜有2-3人分享。 整體內說，這家小店的確有再調整的空間，但區內可吃到雞白湯拉麵而食物及服務又不錯的，可能只有這一家，所以，眼見源源不絕的人龍又不乏回頭客(當日同一批用餐客人都像是熟客呢)。屯門區曾經出現過幾家類似的拉麵小店，但都未能繼續經營，希望這一家位於小巷側的用心小店可以持續發展下去。

住處區內有一幢過百年的歷史建築物，趁假期正好來訪，順道在一樓的餐廳用膳。 主打和風洋食的餐廳，店內一桌一椅亦區分有洋式和和式的設計，最出面是吧枱，裡面更有卡拉OK房，活動性甚廣。 午市只有套餐供應，有頭盤、餐湯、主食和餐飲。和風沙律的菜蔬有些沙律菜、一圈紫洋蔥、半顆車厘茄以及數粒粟米。微酸的沙律汁的確令人開胃，可惜汁液太少，不是每塊菜都沾到，所以食起來有部份好像吃著生生硬硬的。 餐湯由忌廉湯升級到龍蝦忌廉湯。有趣的盛器似是一個星球般，打開便見到裡面的湯。有別於一般的龍蝦湯，沒有紅紅的顏色，忌廉直接增加奶滑度，而且湯裡也有一些蝦粒。可是味道實在太淡了，龍蝦味絕對談不上濃烈，就是一碗帶少許蝦味的忌廉湯。 蛋包飯要了和牛來相伴。蛋包飯的主力滑蛋的而且確炒得滑身，軟嫩帶有蛋香。飯並非常見的茄汁炒飯，反為用上燒汁，所以過甜，需要加些鹽才夠味。細碎的和牛粒約莫有五六塊，帶少量油脂香，雖則這麽少，食完飽滯感竟甚為強勁。 銀鱈魚西京燒更加不得要領。坐落在一大件燒檸檬上的魚塊似是煎都未煎過，雖然吃下也有極度輕微的西京燒味，但好像不是這回事吧！半舊可樂餅還是脆的，蘸點旁邊的醬也還不錯。之不過即使加入整整半碟的沙律都不夠飽，幸好小人加了碗飯方有些吃過東西的感覺。 凍黑啡和熱茶尚算醇厚，是全餐最欣賞的。 百多元一個餐不算很貴，惟份量之少拖低了性價比。

📌 鉄火堂 (厚福街) - 尖沙咀厚福街10號地舖
🗓(29/3) 星期五 ⏰ 晚上5點左右


💈特式：復活節假期首日就梗係瞓到有咁晏得咁晏，然後出去搵下食啦，出左尖沙咀行左陣街街，經過厚福街搵左呢間鉄火堂食個靚靚dinner。


🥩🍔🌭🌮🥗🥯🥘🍲🍝🍣🥟🍤🍱
食物：餐廳主打食丼飯/刺身/壽司，仲有其他日式小食/沙律/紫菜杯，餐廳仲有2人套餐，方便晒我呢d唔鍾意用腦嘅食客，而家等我同大家講下🇯🇵味道先。


2️⃣人前套餐 $3️⃣9️⃣8️⃣ - 呢個套餐包左2碗麵豉湯，2份迷你蟹子沙律，一個超豐富嘅豐盛刺身丼，一個炸物盛合，2份是日甜品：

🦀迷你蟹子沙律 - 蟹子沙律味道正常，我本人幾鍾意佢個沙律醬唔係好酸，但食落感覺都令人開胃。

🍣豐盛刺身丼 - 呢個丼真係應該用豐盛嚟形容，材料有三文魚腩/油甘魚腩/厚切赤身/厚切劍魚腩/八爪魚/烏賊/北寄貝/馬刀貝/帆立貝/芝士蟹籽/海膽魷魚/帝王蟹棒/中華沙律/飛魚籽/碎蔥吞拿魚/珍寶赤蝦共16款食材，d材料多到完全見唔到個飯底，而且每款食落都新鮮。

🥟炸物盛合 - 盛合有芝麻雞翼/墨魚咀/餃子，每樣都係即炸，上枱十分熱辣辣而且炸得好香。尤其是個雞翼，入面d肉仲食到好juicy，再值得一讚仲有佢地個京蔥餃子汁，唔記得問店員係咪自家制，但味道認真出色。

🍓是日甜品 - 甜品有一件迷你士多啤梨雪葩同一件吉士餡嘅團子，個士多啤梨雪葩好甜，一d都唔酸。


鉄丼家 - 因為今日全日都無食野，所以太餓之下再叫多左個丼飯，佢地個丼飯餐都幾多選擇，有5種飯底+沙律菜底，再配一款藍鰭吞拿及4款自選刺身/配料，我就揀左冬菇壽司飯底+藍鰭厚切大拖羅+厚切油甘魚+穴子+火炙左口魚邊+希靈魚，無論份量同質素都對得住個價錢。


☕️🍵🥤🧋🍺🍷🥃🍹🧉🍾🍶🥛
飲品 : 因為餐廳有茶水提供，個餐又有麵豉湯，所以就無再特別叫飲品。


🍽環境：餐廳位置唔算多，裝修偏向日式居酒屋風格，坐位同枱面都算闊落，整體都坐得幾舒適。


🤵🏻🤵🏻‍♀️🤵🏻‍♂️服務：職員態度幾好，全程都好有禮貌同埋有保持笑容，上菜速度都幾快，菜品擺盤亦算精美。


💰💸價錢：佢地個2人套餐咁多食物種類，食材又豐富，我再另外再加多左個丼飯，埋單都只係$5️⃣0️⃣0️⃣左右，係尖沙咀食丼飯嚟講都算幾抵食。


🐲💬總結：我早排先去完日本，當時都有食刺身/丼飯等等，但呢間嘅質素都做得唔錯，除左價錢外都拍等住日本嘅質素，真心推介。


推薦指數：❤️❤️❤️❤️❣️

🏮就嚟富妹生日，生日咁大件事，梗係要慶祝吓啦！富妹成日投訴熊妹成日食西餐，🆗，生日同富妹再食好啲，揀間日本居酒屋，日本菜仲唔夠高級？📌要近富妹屋企附近，就當然喺九龍城搵食。去到打鼓嶺道，見到有間日本居酒屋《禮》，望入去櫥窗，擺滿咗好多個唔同大細，唔同款式的招財貓🐱，咁日本風情就呢間喇！📌店舖唔算好大，有四至五張四人枱，仲有二人枱同埋門口bar枱位，用上木枱木椅，天花板上吊起幾個日式居酒屋燈籠，牆上有個木架，放滿了一些日式擺設🎎同sake杯🍶，呢個杯架真係好吸睛，餐廳仲不停播放住日文歌🎶，成件事就係居酒屋的格局！📌居酒屋初期原本是讓上班族過來飲酒輕鬆一下，後期引入了各款日式菜式，以串燒、佐酒小食為主，與友人把酒歡談的同時，又可以品嚐佳餚，「一啖串燒一啖酒」，正正就是居酒屋引人入勝的地方。📌除了串燒之外，《禮》居酒屋仲有好多日式食品，例如前菜小食、沙律、他他、炸物、燒物、烏冬、丼飯、日式甜品等等，再配合返香港人近期熱愛燒牛舌同炸雞，仲推出咗一連串嘅牛舌款式同埋炸雞口味，所以話係居酒屋又有得食又有得暢飲，真係一個有氣氛又輕鬆的餐飲地方。📌《禮》仲推出咗個9️⃣大排行榜，即係招牌菜式啦，熊妹同富妹本身都唔食得多野，決定今晚係串燒之夜🍢，「一啖串燒一啖酒」，入圍的串燒當然要嗌晒去啦！📌嚟到居酒屋，梗係要飲番杯先啦！原來有兩小時啤酒或者清酒任飲優惠🍺，每位都係$98，嚟到居酒屋一定要用酒先可以釋除一天的辛勞。
📌事不宜遲，乾杯🍻！前菜，$10
好多時候日本餐飲都會有一兩碟前菜小食，佐吓酒，開下胃，今晚《禮》的前菜係醃製咗嘅醬油牛腩蘿蔔粒，牛腩粒咬落去好似食牛肉乾咁，好有咬口，醃製咗醬油味超濃，熊妹幾鍾意呢款小食喎！元氣蒜頭漬，$38
蒜頭漬以日本前菜嚟講都幾出名，蒜頭粒粒好有咬口，用上香濃嘅醬汁醃製而成，食一粒，全個口腔都已經充滿蒜頭鹹味，真係幾好嘅送酒前菜。
牛蒡醬油漬，$38
本身熊妹都唔係幾好牛蒡味，不過呢個牛蒡經醃製之後減少咗好多牛蒡味，食落去好爽口，好似食鹹味嘅蘿蔔咁。古早蟹籽沙律，$58
不嬲熊妹食大餐之前都要食沙律，呢個古早沙律，聽個名都好特別，唔知古早係咩呢？
原來材料就係吞拿魚沙律、沙律菜同埋面頭鋪咗一大堆蟹籽，撈上芝麻柚子醋汁，食落酸味味之餘又有啲吞拿魚肉嘅口感，相信古早就真係經典嘅意思，用上嘅材料都係典型沙律嘅材料，又幾開胃喎！蟹羔玉子燒，$88
9大排行榜第6️⃣名，蟹羔玉子燒。一碟切成六件，面頭鋪滿左蟹籽，望落去橙橙黃黃已經好吸睛。玉子燒要燒得靚絕對好考師傅嘅功架，一層一層蛋皮煎起再包起又唔可以見到任何燒焦嘅虎皮紋，煎嘅時候一定會全神貫注，小看1秒都會失手。呢份玉子燒絕對係一份超班嘅玉子燒，整個玉子都燒到金黃色，玉子餡入邊包含咗蟹羔，淡淡嘅雞蛋味滲出蟹羔的海鮮味，再有面頭帶鹹味的蟹籽，一啖放入口真係滋味無窮。厚切牛舌芯（左），$68
9大排行榜第4️⃣名，厚切牛舌芯。一串牛舌有四大件，目測起碼有3cm×3cm，厚切嚟講真係幾厚，應該有0.5 cm嘅厚度，調味唔需要多，輕輕嘅鹽味已經好配牛舌，牛舌芯厚到食落好爽口，好有嚼勁，咬下咬下，食一件已經好滿足。
富士蘋果煙肉卷（中），$48
煙肉卷配蕃茄仔就食得多，配富士蘋果就未食過。一串有三件，外皮煙肉卷包住一大粒富士蘋果，外皮嘅煙肉煎到剛好唔乾，咬落去有油脂分泌，再配合清新清甜的蘋果🍎，富士蘋果食落好爽口，可以解煙肉脂肪嘅油膩之餘，又好似食飯後果咁清一清口腔嘅煙燻味，比起配蕃茄仔確實係唔同食法。
媽媽鹹蛋豬肉棒（右），$48
9大排行榜第3️⃣名，媽媽鹹蛋豬肉棒。免治豬肉製成嘅串燒棒，面頭鋪上媽媽鹹蛋黃醬，豬肉棒啖啖肉，調味唔重先配合到媽媽鹹蛋黃嘅鹹香味，呢個鹹蛋黃醬真係幾特別，好簡單嘅豬肉鹹蛋黃食材，就係想帶出童年母親燒菜的味道。脆皮白鱔（左），$88
9大排行榜第1️⃣名，脆皮白鱔。第一名喎！一串有兩大件白鱔，白鱔係厚切，塗上燒汁去燒再慢慢滲入鱔肉入邊，火候燒到剛剛好，食落係爽口，而唔係淋生魚肉，與燒汁嘅配合一啲都唔腥，明顯用料上乘，火候十足，難怪可以登上第一名的寶座🏆。
京蔥雞肉串（中），$48
表面搽上醬汁，一啖雞肉一啖京蔥，梅花間竹咁食，就可以食到雞肉同蔥味兩者交織的配搭，係經典的串燒款。
青森青提豚肉卷（右），$48
9大排行榜第2️⃣名，青森青提豚肉卷。比起煙肉卷，這份豚肉卷少了份煙燻味，加重了豚肉嘅味道，內裏包住青提子，驚喜地發現連提子皮衣都剝開了，一咬落去，清甜嘅青提子汁就會泌出來，衝激豚肉片，又鹹又甜，油膩盡消，果然係夠特別的第二名！免治雞肉棒配醬油蛋，$48
9大排行榜第9️⃣名，免治雞肉棒配醬油蛋。免治雞肉棒在熊妹心目中，一直以來都係第一名！免治雞肉棒入邊用上打雞肉及攪碎了的雞軟骨混合製成，咬落去有肉嘅口感又有雞軟骨嘅卜卜脆，重點係點上月見醬油汁，加一點醬油味道之餘，仲有好濃郁嘅日本蛋黃味，生蛋黃漿住喺雞肉棒上面，再提升咗成份雞肉棒的味覺享受。南蠻炸雞，$78
除了串燒，炸雞送酒都非常一流，炸雞款式入面南螿蒜香都幾特別。
一碟有五大件，炸雞超脆口，用上奇趣炸，雞皮有一定嘅厚度同油膩，炸得通透食唔出炸粉，係連骨嘅雞肉位，大大塊雞肉啖啖肉，南螿蒜香經油炸咗之後味道更出，最後連骨頭都噀埋好有味道。日本枝豆，$38
又一送酒佳品！呢碟日本枝豆份量都幾多下，有20條或以上，簡簡單單用鹽水煮滾，食落去已經好充滿鹽味，煮熟咗嘅枝豆皮變軟，喺枝豆中間將一粒枝豆咇出來再滲透出鹽水，清鹹嘅青豆味，食一條再送一啖酒，就係佐酒小食的意義。📌居酒屋就是讓人把酒談歡，消除疲勞，飲過痛快的地方。《禮》無論係環境、食物味道、氛圍都充滿着居酒屋的特色，仲推出咗儲印仔活動，每次來光顧都可以獲得一個印仔💮，儲夠一定數量就有印花卡上面的小食送，咁好氣氛的居酒屋絕對能夠再encore啦！