影片
更多
2014-11-14
1365 瀏覽
晌小弟後生個年代，我諗都無乜邊個唔識阿Sam首「最緊要好玩」，旋律輕快，歌詞鬼馬，當年真喺唱到街知巷聞。好鍾意當中幾句歌詞：「人其實天生奔放貧玩，原沒有拘束只有笑顏，悲歡我唔慣，追趕太陽似子彈。」晌依一代社會裡，能生活得無拘無束著實不易，所以，識得心情嘅調節好重要，就好似今晚，跟幾個老友嚟到「醉串」，吃吃喝喝，只談飲食，細味串燒，其實開心真喺可以好簡單 ！主打賣串燒，跟上次幫襯過晌銅鑼灣嘅深宵食堂感覺好唔同，有別一般日式串燒店，裝潢較為摩登簡約，一室白枱白磚牆，以白色為主調。中間一字長形高腳枱櫈，有少少酒吧感覺，而兩邊都喺可郁動嘅4人位。如果主要嚟飲吓酒，前者無乜所謂，若嚟主要嘆串燒，似乎後者會坐得舒服少少。店名加得個「醉」字，酒類自然少不得，而且款式甚多，又日本吟釀，又韓國真露，生啤就更唔在講啦，滿滿一架一櫃都喺 。 巨峰梳打 $98（1L）不過，小弟唔多飲得，對酒亦不大興趣，所以，最後都揀咗巨峰梳打。冰涼清甜而帶些微酸，點點提子氣味，感覺清新。據介紹，店中嘅「真露Mix巨峰」（$180 / 1L）經特別調制，都幾受客人歡迎，相信跟食串燒會喺「醉佳拍檔」 。睇番其他人嘅食評
主打賣串燒，跟上次幫襯過晌銅鑼灣嘅深宵食堂感覺好唔同，有別一般日式串燒店，裝潢較為摩登簡約，一室白枱白磚牆，以白色為主調。中間一字長形高腳枱櫈，有少少酒吧感覺，而兩邊都喺可郁動嘅4人位。如果主要嚟飲吓酒，前者無乜所謂，若嚟主要嘆串燒，似乎後者會坐得舒服少少。
店名加得個「醉」字，酒類自然少不得，而且款式甚多，又日本吟釀，又韓國真露，生啤就更唔在講啦，滿滿一架一櫃都喺 。
巨峰梳打 $98（1L）不過，小弟唔多飲得，對酒亦不大興趣，所以，最後都揀咗巨峰梳打。冰涼清甜而帶些微酸，點點提子氣味，感覺清新。據介紹，店中嘅「真露Mix巨峰」（$180 / 1L）經特別調制，都幾受客人歡迎，相信跟食串燒會喺「醉佳拍檔」 。
睇番其他人嘅食評，都見「醉串」開咗段短時間，不過，都仲做緊唔少「新張優惠」，例如：食滿$200減$50、Hoegaarden生啤10:00pm後買一送一、感動價$98日式波士頓龍蝦芝士火鍋一客 。
咁都未止，如果晌Facebook或Instagram，讚吓好，打吓卡，都有少少回報，就喺獲贈免費小吃。至於今晚送咗咩小食俾我哋，就喺醬煮牛舌尖（$20 / 份），牛舌經過汁煮，好入味，加上牛舌獨有羶香，以及軟腍嘅質感，一口一件，準備為今晚嘅串燒之旅揭開序幕。
日式柚子凍蕃茄 $22 整串燒製作需時，所以，先嚟個冷盤前菜開開胃。日式蕃茄簡單薄切，配以柚子胡麻汁，酸香醒胃。
日式波士頓龍蝦芝士火鍋 $98（新張優惠價）新張優惠著數嘢，無理由錯過，不過，龍蝦有點細隻，蝦肉亦都唔多；幸而伴有香蒜麵包粒，個芝士火鍋又調校得幽香軟滑，事後才知喺用日本清酒搭瑞士芝士做，怪不得硬喺有啲唔同。
掃一掃張點菜紙，以肉類串燒最多，共有近廿款，而海鮮類（11款）、菜蔬類（11款）、涼拌 / 小食類（13款），加埋麵類，應不愁無選擇。串燒五花腩 $28 / 串
五花腩厚切，肥瘦相間，當然基於健康瘦嘅佔多，所以咬落唔會一口油，但焦香油潤，富肉汁，認真唔錯。
燒雞軟骨 $16 / 串（2串起）雞軟骨其實最主要食佢個口感，咬落咯咯聲，食落咬口柔韌，不過，唔鍾意嘅人就覺得無咩好食。雞軟骨連住少少雞肉，若慢慢細嚼，咬吓咬吓查實都幾過癮。
燒羊架 $88 / 2件 問過店員，羊架取紐西蘭貨色，燒得勻均，上枱已肉香四溢，入口肉汁澎湃，肉質軟腍柔嫩，但羶香溫和，值得推介。
燒牛舌 $28 / 串（2串起） 牛舌同樣厚切有咬口，跟上面個醬煮牛舌尖好唔同，因為只下鹽調味，牛舌獨有香味更突出，爽口有回彈力，鹽燒最能體驗牛舌真味。
燒鱔串 $48 / 串 一串賣$48確喺有啲唔平，但食過會知道佢嘅質素絕唔喺行貨貨色。外皮燒得甘脆，咬落有卜卜聲嘅感覺；鱔肉油潤而嫩滑，脂香十足，推介正貨。
辣酒花螺仔 $48 喺店方自信嘅推介，一份都喺賣$48，大概有十零粒，唔算貴。個辣酒真喺調校得不俗，酒香辣度兼備；花螺仔肉地幾肥美，索滿辣酒汁，非常惹味。
燒日本有機甜番薯 $18 / 串（2串起）臨尾點啲澱粉質食物，可墊一墊肚，始終食串燒都喺唔平嘅消費。一串有4粒嘅日本有機甜番薯，我哋連皮食，番薯軟綿粉甜，幾好味。
燒牛油粟米 $20 / 3條燒蔬菜類中，除燒日本有機甜番薯喺廚師推介外，估唔到個燒牛油粟米亦喺另一廚師推介嚟，粟米清甜富粟米香，不妨再多啲牛油就仲好。
和風冷烏冬 $22 食完個辣酒花螺仔淨番好多汁，點個冷烏冬再撈埋啲辣酒汁就一流，好唔好味？唔使多講啦，況且，啲烏冬煮得有咬口，質感滑溜。
店內特設精緻小巧嘅座枱炭爐，可有助保溫，因為上菜唔算耐，我咃又想慢慢食慢慢嘆，所以，有啲較多油、較多肉汁，又唔易乾水嘅串燒，就放晌炭爐回熱，令串燒有個最佳狀態時先入口，依份細心嘅安排實在窩心。
雖然小弟唔喺「天生奔放貧玩」，但就喺「唔恨有獎品只要笑顏」，做人嘅嘢咩都強求只會事事都唔開心，寫食評都喺，志在自娛 ，又跟人分享吓飲飲食食，所以，好鍾意歌詞最後一句：「不須有人讚，只須我仍覺好玩」 。
張貼
