【Feather & Bone】 由一間位於中環露天街市所在地的小地舖開始，起初只是售賣進口優質肉類、高級食材及餐酒，由於毗鄰中半山，附近較多外籍人士居住，生意越做越好，小店也逐步擴張版圖，甚至踩入飲食界兼營扒房。發展到今天，連同扒房及零售店已有10間分店。第一次光顧，揀了位置便利的銅鑼灣分店。位於銅鑼灣利園二期地庫層，商場本身係香港數一數二嘅高級商場，能夠進駐嘅餐廳當然有一定知名度及質素；側面證明【Feather & Bone】 出品有保證。同近年大部份新開張的餐廳一樣，採用開放式門面設計，有效吸引客人目光。燈光幽暗柔和，裝修風格沈實、但又隱隱透露英式典雅；尤其一排棗紅色皮梳化，更突顯扒房的優雅風格。餐廳內擺放了大大隻牛雕塑，提醒客人牛扒最馳名。以進口食材店起家，餐廳門口也特意保留了肉類零售店常見的凍肉櫃(butcher’s counter)，並且聘請了一位員工專門負責。這個凍肉櫃可不是只是裝飾，真係有實際用途⋯⋯ 餐牌上的其中一個重要選項正是【Butcher’s Counter - Your Choice】！客人可按喜好，揀選不同部位、不同產地的牛肉，按重量收費。牛肉產地來自阿根廷、澳洲及日本宮崎A4和牛；以澳洲產牛肉款式最多，除了多種部位之外，還有草飼、穀飼、熟成(dry-aged)等。奇怪不見有香港最流行的美國產 USDA牛肉，係市場定位原因？抑或老闆係澳洲人，要推廣本國出品，放棄入口 USDA牛肉？餐廳網站亦講明進口肉類較其他零售店貴，標榜優質食材 - 天然飼料，不含荷爾蒙、生長激素及抗生素；而且全部冰鮮進口、小批量進貨，以求新鮮美味。餐廳設有熟成櫃，自家熟成(dry-aged)牛肉後放在凍肉櫃內售賣；同時也代客熟成。客人只需要選購原條牛肉，餐廳就會代為免費熟成及免費寄存，自家專享。客人之後可按所需重量請餐廳代為切件、取走自行烹調；或彌補外賣及堂食之間差價，由餐廳烹調及堂食。有多款前菜及沙律選擇，部份款式在香港其他餐廳少見；海鮮及意大利麵則選擇不多，款式亦未見吸引。主打當然是【Butcher’s Counter - Your Choice】。如果有選擇困難症，可以揀【Butcher’s Choice $488 / 位】，已包括多款前菜及沙律、牛扒、伴菜及迷你甜品，但就一定要全檯人一齊落單，未必適合所有客人。如果多人分享，反而強烈建議【烤乳豬 Suckling Pig $2398】或【威靈頓牛柳 Beef Wellington $1980】。食牛扒當然不能缺少伴菜及醬汁：共有8款伴菜、兩款意大利通心粉及8款醬汁（$15 / 每款）。雖然全部要另外加錢，但仍然值得花錢選擇一兩款品嚐。聽就聽得多，第一次見到餐牌有牛骨髓，一定要試試。【烤草飼牛骨髓 Roasted Grass-Fed Bone Marrow $168】將開邊牛腳筒骨(連牛骨髓)加入少許牛油及香料烤香，之後再在上面鋪滿煙肉醬。骨髓本身膠質濃厚，一般配搭蒜蓉焗法式麵包。塗一些牛骨髓在麵包，入口黏滑、帶有少許膠質，滿口都是油脂，有點似食動物脂肪；唔怪得要用麵包及鹹香的煙肉醬調和油膩感。【自家製和牛風乾牛肉House-made Wagyu Jerky $68】似乎係用手撕成一條條，外型不規則，加上啡啡黑黑，好似乾身口味的台灣牛肉乾，賣相唔吸引。入口軟硬適中，乾身、但仍然保留天然肉汁。同意大利 Parma ham 或者西班牙 jamon iberico 不同，風乾牛肉沒有殘留脂肪油香；又由於加入香料醃製，味道鹹香以外，有點似中式臘肉，感覺怪怪地，不太喜歡這種口味。【燒粟米 Grilled Corn Ribs $78】味道清甜，咬落粒粒爽口、又有少少軟綿。不鏽鋼鉢底浸著味噌牛油醬汁，牛油香濃及日本味噌鹹香竟然同粟米很匹配；加上大量 ricotta 芝士碎，簡單的燒粟米味道頓時變得複雜起來。主菜揀了三款肉，並要求廚師烤熟後切件上碟，方便分享。醬汁份量超多，全部非常濃稠，似麵糊多過醬汁。左邊是【FAB秘製牛油 FAB Butter $15】，右邊是【黛安蘑菇醬 Diane $15】；味道特別、亦非常濃烈。羊架及牛扒已經加了鹽及少許黑胡椒調味，儘管不蘸任何醬汁，已非常好味。【澳洲羊架 $64.8 / 100g (外賣)；$96.8 / 100g (堂食)】只買了2條骨，專為不吃牛肉的外母大人享用。吃完之後，讚不絕口：羶而不臊，肉質鬆軟幼嫩。牛扒揀了兩款澳洲穀飼和牛，普通冰鮮及 Dry-aged 各一，分別是【澳洲穀飼和牛肉眼  Australia Wagyu Ribeye Grain-Fed $139.8 / 100g (外賣)；$173.8 / 100g (堂食)】及【澳洲穀飼和牛西冷   Australia Dry-aged Wagyu Sirloin Grain-Fed $238.8 / 100g (堂食)】，每塊牛扒大約重 300～400g。之前食牛扒，一係普通牛扒、一係就熟成；好少機會同一時間試齊兩款，今次終於可以做個比較。肉眼(Ribeye) 脂肪較少，肉味濃郁，纖維較多、有咬口。西冷(Sirloin) 有較多脂肪，肉味略淡，肉質較鬆軟；但經過乾式熟成處理後，味道變得更濃郁，口感也較為結實。始終是澳洲穀飼和牛，油花較多、肉汁豐富，兩款牛扒各有特色，但同樣美味！揀了兩款伴菜：【龍蝦芝士通心粉 Lobster Mac & cheese $158】及【薯條 Chips $78】。以為龍蝦芝士通心粉細細碗，原來落足材料。龍蝦肉雖然份量唔多，但就有濃郁龍蝦湯醬汁鮮味；芝士份量更是毫不吝嗇，淡淡都是濃稠芝士。很飽膩，但好味。一定要食推介英式甜品【經典新地 Knickerbocker-Banoffee $148】。大大杯、賣相震撼、材料豐富，有香蕉焦糖雪糕、薑汁奶油餅乾、法式鮮奶油、朱古力醬及海鹽焦糖，還有不能缺少的吉百利朱古力棒；三至四個人分享都綽綽有餘！非常甜膩，但味道又出奇地香甜濃郁，食完唔會覺得只係得個「甜」字，反而係想食過幾啖。前菜味道一般，不太啱小編口味；但肉類質素及烹調火喉就真係非常好，莫非冰鮮肉(chilled) 真係好食過急凍肉(frozen)？餐廳旁邊就是附屬大型優質進口食材店。今晚盡情品嚐美食後，離開餐廳時食材店已經關門，未能逛店，下次一定要參觀一下。

我跟朋友C的一年之約又到了。
（不是刻意一年見面一次，但就往往變成這樣。）

我們去年已想到瑞吉酒店The Drawing Room吃英式下午茶。
是被媒體介紹而吸引。
而且可要求食物改成純素。
單一位有此要求也可以。

似乎此餐廳的英式下午茶實在太吸引了。
當時可以做3個月內的預約。
我每次致電也是預約位子滿了。
嘗試數次後便放棄。

今年中再跟朋友C提出是否嘗試預約。
她說外國開放境外旅客入境，香港人不用再留港宅渡假，可能較容易預約位子。
果然！這次預約成功了。
還可以選擇日子。

於是，11月27日星期六，我們便吃了期待已久的英式下午茶。第一次找這酒店位置比較困難。
其中一個原因是港鐵會展站的路牌給了錯誤的指示。
實際上是不用走到天橋上，再穿過中環廣場而行。
上上落落的甚是複雜。

離開時才發現，沿地面往維港方向走。
繞過鷹君中心便看到會展站B1出口。
不消數分鐘便到。

酒店門口並不大。
我是經過停車場那門口進入酒店。
其實那應該是正門。
離開時從側門走。
所以，找到停車場便對了。酒店樓層非常高。
感覺得華麗。

餐廳外有不少座椅。
四周的佈置都是英式風格。
例如這個郵筒。
應該有郵差來收取信件的。配合淡黃的燈光，感覺很舒適。11月份已放置聖誕樹。
令我可以早一點感受聖誕氣氛。

樓層高，聖誕樹也可以放巨型的。裡面便是餐廳的用餐區。餐廳外有露天區。
當時沒有客人坐那裡。

我有時覺得在露天位置用餐感覺寫意。
不過，我們現在是享用英式下午茶，還是在室內用餐較合適。天花板的燈飾。我們坐在圓桌旁。
獨立又大的沙發椅令人坐得舒適。
旁邊還有方形軟墊椅子給我放袋子。這個茶盒子，我在Openrice看過別人分享。
那人說烏龍茶好喝。
所以，我們早已決定要烏龍茶。

但當職員為我們逐一介紹茶葉時，我聽到大吉嶺時又心動。
不過，最後都是點了兩款不同的烏龍茶。

下午茶餐單上有列出這12款茶葉。
即使當時職員介紹，我是快速洗腦的。
12款茶葉都是來自Plantation這家茶店，包括Jasmine Phoenix Pearls（茉莉鳳眼）、Kuchi Hojicha（日式焙茶）、Chamomile Reverie（意想洋甘菊）、Moroccan Mint（摩洛哥薄荷茶）、Keemun Rose（祁紅玫瑰）、Honeybush Chai（南非蜜樹茶）、Darjeeling Moonshine（大吉嶺月光白茶）、Osmanthus Oolong（桂花烏龍）、Oriental Beauty（東方美人茶）、Darjeeling First Flush（大吉嶺春摘茶）、Plantation Breakfast（茶莊早餐茶）和Tangerine Pu-erh（小青柑）。如沒有記錯的話，朋友C點的是桂花烏龍。
我的是東方美人茶，也是烏龍茶的一種。
（前面較深色那一杯。）
味道清香怡人。

我不選擇咖啡，是因為茶是以一壼提供。
可以邊吃邊喝茶。
咖啡則是一飲而盡。另外，這兩杯迎賓酒是贈送給我們。
（不單是我們二人，其他客人也有。）
那是跟一家酒商合作。
客人喜歡的話，可根據名片查找酒商資料。

為何又是有深淺不一的顏色？
因為我的一杯是沒有酒精。
這真讓人意外，連這杯贈送的雞尾酒也可以按客人的特別要求提供。
我還以為沒有我的份兒。好美的「酒」。
兩個女生的下午茶聚，喝著一杯粉紅色的飲品，很搭配呢！

飲品的味道有水果味。
有氣泡。
好好喝。中間的冰塊也讓我們欣賞了一回。
像一座小冰山。
中間凹下去的地方有玫瑰花瓣。朋友C 11月份吃素。
所以，我們二人的鹹點都是特別製作。

正常的餐點是在餐車上選擇4款鹹點。
共有8款給客人選擇。職員有給我們每一款食物作介紹。
我們聽完後都忘記了一大半，哈哈！

前面這個是酥皮雜菌塔（名字都是我自己作，因為沒有餐單）。
雜菌切成小丁，其味芳香。
下面的酥皮口感十分酥脆。
是好吃的小食。

忘記了小番茄內是甚麼。
只記得味道清新。
下面的麵包，我們眼看以為是軟的，非也。
那是脆的。另一個酥皮包內是牛油果末。
也是好好吃的小食。

蘆筍下也是脆麵包。
其上有黃色的醬汁，忘記了是甚麼。
但我記得我們都驚訝這樣配搭的味道很新鮮。一開始看到的4瓶果醬便是用來配司康。
職員再給我們不同於此的2瓶果醬。
讓我們忙於嘗試每一種味道的果醬。
只有每人2個司康，哪會足夠？

記得最特別的果醬是柑橘味。
跟平常吃到的那一種不同。
味道獨特又好味道。已知有人讚賞這裡的司康。
所以，我都滿期待。

果然不錯，司康的口感外微脆內鬆軟。
尤其是圍邊鬆脆。
咀嚼時內裡的糕餅沒有黏糊在口腔上。
亦不會一咬便鬆散至粉碎。

這是純素的司康，味道和口感都好。最後是甜品。
朋友C可以吃蛋奶，所以，職員推出甜品餐車。
她需要在裡面8款甜品中選擇4款。

這個英式餐車我應該是第一次見。
感覺得高貴。
當職員打開玻璃蓋子，蓋子捲動到後面。
入面的層架就像向前伸出來。
讓職員夾取客人所選的甜品。朋友C選擇的應該是Raspberry lychee（野莓荔枝球）、Lemongrass apple（檸檬草蘋果塔）、Cherry pistachio（車厘子開心果塔）和Whisky chocolate cake（威士忌巧克力蛋糕）。

每款甜品都做得很美！
如果要我選，我應該選不到。
因為每款都想吃。朋友C切開其中一個甜品拍了直切面給我看。而我的甜品是純素，不用選，就只有這4款。
也做得很精美。我的甜品做得比較小巧。
很快已被我全吃進肚子裡去。

芒果塔的味道很香甜。
草莓甜品下好像是一塊麻糬。草莓布丁內是椰子布丁。
巧克力塔有濃郁的巧克力味。

這個英式下午茶的特別之處是可以為每位客人提供特別餐飲要求。
就如我們二人，一人是蛋奶素，一人是純素，餐廳也可以安排。

職員的服務周到，令我們用餐時感到很舒適。
訂座時特別提醒我們只有90分鐘。
但我們吃得慢，談話又多。
甜品來到之時，朋友C突然看手錶已差不多下午4時。
即是我們是時候要離開了。

不過，職員也沒有向我們遞上賬單。
或許當時沒有客人在外等候。

這裡的消費是$478一位，另有加一服務收費。
雖然消費高，但我覺得是值得一試。

已經隔咗3-4年冇嚟過喇。最近經常諗起呢間餐廳，於是11月份就開始訂位。不過，由於素苗只開星期五、六、日的夜晚，而訂位係以過戶$500訂金為準，所以拖下拖下，到俾埋訂金後，11月的訂位已滿。最後，我哋揀咗平安夜，嚟呢度預祝聖誕係一個好選擇，因為可以帶埋狗狗嚟，超開心！ 同以前一樣，送上食物後由老閭娘負責介紹，不過可能平安夜多人，所以都漏咗介紹其中一樣，加上食材實在太豐富，所以下要寫的食材我亦只係盡記咋。。。 先嚟係welcome drink：蘋果玉竹淮山薏米班蘭水，2人1jar，應該有1-1.5公升，夠由開始飲到食完餐飯。飲品足料，非常清甜滋潤，令喉嚨好舒服。飲品係keep住加熱，所以冬天不停有溫熱的飲品供應係好窩心既~~我同狗狗爸爸覺得飲品有少少過甜，呢個可能係我哋兩個的口味而已，如果有得少甜就仲正！ 前菜係香煎山藥同巨型羊肚菌。山藥煎到好香，上面搽咗鴨腳木本地蜜糖（花蜜），不過唔係太濃味，可以先食。巨型羊肚菌有少少鹹香，好味。 接住係湯 - 陳皮西洋菜湯配桂圓百里香手工麵包。湯好濃稠，濃濃的西洋菜味，熱度又剛剛好，唔會「辣」口，好鍾意飲。桂圓百里香手工麵包係純手工製作，原味，味道同一般麵包比會較淡，但就肯定健康啲，同埋配湯好夾架。 喺開餐冇耐，老闆娘就到每一檯問大家食唔食榴槤，而榴槤係會用嚟做沙律醬，唔食榴槤的就唔會加入去。個雜果沙律好豐富，配料太多，不能盡錄，而沙律醬就係熱情果榴槤醬（又或者係熱情果醬），沙律面頭有一塊炸羽衣甘藍。雖然狗狗爸爸唔喜歡榴槤，但由於我果碟個榴槤醬都唔係太大陣味，所以就算有人對榴槤味好抗拒，都唔使太擔心或彈開。個沙律食材勁多，每樣貴精不貴多，好滿足食完個沙律，都8-9成飽~~ 主菜係芝士蘑菇粟子批、蕃茄貝殼通粉同黑松露藜麥牛油果。一睇就知多材料，蕃茄貝殼通粉個醬好夠味，好好食。芝士蘑菇粟子批非常香口、酥脆，蘑菇好美味，而且冬天食覺得好warm 。我最後先食黑松露藜麥牛油果，佢有少少似warm salad，細細份，建議可最早食，因為食完前兩者，我覺得佢淡味咗啲，而且相對欠咗少少特色。 當食到八八九九時，老闆娘開始介紹甜品。甜品係另計，$70/份。當晚提供4款甜品，如果我冇記錯，佢哋分別係紅酒煮啤梨、無糖雜果雪芭、玉桂蘋果卷同埋朱古力杏仁蛋糕。我哋點咗朱古力杏仁蛋糕。蛋糕賣相好靚，同無糖雜果雪芭一樣未食已令人好想食（我哋冇點，但因為有其他食客點唔同甜品，所以都見曬全部）。呢個蛋糕的質感唔似出面的蛋糕，唔識形容，但幾特別，出面食唔到。蛋糕少甜，所以雖然係朱古力，但唔會感覺heavy。同埋佢份量唔細，2個人share嚟食冇問題。 另外，老闆娘話天氣冷，所以特別為大家煮咗印度香料奶茶。大煲奶茶喺火堆度煮熱再逐檯斟俾大家。飲品香料味重，暖笠笠，同樣都係甜的飲品，我哋都覺得甜咗少少，不過好好飲，所以有encore！ 好鍾意嚟呢度食嘢，一嚟食物健康、豐富，二嚟少調味，基本上每道菜我都可以俾狗狗試下，而狗狗都勁鍾意食。我之前2次嚟都係夏天，今次係入冬後，凍啲嚟呢度餐廳會喺戶外位置起火堆，食食下趁冇人走出去圍爐取暖，覺得勁有氣氛，好溫馨~ 呢度係pet friendly，狗狗或各類寵物都無任歡迎（老闆娘話有客人帶過鸚鵡同小豬嚟）。另外，雖然係fully booked而我哋係要同人「搭檯」，不過所謂「搭檯」係喺一張接駁成大長檯的兩端，非常有私人空間。我記得前2次嚟，上菜好似慢啲，都要食3-4小時，不過今次上菜節奏比較快，如果唔另加甜品，大約係食1.5小時左右，所以就算住得遠啲，都可以嚟試下。

之前同屋企人嚟食冬至飯
見OpenRice評語唔錯 碟碟餸都幾精緻靚仔咁
睇成個格局都已經feel到好high class
餐牌勁多勁多菜式! 我哋主要都係揀啲廚師推介嘅💫

《前菜》
▶️ 清香柚子凍鮑魚 ($148)
賣相超型 用咗乾冰 所以不斷散發「煙霧」🌫️
每人一粒鮑魚仔 食落口感韌韌地彈牙
底部有好多西柚 西柚食落有汁帶苦味 配上少許柚子醬 成個combination幾特別
▶️ 話梅鐵棍淮山 ($78)
淮山切到一粒粒
外面啲汁令到佢黐笠笠咁 食落甜甜地 不過就冇話梅嗰陣味
而淮山質地好爽口 咬落以為係硬啲嘅啤梨🍐個人覺得呢個唔算特別好食

▶️涼拌海蜇頭 ($138)
呢個海蜇頭同出邊買嘅好唔同 大塊又厚身
另外加咗啲青蘋果 黑木耳 芝麻
全部咬落都好爽脆 醬汁酸酸地 好開胃
▶️ 川味口水竹絲雞 ($118)
因為用咗烏絲雞 所以係黑蚊蚊嘅🖤
個醬油係麻辣醬 好在唔係好辣🌶️
因為係前菜所以凍嘅
雞肉幾腍 質地有啲似啫喱 似上海肴肉嘅做法

▶️ 金甲脆魚皮 ($78)
自己唔食魚皮所以冇試 但係應該幾香口 因為魚皮炸完之後外面仲落咗啲鹹蛋黃

《肉類》
▶️ 招牌黑毛豬叉燒 ($248)
望落去同一般叉燒唔同 雖然叫咗瘦 但係其實都似半肥瘦
呢個就冇想像中咁好食 叉燒冇乜嗰種烤過嘅味 豬肉偏韌🐷
▶️ 黑糖龍井茶燻雞 ($228)
望落雖然似正常嘅油雞 但食落反而幾特別
佢嗰種煙燻味 加茶味好出🤤連皮食都唔會好油淋淋
🐔肉質滑嫩新鮮 仲要多數係肉冇咩骨
《蔬菜》
▶️ 珊瑚蟹肉脆茄子 ($218)
嚟到以為係炸豆腐😂
茄子一片片咁 之後炸咗佢 成金黃色
旁邊有一壼蟹肉嘅醬汁俾你淋落去 真係超級多真蟹肉🤩好正
多到可以用嚟撈飯食
唔太脆口 純粹有炸嘢嘅香味 茄子幾淋🍆好食！推介呢個試吓
▶️ 豆漿杞子黑腐竹浸時蔬 ($158)
今日嘅時蔬係豆苗
第一次見用豆漿煮菜而非上湯
豆漿奶白色 偏杰身 少少Creamy 🥛
上面一啲深紫色嘅腐竹 然後有好多粒杞子 望落去清淡而滋補😌
豆苗好新鮮好清脆 唔太食到豆味 但係好鍾意佢個醬汁口感
呢個都好值得叫🥬
《飯麵》
▶️ 金蒜瑤柱蒸冰島鰈魚鰭籠仔蒸飯 ($268)
一個竹籠裝住瑤柱香蔥炒飯 上面鋪咗唔少魚片 最後灑上蒜蓉
個魚同一般食嘅龍躉好唔同 呢個好黏身 同埋軟到似肥膏咁 入口即溶🐟帶有少少魚油味 好在冇骨冇皮
🍚炒飯唔會太油膩 飯都係粒粒分明嘅 調味唔會太鹹 不過感覺就差少少鑊氣
炒入咗唔少瑤柱 同埋應該落咗啲薑
呢個就一般啦 份量足夠分四碗
《甜品》
▶️ 金箔懷舊芝麻卷 ($48)
因為搶手 所以要預訂架🔥
芝麻卷整到好似腸粉咁 其實食落個feel幾似😆只係黏身啲
的確幾好食嘅 因為佢個黑芝麻味好香濃 又唔會太甜👍🏻
想食記得提前落單！一碟三卷

▶️ 清心柚子糕 ($45)
賣相幾靚 分成兩層 上面透明粉紅色嘅 下面就白色一層
透明嗰層入邊有真西柚粒 同前菜嘅西柚粒一樣 食落又酸又苦
個人唔鍾意食呢個 一來覺得佢個糕整得太甜 二來覺得加左西柚唔係好夾🫢
▶️ 流心南瓜球 ($45）
味道同南瓜餅差唔多 只係圓轆轆 整成南瓜形狀 (其實似吉仔多啲🍊)
外皮炸到超香脆 入面就好煙韌好似mochi咁
因為落咗芝士 所以甜中帶鹹🧀本身冇咩南瓜味 亦冇南瓜蓉
但係呢個好熱氣 食完即刻少少喉嚨痛🤏🏻-
食物超級精緻而份量正常 (唔係fine dining咁細碟)
用料靚而足 對得上價錢
每道菜式都有佢特別之處 唔係一般中菜館會叫到嘅 感覺創新有趣😍
服務超好 啲姐姐好nice 點單仲會同你介紹邊啲係必要菜式
成個環境氣氛都好舒服 因為分成唔同廳堂 所以坐得空曠又唔會好嘈
入面用上紅色配黑色嘅格調 感覺高檔
平均每人$400左右 間唔時食下貴嘅好西😆

每當一入冬，好友便嚷着要食羊腩煲，好吧! 今晚就去食。其實不少食店已推出了羊腩煲，我倆今晚就揀了這間環境不錯的冰室。冰室整齊企理，環境光猛，設有多張梳化卡座，主要是二人枱和四人枱，枱與枱之間有一定距離，坐得挺舒適。細閱多份餐牌和厚厚的餐簿，選擇非常多，有精選套餐、羊腩煲、胡椒豬肚雞鍋、鐵板餐、小菜、燒味之作、西式晚餐、全日餐、常餐、焗飯、咖喱、明爐燒味、本土情懷、小食三文治、飲品等，真是令人眼花撩亂。
***************************友人第一時間要一個羊腩煲配菜籃和白飯（$158），以小火爐邊滾邊吃，一直熱辣辣，吃得更滋味！數數看，一煲挺多食材，有我喜歡的支竹、爽身的冬菇、爽口的馬蹄和荀，還有一籃新鮮的生菜、南瓜和金菇，只要滾一會，又爽口又入味，正！各款配料都烹調入味。羊腩汁味道香濃，用來佐白飯一流！主角羊肉約有五至六件，每件也不細。當中有淨肉，也有連骨，部分還連帶滑嘟嘟的羊皮。羊肉挺入味，蘸些腐乳，鹹香帶辣，更惹味！若然肉質再腍嫩一點就更好，但連骨的肉質就腍一點，喜歡！
***************************精選2人套餐（$158）都好抵食，而所選的菜式都不少，我們先要一客燒味雙拼，當中揀了燒鵝（+$20）和燒腩仔。竟然是鵝脾，太好彩呀！大小適中，外皮赤紅亮澤，薄脆油潤；脾位果然不同，肉質寧舍香嫩，夾雜油潤的肥亮，充滿鵝油香，啖啖滋味！再蘸些甜酸醬，兩者一向是最佳拍檔，更添美味。燒腩仔也吸引，皮脆得來又鬆，而皮下肥膏和肉比例合宜，一層油潤的肥膏，一層嫩肉，兩者相間幾層，蘸些芥末醬，一口一件，又脆又嫩又油潤，吃得滋味。
***************************另一小菜揀了南乳溫公粗齋煲，以小煲仔盛載上枱，熱度十足。一揭開蓋就聞到陣陣南乳香，不禁垂涎。選材豐富，有白菜、豆卜、支竹、雲耳、筍、雪耳、雜菌等等，味道鹹香，弄得入味，讚！最喜歡是索滿南乳汁的粉絲，最美味。
***************************套餐配有老火湯及白飯各兩碗，是日老火湯是蓮藕豬骨湯($0/跟餐)，味精甘香，蓮藕煲至粉糯，夠晒火喉。
***************************太好了！原來惠顧滿$168就奉送一碟蒜茸炒時蔬，不知是否想鼓勵食客多吃蔬菜呢？讚！今晚是蒜茸炒白菜（$0），青綠爽嫩，少油少鹽，滿有蒜香，健康之選。
***************************最後再來兩杯熱檸蜜（各杯+$3）暖笠笠，甜美滋潤，加埋檸檬，酸酸甜甜，有助消化。
------------------------------
食完羊腩煲身體果然暖了不少，其實除了羊腩煲是入冬之選外，胡椒豬肚雞鍋都可驅寒保暖，下次也要再來試試。

冇得去台灣，最掛住就係嗰個勁平又勁好味嘅個碗滷肉飯！最近不論社交平台、訪問都係呢間台灣人主理小食店。主打每日新鮮熬製滷肉，還原台灣味道。閒日晚上去到都見到有幾pair人排緊隊，大概15分鐘就入得。入面裝修幾舒服，有一邊係台灣夜市嘅畫作，但只係座位位置較逼，同埋大家記得用餐時間係1小時。爆蔥滷肉飯 $58
⭐️⭐️⭐️⭐️
份量巨多，女仔叫真係小心，唔好因為一時想試唔同款野食而叫太多，食落就知佢份量有幾足。一睇就見到有幾爆蔥，成碗都佈滿哂，鍾意食蔥嘅一定要點呢個！呢度嘅滷肉食到一粒粒顆粒口感，唔會話太腍好似醬咁，滷肉偏向瘦少少，油膩感唔會太重。撈完飯個咸度岩岩好，叫左溏心蛋，正正常常，如果係溫泉蛋會仲加好食，但最緊要個飯夠熱。成個飯最令我驚喜嘅唔係滷肉，反而係個不太起眼嘅醃菜，簡直先係神之筆，香得黎帶酸微辣，令到個滷肉飯味道層次多好多，亦點綴到個飯，唔會咁膩口，令到人食幾啖就唔想食！鹽酥雞套餐 $70
⭐️⭐️⭐️⭐️
鹽酥雞真係記得趁熱食，凍左真係整體味道上差好多。首先佢炸到好香脆，熱辣辣又脆卜卜（加分），雞肉食落都算嫩滑，唔會太柴太乾爭爭。調味都幾香唔會過咸，除左層炸皮有調味粉之外，入面雞肉都有醃過。但唯一敗筆之處係個九層塔，真係正常裝飾之用，點食個鹽酥雞都冇個陣九層塔香味，有小小失望。咁香口嘅野食，好啱整番杯台灣啤！肉鬆起司蛋餅$38
⭐️⭐️⭐️
肉鬆起司蛋餅正常發揮，冇話特別覺得超級出色，正路唔會出錯菜式。入面雞蛋個熟程度控制得幾好，半生熟，但芝士個人覺得唔太足夠，食落主要淨係食到肉鬆味，比起台灣早餐店食到嘅味道仲有一段距離。白桃烏龍寒天 $15
⭐️⭐️⭐️⭐️
叫主食或套餐可以加$15飲到特飲，分別叫左白桃烏龍（少甜、少冰）配寒天同仙草。本身冇咩期望，因為始終見大多評價都話珍珠奶茶太奶冇咩茶味，但一入口好香桃味，隻味唔係好人工，加上叫左少甜岩岩好。茶底真係比想像中香濃好多，飲落清香，用黎解油膩一流。寒天一粒粒有咬口煙煙韌韌，幾好食，但係仙草完全冇口感，好溶爛咁。

🌟總括：如果排一陣都值得一試，半個鐘以上就唔好啦。味道上各方面都係中上，但話係台灣嘅味道咁又未到，始終有距離。大家要慎點份量，太多就好似我咁搞到要打包拎走。價錢都係偏少貴，但香港地鋪租物價咩都貴，唔可以拎台灣食到嘅價錢黎直接比較。

今日同朋友在威靈頓街工作後剛剛遇正tea time！就揀咗上一樓嘅Tommy Yummy Tea一Tea,Yum一Yum先😆😆😆 🌲🍀☘️🌿🌵🌾🌴🍃🌳🪴🌱🍃🌴🌲🌾 餐廳裝修主要白色及綠色為主色！富有熱帶森林嘅格調，空間感十足！簡約又舒服！甚有泰國渡假feel的設計！店內有寬闊的大玻璃，可望到外面的環境！位置也非常方便！🌳🌲🍀☘️🌱🌿🌴🍃🌱🪴🌵🌳🍃🌴🌾 💠💠💠💠💠💠💠💠💠💠💠💠💠💠💠 餐廳以QR code落單！方便快捷！想食乜就食乜！ 👦🏽👧🏼🧑🏻👱🏽👨🏼👩🏼👩🏻👨🏽‍🦱👨🏼‍🦰🧑🏽‍🦱👦🏽👱🏽🧑🏻🧑🏽‍🦱👧🏼 職員以年輕一族為主，待客有禮！ Tea Set: 1️⃣ $58 沙嗲串(豬頸肉/雞肉)🍢🍡+ ☘️薄荷青檸梳打 杯裝上的兩串串燒,醬汁是沙爹醬,沾滿雞肉及豬頸肉十分惹味！串燒仲有炭燒味！真係好似泰國嘅街頭小食呀！ 薄荷青檸梳打~ 如果喜歡薄荷味就啱曬！因為感覺好清新及開胃！ 2️⃣ $78 泰式扎肉湯河🍲 + 泰式奶茶🧋 湯河粉量足夠,扎肉香茅味濃！十分飽肚！泰式奶茶與港式奶茶不一樣， 好有特色，口感濃滑，非一般茶餐廳嘅奶茶！ 除兩個tea set外更想試下餐廳獨有嘅食物！3️⃣ $128 虎蝦海鮮混亂杯麵🦐🐙🐚🦑 一上枱賣相已好吸引，打卡一流！加上個人很喜歡冬陰功的味道，麵質好有咬口，中辣帶點微酸係我至愛！海鮮多種類之餘份量仲好足夠，例如：大虎蝦、青口及魷魚圈等。。。整碟混亂杯麵真係好香口，味道確不錯！ 4️⃣ $118 芒果乳酪疊疊冰 2人份🥭🍧 賣相會畀五粒星，每粒乳酪方塊冰都含有芒果肉，仲有一支鮮芒果雪條，食落好香甜！綿花冰軟綿綿，中間夾有一嚿煙韌糯米飯，額外仲有杯椰漿按喜好自行淋上面！這個甜品冇得輸！無論賣相及材料都非常豐富，果然大滿足！ 總括來說：對餐廳印象深刻，尤以特色食品及用心製作！下次可以再品嚐其他不同的食物！

近日大規模降溫，大西北居民表示凍到震 🥶 雖然在冷氣加持下，食客不必受天氣限制，四季照舊「烚吓烚吓」，但煲仔飯這種傳統美食，依然堅持秋冬才出動 ❄️ 原因無他，在 40 度高溫下製作煲仔飯，只怕臘鴨未熟廚師已經化成一灘水 👨🏽‍🍳💦


坤記、嚐囍兩大米芝蓮煲仔飯名店，多年來鬥得難分難解 ⚡️ 去年已到訪過後者，今次跑來慕名已久的坤記煲仔小菜，香港人排隊乃是兵家常事，在門外的心情緊張又期待，後來發現 30 分鐘的等待絕對值得 😸

店內環境市井熱鬧，煲仔飯即叫即煮 🔥 專門的師傅在灶台前同時照顧七八個柯打——煮飯、鋪上食材、揭蓋加油、關蓋焗出飯焦、調整火力…♨️ 將生米煮成熟飯的過程講究得很 🍚 火太猛怕燶，不溫不火飯焦則無法成形，多年練成的「鐵砂掌」，使師傅可以徒手處理滾燙砂煲，這時切忌心急，耐心等候不要催單喔～🫶🏻

選擇了最愛的白鱔田雞煲仔飯 ($120)，亦是最考驗食材品質的組合，白鱔魚皮富彈性、肉質爽滑，滲出天然油香 🐟 田雞大件肉厚又彈牙，配上豉汁好好食！☺️👍🏻


上檯時自行淋入豉油再焗 2 分鐘 ( 建議一圈起兩圈止，因太多豉油會浸濕飯焦 )。砂煲受熱均勻可輕易起出原塊飯焦，火候控制得宜、飯粒乾爽分明。


香脆鍋巴帶豬油甘香，食得出啖啖心機 ❣️ 食完暖笠笠，能夠連續多年獲得米芝蓮必比登推介，當之無愧 🫡👏🏻


另外叫了兩款小菜，蒜蓉蒸開邊蝦 ($105) 大大隻，鋪滿金銀蒜味道鮮甜 😋


西蘭花炒斑球 ($95) 並非以雪藏貨冒充，斑球嫩滑之餘，有一種獨特的果凍感，玻璃芡勾得透薄，剛好掛在食材表面 🥦 小菜水準亦不俗，建議多約兩位朋友來，可以多點幾道菜！有機會一定會再訪，錯開用餐時段應該不用排長龍吧 🥲

💰 $150 p.p.
📍 坤記煲仔小菜
西環西營盤皇后大道西 263 號和益大廈地下 1 號舖

活化咗嘅618上海街，二樓有間逢星期一至六開到夜晚8點嘅新加坡社企餐廳💁🏻‍♀️想支持嘅話要早啲去呀! 星期日收下晝5點添㗎~ 呢間社企餐廳致力幫助弱勢社群同殘障人士，俾佢哋工作機會同建立信心❤️重拾尊嚴! 所以佢哋件制服都有大大隻字「尊嚴」🫡 入面好似food court~ 喺cashier綜合買完之後，職員會溫馨提示你每項食品去第幾檔領取🫶🏻 聽唔切唔緊要㗎! 有得拎嘅時候，電視屏幕會顯示㗎喇😉 牆身有好多特式油畫! 啱晒打卡📸 食品製作嘅時候可以欣賞吓四週嘅環境先(˶‾᷄ ⁻̫ ‾᷅˵) 全層好大好多位~ 員工多過食客，希望佢哋做得住啦😗 食物唔錯㗎!! 大家可以俾個機會佢哋自力更生，融入社會💪🏻 接住落嚟會有介紹我衝住佢而嚟嘅Laksa😌 選擇唔多，就只有蝦同雞揀~ 朋友唔食蝦，揀咗雞仲有驚喜😙係海南雞嚟㗎!!!! 皮滑肉嫩之餘份量仲好多! 起碼有八件🐔 可惜佢係凍嘅~ 如果整熱佢會更好🫶🏻 湯頭超濃稠~ 一個人食晒應該會滯😂 椰香味恰好! 微辣唔搶喉! 兩個人happy share 就啱啱好! 到喉唔到肺，想encore先會有第二次😊 麵底係摻摻💁🏻‍♀️正宗又啱晒鍾意唔同口感麵底嘅人👍🏻 我最like佢嘅米粉嗦晒啲湯味，超正!! 大大碗都係$65咋! 好抵食‼️ <<臘腸雞粒瓦煲飯>>($65) 佢都唔止係雞粒! 我覺得係雞球😂 雞肉份量好多又冇骨👍🏻 原條臘腸望落好吸引! 不過油脂重咗啲~ 食咗兩啖我就嫌佢太肥，冇咩興趣🫣 下次可以試吓另一款💁🏻‍♀️豆豉排骨 <<炒蘿蔔糕>>($62) 即叫即炒嘅佢需要啲時間準備☺️請耐心等候٩(˃̶͈̀௰˂̶͈́)و 蘿蔔糕係連埋雞蛋一齊炒，所以特別香😆 不過略嫌覺得蛋多咗少少! 有啲宣賓奪主咗😌 落單嘅時候有問要唔要辣! 我哋叫咗辣都唔算好辣~~ 辣醬好惹味! 額外問佢拎一碟仔自己點醬都好好食🥰

銅鑼灣登龍街雖然只是一條短短橫街，但九成以上地鋪都是食肆，再加上兩旁幾幢商廈也有不少樓上餐廳，如果要每間餐廳都光顧一次，就算日日去都要食足兩個月！正可能因為競爭太大，餐廳經常轉手，只有少數可以長期經營。今日經過，發現之前的「豐勝手丼」原來已經結業，變成「Solo Udon ソロうどん」。餐廳門面裝修有特色，加上用色鮮明，遠處望過已相當搶眼；但另一方面又顯得低調，招牌名字並不顯眼。入內前先在門口的觸控式屏幕食卷機自助買票，類似日本當地拉麵店或連鎖牛丼店的運作模式。香港強制採用這種自助食卷機的店舖不多，印象中只有少數日式拉麵店 ⋯⋯ 雖然麥當勞、大家樂、KFC 也有相同設備，但這些連鎖快餐店仍然保留傳統排隊買餐櫃檯。講起上來，香港的自助食卷機比日本先進得多，既有圖文並茂的 touch screen、又接受各種電子付款方式；反而日本雖然電子科技先進，但食卷機仍然停留在幾十年前的按鍵式（唔識日文真係唔知㩒邊個掣）及只收取現金（雖然有自動找續功能）。

全個電子屏幕都是烏冬，口味走港式新派路線。烏冬有熱有凍，有咖喱湯、雞白濃湯、甚至fusion口味的中式擔擔濃湯！反而欠缺傳統日式烏冬的昆布清湯。除了烏冬，亦有多款日式小食配搭：日式叉燒、日式炸雞、天婦羅蝦、吉列豬扒、火炙牛肉等。室內裝修明亮簡潔，全部都是吧枱式座位，每個座位之間用間板分隔 ⋯⋯ 即時聯想起源自日本九州、首創個室拉麵的「一蘭」。分別在於「一蘭」採用傳統日式拉麵店裝修風格、間板是實心木材；「Solo Udon ソロうどん」則裝修時尚、間板用不鏽鋼粗框加透明玻璃打造。內圍個室的背面就是廚房，廚師煮好烏冬後可打開小門，直接遞給顧客。每個位都有罌天婦羅脆粉，最啱配搭清湯烏冬，偏偏餐牌上沒有昆布清湯烏冬，好似得物無所用。咖喱湯吉列豬扒烏龍麵（$98）的概念很可能源自北海道的湯咖喱。試一啖湯汁，味道小辣、又有蔬菜的清甜，原來廚師選擇了日式咖喱的經典味道炮製湯咖喱。不愧烏冬專門店，又標榜採用北海道麵粉及正宗日式烏冬風味，入口煙韌彈牙。吉列豬扒味道一般，脂肪太少、肉質入口有少少嚡口。雜錦天婦羅冷烏龍麵（$98） 天婦羅放在烏冬表面，好容易被烏冬汁浸軟；又沒有另外提供蘿蔔蓉 / 天婦羅汁或者海鹽調味，到底想點？幸好天婦羅脆衣夠薄、入口鬆化，以烏冬店來説，炸功已算相當好。蝦天婦羅雖然彈牙爽口，但蝦味淡；蔬菜天婦羅較好吃。但沒有天婦羅汁調味，始終有所欠缺。無論什麼食材、湯汁或者冷熱，店主俱刻意整碗烏冬奉客，食材不會分開另上。雖然每隻烏冬碗各有特色、顏色鮮明，明顯係細心挑選，但並非所有烏冬都適合；冷烏冬正是其中之一。沒有一杯烏冬汁，烏冬要沾碗底的汁實在非常不方便，一來太少汁，另一方面，一定無法避免浸軟鋪在表面的天婦羅。偏偏又有一小撮山葵蓉放在碗邊，到底想點？雞白湯叉燒烏龍麵（$88）令人聯想起日式拉麵。雞白湯表面浮起一層泡沫，賣相媲美以濃厚雞白湯馳名的名牌拉麵店。馬上呷一口雞湯，有點失望；偏稀、雞鮮味唔夠濃郁，同名牌日式拉麵店仍有距離，但尚算幾好味。薄切日式叉燒就很好味，有適量豚脂，亦見到兩個部位的豬肉。只得兩小塊，未夠喉。雖然出品加入了港式風味，配搭食材味道一般，不過烏冬質素相當好，媲美烏冬專門店，值得一試。

【超推薦嘅元朗泰國餐廳🇹🇭芭堤雅泰國餐館】
-
元朗不嬲好多嘢食😜都有唔少泰國餐廳😗
而🌴芭堤雅泰國餐館🌴暫時係小編嘅No. ①
餐廳裝修完之後環境更舒服😌食物款式又多咗😛大家有興趣一定要去試吓🫶🏻🫶🏻😝

-
唔講唔知原來🌴芭堤雅泰國餐館🌴係元朗已經開咗十年🥳最近仲翻新過啱啱裝修好～
佢係元朗站行幾分鐘就到🚶🏻‍♀️非常方便🚉
餐廳有兩層😏都有幾多位😝以淺啡色為主調🌿配上綠色嘅牆壁同埋植物🍃環境好舒適😜~

食物方面款式都幾多😙仲好特色添！
好似甜品咁💁🏻‍♀️除咗有經典嘅芒果糯米飯之外🥭
呢度仲有泰式香蕉煎餅🍌同埋椰子雪糕🥥好驚喜呀😻
同埋餐廳嘅special menu會不定期更新🤤仲會按季節更改時令食材🫡幾有熱誠值得比個讚👍🏻

-
😋泰式乾炒河粉🐷 $88+1
泰式乾炒河粉有得揀豬肉或者雞肉🐓小編就揀咗豬肉啦 💁🏻‍♀️
河粉入面仲有芥蘭、紅蘿蔔🥕同埋好甜好嫩嘅粟米筍🌽
呢款河粉有別於港式嘅乾炒牛河嘅河粉😂比較闊身口感滑順Q彈有勁😝
炒得夠鑊氣食落幾香口😙蛋絲同埋炸蒜增加口感😌味道相當唔錯～

好味指數：🌕🌕🌕🌕🌗

-
😋碎肉生菜包🥗 $88+1
肉碎用泰式香料炒香🫡
香濃惹味的肉碎配上清爽嘅生菜，
令人食指大動😝

好味指數：🌕🌕🌕🌕🌖

-
特製蒜蓉包🧄 $38+1
有別於傳統泰國餐廳用嘅黃金磚🍞
Pattaya用咗全新配方炮製蒜蓉包
小圓包搽滿牛油同埋蒜蓉加埋迷迭香🤩
即叫即焗😝香噴噴、熱辣辣🔥
單食或者點咖哩都一流架！

好味指數：🌕🌕🌕🌕🌗

-
😋香蕉飛碟🥏 $48+1
唔使去香蕉仔都可以食到好味嘅香蕉煎餅🥞
外皮煎到金黃色😍幾酥脆
面頭淋咗煉奶同朱古力醬🍫
中間就夾咗香蕉🍌又甜又香
非常好食嘅泰式小食😋

好味指數：🌕🌕🌕🌕🌗

-
😋椰子雪糕杯🥥 $48+1
賣相好精美有兩朵小花做裝飾🌼
椰子雪糕味道香濃口感軟滑😝仲有爽口嘅椰子肉😍
值得一提嘅係佢嘅花生碎同埋椰子脆片令到成個甜品口感更加豐富🤩

好味指數：🌕🌕🌕🌕🌖

-
😋馬拉盞通菜🥬 $78+1
新鮮通菜口感爽脆😝鹹香惹味！
不過小編覺得味道可以再濃少少🤏🏻

好味指數：🌕🌕🌕🌕🌑

-
😋泡沫泰式奶茶☕️ $35+1
呢個泰式奶茶小編好推薦😝口感絲滑
雖然第一啖飲落去偏甜😜但係加埋啲奶泡味道就啱啱好😚可以平衡重口味嘅泰菜

好味指數：🌕🌕🌕🌕🌖

-
😋芒果梳打🥭 $38+1
賣相好吸引😜味道清新🤩入面仲有新鮮芒果粒💁🏻‍♀️

好味指數：🌕🌕🌕🌕🌘

-
總括而言😗喺元朗想食泰國菜😌✨芭堤雅泰國餐館✨係一個唔錯嘅選擇🤩

-
📍芭堤雅泰國餐館 (元朗)
元朗安樂路1-11號明珠樓地下1號舖
💸人均消費： $170