Paper Moon

營業中

休息中

難得最近疫情放緩，同男朋友仔出嚟嘆吓下午茶，預先已經預訂咗人氣唔錯嘅Paper Moon下午茶，點知唯一可取嘅只係海景，食物完全令人失望。之前聽朋友講，同埋好多YouTuber介紹都話呢度嘅下午茶性價比好高。又話有龍蝦尾同埋生蠔。可惜今日嚟到食下午茶，龍蝦尾已經變咗蟹腳，生蠔變咗幾隻蝦。首先蟹腳好瘦，冇乜肉，好彩尚算新鮮。嗰幾隻蝦，完全冇味，就好似快餐店嘅到會咁。唔知點解兩杯奶凍又會同啲蝦擺埋一齊。相信呢間餐廳知道自己咁樣偷工減料，驚客人唔夠飽，於是乎提供大量澱粉質。啲包好大件但係啲餡超級少。可能塔塔子見識少啦，食開嘅都係英式下午茶，莫非意大利式下午茶就係咁樣？聽聞意大利嘅甜品出名好食，可惜呢個下午茶嘅甜品簡直係不值一提。蘋果批個皮係林嘅，仲有件好恐怖嘅粉紅色棉花糖，其他糕點真係難食過X心西餅。macaron 味道正常，因為相信都係買返嚟嘅。Cocktail有啲似李斯X林…應該留返萬聖節推出。唯一可取嘅只係餐廳有維港景色， 590幾蚊嘅價錢相信有$500就係比維港嘅。下午茶都整到咁，相信都唔使黎試佢嘅正餐。