一年一度嘅優秀開飯熱店大賞，今年以「全城打氣 滋味起飛」為主題，啱啱喺前幾日宣佈咗賽果，名單滿有驚喜，當中大部分嘅餐廳都係第一年獲獎，其中更有13間餐廳同時包攬咗地區組別同菜式組別兩個獎項！
今日再同大家介紹另外5間得獎熱店，由冰室到火鍋店、甜品店等都有，由朝到晚食好西，絕對不是夢呀！
蕃茄師兄（最優秀深水埗開飯熱店） （最優秀開飯港式餐廳）
圖﹕聽呢間餐廳個名，都知道係主打番茄啦！湯底用上新鮮番茄熬煮，冇加味精，真係飲得出番茄嘅甜味！要介紹佢哋嘅招牌菜「犇犇有禮」，用上牛面頰，牛坑腩，崩沙腩，3個部位都一樣咁軟腍，而且牛味十足，配埋個番茄湯底，夠晒過癮啦！
Top Blade Steak Lab （最優秀灣仔/銅鑼灣開飯熱店） （最優秀開飯西式餐廳）
圖﹕ 呢間位於銅鑼灣嘅扒房，門面裝修相當樸素，真係唔留心啲都會睇漏眼呀～門面雖然簡單，但牛扒就相當講究啦，主打「平鐵牛扒」（Flat Iron Steak），經過21日濕式熟成處理，肉質特別柔嫩，再用海鹽、香草等簡單調味，唔怕蓋過天然嘅牛味！重點係，薯條任食呀！
龍門冰室 （最優秀灣仔/銅鑼灣開飯熱店） （最優秀開飯港式餐廳）（最優秀開飯新餐廳）
圖﹕呢間冰室同一般茶記唔同，選擇多元化，除咗有碟頭飯之外，亦有而家買少見少嘅美式鐵板餐、傳統英式早餐等。鍾意鋸扒嘅可以試下「紐西蘭羊架拼香草腸」，香草腸有成塊鐵板咁長，再加埋兩大件羊架，認真有份量呀！配埋意粉，或者飯，唔大食啲都食唔晒呀！
HeSheEat （最優秀旺角開飯熱店） （最優秀開飯甜品店）
圖﹕phonebus
開店以來多次擠身好評餐廳十強，亦連續多年成為最優秀旺角開飯熱店，甜品控冇可能唔識呢間甜品店啦！提供唔同種類嘅甜品，包括日本牛乳刨冰、焗鬆餅、窩夫等，而且口味層出不窮添！雖然市面上愈嚟愈多鬆餅過江龍店，但佢哋嘅焗鬆餅一啲都唔遜色，口感鬆軟，夠晒厚身，最緊要係價錢合理嘛！
呦呦鹿鳴布丁燒（最優秀荃灣/葵青開飯熱店） （最優秀開飯小食店）
圖﹕專賣布丁燒嘅小食店，喺葵廣芸芸小食中只此一間呀！由一對小情侶開設嘅小店，佢哋仲專誠去台灣學藝。布丁燒嘅工序、時間係普通布丁嘅3倍，入面嘅焦糖、布丁同蛋糕都係分開做，所以特別考功夫。做法已經夠複雜，但呢對小情侶仲研發咗唔同嘅創新口味，好似椰子味、豆腐味、焙茶味等，睇得出佢哋真係相當有heart呀！
文﹕Kiko
編：Kar