無論係早餐定下午茶，富牛油香、口感酥脆嘅牛角包都係其中一個好選擇！加上近年澳門嘅麵包店越開越多，無論係經典法式月牙形嘅牛角包，定係各款創意口味都各具特色啊。

下午茶限定蝸牛牛角包  Le Pic

圖：餐廳IG

位於葡國領事館對面、定價親民嘅法式小餐館日前推出別緻又好味嘅蝸牛牛角包！餐廳參考咗紐約大熱嘅圓形牛角包，用酥皮卷成圓形蝸牛殼狀，外層酥脆，裡面嘅餡料更有爆漿效果唷。有荔枝紅茶、開心果同咖啡三款口味，每日下午3:00起限量供應，售完即止。
 

打卡大熱奶酪花杯子  Goat Bakers

圖：餐廳IG

培正中學附近嘅呢間麵包店主打牛角包，選用獲得A.O.P產地限定認證嘅法國牛油，同用傳統石臼研磨嘅100%法國小麥麵粉。最多人打卡嘅係奶酪花杯子，即花型模具發酵而成嘅牛角包，包住流心芝士醬同焦糖脆面。另一款彩虹牛角包咬開裡面就有唔同顏色。
 

時令口味小方塊牛角  Neibur Cafe & Bakery

圖：餐廳IG

呢間麵包咖啡店位於筷子基東方海岸，主打嘅牛角包同牛奶吐司都係呈立方體！賣相得意、前者口感亦比一般形狀嘅牛角包更實在。有原味、朱古力、芝士火腿可頌等。更不時推出期間限定，好似去年12月就出過士多啤梨乳酪可頌同栗子蒙布朗可頌。