美食雖好，加埋靚景更正！想搵間有海景嘅餐廳打卡或者拍拖，甚至坐擁海景慶祝紀念日，唔一定等於貴嘅。今次開飯仔幫大家精選銅鑼灣、尖沙咀、將軍澳、荃灣等地嘅海景餐廳，人均消費 $200 或以下，由精品咖啡食到韓國、泰國或者墨西哥菜，有心水餐廳可以利用收藏功能 Bookmark，或者用 OpenRice 搜尋當中嘅「海景景觀」條件，搵更多海景餐廳！
目錄
港島
海景餐廳推介 1：灣仔｜Harbour Fun Restaurant and Bar 
呢間海濱餐廳位於灣仔同銅鑼灣中間，白、藍色貨櫃屋本身已經好搶眼，天台更可以飽覽無遮擋嘅維港海景！餐廳供應多國菜，4道菜 Lunch Set 都係 $88 起。溫馨提示係如果想坐室外或者天台，建議先訂座留位，同埋噴定蚊怕水啊。
圖: 海景餐廳推介 2：銅鑼灣｜阿閒泰 
餐廳主打傳統泰菜及摩登泰西 Fusion 菜，從泰國空運直送多款風味地道嘅私房秘製醬汁同食材，糅合西式料理元素。好似泰式醉貓炒泰國新鮮直送手造卷粉、冬陰功虎蝦意大利麵等。可以試埋自家製氮氣冷泡檸檬茶，茶香醇郁又夠透心涼。
圖: 海景餐廳推介 3：銅鑼灣｜Umi
銅鑼灣呢間今年 6 月新開嘅 Cafe 位於13樓，一排大玻璃窗可以畀大家飽覽無敵維港海景，難怪有食評形容為超廣角海景 Cafe！食物夠大份得嚟又有水準，火炙北海道帶子明太子意粉有一串三件嘅鮮甜帶子。小食、甜品等選擇亦一應俱全。
圖: 海景餐廳推介 4：北角｜濟州燒肉食堂
呢間韓式燒肉店對住北角渡輪碼頭，無論室內定室外都有海景睇。前菜四小碟、爐邊蛋同芝士粟米可以免費 Refill 都係加分點。不過最廣受好評嘅都係佢哋嘅燒肉，牛小排、五花肉、蘋果梨汁雞肉各有特色，最多人推介要試嘅係韓國鰻魚，非常新鮮、肉質細緻。
圖: 馋嘴，foodandrabbit
海景餐廳推介 5：赤柱｜Cali-Mex Bar & Grill
老實講，呢間美式墨西哥菜餐廳同個海係隔咗條大馬路，但赤柱個 Feel 夠 Chill 補返數啦。無論係牛油果沾醬配玉米脆片、地道墨西哥夾餅（Tacos）、小食拼盤等都分量十足。最值得一讃嘅係有素食之選、增肌高蛋白餐、甚至係低碳水生酮餐，照顧唔同飲食需要。
圖: 海景餐廳推介 6：淺水灣｜The Coffee Academics
呢個本地精品咖啡品牌喺各區都有分店，要講靚 View 就要提到淺水灣分店，外面就係淺水灣泳灘。菜式方面以早午餐為主，有多款全日早餐、沙律、意粉、薄餅、甜品選擇。飲品當然首推咖啡，House Blend 咖啡被世界權威咖啡網站 Coffee Review 評為 90 分。
圖: 九龍
海景餐廳推介 7：尖沙咀｜Cupping Room Coffee Roasters 
呢個香港精品咖啡店同樣有唔少分店，但講到最「打卡 able」就係位於尖沙咀嘅首間九龍區分店！落地大玻璃窗可以飽覽維港海濱美景，旁邊兩層座位嘅構思靈感就係嚟自遊輪甲板。餐廳除咗自家烘焙咖啡豆製作嘅飲品之外，亦有多款即叫即烘製嘅麵包鹹點。
圖: stephyss
海景餐廳推介 8：尖沙咀｜Pizza Maru
呢間連鎖薄餅店嚟自韓國，喺當地有超過 600 間分店！特色係麵團用咗黑麥、小米、小麥等 12 種天然穀物低溫發酵至少 24 小時，好味得嚟亦兼顧健康。鍾意香口嘅朋友可以試曲奇批邊，愛芝士嘅話就必試芝加哥系列。Pizza 之外亦有韓式炸雞、意粉等選擇。
海景餐廳推介 9：西九｜Crepes & Bakes
餐廳位於西九龍香港故宮博物院 LG 層，室外座位可以吹住海風飽覽維港海景，更係親子同寵物友善！餐廳主打法式鹹甜薄餅及新鮮烘焙食品，包括各款麵包、開放式三文治、蝴蝶酥、曲奇、撻等。蕎麥薄餅及甜味薄餅亦有齊傳統同創意口味選擇。
海景餐廳推介 10：黃埔｜NOC Coffee Co.
呢間極簡美學嘅純白咖啡店本身已經好啱打卡，黃埔分店更有高樓底同落地大玻璃，而且對住黄埔海濱長廊，喺門口或者坐窗口位就可以對住海景嘆咖啡啦。佢哋提供咖啡、輕食及烘焙食品，最出名嘅係焦糖蛋撻，酥皮香脆、燉蛋嫩滑。
圖: 新界 & 離島
海景餐廳推介 11：荃灣｜Peko Peko Eatery
餐廳主打健康主題嘅多國菜，最加分係餐廳有一邊全部都係落地大玻璃窗，室內窗邊位置同室外都可以觀賞到荃灣西海濱長廊嘅海景！Lunch Time 必試自選午市定食，夜晚就可以試試蟹肉牛油果船、海膽三文魚子竹炭烏冬同釀海鮮南瓜批。
圖: 海景餐廳推介 12：大尾篤｜Relax B&M
大尾篤呢間年初開業嘅 Cafe 佔據三層加天台：地下係Cafe、一樓係貓貓主題區、二樓係泰式按摩，天台就係打卡專區，好天可以望到吐露港日落靚景！食物同飲品水準都唔錯，有沙律、意粉、全日早餐，甚至係肉扒選擇，相當多元化。
圖: 海景餐廳推介 13：將軍澳｜JOMO Kitchen & Health Hub
呢間 Cafe 對住將軍澳海濱長廊，假日會有唔少人嚟踩單車同帶狗狗去附近嘅寵物公園，感覺真係好 Chill。Cafe 最出名嘅係戚風蛋糕，口感輕盈濕潤，無論係伯爵茶、黑芝麻定其他口味亦唔會太甜。全日早餐同手工意粉都有水準，值得一試。
圖: 海景餐廳推介 14：馬灣｜太陽系委員會
睇個名唔知賣啲咩？其實係一間位於臨海廣場、寵物友善嘅 Cafe！面臨馬灣東灣泳灘同青馬大橋，係嚟馬灣一日遊唔可以錯過嘅景點。簡單飲杯 Banana Latte 配薑汁豆腐花蛋糕得，嚟食花雕蟹意粉或者煙燻蕃茄忌廉蟹餅長通粉加馬灣可樂當 Lunch 亦得，得咗。
圖: 海景餐廳推介 15：東涌｜La Vista
東涌其實都有唔少可以睇到飛機升降、又高 CP 值嘅海景餐廳。好似呢間就主打正宗墨西哥菜，有一系列前菜、串燒、沙律選擇，必食嘅係墨西哥玉米餅（Taco）同卷餅（Burrito），自選餡料配仙人掌、鮮茄莎莎醬等，味道同口感層次都好豐富。
圖: 海景餐廳推介 16：大澳｜Tai O Lookout
位於由百年古跡改建而成嘅酒店一樓，前身係天台看守塔，而家就係一間好啱打卡嘅玻璃屋頂餐廳！餐點以融入大澳特色，以蝦醬、䶢魚、紫貝天葵等食材入饌，好似大澳蝦醬豬扒包配薯條、大澳花膠螺頭燉豬腱湯、紫貝天葵芝士餅等。
圖:
文：Cathy.H
